སྔོན་རབས་དང་པོ། 13 - Tibetan Old Testament 2011

དམ་བཅའི་སྒྲོམ་དེ་ཀིར་ཡད་ཡ་རིམ་ནས་སྤོས་པ།

¹ རྒྱལ་པོ་དཱ་བིད་ཀྱིས་མི་སྟོང་ཚོ་དང་མི་བརྒྱ་ཚོའི་འགོ་འཛིན་རྣམས་དང་གྲོས་བསྡུར་གནང་ངོ་།

² དེ་ནས་ཁོང་གིས་ཨིསི་རཱཨེལ་གྱི་མི་མང་རྣམས་ལ་གསལ་བསྒྲགས་གནང་བ་ནི་ཁྱོད་ཚོས་མོས་མཐུན་བྱས་པ་དང་གཙོ་བོ་དཀོན་མཆོག་ང་ཚོའི་དཀོན་མཆོག་གི་ཐུགས་འདོད་ཡོད་པ་ཡིན་ན། ང་ཚོའི་ཡུལ་མི་ལྷག་འཕྲོས་རྣམས་དང་བླ་མ་ཚོ་དང་ལེ་ཝི་པ་ཚོ་ཡོད་པའི་གྲོང་ཁྱེར་རྣམས་ལ་ཁོ་ཚོ་འདིར་ང་ཚོ་དང་མཉམ་དུ་འཛོམས་དགོས་རྒྱུར་བང་ཆེན་རྣམས་གཏོང་རྒྱུ་ཡིན་ནོ།

³ དེ་ནས་རྒྱལ་པོ་ས་ཨུལ་རྒྱལ་པོ་ཡིན་སྐབས་དོ་སྣང་མེད་པར་བཞག་པའི་དཀོན་མཆོག་གི་དམ་བཅའི་སྒྲོམ་དེ་ང་ཚོ་ཕྱིན་ནས་བླངས་རྒྱུ་ཡིན་ཞེས་སོ།

⁴ མི་མང་རྣམས་གྲོས་མོལ་དེ་ལ་ཧ་ཅང་དགའ་ནས་དེ་ལ་མོས་མཐུན་བྱས་སོ།

⁵ དེ་འདྲ་སོང་ཙང་དམ་བཅའི་སྒྲོམ་དེ་ཀིར་ཡད་ཡ་རིམ་ནས་ཡེ་རུ་ཤ་ལེམ་དུ་གདན་འདྲེན་ཞུ་བའི་ཆེད་དུ། དཱ་བིད་ཀྱིས་ཨིསི་རཱཨེལ་གྱི་མི་མང་རྣམས་ཡུལ་ཡོངས་ནས་ཨི་ཇིབ་ཀྱི་ས་མཚམས་བྱང་དུ་ཧ་མད་ལའི་ལྷོ་ཕྱོགས་བར་ཚང་མར་འཛོམས་བཅུག་གོ

⁶ དཱ་བིད་དང་མི་མང་རྣམས་གྲོང་ཁྱེར་བྷ་ལཱར་དེ་ནི་ཡ་ཧུ་དཱའི་ས་མཚམས་ཀྱི་ཀིར་ཡད་ཡ་རིམ་དུ་གཙོ་བོ་དཀོན་མཆོག་གི་དམ་བཅའི་སྒྲོམ་དེར་ཀེ་རུབ་ཡོད་པའི་ཞུགས་ཁྲིའི་སྟེང་དུ་འཁོད་ཡོད་པ་དང་། གཙོ་བོ་དཀོན་མཆོག་གི་མཚན་ཡོད་པ་དེ་ལེན་པར་ཕེབས་སོ།

⁷ དེ་ཚོས་ཨ་བྷི་ན་དྷབ་ཀྱི་ཁྱིམ་ནས་དམ་བཅའི་སྒྲོམ་དེ་འཁྱེར་ཡོང་ནས་ཤིང་རྟ་འཁོར་ལོ་གསར་པ་ཞིག་གི་སྟེང་དུ་བཞག་གོ ཨུཛ་ཛཱ་དང་ཨ་ཧི་ཡོས་སྣེ་འཁྲིད་བྱས་སོ།

⁸ དཱ་བིད་དང་མི་མང་རྣམས་ཀྱིས་དཀོན་མཆོག་ལ་གུས་ཞབས་ཞུ་ཕྱིར་ནུས་ཤུགས་ཡོངས་ནས་ཞབས་བྲོ་ཁྲབ་པ་དང་། དེ་ཚོས་གཞས་གཏོང་བ་དང་། རོལ་དབྱངས་ཁག་པི་ཝང་དང་རྔ་དང་སྦུག་དང་དུང་སོགས་བཏང་ངོ་།

⁹ དེ་ཚོ་ཀི་དོན་གྱི་གཡུལ་འཐག་སར་སླེབས་པ་དང་། གླང་རྣམས་རྐང་པ་འཁྱོར་བས་ཨུཛ་ཛཱས་རང་གི་ལག་པ་བརྐྱངས་ནས་དམ་བཅའི་སྒྲོམ་ཟིན་པ་དང་།

¹⁰ དེ་མ་ཐག་ཏུ་གཙོ་བོ་དཀོན་མཆོག་ཨུཛ་ཛཱ་ལ་ཐུགས་ཧ་ཅང་ཁྲོས་པ་དང་སྒྲོམ་ལ་རེག་པའི་རྐྱེན་གྱིས་ཁོ་ལ་བསད་གནང་ངོ་། ཁོ་ནི་གཙོ་བོ་དཀོན་མཆོག་གི་ཞལ་ངོར་ཤིའོ།

¹¹ དེ་ནས་བཟུང་ས་ཆ་དེ་ལ་པེ་རེཛ་ཨུཛ་ཛཱ་ཞེས་གྲགས་སོ། དཱ་བིད་ཧ་ཅང་ཁྲོས་སོ། གང་ལ་ཟེར་ན། གཙོ་བོ་དཀོན་མཆོག་ཐུགས་ཁྲོས་ནས་ཨུཛ་ཛཱ་ལ་ཆད་པ་བཏང་གནང་བ་ཡིན་ནོ།

¹² དེ་ནས་དཱ་བིད་དཀོན་མཆོག་ལ་འཇིགས་ནས། ད་ངས་ཇི་ལྟར་ང་མཉམ་དུ་དམ་བཅའི་སྒྲོམ་དེ་འཁྱེར་ཐུབ་ཀྱི་རེད་དམ་སྨྲས་སོ།

¹³ དེ་འདྲ་སོང་ཙང་དཱ་བིད་ཀྱིས་དམ་བཅའི་སྒྲོམ་དེ་ཡེ་རུ་ཤ་ལེམ་དུ་ཁོ་རང་མཉམ་དུ་མ་འཁྱེར་རོ། ཁོས་སྒྲོམ་དེ་གྷད་གྲོང་ཁྱེར་གྱི་ཡུལ་མི་ཨོ་བེད་ཨེ་དྷོམ་ཟེར་བ་དེའི་ཁྱིམ་དུ་བཞག་གོ

¹⁴ དེར་སྒྲོམ་དེ་ཟླ་བ་གསུམ་རིང་གནས་པ་དང་གཙོ་བོ་དཀོན་མཆོག་གིས་ཨོ་བེད་ཨེ་དྷོམ་གྱི་ཁྱིམ་ཚང་དང་ཁོ་ལ་བདག་པ་ཚང་མར་བྱིན་རླབས་གནང་ངོ་༎