སྔོན་རབས་དང་པོ། 10 - Tibetan Old Testament 2011

རྒྱལ་པོ་ས་ཨུལ་གྲོངས་པ།

¹ ཕེ་ལེ་ཤེད་པ་ཚོས་རི་བོ་གྷིལ་བོ་རུ་ཨིསི་རཱཨེལ་པ་ཚོ་མཉམ་དུ་དམག་འཐབ་བྱས་ནས། དེར་ཨིསི་རཱཨེལ་པ་མང་པོ་བསད་པ་དང་། དེ་འཕྲོས་རྒྱལ་པོ་ས་ཨུལ་དང་ཁོང་གི་སྲས་ཚོ་དང་བཅས་བྲོས་སོ།

² འོན་ཀྱང་ཕེ་ལེ་ཤེད་པ་ཚོས་དེ་ཚོ་བཟུང་ནས། རྒྱལ་པོའི་སྲས་ཡོ་ན་ཐན་དང་ཨ་བྷི་ན་དྷབ་དང་མལ་ཀི་ཤུ་ཨ་བཅས་སྲས་གསུམ་བསད་དོ།

³ ས་ཨུལ་གྱི་མཐའ་འཁོར་དུ་དམག་འཐབ་ཤུགས་ཆེ་ཐུག་པ་དང་ཁོང་ལ་དགྲ་བོའི་མདའ་ཕོག་སྟེ་ཚབ་ཆེ་རྨས་སོ།

⁴ ཁོང་གི་རང་གི་མཚོན་ཆ་འཁུར་མཁན་མི་ན་གཞོན་དེ་ལ་དཀོན་མཆོག་མེད་པའི་ཕེ་ལེ་ཤེད་པ་འདི་ཚོས་ང་ལ་འཕྱ་བའི་སྔོན་དུ་ཁྱོད་ཀྱིས་རལ་གྲི་བཏོན་ནས་ང་ལ་གསོད་ཅིག་ཅེས་སྨྲས་སོ། འོན་ཀྱང་མི་ན་གཞོན་དེས་དེ་ལྟར་བྱེད་རྒྱུར་ཧ་ཅང་འཇིགས་སོ། དེ་འདྲ་སོང་ཙང་ས་ཨུལ་གྱིས་རང་གི་རལ་གྲི་བཏོན་ནས་དེའི་སྟེང་དུ་རིལ་བ་དང་།

⁵ མི་ན་གཞོན་དེས་ས་ཨུལ་གྲོངས་པ་མཐོང་པ་དང་། ཁོ་རང་ཡང་རལ་གྲིའི་སྟེང་དུ་རིལ་ནས་ཤིའོ།

⁶ དེ་ལྟར་རྒྱལ་པོ་ས་ཨུལ་དང་ཁོང་གི་སྲས་གསུམ་པོ་མཉམ་དུ་གྲོངས་པ་དང་ཁོང་གི་རྒྱལ་སྲིད་སྟོངས་སོ།

⁷ ཡེཛ་རིལ་གྱི་ལུང་གཤོང་དུ་སྡོད་པའི་ཨིསི་རཱཨེལ་པ་ཚོའི་དམག་མི་རྣམས་བྲོས་པ་དང་། ས་ཨུལ་དང་ཁོང་གི་སྲས་གསུམ་པོ་གྲོངས་པའི་སྐོར་ཐོས་ནས། དེ་ཚོས་ཡུལ་དེ་སྤངས་ནས་བྲོས་སོ། དེ་ནས་ཕེ་ལེ་ཤེད་པ་ཚོ་ཡོང་ནས་ས་གནས་དེ་དབང་བ་ཡིན་ནོ།

⁸ དམག་འཐབ་དེའི་ཉིན་རྗེས་མར་ཕེ་ལེ་ཤེད་པ་ཚོས་རོ་བཅོམ་པར་སོང་བ་དང་། དེ་ཚོས་རི་བོ་གྷིལ་བོའི་སྟེང་ས་ཨུལ་དང་ཁོང་གི་སྲས་གསུམ་པོའི་སྐུ་ལུས་རྙེད་དོ།

⁹ དེ་ཚོས་ས་ཨུལ་གྱི་མགོ་བཅད་པ་དང་ཁྲབ་དེ་བཤུས་ནས་དེ་ཚོའི་ལྷ་སྐུ་དང་མི་མང་ལ་གཏམ་བཟང་ཤོད་དུ་ཕེ་ལེ་ཤེད་ཀྱི་ཡུལ་ཡོངས་སུ་བང་ཆེན་རྣམས་བཏང་ངོ་།

¹⁰ དེ་ཚོས་ཁོང་གི་མཚོན་ཆ་རྣམས་དེ་ཚོའི་ལྷ་ཁང་ཞིག་ཏུ་བཞག་པ་དང་། ཁོང་གི་མགོ་དེ་དེ་ཚོའི་ལྷ་དྷ་གོན་གྱི་ལྷ་ཁང་དུ་བཀལ་ལོ།

¹¹ ཕེ་ལེ་ཤེད་པ་ཚོས་ས་ཨུལ་ལ་ཇི་ལྟར་བྱས་པའི་སྐོར་གྷིལ་ཨད་ནང་གི་ཡ་བྷེཤའི་མི་མང་ཚོས་ཐོས་པ་དང་།

¹² མི་བློ་སྟོབས་ཆེ་ཤོས་ཚོ་སོང་ནས་ས་ཨུལ་དང་ཁོང་གི་སྲས་ཚོའི་སྐུ་ལུས་བླངས་ནས་ཡ་བྷེཤ་རུ་འཁྱེར་ནས། དེ་ཚོས་དེ་རྣམས་བེ་ཤིང་གི་འོག་ཏུ་སྦས་ནས་ཉིན་བདུན་རིང་སྨྱུང་གནས་སྲུང་ངོ་།

¹³ ས་ཨུལ་གྲོངས་སོ། གང་ལ་ཟེར་ན། ཁོང་ནི་གཙོ་བོ་དཀོན་མཆོག་ལ་དམ་ཚིག་གཙང་མ་མེད་པ་དང་། ཁོང་གིས་གཙོ་བོ་དཀོན་མཆོག་གི་བཀའ་ལ་མི་ཉན་པར། ཁོས་མི་ཤི་བའི་རྣམ་ཤེས་ནས་ལམ་སྟོན་ཞུ་ཐབས་བྱས་སོ།

¹⁴ གཙོ་བོ་དཀོན་མཆོག་ནས་བཀའ་བསྡུར་ཞུ་གི་མེད་དོ། དེ་འདྲ་སོང་ཙང་གཙོ་བོ་དཀོན་མཆོག་གིས་ཁོང་བསད་གནང་ནས་རྒྱལ་སྲིད་ཀྱི་དབང་ཆ་ཡི་ཤེའི་སྲས་དཱ་བིད་ལ་གནང་ངོ་༎