ཏི་ཏཱས། 3 - Tshangla New Testament (BSI)

ལའི་ལེག་པུ་ཨའི།

¹ ན་ཧ་སོ་ངོ་བ་ཀ་ རོག་ཏེ་བ་ཀ་ གཞུང་དང་ དབང་ཚད་ཙུང་ཁཱན་ག་ ཕརའ་ཁེ་ཆོའི་ཨ་ཉི་ ཡེག༌ཅོ། རོག་ཏེ་བ་ཀི་ ཧང་རང་གི་ནེ་བུ་ ལའི་ལེག་པུ་ཨ་ལེ་ག་དེན་གེ་ ཅབ་ཉི་ཆོ་ལེ་ཁེ༌ལེ།

² རོག་ཏེ་བ་ཀི་ བཱརའ་ག་ཀོར་གེ་ ཆཱས་ངན་པ་ཨ་ཉི་ ཁོ་ལོང་ཨ་ལེ་མང་ཕ། ལག་ཏང་ སོ་ངོ་ཐམས་ཅན་ཀབ་ཉི་ ཇམ་པུ་དང་ ཉམ་ཆུང་ཨ་ཉི་ ཆོ་ལེ་ཁེ༌ལེ།

³ གོ་མ་ ཨའི་བུ་ ཡོང་བ་དང་ ཆ་གནས་མ་ཐ་ཁཱན་ སོ་ངོ་གི་ཝ་ཆོ༌ཝ། ཨ་ཧ་བ་ བཱརའ་གི་ ལམ་མང་གི་ཝ་གེ་ རིག་ཉི་ སེམས་ངན་པ་དང་ བག་ཆགས་ག་ ཟ་པ་རི་ཝ་ཆོ༌ཝ། ཨ་ཤི་ བཱརའ་ག་ངན་པ་ཨ་ཉི་ སེར་སྣ་ཨན་ཆོ༌ཝ། ཉི་ཨ་ཤི་ བཱརའ་སོ་ངོ་བ་ ཟེས་པུ་མཱན་ཆི། ཉི་བཱརའ་གི་བུ་ ཨའི་ཟེས་པུ་མཱན་ཆི།

⁴ དག་པ་ཀབ་ཉི་ ཨ་ཧ་སྐྱབས་མགོན་ དཀོན་མཆོག་གི་ ཨ་ཧ་ཏཱན་ རོ་ཀ་བྱམས་པར་དང་ སྙིང་རྗེ་ གེན་གནང༌མ།

⁵ ཨ་ཤི་ ལའི་ལེག་པུ་ ཨ་ཝ་ཨ་དེན་གེ་མང་གི་ཝ་ རོ་ཀ་ཐུགས་རྗེ་ག་ཡོར་ཀེ་ དཀོན་མཆོག་གི་ ཨ་ཧ་ཐར་པ་གནང་མ་གི༌ལ། རོ་ཀི་ ཨ་ཧ་སྡིག་པ་དག་ཉི་གནང༌མ། ཉི་དམ་པའི་ཐུགས་ཉིད་ག་ཐུང་ཀེ་ཨ་ཉི་ རོ་ཀི་ ཨ་ཧ་ཚེ་སིང་མ་གནང༌མ།

⁶ ཨ་ཧ་སྐྱབས་མགོན་ ཡི་ཤུ་ཁིརིས་ག་ཐུང་ཀེ་ཨ་ཉི་ དཀོན་མཆོག་གི་ ཨ་ཧ་ རོ་ཀ་དམ་པའི་ཐུགས་ཉིད་ མང་པུ་ཨ་ཉི་གནང༌མ།

⁷ ཧང་ཡ་དག་ནེ་ལ་ རོ་ཀ་ཐུགས་རྗེ་ག་ཐུང་ཀེ་ཨ་ཉི་ ཨའི་དྲང་པུ་རི་ཉི་ ཨ་ཤི་རེ་ཆ་ཨ་ཁཱན་ ཚེ་མ་འགྱུར་བརྟན་པ་ ཉོང་ཅེན་དག་པ་གི་གི༌ལ།

⁸ ཨོ་ཐ་བསླབ་བྱ་ཤོ་ དེན་པ་གི༌ལ། ཉི་དཀོན་མཆོག་ག་ དད་པ་ཨ་ཁཱན་ ཐམས་ཅན་གི་ ཧ་ལ་ཨ་ནེ་བུ་ ལའི་ལེག་པུ་ ཨ་ལེ་རེ་བེ་དེན་གེ་ ཇི་གི་ན་ག་ ཨོ་ཐ་བ་ཀ་ཀོར་གེ་ ལེག་པུ་ཨ་ཉི་ཡེག༌པེ། ཉི་ཨོ་ཐ་བ་ཤོ་ གནམ་མེད་ས་མེད་ ལེག་པུ་ཐུར་ཤ་མང་གི་ཝ་ སོ་ངོ་མང་པུ་ཐུར་ག་ ཕཱན་ཏོག་ཁཱན་ཆཱས་གི༌ལ།

⁹ དག་པ་ཀབ་ཉི་ དེན་ཐ་མ་ཁཱན་གཏམ་བ་དང་ ཧ་ལ་རང་མ་ཆུམ་ཁཱན་ མི་རྒྱུད་བ་ཀ་གཏམ་ ཉི་མོ་ས་ག་ བཀའ་ཁྲིམས་ག་ཡོར་ཀེ་ ན་ཧ་བ་ མ་ཆ་མཱན་ ཁོ་ལོང་མ་ཕི། ཧང་ཡ་དག་ནེ་ལ་ ཨོ་ཐ་བ་ཀི་ ལའི་ན་ལུ་མཱན༌ཅ། ཉི་ཧང་རང་ ཕཱན་ཏོག་པུ་མཱན༌ཅ།

¹⁰ མ་ཆ་མཱན་ བོང་མེ་རིག་ཁཱན་ སོ་ངོ་བ་ཀ་ ཤེབ་ཐུར་ཉིག་ཙིང་ ལེག་པུ་ཨན་ ཡེག་ཉི་གོད༌ཅོ། མ་ན་ནེ་ལ་ ཨོ་ཉ་སོ་ངོ་གེ་ ཇང་ཀིན་ཨ་ཉི་ཆོའི།

¹¹ ཧང་ཡ་དག་ནེ་ལ་ ཨུ་ཉུ་ད་བུ་ སོ་ངོ་ཤོ་ དེན་པ་གེ་ ལམ་རིང་མུ་རི་ཝ་ཨ་དེན་གེ་ སྡིག་པ་ཨན༌ཅ། ཉི་རང་ཏེན་གི་ རང་ཏེན་ག་ ཅོན་ཏག༌ཅ༎

ཆཱས་མཇུག་དུས།

¹² ཇི་གི་ ཨར་ཏེ་མཱས་གི་ནེ་བུ་ ཏུ་ཁི་ཀཱས་གི་ནེ་བུ་ ན་ག་ཚབ་ཨ་ལེ་དེན་གེ་ ན་ག་བཱརང་ཀ་ ཀུན་ཏི་ལེ་ག་ འཆར་གཞི་ཙ་མ༌ཅ། རོག་ཉིག་ཙིང་གེ་ ཨི་བི་ཤེག་པ་ཐུར་ ནཱན་དོ་ཟོ་ཨ་ཉི་ ཇང་རུ་མེ་ག་ ནི་ཀོ་པོ་ལིས་ག་ཏཱན་ཨོ་དོ། ཧང་ཡ་དག་ནེ་ལ་ ཏོན་ག་ ཇང་ནི་ཀོ་པོ་ལིས་ག་ཆོ་ལེ་ཨ་ཉི་ གྲོས་ཐག་ཆོད་པ༌ཅ།

¹³ ཨ་པོལ་ལོས་དང་ དྲང་དཔོན་ཇེ་ནཱས་ དི་ལེ་ག་ཅམ་ཅ་ཨ་ཉི་ རོག་ཉིག་ཙིང་ ཧང་གེ་རང་ མ་ཀོན་མེ་དེན་གེ་ ཧབ་ཏུར་རེ་བ་ཐུར་ ནཱན་གི་ རོག་ཉིག་ཙིང་ག་རུམ༌ཅོ།

¹⁴ ཨ་ཧ་སོ་ངོ་བ་ཀི་ ལའི་ལེག་པུ་ཨ་ལེ་ག་ ལམ་པེ་ཁེ༌ལེ། ཉི་ཤ་ རོག་ཏེ་བ་བུ་ ཚེ་ག་ལའི་ག་ མ་ན་ཝ་མ་རི༌ལ། ཉི་བཱརའ་སོ་ངོ་བ་ཀ་ རུམ་པེ་རེ༌བེ།

¹⁵ ཐ་ག་ ཇང་ཀབ་ཉི་ཆོ་ཁཱན་ སོ་ངོ་ཐམས་ཅན་གི་ ན་ག་ སྐུ་གཟུགས་བཟང་པོ་ཨ་ཉི་ཡེག༌ལ། ཨའི་ཕང་ཁཱན་ དད་པ་ཨ་ཁཱན་ ཐམས་ཅན་ག་ སྐུ་གཟུགས་བཟང་པོ་ཨ་ཉི་ཡེག༌ཅོ། ཉི་ནའི་ ཐམས་ཅན་ཀབ་ཉི་ དཀོན་མཆོག་ག་ཐུགས་རྗེ་ བཞུགས་གནང་ཆེན༎