རོ་མི། 9 - Tshangla New Testament (BSI)དཀོན་མཆོག་དང་ རོ་ཀ་སོ་ངོ་ཨིས་རེལ༌བ། 1 ཁིརིས་ག་སྐུན་མདུན་ག་ ཇི་གི་ན་ཧ་ སོ་ད་མ་ཕི་ལཱན་ དེན་པ་ཡེག༌ཅ། ཉི་ཇ་ག་སེམས་དང་ དམ་པའི་ཐུགས་ཉིད་གི་བུ་ ཇི་གི་ཡེག་ཁཱན་ཁེ་པ་ དེན་པ་གི་ལ་དག་ཉི་ འཛོམས་དཔང་དཔང་བཞག་ཨན༌ཅ། 2-3 ཇ་ག་སོ་ངོ་ཡ་ཧུ་དི་པ་ ཡུང་ཟི་བ་ཀ་དེན་གེ་ ཇང་གནམ་མེད་ས་མེད་ ཁོ་དང་ཆཱད་པ༌ཅ། ཉི་ཤུག་ཐེ་བ་ཨ་ཉི་རང་ སེམས་ཤི་ཝ༌ཅ། རོག་ཏེ་བ་རང་ ཐར་པ་ཉོང་པེ་ཆོ་ནེ་ཏ་ ཇང་དུས་ཏ་བུ་ག་དེན་གེ་ སྨོན་ལམ་ཕོག་ཉི་ ཁིརིས་གེ་ མ་ཝ་རི་ནེ་བུ་ རི་ཆོག་ཆོག༌ཅ། 4 རོག་ཏེ་བ་ཤོ་ ཨིས་རེལ་ག་ སོ་ངོ་གི་ཝ་ཨ་དེན་གེ་ དཀོན་མཆོག་ག་ སྲས་སྲས་མོ་བ་ཨ་ཉི་ སི་ཝ་ཆོ༌ཝ། དཀོན་མཆོག་གི་ རོག་ཏེ་བ་ཀ་ གཟི་བརྗིད་གེན་གནང༌མ། ཉི་འགན་རྒྱ་དང་བཀའ་ཁྲིམས་བུ་ རོག་ཏེ་བ་ཀ་གནང༌མ། དཀོན་མཆོག་ག་ གསོལ་ཝ་ཏ་པེ་ག་དང་ རོ་ཀི་དབུ་མནའ་བཞེས་ཁཱན་བ་ ཞུ་ལེ་ག་གོ་སྐབས་ རོག་ཏེ་བ་ཀི་ ཉོང་པ་ཆོ༌ཝ། 5 རོག་ཏེ་བ་ཀ་ཕ་མ་བ་ གནམ་མེད་ས་མེད་ མིང་གཏམ་ཤོ་ཁཱན་གི་ཝ་ཆོ༌ཝ། ཉི་སོ་ངོ་རི་ཉི་ བྱོན་མ་ཀབ་ཉི་ ཁིརིས་ཡ་ཧུ་དི་པ་ཨ་ཉི་ བྱོན་མ་ཆོ༌ཝ། ཉི་རོག་ཤོ་ ཐམས་ཅན་རང་ དབང་ཁཱན་དང་ དུས་ཏ་བུ་རང་ བསྟོད་པ་ཕུལ་བེ་རུང་ཁཱན་ དཀོན་མཆོག་གི༌ལ། ཨ་མེན། 6 དཀོན་མཆོག་གི་ དབུ་མནའ་བཞེས་ཁཱན་ཁེ་པ་ མ་ཇུང་ཤི་དག་ཉི་ ཡེག་ཅ་མང་གི། ཨིས་རེལ་ག་ཕའི་ག་ཀེ་ཁཱན་ ཐམས་ཅན་རང་ ཨིས་རེལ་ངོ་མ་མང་གི། 7 ཨ་བཱརའ་ཧམ་ག་ མི་རྒྱུད་གི་ཝ་ཙམ་གི་ རོག་ཏེ་བ་ ཨ་བཱརའ་ཧམ་ག་ ཝག་ཙ་བ་རིན་ཅ་མང་གི། ཧང་ཡ་དག་ནེ་ལ་ ཨ་བཱརའ་ཧམ་ག་ བཱརའ་ཝག་ཙ་ ཆོན་ཐཱན་རང་གི་ནེ་བུ་ རོ་ཀ་ཟ་ ཨི་སག་གེ་ཨན་ཙག་ཉི་ རོ་ཀ་མི་རྒྱུད་ཆིན་མེ་དག་ཉི་ གསུང་རབ་གེ་ཤོན༌ཅ། 8 ཨོ་ཐ་དེན་ཐ་ཤོ་ ཧང་གི་ལ་ཡ་དག་ནེ་ལ་ ལུས་པུ་ག་ཀེ་ཁཱན་ ཝག་ཙ་བ་ཤོ་ དཀོན་མཆོག་ག་ སྲས་སྲས་མོ་མང་གི། དག་པ་ཀབ་ཉི་ དཀོན་མཆོག་གི་ དབུ་མནའ་བཞེས་ཝ་དང་ཏུ་ཉི་ ཀེ་ཁཱན་ཝག་ཙ་བ་ཤོ་ མི་རྒྱུད་ངོ་མ་གི༌ལ། 9 དཀོན་མཆོག་གི་ དབུ་མནའ་བཞེས་ཉི་ ཨོ་ཐེན་གསུངས་མ་ཆོ་ཝ་ དུས་ཙུན་ཕྲིག་ཀིན་རེན་པ་ཀབ་ཉི་ ཇང་ལོག་ཉི་ལོག༌པེ། ཉི་ས་ར་གི་ ཝག་ཙ་ཟ་ཐུར་སིང་མེ་དག༌ཉི། 10 ཨུ་ཉུ་ཤ་མང་གི་ཝ་ རི་བེ་ཀ་ག་ཟ་ཉིག་ཙིང་ག་བུ་ ཨ་པ་ཐུར་ཤ་ཆོ༌ཝ། རོག་ཉིག་ཙིང་ག་ ཨ་པ་ཤོ་ ཨ་ཧ་ཕ་མ་ ཨི་སག་གི༌ལ། 11-12 རོག་ཉིག་ཙིང་གེ་ ཐུར་སི་ཁཱན་ཁེ་པ་ དཀོན་མཆོག་ག་ འཆར་གཞི་དང་ཏུ་ཉི་ གི་ལ་དག་ཉི་ གེན་མེ་དེན་གེ་ རོག་ཉིག་ཙིང་ མ་ཀེ་ལེ་གོ་མ་ ཉི་རོག་ཉིག་ཙིང་གི་ ལེག་པུ་དང་མ་ལེག་པ་ ཧང་རང་མ་ཨ་ལེ་ གོ་མ་གེ་རང་ དཀོན་མཆོག་གི་ རི་བེ་ཀ་ག་ གསུངས་མ་ཆོ་ཝ་ལ་ ཨ་ཏ་གི་བོ་ཉིང་ག་ ཕྱག་ཞུ་ལེ་དག༌ཉི། དཀོན་མཆོག་གི་ སི་ལ་ཀབ་ཉི་ ལའི་ལེག་པུ་དང་ མ་ལེག་པ་ཨ་ཝ་ག་གོད་ཉི་ སིན་ཅ་མང་གི་ཝ་ རོ་ཀི་ར་ཁཱན་ཁེ་པ་ སིན་གནང་ཅ་གི༌ལ། 13 གསུང་རབ་ནང་ཀེ་ ཨོ་ཐེན་ཤོན་ཅ་ ཡ་ཀུབ་ ཇི་གི་ཕང༌ཅ། དག་པ་ཀབ་ཉི་ ཨེ་སའུ་ཇི་གི་ ཟེས་པུ་མཱན་ཅ་དག༌ཉི། 14 ཨ་ཤི་ཧང་ཡེག་པེ་ཡ། དཀོན་མཆོག་གི་ ཐྲང་ཉི་མ་གནང་མ་སྨོ། ཨུ་ཉུ་ད་བུ་ ཏི་ངེ་རང་མང་གི། 15 ཧང་ཡ་དག་ནེ་ལ་ དཀོན་མཆོག་གི་ མོ་ས་ག་ གསུངས་མ༌ཅ་ ཇི་གི་ཨི་བི་སི་ཝ་ཐུར་ ཨོ་ཉ་སོ་ངོ་ག་ ཇི་གི་སྙིང་རྗེ་ཨ༌ལེ། ཉི་ཇི་གི་ཨི་བི་སི་ཝ་ཐུར་ ཨོ་ཉ་སོ་ངོ་ག་ ཇི་གི་བྱམས་པར་ཀེ་བེ་ དག༌ཉི། 16 ཨོ་ཉི་ཨ་དེན་གེ་ དཀོན་མཆོག་གི་ དབུ་མནའ་བཞེས་ཁཱན་ཁེ་པ་ ཨ་ཧ་ག་དང་ག་མཱན༌ཅ། ཨ་ཤི་སེམས་ཨ་ཉི་ ཉི་ཙ་དྲེག་པ་ཐུར་གི་ མ་དྲིག༌པ། ཨུ་ཉུ་ཤོ་ དཀོན་མཆོག་གི་ སྙིང་རྗེ་ཨ་ཝ་དང་ཏུ་ཉི་གནང༌ཅ། 17 ཧང་ཡ་དག་ནེ་ལ་ ཨི་ཇིབ་ག་དཔོན་ ཕ་རོ་ག་ཀོར་གེ་ གསུང་རབ་གེ་ཤོན་ཅ་ ཇ་ག་སྟོབས་དབང་དང་ མིང་གཏམ་ འཛམ་གླིང་ཐམས་ཅན་རང་ ཆ་པ་ཨ་ཉི་ གེན་མེ་དེན་གེ་ ཇི་གི་ནཱན་ དཔོན་ཨ་ཉི་ ཀེ་བ་གི་ལ་དག༌ཉི། 18 ཨོ་ཐེན་ཨ་ཉི་ དཀོན་མཆོག་གི་ སྙིང་རྗེ་ཨ་ལེ་ག་ སི་ཁཱན་བ་ཀ་ཐུང་ཀ་ སྙིང་རྗེ་ཨན་གནང༌ཅ། ཉི་སེམས་ཀག་ཏར་ཅོད་པེ་ག་ སི་ཁཱན་བ་ཀ་སེམས་ དཀོན་མཆོག་གི་ ཀག་ཏར་ཅོད་ཉི་གནང༌ཅ། 19 ཉི་ལ་ ན་ཤི་ཨོ་ཐེན་ཡེག་ཏུ་ དཀོན་མཆོག་གི་ ཧང་ཨ་ཉི་སོ་ངོ་ག་ ཅོན་ཏག་ཅ་ཡ། རོ་ཀ་ཐུགས་བསམ་ཁེ་པ་ ཨི་བི་གི་ཁག་པེ་རེ་བེ་ཡ་དག༌ཉི། 20 དག་པ་ཀབ་ཉི་ ནའི་སོ་ངོ་བ་ཤོ་ དཀོན་མཆོག་ག་ དྲི་ཝ་ཨ་ཁཱན་ ཨི་བི་གི་ལ་ཡ། བཀོད་ཉི་ཐ་ཁཱན་ཅ་ལ་གི་ བཀོད་ཁཱན་ག་ཏཱན་ ནཱན་གི་ ཇང་ཧང་ཨ་ཉི་ཨོ་ཐེན་ བཀོད་པ་ཡ་དག་ཉི་ ཇི་མེ་རེ་བེ་སྨོ། 21 ཧང་ས་ཁོ་པ་གི་ ས་ག་ཁོ་ཅོད་པ་ཀབ་ཉི་ ཁོ་ཚེ་བང་ ལའི་ཁག་ཆི་ལུ་ག་དེན་གེ་དང་ ཁོ་ཚེ་བང་ ལའི་ཁག་མ་ཆི་ཁཱན་ག་དེན་གེ་ ཅོད་པེ་ག་དབང་ཚད་ རོ་ཀ་མཱན་ཅ་སྨོ། 22 དཀོན་མཆོག་གི་ མཛད་ཁཱན་བུ་ ཨུ་ཉུ་པུརུས་ཀིན་རང་གི༌ལ། རོ་ཀ་སྟོབས་དབང་ གེན་མེ་དེན་གེ་ རོ་ཀི་རོག་ དགོངསམ་ཁྲེལ་པ་ཅ་དག་ཉི་ གེན་མེ་རེ༌བེ། དག་པ་ཀབ་ཉི་ རོག་དགོངསམ་ཁྲེལ་པེ་ བི་ཁཱན་བ་ཀབ་ཉི་ རོག་གནམ་མེད་ས་མེད་ བཟོད་པར་སྒོམ་ཉི་ བཞུགས་པ༌ཅ། རོག་ཏེ་བ་ཤོ་ མེ་པ་དི་ལེ་ག་ཅམ་པ༌ཅ། 23 ཉི་ཇོབ་ཇོབ་ཨ་ཉི་ཆོ་ཁཱན་ རོ་ཀ་གཟི་བརྗིད་ཁེ་པ་ རོ་ཀི་སྙིང་རྗེ་ཨ་ཁཱན་བ་ཀ་ གེན་ཉི་གནང་མེ་ག་ དབང་ཚད་ རོ་ཀ༌ཅ། ཉི་རོག་ཏེ་བ་ཤོ་ རོ་ཀི་གོ་མ་གེ་རང་ གཟི་བརྗིད་ག་དེན་གེ་ ཅམ་ཉི་ཐ་ཁཱན་བ་གི༌ལ། 24 ཨའི་བུ་ རོ་ཀི་ར་ཉི་གནང་ཁཱན་ སོ་ངོ་བ་གི༌ལ། ཡ་ཧུ་དི་པ་ པོང་ཀེ་ཤ་མང་གི་ཝ་ ཡ་ཧུ་དི་པ་ མང་གི་ཁཱན་བ་ཀ་ པོང་ཀེ་བུ་ ར་ཉི་གནང་མ༌ཅ། 25 ལུང་བསྟན་པ་ ཧོ་ཤེ་ག་དཔེ་ཆ་ནང་ཀ་ དཀོན་མཆོག་གི་ གསུངས་མ༌ཅ་ ཇ་ག་སོ་ངོ་མང་གི་ཁཱན་བ་ ཇི་གི་ ཇ་ག་སོ་ངོ་ཨ་ཉི་ར༌ལེ། ཉི་ཇི་གི་གོ་མ་ མ་ཕང་ཁཱན་བ་ ཇི་གི་ཕང༌པེ། 26 ན་ཧ་བ་ཤོ་ ཇ་ག་སོ་ངོ་མང་གི་དག་ཉི་ཡེག་ཁཱན་ ས་ཆ་ཐམས་ཅན་ག་ རོག་ཏེ་བ་ཤོ་ མ་གཤགས་ཁཱན་ དཀོན་མཆོག་ག་ ཝག་ཙ་བ་ཨ་ཉི་ཆིན་མེ་ དག༌ཉི། 27 ཨིས་རེལ་ག་ཀོར་གེ་ ལུང་བསྟན་པ་ ཡ་ཤའི་ཡ་གི་ གསུངས་མ༌ཅ་ ཨིས་རེལ་ག་སོ་ངོ་བ་ རྒྱམ་མཚོ་ནེ་མ་ག་ཆོ་ཁཱན་ བེ་ཙ་གེ་ལག་ཉི་ཆོ་ནེ་བུ་ རོག་ཏེ་བ་ཉུང་པུ་ཐུར་གི་ཤ་ ཐར་པ་ཉོང༌པེ། 28 ཧང་ཡ་དག་ནེ་ལ་ དཀོན་མཆོག་གི་ འཛམ་གླིང་ག་སོ་ངོ་བ་ཀ་ དོ་ཟོ་དོ་ཟོ་ཨ་ཉི་ ཇུག་ཕག་པ་ཨ་ཉི་རང་ ཁྲིམས་ཀེ་ཉི་གནང་མེ་ དག༌ཉི། 29 ཉི་ཡ་ཤའི་ཡ་གི་ ཨོམ་ཆང་རང་ ལུང་བསྟན་མ༌ཅ་ ཤུགས་སྟོབས་ཆི་ལུ་ཆོ་ཁཱན་ གཙོ་བོ་གི་ ཨ་ཧ་རྒྱུད་པ་ཚེ་བང་ག་ སྐྱབས་མ་གཟིགས་པ་གི་ནེ་ཏ་ ཁྲོམ་ས་དོམ་དང་ ག་མོ་ར་ད་བུ་རང་ ཨ་ཧ་བ་ ཇཝ་ཆུ་མ་ཨོ་ཕེ་ དག༌ཉི༎ ཨིས་རེལ་གི་དད་པ་མ་ཨ་ཝ༌ལ། 30 ཉི་ལ་ ཨ་ཤི་ཨོ་ཐ་ཀོར་གེ་ ཧང་ཡེག་པེ་ཡ། ཡ་ཧུ་དི་པ་མང་གི་ཁཱན་བ་ཀི་ དྲང་པུ་རི་ལེ་མ་གོད་ནེ་བུ་ དད་པ་ག་ཐུང་ཀེ་ཨ་ཉི་ རོག་ཏེ་བ་ དྲང་པུ་རི་ཝ༌ལ། 31 དག་པ་ཀབ་ཉི་ ཨིས་རེལ་བ་ཀི་ བཀའ་ཁྲིམས་ག་ཐུང་ཀེ་ཨ་ཉི་ དྲང་པུ་རི་ལེ་དེན་གེ་ གནམ་མེད་ས་མེད་ ཙ་དྲེག༌པ། དག་པ་ཀབ་ཉི་ རོག་ཏེ་བ་ དྲང་པུ་རི་ལེ་མར་ཤི། 32 ཧང་ཨ་ཉི་ཡ། ཧང་ཡ་དག་ནེ་ལ་ རོག་ཏེ་བ་ཀི་ དད་པ་ག་ཐུང་ཀེ་ཨ་ཉི་མང་གི་ཝ་ ལའི་ག་ཏེན་ཉི་ དྲང་པུ་རི་ལེ་ གོད་པ་ཨ་དེན་གེ་གི༌ལ། ཉི་རོག་ཏེ་བ་ ཏོག་ཁཱན་ལུང་གི་ཏོག༌པ། 33 གསུང་རབ་གེ་ ཨོ་ཐ་ཀོར་གེ་ཤོན༌ཅ་ གོད་ཅོ་ སོ་ངོ་ཏོག་ཁཱན་ལུང་ཐུར་ ཇི་གི་སི་ཡོན་ག་ཐཱན༌ཅ། ཉི་རོག་ཏེ་བ་ རོ་ཁེ་དི་ལེ་བི་ཁཱན་ ལུང་ཆི་ལུ་ཐུར་ཐ་ཝ༌ཅ། དག་པ་ཀབ་ཉི་ ཨི་བི་གི་ རོ་ཀ་ཏཱན་ དད་པ་ཨ་ཝ་ཐུར་ ཨོ་ཉ་སོ་ངོ་ཁེ་པ་ ཧ་ལ་རང་ ངི་ནང་ཁུ་ལེ་མ་ཁེ་ལ་ དག༌ཉི༎ |