རོ་མི། 10 - Tshangla New Testament (BSI)1 ཇ་ག་ཡུང་ཟི་བ་ ཨིས་རེལ་ག་སོ་ངོ་བ་ཀི་ ཐར་པ་ཉོང་ཅེན་དག་ཉི་ ཇ་ག་སེམས་ཆི་ལུ༌ཅ། ཉི་ཇི་གི་ དཀོན་མཆོག་ག་ སྨོན་ལམ་ཏབ༌ཅ། 2 རོག་ཏེ་བ་ཀི་ དཀོན་མཆོག་ག་ གནམ་མེད་ས་མེད་ ཆོས་ཨན་ཅ་དག་ཉི་ ཇི་གི་འཛོམས་དཔང་ཨན༌ཅ། དག་པ་ཀབ་ཉི་ རོག་ཏེ་བ་ཀི་ ཆོས་ཨ་ཁཱན་ཁེ་པ་ ཡོན་ཏན་ག་ཐུང་ཀེ་ཨ་ཉི་ ཙི་ལུ་མ༌ལ། 3 དཀོན་མཆོག་གི་ དྲང་པུ་ཅོད་གནང་ཐང་ག་ཀོར་གེ་ རོག་ཏེ་བ་ཀི་ མ་སེ་ཝ་ཨ་དེན་གེ་ རོག་ཏེ་བ་ཏེན་གི་ དྲང་པུ་ཅོད་པེ་གོད་ཉི་ དཀོན་མཆོག་གི་ དྲང་པུ་ཅོད་གནང་མ་དང་ཏུ་ཉི་ རོག་ཏེ་བ་ཀི་ ཨ་ལེ་གོད་པུ་མ༌ལ། 4 ཧང་ཡ་དག་ནེ་ལ་ བཀའ་ཁྲིམས་ཐམས་ཅན་རང་ ཁིརིས་གི་འགྲུབ་ཉི་གནང༌མ། ཉི་རོ་ཀ་ཏཱན་ དད་པ་ཨ་ཁཱན་ ཐམས་ཅན་རང་ དྲང་པུ་ཅོད་ཉི་གནང༌ཅ༎ ཐམས་ཅན་ག་ཐར༌པ། 5 བཀའ་ཁྲིམས་དང་ཏུ་ཉི་ དྲང་པུ་རི་ལེ་གི་ལ་དག་ནེ་ལ་ བཀའ་ཁྲིམས་གེ་ཤོ་ཁཱན་ ཐམས་ཅན་རང་ ཨ་ལེ་རེ་བེ་ཁེ་ལེ་དག་ཉི་ མོ་ས་གི་འབྲི་བ༌ཅ། 6 དག་པ་ཀབ་ཉི་ དད་པ་ག་ཐུང་ཀེ་ དྲང་པུ་རི་ཁཱན་ག་ཀོར་གེ་ ཨོ་ཐེན་གསུངས་མ་ཅ་ ཞིང་ཁམས་ག་ ཨི་བི་དི་ལེ་ཡ་དག་ཉི་ ན་ཧ་སེམས་ཀ་ ཧ་ལ་རང་མ་མི། (ཨུ་ཉུ་ཤོ་ ཁིརིས་དོང་ཕ་ལེ་ག་གི༌ལ།) 7 ཉི་ཨི་བི་གི་ འཛམ་གླིང་ཕརའ་ཁ་དི་ལེ་ཡ། ཨུ་ཉུ་ཤོ་ ཁིརིས་གཤགས་པ་གེ་ ལོག་ཉི་ག་ཏཱན་ཕ་ལེ་ག་གི༌ལ། 8 དཀོན་མཆོག་ག་གསུང་ཁེ་པ་ ན་ཧ་ར་ག༌ཅ། ཉི་ན་ཧ་ནོ་ཝང་ག་དང་ ན་ཧ་སེམས་ནང་ཀ་ཅ་ དག་ཉི་ གསུང་རབ་གེ་ཨོ་ཐེན་ཤོ་ན། ཉི་ཨུ་ཉུ་ཤོ་ ཨ་ཤི་བཤད་ཁཱན་ དད་པ་ག་གསུང་གི༌ལ། 9 ཧང་ཡ་དག་ནེ་ལ་ ཡི་ཤུ་ཤོ་ གཙོ་བོ་གི་ལ་དག་ཉི་ ན་ཧ་ནོ་ཝང་གི་ཁ་དོག་ཐཱན་ དཀོན་མཆོག་གི་ རོག་གཤགས་པ་གེ་ ལོག་ཉི་བཞེངས་གནང་མ་དག་ཉི་ ན་ཧ་སེམས་ཀ་ དད་པ་ཨ་ནེ་ལ་ ན་ཤི་ཐར་པ་ཉོང༌པེ། 10 ཧང་ཡ་དག་ནེ་ལ་ ན་ཧ་སེམས་ཀི་ དད་པ་ཨ་ཝ་ཨ་དེན་གེ་ ན་ཧ་བ་ དྲང་པུ་རིན་ཅ་གི༌ལ། ཉི་ན་ཧ་ནོ་ཝང་གི་ཁ་དོག་ཉི་ ན་ཤི་ཐར་པ་ཉོང་ཅ་གི༌ལ། 11 གསུང་རབ་གེ་ཤོ་ཝ་དང་ཏུ་ཉི་ ཨི་བི་གི་ རོ་ཀ་དད་པ་ཨ་ཝ་ཐུར་ ཨོ་ཉ་སོ་ངོ་ཁེ་པ་ ཧ་ལ་རང་ ངི་ནང་ཁུ་ལེ་མ་ཁེ་ལ་དག༌ཉི། 12 གཙོ་བོ་ཤོ་ ཐུར་རང་གི༌ལ། ཉི་ཐམས་ཅན་ག་ གཙོ་བོ་གི༌ལ། ཉི་རོ་ཀེ་ཞུ་ཁཱན་ ཐམས་ཅན་ག་ རོ་ཀི་ཇོབ་ཇོབ་ཨ་ཉི་གནང༌ཅ། ཡ་ཧུ་དི་པ་དང་ གིརིག་བ་ཀ་བར་ཀ་ ཁྱད་པར་ཧང་རང་མཱན༌ཅ། 13 ཧང་ཡ་དག་ནེ་ལ་ ཨི་བི་གི་ གཙོ་བོ་ག་མཚན་ཞུ་ཝ་ཐུར་ ཨོ་ཉ་སོ་ངོ་གི་ ཐར་པ་ཉོང་པེ་གི་ལ་དག་ཉི་ གསུང་རབ་གེ་ཤོན༌ཅ། 14 དག་པ་ཀབ་ཉི་ རོག་ཏེ་བ་ཀི་ རོ་ཀ་དད་པ་མ་ཨ་ཝ་སག་པུ་ རོག་ཏེ་བ་ཀི་ རོ་ཀ་ཏཱན་ ཧང་ཏེན་ཞུ་ལེ་ཡ། ཉི་རོག་ཏེ་བ་ཀི་ རོ་ཀ་ཀོར་གེ་ ཧ་ལ་རང་ ན་མ་ཐ་ཝ་སག་པུ་ རོག་ཏེ་བ་ཀི་ རོ་ཀ་ཏཱན་ ཧང་ཏེན་དད་པ་ཨ་ལེ་ཡ། ཉི་སོ་ངོ་ཐུར་ཕང་གི་ རོག་ཏེ་བ་ཀ་ གསུང་མ་བཤད་པ་སག་པུ་ རོག་ཏེ་བ་ཀི་ ཧང་ཏེན་ན་ཐ་ལེ་ཡ། 15 ཉི་མ་ཀུན་ཏི་ཝ་སག་པུ་ ཨི་བི་གི་དིན་ཐཱན་ རོག་ཏེ་བ་ཀ་ གསུང་བཤད་པེ་ཡ། གསུང་རབ་གེ་ ཨོ་ཐེན་བུ་ཤོན་ཅ་ འཐེན་ལེག་པུ་ཕ་ཁཱན་ སོ་ངོ་བ་ཀ་བི་ ཧབ་ཏུར་ཅེམ་པུ་ལ་ཡ་ དག༌ཉི། 16 དག་པ་ཀབ་ཉི་ ཨིས་རེལ་ག་སོ་ངོ་ ཐམས་ཅན་གི་ འཐེན་ལེག་པུ་མ་ཞུན་ཤི། གཙོ་བོ་ ཨ་ཤི་བཤད་ཁཱན་ག་ ཨི་བི་གི་ དད་པ་ཨ་ཝ་ཡ་དག་ཉི་ ཡ་ཤའི་ཡ་གི་ གཙོ་བོ་ག་ཞུ་ཝ༌ཅ། 17 དད་པ་ཤོ་ གསུང་ཉཱན་ཏེན་གེ་ཨུན༌ཅ། ཉི་ཨུ་ཉུ་གསུང་ཤོ་ ཁིརིས་ག་ཀོར་གེ་ འཐེན་ལེག་པུ་གི༌ལ། 18 དག་པ་ཀབ་ཉི་ ཇི་གི་ཇིམ་ཅ་ རོག་ཏེ་བ་ཀི་ འཐེན་ལེག་པུ་ན་ཐ་ཝ་སྨོ། ཧང་ཨ་ཉི་མ་ཐ་ལེ་ཡ། རོག་ཏེ་བ་ཀ་ཀཱན་གི་ འཛམ་གླིང་ཐམས་ཅན་རང་ ཆ་པ༌ཅ། ཉི་རོག་ཏེ་བ་ཀ་ཆཱས་གི་ འཛམ་གླིང་གུར་ཅི་ ཐམས་ཅན་རང་ ཆ་པ་ཅ་ དག༌ཉི་ གསུང་རབ་གེ་ཤོན༌ཅ། 19 ཉི་ཨོམ་ཆང་རང་ ཇི་གི་ཇིམ་ཅ་ ཨིས་རེལ་ག་སོ་ངོ་བ་ཀི་ ཧ་མ་གོན་ཤི་སྨོ། གོ་རང་ མོ་ས་རོག་ཏེན་གི་ གསུངས་མ་ཅ་ ཇི་གི་བཱརའ་མི་རིགས་བ་ཀ་ བྱིན་རླབས་བི་ཉི་ ན་ཧ་བ་ སེར་སྣ་ཨ་ལེ་བི༌ལེ། ཡ་ཧུ་དི་པ་མང་གི་ཁཱན་ ཡོང་བ་མི་རིགས་བ་ཀ་ ཇི་གི་བྱིན་རླབས་བི་ཉི་ ཇི་གི་ན་ཧ་བ་ རོ་ཙིག་པེ་བི་ལེ་ དག༌ཉི། 20 ཚི་ངེ་ ཡ་ཤའི་ཡ་གི་བུ་ ཡོང་མ་ཁེ་ལཱན་ གསུངས་མ་ཅ་ ཇང་མ་ལམ་ཁཱན་ སོ་ངོ་བ་ཀི་ ཇང་ཐོང༌མ། ཇ་ག་ཀོར་གེ་མ་ཇིམ་ཁཱན་ སོ་ངོ་བ་ཀ་ ཇང་ཇང་ཏེན་གི་གེན་མ་ དག༌ཉི། 21 དག་པ་ཀབ་ཉི་ ཨིས་རེལ་ག་ སོ་ངོ་བ་ཀ་ཀོར་གེ་ དཀོན་མཆོག་གི་ གསུངས་མ་ཅ་ ཡེག་པ་མ་ན་ཁཱན་དང་ ངོ་ལོག་ཁཱན་ ཝག་ཙ་བ་ཀ་དེན་གེ་ ཇི་གི་ངམ་ཐུར་རང་ ཇ་ག་ག་དང་ཕེག་ཉི་ ནོང་མ་ དག༌ཉི༎ |