མཇལ་ཁ། 9 - Tshangla New Testament (BSI)

¹ ཉི་ཞིང་ཁམས་ག་འཐེན་པ་ལྔ་པ་གི་ དམག་དུང་ཐེད་པ་ཀབ་ཉི་ ངམ་ཐུང་ཀེ་དོང་ འཛམ་གླིང་ག་ཏཱན་ སྐར་མ་སྨིན་དྲུག་ཐུར་ ཞུད་ཉི་ཁེ་ཝ༌ལ། ཉི་ར་ཅི་མ་ཁཱན་ཧོང་ཅི་ག་རིག་ཁཱན་ གང་ག་དེ་མེ་ཟུ་ རོ་ཀ་བི་ཝ་ཆོ༌ཝ།

² རོ་ཀི་ ཨོ་ཉ་གང་ཕེག་པ་ཀབ་ཉི་ མི་ཙང་ཆི་ལུ་ཐུར་གེ་ མུ་གུ་ཤོ་ཝ་ད་བུ་རང་ མུ་གུ་ཤོན་ཆོ༌ཝ། ཉི་ཨོ་ཉ་མུ་གུ་གི་ཨ་ཉི་ ངམ་དང་རི་དི་ ཆང་ལུ་རི༌ཝ།

³ ཉི་གེ་ མུ་གུ་ནང་ཀེ་ ཏེག་ཏེག་པ་ཤོན་ཐཱན་ འཛམ་གླིང་ག་ཏཱན་ ཨོ་ཕ༌ལ། ཉི་སྡིག་པ་ར་ཟ་ག་ དབང་ཚད་ད་བུ་རང་ རོག་ཏེ་བ་ཀ་བུ་ དབང་ཚད་བི་ཝ་ཆོ༌ཝ།

⁴ ཏེག་ཏེག་པ་བ་ཀ་ཏཱན་ ངོན་ ཤིང་ཟེ་མུ་བ་དང་ ཤིང་ཆི་ལུ་བ་ཀ་ ནོད་པ་མ་ཀེ་ཤོ་དག་ཉི་ ཡེག་ཆོ༌ཝ། དག་པ་ཀབ་ཉི་ པ་ཏོང་ཐུང་ཀ་ དཀོན་མཆོག་ག་ ཐེལ་ཙི་མ་ཁཱན་ སོ་ངོ་བ་ ཐམས་ཅན་ག་ ནོད་པ་ཀེ་ཤོ་དག་ཉི་ ཡེག་པ་ཆོ༌ཝ།

⁵ སོ་ངོ་བ་ཤེ་ལེ་ག་དབང་ཚད་ རོག་ཏེ་བ་ཀ་ མ་བི་ཝ་ཆོ་ཝ༌ལ། དག་པ་ཀབ་ཉི་ ལ་ཉི་ལྔ་སག་པུ་ ཀ་ལུ་ཏཱད་ཅོ་དག༌ཉི། རོག་ཏེ་བ་ཀི་ ཀ་ལུ་ཏཱད་པ་ཀབ་ཉི་ སྡིག་པ་ར་ཟ་གི་ ཐོ་ཝ་ད་བུ་རང་ ངམ་ཅ་གི་ཝ༌ལ།

⁶ ཨུ་ཉུ་གང་ཀ་ སོ་ངོ་བ་ཀི་ ཤི་ལེ་ག་སེམས་ཨ༌ལེ། དག་པ་ཀབ་ཉི་ ཤི་ལེ་མར༌བ། ཉི་རོག་ཏེ་བ་ཀི་ ཤི་ལེ་ག་རེ་ཆ་ཨ༌ལེ། དག་པ་ཀབ་ཉི་ ཤི་སྲོག་ རོག་ཏེ་བ་ཀེ་གཱན་ཇོང༌མེ།

⁷ ཨོ་ཐ་ཏེག་ཏེག་པ་བ་ གོད་པ་ཀབ་ཉི་ ཕྱད་མདའ་ཕི་ལེ་ཅམ་ཁཱན་ ཀུར་ཏ་ད་བུ་རང་ཆོ༌ཝ། རོག་ཏེ་བ་ཀ་ ཤ་རང་ག་ གསེར་ག་རི་ང་ཙུག་པ་ཆོ༌ཝ། ཉི་རོག་ཏེ་བ་ཀ་ཟུག་ཤོ་ སོ་ངོ་ག་ཟུག་གི་ཝ་ཆོ༌ཝ།

⁸ རོག་ཏེ་བ་ཀ་ཚམ་ཤོ་ མེ་ཝག་ཙ་ག་ ཚམ་ད་བུ་རང་ རིང་མུ་ཆོ༌ཝ། ཉི་རོག་ཏེ་བ་ཀ་ཤ་ཤོ་ སེང་གེ་ག་ ཤ་ད་བུ་ཆོ༌ཝ།

⁹ རོག་ཏེ་བ་ཀི་ པེར་ག་བཱརང་ཏོང་དགྲ་ལི་ ཡེ་ཝ་ཆོ༌ཝ། ཉི་རོག་ཏེ་བ་ཀ་ ཡེ་ལམ་གི་ ཀཱན་ཇིག་པ་ཀབ་ཉི་ ཕྱད་མདའ་ཕི་ལེ་ག་དི་ཁཱན་ ཀུར་ཏ་ག་རི་བ་ད་བུ་རང་ ཀཱན་ཇིག་ཆོ༌ཝ།

¹⁰ ཉི་རོག་ཏེ་བ་ཀ་ ཤམ་པི་ཁེ་པ་ སྡིག་པ་ར་ཟ་ག་ ཤམ་པི་ད་བུ་རང་ཆོ༌ཝ། ཉི་སོ་ངོ་བ་ཀ་ཐོ་ཉི་ ལ་ཉི་ལྔ་སག་པུ་ ཀ་ལུ་ཏཱད་པེ་ག་དབང་ཚད་ བི་ཝ་ཆོ་ཝ༌ལ།

¹¹ ཉི་རོག་ཏེ་བ་ཀ་ དཔོན་ཤོ་ ར་ཅི་མ་ཁཱན་ ཧོང་ཅི་གོད་ཁཱན་ ཞིང་ཁམས་ག་འཐེན་པ་ གི་ཝ་ཆོ༌ཝ། ཧི་བུརུ་ག་ རོ་ཀ་མིང་ཤོ་ ཨ་བ་དོན་དང་ གིརིག་ག་མིང་ཤོ་ ཨ་པོལ་ཡོན་གི་ཝ་ཆོ༌ཝ།

¹² གནམ་མེད་ས་མེད་ དཀའ་ཝ་ཅཱད་པེ་ཁེ་ཁཱན་ གོ་དང་པ་ཁེ་པ་ཆུ༌མ། དག་པ་ཀབ་ཉི་ གོད་ཅོ་ ཨོམ་ཆང་རང་ གནམ་མེད་ས་མེད་ དཀའ་ཝ་ཅཱད་པེ་ཁེ་ཁཱན་ ཉིག་ཙིང་ཁེ་པ་ ཨུན་ཅ་དག༌ཉི།

¹³ ཉི་ཞིང་ཁམས་ག་འཐེན་པ་ཁུང་པ་གི་ དམག་དུང་ཐེད་པ༌ལ། ཉི་དཀོན་མཆོག་ག་ སྐུན་མདུན་ག་ཆོ་ཁཱན་ གསེར་ག་མཆོད་གཤམ་ག་ ཝ་རོང་ཕིཤི་གེ་ ཇི་གི་ཀཱན་ཐུར་ ན་ཐ༌ཝ།

¹⁴ རི་དྲང་ཡུ་ཕེར་ཏྲིས་ར་ག་ ཆེང་ཉི་ཐ་ཁཱན་ ཞིང་ཁམས་ག་འཐེན་པ་ཕིཤི་ཐར་ཤོ་དག༌ཉི། ཨོ་ཉ་ཀཱན་གི་ ཞིང་ཁམས་ག་འཐེན་པ་ཁུང་པ་ག་ཏཱན་ གསུངས་ཆོ༌ཝ།

¹⁵ ཉི་ཨོ་ཉ་ཞིང་ཁམས་ག་འཐེན་པ་ཕིཤི་ཁེ་པ་ དེན་ཆེན་རང་ ཨོ་ཐ་ཆུ་ཚོད་དང་ ཨོ་ཐ་ནོང་ ཉི་ཨོ་ཐ་ལ་ཉི་དང་ ཨོ་ཐ་ཉིང་ཀ་དེན་གེ་ཅམ་ཉི་ ཐ་ཝ་ཆོ་ཝ༌ལ། ཉི་ཨོམ་ རོག་ཏེ་བ་ཤོ་ སོ་ངོ་ཅ་སམ་གེ་ ཅ་ཐུར་ཤེ་ལེ་དེན་གེ་ ཐར་ཅ་གི་ཝ༌ལ།

¹⁶ ཇི་གི་ན་ཐ་ཝ་དང་ཏུ་ཉི་ ཀུར་ཏ་ཐུང་ཀ་ལང་ཁཱན་ དམག་མི་ ས་ཡ་གཉིས་བརྒྱ་ཆོ༌ཝ།

¹⁷ ཇ་ག་མཇལ་ཁ་ནང་ཀ་ ཀུར་ཏ་བ་དང་ ཀུར་ཏ་ཐུང་ཀ་ལང་ཁཱན་བ་ཆོ༌ཝ། ཉི་རོག་ཏེ་བ་ཀ་ བཱརང་ཏོང་གེ་ཇཱན་ཁཱན་ པེར་ག་དགྲ་ལི་བ་ཀ་ཚོན་ཤོ་ ཙ་ཏེག་ཀིན་དང་ ངོ་ཀར་ཁ་ཝང་ཝང་ ཉི་སེར་བུ་དང་ ཙ་ལུ་ཡ་ཁཱན་ཆོ༌ཝ། ཀུར་ཏ་ག་ཤ་རང་ཤོ་ གོད་པ་ཀབ་ཉི་ སེང་གེ་ག་ཤ་རང་ད་བུ་ཆོ༌ཝ། ཉི་རོག་ཏེ་བ་ཀ་ནོ་ཝང་གེ་ མི་ མུ་གུ་དང་ སཱལ་ཕར་ཤོན་ཆོ༌ཝ།

¹⁸ སོ་ངོ་ཅ་སམ་གེ་ ཅ་ཐུར་ཁེ་པ་ མི་དང་མུ་གུ་ ཉི་སཱལ་ཕར་ག་ རེམ་པ་སམ་གི་ཤེ་ཝ༌ལ། ཉི་ཨོ་ཐ་རེམ་པ་ཤོ་ ཀུར་ཏ་བ་ཀ་ནོ་ཝང་གེ་ ཤོ་ཝ༌ལ།

¹⁹ ཀུར་ཏ་བ་ཀ་ནོ་ཝང་ག་ ཤུག་ཆོ་ཝ༌ལ། ཉི་རོག་ཏེ་བ་ཀ་ ཤམ་པི་ཤོ་ རུ་གེ་ནང་ག་ ཤ་རང་ད་བུ་ ཆོ་ཝ་ཨ་དེན་གེ་ ཐོ་ལེ་ག་དང་ ཅོན་མེ་ག་དབང་ཚད་ཆོ༌ཝ།

²⁰ དག་པ་ཀབ་ཉི་ ཨོ་ཐ་རེམ་པ་བ་ཀི་མ་ཤེ་ཁཱན་ སོ་ངོ་བ་ཀི་ སྡིག་པ་གེ་ལོག་པེ་མ་ན་ཝ༌ལ། རོག་ཏེ་བ་ཀི་ བདུད་དང་ གསེར་ དངུལ་ ཟངས་ ཉི་ཤིང་དང་ ལུང་གི་ཅོད་ཁཱན་ སྐུ་བ་ཀ་གསོལ་ཝ་ ཏ་པུ་ཏབ་ས་རང་ཆོ་ཝ༌ལ། ཨོ་ཉ་སྐུ་ཐུར་གི་བུ་ ཐོང་མུ་མཱན་ཅ་ ན་ཐ་ལུ་མཱན་ཅ་ ཉི་དང་མུ་མཱན༌ཅ།

²¹ ཐུར་གི་བུ་ སོ་ངོ་ཤེ་ལེ་ག་ ཐུབ་མ་ཐཱན་ཤི། ངཱན་ཕི་ལེ་ག་ ཐུབ་མ་ཐཱན་ཤི། ཉི་ལུས་འབྲེལ་མ་ཙང་མ་ ཨ་ལེ་ག་དང་ དྲོ་ཝཱན་ཨ་ལེ་ག་ སྡིག་པ་གེ་ལོག་པེ་མ་ནཱན་ཤི༎