མཇལ་ཁ། 8 - Tshangla New Testament (BSI)

ཐེལ་ཙི་ཟུམ་པ་ ཕེག་པ༌ལ།

¹ ཤི་ཤ་ཀ་ཏོང་གི་ ཐེལ་ཙི་ཟུམ་པ་ཕེག་པ་ཀབ་ཉི་ ཞིང་ཁམས་ག་ གཱན་དྲ་ཚེ་བང་ཐུར་ དབ་ཏུར་ཕང་ ཀཱན་ད་སུ་རང་མ་ཝ་ ཙང་ཀེན་རི༌ཝ།

² ཇི་གི་གོད་པ་ཀབ་ཉི་ དཀོན་མཆོག་ག་ སྐུན་མདུན་ག་ཆོ་ཁཱན་ ཞིང་ཁམས་ག་འཐེན་པ་ ཟུམ་ག་ཏཱན་ དམག་དུང་ཐུར་རེ་རེ་ གནང་མ་ཆོ༌ཝ།

³ ཉི་གསེར་ག་ པོས་ཁོ་མེན་ཁཱན་ ཞིང་ཁམས་ག་འཐེན་པ་བཱརའ་ཐུར་ མཆོད་གཤམ་ར་ག་བྱོན་ཐཱན་ ཐིང་ཉི་བཞུགས་ཆོ༌ཝ། ཉི་རོ་ཀ་པོས་ གནམ་མེད་ས་མེད་ མང་པུ་ཨ་ཉི་ གནང་མ་ཆོ༌ཝ། ཉི་དཀོན་མཆོག་ག་སོ་ངོ་བ་ཀ་ སྨོན་ལམ་ཀབ་ཉི་ པོས་ཡཱན་ཐཱན་ གསེར་ཁྲི་ག་གུབ་ཀ་ཆོ་ཁཱན་ མཆོད་གཤམ་ག་ ཐོག་པེ་གི་ཝ༌ལ།

⁴ ཉི་ཞིང་ཁམས་ག་འཐེན་པ་ག་ ཕྱག་ཀ་ཐུང་ཀེ་ཨ་ཉི་ པོས་ག་མུ་གུ་དང་ དཀོན་མཆོག་ག་ སོ་ངོ་བ་ཀ་སྨོན་ལམ་ དཀོན་མཆོག་ག་སྐུན་མདུན་ག་ དིན་ཆོ༌ཝ།

⁵ ཨོ་ཐ་ཚི་ངེ་ ཞིང་ཁམས་ག་འཐེན་པ་གི་ པོས་དང་ མཆོད་གཤམ་ག་མི་གི་ ཨོ་ཉ་པོས་ག་ ག་ཙ་ཕུང་ཐཱན་ འཛམ་གླིང་ག་ཏཱན་ ཐུབ་ཉི་གེམ་ཆོ༌ཝ། ཉི་མུང་ཕོག་ཆོ་ཝ་ ཏང་ལེབ་ཆོ་ཝ་ ཉི་ན་ཀ་གི་ འཛམ་གླིང་དྲེང་ཆོ༌ཝ༎

དམག་དུང་ཟུམ།

⁶ དམག་དུང་ཟུམ་མེན་ཁཱན་ ཞིང་ཁམས་ག་འཐེན་པ་ཟུམ་གི་ དམག་དུང་ཐེད་པེ་ག་ ཅབ་ཉི་ཆོ་ཝ༌ལ།

⁷ ཞིང་ཁམས་ག་འཐེན་པ་ དང་པ་གི་ དམག་དུང་ཐེད་པ་ཀབ་ཉི་ ཞི་ཀབ་ཉི་ཡ་ཝ་ག་ སེར་བ་དང་མི་ འཛམ་གླིང་ག་ཏཱན་ ཐུབ་ཉི་གེ་མ༌ལ། ཉི་འཛམ་གླིང་ཅ་སམ་གེ་ ཅ་ཐུར་མི་གི་ཞུམ་པ༌ལ། ཤིང་བ་ཅ་སམ་གེ་ ཅ་ཐུར་ཞུམ་པ༌ལ། ཉི་ངོན་བ་ ཐམས་ཅན་རང་ ཞུམ་པ༌ལ།

⁸ ཞིང་ཁམས་ག་འཐེན་པ་ ཉིག་ཙིང་པ་གི་ དམག་དུང་ཐེད་པ་ཀབ་ཉི་ མི་ཆི་ལུ་ ཕུ་ད་བུ་ཆོ་ཁཱན་ཐུར་ རྒྱམ་མཚོ་ནང་ཀ་ཏཱན་ ཐུབ་ཉི་གེ་མ༌ལ། ཉི་རྒྱམ་མཚོ་ག་ཆོ་ཁཱན་རི་ ཅ་སམ་གེ་ ཅ་ཐུར་ཞི་རི་ཝ༌ལ།

⁹ ཉི་རྒྱམ་མཚོ་ནང་ཀ་ གསོན་པོ་ཨ་ཉི་ཆོ་ཁཱན་བ་ ཐམས་ཅན་རང་ ཅ་སམ་གེ་ ཅ་ཐུར་ཤི་ཝ༌ལ། ཉི་གྲུ་ཆེན་བ་བུ་ ཅ་སམ་གེ་ ཅ་ཐུར་མེ་པ་ཕི་ཝ་གི་ཝ༌ལ།

¹⁰ ཞིང་ཁམས་ག་འཐེན་པ་སམ་པ་གི་ དམག་དུང་ཐེད་པ་ཀབ་ཉི་ འཕྲུལ་མི་ད་བུ་ཆོ་ཁཱན་ སྐར་མ་སྨིན་དྲུག་ཆི་ལུ་ཐུར་ དོང་ཕུད་ཉི་ཁེ་ཝ༌ལ། ཨོ་ཉ་སྐར་མ་སྨིན་དྲུག་ ཞུད་པ་ཀབ་ཉི་ རི་དྲང་དང་ ཕོག་ཅི་རི་ ཅ་སམ་གེ་ ཅ་ཐུར་ག་ཐུང་ཀ་ ཁེ་ཝ༌ལ།

¹¹ ཉི་ཨོ་ཉ་སྐར་མ་སྨིན་དྲུག་ག་མིང་ཤོ་ ཁ་ལུ་གི་ཝ༌ལ། ཉི་ཨོ་ཉེ་གི་ རི་ཅ་སམ་གེ་ ཅ་ཐུར་ཁ་ལུ་ཅོད་པ༌ལ། ཉི་རི་གནམ་མེད་ས་མེད་ ཁ་ལུ་ཆོ་ཝ་ཨ་དེན་གེ་ སོ་ངོ་མང་པུ་ཐུར་ ཤི་ཝ༌ལ།

¹² ཉི་ཞིང་ཁམས་ག་འཐེན་པ་ཕིཤི་པ་གི་ དམག་དུང་ཐེད་པ་ཀབ་ཉི་ ངམ་ག་ཅ་སམ་གེ་ ཅ་ཐུར་ག་འོད་ཟེར་ མ་ཝ་རི་ཝ༌ལ། ཉི་ལ་ཉི་ངམ་བུ་ ཅ་སམ་གེ་ ཅ་ཐུར་ག་འོད་ཟེར་ མ་ཝ་རི་ཝ༌ལ། ཨུ་ཉུ་པུརུས་ཀིན་ཨ་ཉི་ སྐར་མ་སྨིན་དྲུག་བ་བུ་ ཅ་སམ་གེ་ ཅ་ཐུར་མེར་བུ་རི་ཝ༌ལ། ཨོ་ཉི་ཨ་དེན་གེ་ ངམ་ཅ་སམ་གེ་ ཅ་ཐུར་མེར་བུ་རི་ཝ༌ལ། ཉི་བི་ནང་ག་བུ་ ཨུ་ཉུ་ད་བུ་རང་ ཇུང་མ༌ལ།

¹³ ཉི་ཇི་གི་ ག་ཏཱན་གོད་པ་ཀབ་ཉི་ ཝུན་བ་ཐུར་ ངམ་ཐུང་ཀ་ཕེན་ཉི་ ཆོ་ཝ་ཨ་ཝ་ཐོང༌མ། ཉི་ཨོ་ཉ་ཝུན་བ་གི་ ཤ་དར་ཕི་ཉི་ཡེག་ཆོ་ཝ་ འཛམ་གླིང་ག་ཆོ་ཁཱན་ ཐམས་ཅན་རང་ དཀའ་ཝ་ཅཱད་པེ་ཁེ༌ལེ། དཀའ་ཝ་ཅཱད་པེ་ཁེ༌ལེ། དཀའ་ཝ་ཅཱད་པེ་ཁེ་ལེ་དག༌ཉི། ཉི་ཨོམ་ ཨོམ་ཐུར་ ཞིང་ཁམས་ག་འཐེན་པ་སམ་གི་ དམག་དུང་ཐེད་པེ་གི་ཝ་ལ།