མཇལ་ཁ། 7 - Tshangla New Testament (BSI)ཨིས་རེལ༌ག་སོ༌ངོ་ 144000 ག་ ཐེལ༌ཙི་ཀེ༌ཉི་གནང་མ༌ལ། 1 ཨོ་ཐ་ཚི་ངེ་ ཇི་གི་ཞིང་ཁམས་ག་འཐེན་པ་ཕིཤི་ འཛམ་གླིང་ག་ ཟུར་ཕིཤི་ག་ཐིང་ཉི་ བཞུགས་པ་ཨ་ཝ་མཇལ༌བ། ཉི་འཛམ་གླིང་ རྒྱམ་མཚོ་དང་ ཤིང་བ་ཀ་ཏཱན་ རི་དི་མ་ཨུན་ཆེན་དག་པ་གི་ ཨོ་ཉ་ཞིང་ཁམས་ག་འཐེན་པ་ཕིཤི་གི་ འཛམ་གླིང་ག་རི་དི་ཕིཤི་ ཙུང་ཉི་ཐ་ཝ་ཆོ༌ཝ། 2 ཉི་ཇི་གི་ ཨོམ་ཆང་རང་ བཱརའ་ཞིང་ཁམས་ག་འཐེན་པ་ཐུར་ མཇལ༌བ། རོག་ཤོ་ ཤར་གེ་དོང་བྱོན་ཆོ༌ཝ། ཉི་རོ་ཀི་ གསོན་པོ་ཨ་ཉི་བཞུགས་ཁཱན་ དཀོན་མཆོག་ག་ཐེལ་ཙི་ བསྣམས་པ་ཆོ༌ཝ། ཉི་རོ་ཀི་ ཞིང་ཁམས་ག་འཐེན་པ་ཕིཤི་ཁེ་པ་ གསུང་སྐད་ཆི་ལུ་ཨ་ཉི་ རཱན་ཆོ༌ཝ། འཛམ་གླིང་དང་ རྒྱམ་མཚོ་ཅོན་མེ་ག་ སྟོབས་དབང་ ཨོ་ཉ་ཞིང་ཁམས་ག་འཐེན་པ་ཕིཤི་ག་ གནང་ཆོ༌ཝ། 3 ཨ་ཤི་ དཀོན་མཆོག་ག་ གཡོག་པ་བ་ཀ་ པ་ཏོང་ག་ ཐེལ་ཙི་མ་ཕི་ཝ་སག་པུ་ འཛམ་གླིང་ རྒྱམ་མཚོ་དང་ ཤིང་བ་ མ་ཅོན་ཤོ་དག་ཉི་ རོ་ཀི་གསུངས་ཆོ༌ཝ། 4 ཉི་དཀོན་མཆོག་ག་ ཐེལ་ཙི་ཕི་ཁཱན་ སོ་ངོ་བ་ཀ་དྲང་ ཇི་གི་ན་ཐ༌ཝ། ཨིས་རེལ་ག་མི་རིགས་ ཐམས་ཅན་རང་དོབ་ཉི་ 144000 ཐུང་ཀ་ ཐེལ་ཙི་ཕི་ཝ་ཅ་གི་ཝ༌ལ། 5 ཡ་ཧུ་ད་གེ་ 12000། རུ་བེན་གེ་ 12000། གཱད་གེ་ 12000། 6 ཨ་ཤེར་གེ་ 12000། ནབ་ཏ་ལི་གེ་ 12000། མ་ན་ཤེ་གེ་ 12000། 7 ཤི་མི་ཡོན་གེ་ 12000། ལེ་ཝི་གེ་ 12000། ཨིས་ས་ཁར་གེ་ 12000། 8 ཇ་བུ་ལུན་གེ་ 12000། ཡོ་སེཕ་གེ་ 12000། བེ་ནེ་ཡ་མིན་གེ་ 12000༎ འཛམ་བུ་གླིང་ག་སོ་ངོ༌བ། 9 ཨོ་ཐ་ཚི་ངེ་ ཇི་གི་གོད་པ་ཀབ་ཉི་ སོ་ངོ་བ་ གནམ་མེད་ས་མེད་མང་པུ་ ཨི་བི་གི་དྲང་ཨ་ནེ་བུ་ ཨ་ལེ་མར་བ་ག་ཆོ༌ཝ། རོག་ཏེ་བ་ མི་རིགས་མ་འདྲ་ཝ་བ་དང་ ལོ་མ་འདྲ་ཝ་ཨ་ཁཱན་བ་ ཉི་རྒྱལ་ཁབ་མ་འདྲ་ཝ་བ་དང་ འཛམ་གླིང་ག་སོ་ངོ་ཐམས་ཅན་རང་ཆོ༌ཝ། ཉི་རོག་ཏེ་བ་ གསེར་ཁྲི་ག་གུབ་ཀ་དང་ ཤི་ཤ་ཀ་ཏོང་ག་ སྐུན་མདུན་ག་ ཐིང་མ་ཆོ༌ཝ། རོག་ཏེ་བ་ཀི་ ཁ་མུང་བ་ལིང་མིན་ཨ་ཝ་ ཡེ་ཝ་ཆོ༌ཝ། ཉི་རོག་ཏེ་བ་ཀ་ ག་དང་ག་ པམ་ཤིང་ག་ད་ཀ་བ་ མེན་མ་ཆོ༌ཝ། 10 ཉི་རོག་ཏེ་བ་ཀི་ ཀཱན་ཤུག་ཨ་ཉི་ ཞུ་ཝ་ལ་ གསེར་ཁྲི་ཐུང་ཀ་བཞུགས་ཁཱན་ ཨ་ཧ་དཀོན་མཆོག་ག་དང་ ཤི་ཤ་ཀ་ཏོང་གེ་ཨ་ཉི་ ཐར་པ་ཉོང་ཅ་གི་ལ་དག༌ཉི། 11 ཉི་ཞིང་ཁམས་ག་འཐེན་པ་བ་ ཐམས་ཅན་རང་ གསེར་ཁྲི་ག་ཀོ་ལོ་ལོ་དང་ སོ་ངོ་ཆི་ལུ་བ་ཀ་ ཀོ་ལོ་ལོ་ ཉི་གསོན་པོ་ཨ་ཉི་ཆོ་ཁཱན་ སེམས་ཅན་ཕིཤི་ག་ ཀོ་ལོ་ལོ་ཐིང་ཉི་ བཞུགས་པ་ཅ་གི་ཝ༌ལ། ཉི་རོག་ཏེ་བ་ཀི་ གསེར་ཁྲི་ག་གུབ་ཀ་ཏཱན་ ཕྱག་འཚལ་ཐཱན་ དཀོན་མཆོག་ག་ གསོལ་ཝ་ཏབ་ཉི་ 12 ཞུ་ཝ༌ལ་ ཨ་མེན། བྱིན་རླབས་དང་གཟི་བརྗིད་ རིག་པ་དང་ བཀའ་དྲིན་ གུས་ཞབས་དང་ སྟོབས་དབང་ ཉི་ཤུགས་སྟོབས་ ཐམས་ཅན་རང་ ཧ་ལ་ཨ་ནེ་བུ་ དུས་ཏ་བུ་རང་ ཨ་ཧ་དཀོན་མཆོག་ག་གི༌ལ། ཨ་མེན། 13 ཉི་སོ་ངོ་ཆི་ལུ་ཐུར་གི་ ཇ་ག་གསུངས་ཆོ་ཝ་ ཨོ་ཐ་ཁ་མུང་བ་ལིང་མིན་ ཡེ་ཁཱན་སོ་ངོ་བ་ ཨི་བི་གི་ལ་ཡ། ཉི་རོག་ཏེ་བ་ ཨོ་གེ་ཨོ་ཕ་གི་ལ་སྨོ་ ནཱན་གི་ སེན་ཅ་སྨོ་དག༌ཉི། 14 ཇི་གི་ རོ་ཀ་ཞུ་ཝ་ སློབ་དཔོན་ ཨུ་ཉུ་མཁྱེན་ཁཱན་ཤོ་ ནཱན་གི་ལ་དག༌ཉི། ཉི་རོ་ཀི་ ཇ་ག་གསུངས་ཆོ་ཝ་ ཨོ་ཐ་སོ་ངོ་བ་ཤོ་ གནམ་མེད་ས་མེད་ དཀའ་ཝ་ཅཱད་ས་གེ་ ཨུ་ཁཱན་བ་གི༌ལ། རོག་ཏེ་བ་ཀི་ རོག་ཏེ་བ་ཀ་ཁ་མུང་བ་ ཤི་ཤ་ཀ་ཏོང་ག་སྐུ་ཁྲག་གི་ཨ་ཉི་ཟིག་ཉི་ བ་ལིང་མིན་ཅོད་པ༌ཅ། 15 ཨོ་ཉི་ཨ་དེན་གེ་ རོག་ཏེ་བ་ དཀོན་མཆོག་ག་ གསེར་ཁྲི་ག་གུབ་ཀ་ཐིང་ཉི་ ངམ་བི་ནང་མ་ཝ་ རོ་ཀ་ཕྱག་ཞུ་ཉི་ རོ་ཀ་མཆོད་ཁང་ནང་ཀ་ཆོན༌ཅ། ཉི་གསེར་ཁྲི་ཐུང་ཀ་བཞུགས་ཁཱན་ རོག་ཏེ་བ་ཀ་པོང་ཀ་བཞུགས་ཉི་ རོག་ཏེ་བ་ཀ་ སྐྱབས་ཨ་ཉི་གནང༌མེ། 16 རོག་ཏེ་བ་ ལོག་ཉི་ ཧ་ལ་རང་ བི་ནང་མ་ཁུ༌ལ། ཉི་རི་ནང་བུ་མ་སོ་ཕ། ཉི་རོག་ཏེ་བ་ ངམ་གི་མ་ཅོན༌མ། ཉི་གནམ་མེད་ས་མེད་ སོབ་ཁཱན་དྲེ་ཀི་བུ་ མ་ཅོན༌མ། 17 གསེར་ཁྲི་ག་བར་ཀ་བཞུགས་ཁཱན་ ཤི་ཤ་ཀ་ཏོང་ཤོ་ རོག་ཏེ་བ་ཀ་ དི་པ་རི་ཉི་གནང༌མེ། ཉི་ཚེ་གནང་ཁཱན་ ཕོག་ཅི་རི་ག་ཏཱན་ རོ་ཀི་ རོག་ཏེ་བ་རིག་ཉི་གནང༌མེ། ཉི་དཀོན་མཆོག་གི་ རོག་ཏེ་བ་ཀ་མིང་རི་ ཐམས་ཅན་རང་ ཕག་ཉི་གནང་མེ་དག༌ཉི༎ |