མཇལ་ཁ། 6 - Tshangla New Testament (BSI)

ཤི་ཤ་ཀ་ཏོང༌གི་ཐེལ༌ཙི་ཁུང་ ཆོག༌ཉི་གནང་མ༌ལ།

¹ ཉི་ཤི་ཤ་ཀ་ཏོང་གི་ ཐེལ་ཙི་ཟུམ་གེ་ ཐུར་ཕེག་པ་ག་ ཇི་གི་ཐོང༌མ། ཉི་གསོན་པོ་ཨ་ཉི་ཆོ་ཁཱན་ སེམས་ཅན་ཕིཤི་ག་པོང་ཀེ་ ཐུར་གི་ ཨོ་དོ་དག་ཉི་ ཡེག་པ་ག་ ཇི་གི་ན་ཐ༌ཝ། རོ་ཀ་ཀཱན་ཁེ་པ་ མུང་ཕོག་པ་ད་བུ་རང་ཆོ༌ཝ།

² ཉི་ཇི་གི་ ཀུར་ཏ་བ་ལིང་མིན་ ཨ་ཝ་ཐུར་ཐོང༌མ། ཉི་ཨོ་ཉ་ ཀུར་ཏ་ཐུང་ཀ་ལང་ཁཱན་གི་ ལི་མེན་མ་ཆོ༌ཝ། ཉི་རོ་ཀ་ཏཱན་ རྒྱལ་ཞྭ་ཐུར་མུག་ཉི་ བི་ཝ་ཆོ༌ཝ། རོ་ཀི་ རྒྱལ་ཁ་མང་པུ་ཉོང་ཉི་ ཨོམ་ཆང་རང་ རྒྱལ་ཁ་ཉོང་པེ་དེན་གེ་ རོག་དིན་ཆོ༌ཝ།

³ ཤི་ཤ་ཀ་ཏོང་གི་ ཐེལ་ཙི་ཉིག་ཙིང་པ་ ཆོག་པ་ཀབ་ཉི་ གསོན་པོ་ཨ་ཉི་ཆོ་ཁཱན་ སེམས་ཅན་ཉིག་ཙིང་པ་གི་ ཨོ་དོ་དག་ཉི་ ཡེག་ཆོ༌ཝ།

⁴ ཉི་ཨོམ་ཆང་རང་ བཱརའ་ཀུར་ཏ་ཤོ༌ཝ། ཉི་ཨོ་ཉ་ཀུར་ཏ་ཁེ་པ་ ཙ་ལུ་ཞིང་ཞིང་ཨ་ཝ་ཆོ༌ཝ། འཛམ་གླིང་ག་སྐྱིད་པུ་ ཐམས་ཅན་རང་ མ་ཝ་ཅོད་པེ་དེན་གེ་ གི་རིང་ཆི་ལུ་ཐུར་ ཨོ་ཉ་ཀུར་ཏ་ཐུང་ཀ་ ལང་ཁཱན་ག་བི་ཝ་ཆོ༌ཝ། ཨོ་ཉི་ཨ་དེན་གེ་ ཨོ་ག་རང་ཨ་ནེ་བུ་ ཕྱད་མདའ་ཕི་ཉི་ ཤེ་ཤེ་བ་རུ་མ༌ལ།

⁵ ཤི་ཤ་ཀ་ཏོང་གི་ ཐེལ་ཙི་སམ་པ་ ཕེག་པ་ཀབ་ཉི་ གསོན་པོ་ཆོ་ཁཱན་ སེམས་ཅན་སམ་པ་གི་ ཨོ་དོ་དག་ཉི་ཡེག་པ་ག་ ཇི་གི་ན་ཐ༌ཝ། ཇི་གི་གོད་པ་ཀབ་ཉི་ ཀུར་ཏ་ཆང་ལུ་ ཨ་ཝ་ཐུར་ཆོ༌ཝ། ཉི་ཨོ་ཉ་ ཀུར་ཏ་ཐུང་ཀ་ལང་ཁཱན་གི་ རོ་ཀ་ག་དང་ག་ སང་ཟེར་ཁཱན་ ཆ་ཐུར་མེན་མ་ཆོ༌ཝ།

⁶ གསོན་པོ་ཨ་ཉི་ཆོ་ཁཱན་ སེམས་ཅན་ཕིཤི་ག་པོང་ཀེ་ ཇིག་པ་པུརུས་ཀིན་ཨ་ཉི་ ཀཱན་ཐུར་ཇི་གི་ན་ཐ༌ཝ། བོང་བོག་པི་ ལམ་ཤུ་ཐུར་ག་གོང་ཤོ་ ངམ་ཐུར་ག་ཉི་གི༌ལ། ཉི་ཀོང་པུ་ ལམ་ཤུ་སམ་ག་གོང་བུ་ ངམ་ཐུར་ག་ཉི་གི༌ལ། དག་པ་ཀབ་ཉི་ སི་དང་ཞུ་ཤོ་ མེ་པ་ཕི་ལེ་མ་བི་དག་ཉི་ ཨོ་ཉ་ཀཱན་གི་ཡེག་ཆོ༌ཝ།

⁷ ཉི་ཤི་ཤ་ཀ་ཏོང་གི་ ཐེལ་ཙི་ཕིཤི་པ་ ཕེག་པ་ཀབ་ཉི་ གསོན་པོ་ཨ་ཉི་ཆོ་ཁཱན་ སེམས་ཅན་ཕིཤི་པ་གི་ ཨོ་དོ་དག་ཉི་ ཡེག་ཆོ༌ཝ།

⁸ ཉི་ཇི་གི་གོད་པ་ཀབ་ཉི་ ཀུར་ཏ་ཐུར་ སེར་བུ་ཡེང་ལུ་ ཨ་ཝ་ཆོ་ཁཱན་ཐུར་ཐོང༌མ། ཉི་ཨོ་ཉ་ ཐུང་ཀ་ལང་ཁཱན་ག་མིང་ཁེ་པ་ ཤི་སྲོག་ཨ་ཉི་ཏག་པ་ཆོ༌ཝ། ཉི་ཤི་ཁཱན་བ་ཆོ་ས་བཱརང་ཀི་ རོ་ཀ་ཚིང་ཁོན་མ་ཆོ༌ཝ། འཛམ་གླིང་ཅ་ཕིཤི་གེ་ཅ་ཐུར་ དབང་པེ་ག་དབང་ཚད་ རོག་ཏེ་བ་ཀ་བི་ཝ་ཆོ༌ཝ། ཉི་རོག་ཏེ་བ་ཀི་ འཛམ་གླིང་ག་སོ་ངོ་བ་ གི་རིང་ག་ཐུང་ཀེ་དང་ བེས་པེ་རིག་ཉི་ ན་ཚ་ཁེ་ཉི་ ཉི་བོ་རང་སེམས་ཅན་ག་ཐུང་ཀེ་ཨ་ཉི་ ཤེ་ལེ་གི་ཝ༌ལ།

⁹ ཉི་ཤི་ཤ་ཀ་ཏོང་གི་ ཐེལ་ཙི་ལྔ་པ་ཕེག་པ་ཀབ་ཉི་ ཇང་མཆོད་གཤམ་ཕརའ་ཁ་ དཀོན་མཆོག་ག་གསུང་དང་ རོག་ཏེ་བ་ཀི་ དམ་ཚིག་ཙུང་མ་ཨ་དེན་གེ་ བཀྲོངས་ཁཱན་ རྣམ་ཤེས་བ་ཐོང༌མ།

¹⁰ རོག་ཏེ་བ་ཀི་ ཀཱན་ཆི་ལུ་ཨ་ཉི་ ཞུ་ཝ་ལ་ གཙོ་བོ་ ནཱན་ཤོ་ དམ་པ་དང་ དེན་པ་གི༌ལ། ཉི་ཨོ་ཐ་འཛམ་གླིང་ག་ སོ་ངོ་བ་ཀི་ ཨ་ཧ་བ་ ཤེ་ཝ་ཨ་དེན་གེ་ ནཱན་གི་ རོག་ཏེ་བ་ཀ་ཁྲིམས་ ཧ་ལ་ཅཱད་ཉི་གནང་མེ་ཡ་དག༌ཉི།

¹¹ ཉི་རོག་ཏེ་བ་ ཐམས་ཅན་ག་ ནམ་བཟའ་ བ་ལིང་མིན་ཨ་ཝ་ ཐུར་རེ་རེ་གནང་ཐཱན་ རོག་ཏེ་བ་ ཤི་ཝ་པུརུས་ཀིན་ཨ་ཉི་ དོ་ཟོ་རང་ ཤི་ལེ་ཅམ་ཁཱན་ རོག་ཏེ་བ་ཀ་ ཡུང་ཟི་བ་ ཡེག་པེ་དེན་ཐ་ཤོ་ རོག་ཏེ་བ་ཀབ་ཉི་ཏབ་ཐུར་ག་ གཙོ་བོ་ག་ཕྱག་ཞུ་ཁཱན་ གཡོག་པ་བ་ ཤེ་ཉི་མ་ཚང་པ་སག་པུ་ ནོང་ཤོ་དག་ཉི་གསུངས་མ༌ལ།

¹² ཤི་ཤ་ཀ་ཏོང་གི་ ཐེལ་ཙི་ཁུང་པ་ཆོག་ཉི་ གོད་པ་ཀབ་ཉི་ ན་ཀ་གནམ་མེད་ས་མེད་ ཤུག་ཨ་ཉི་ཨོ་ཕ་ག་ ཇི་གི་ཐོང༌མ། ཉི་ངམ་མེར་བུ་རི་ཉི་ ཁ་ཤ་ཆང་ལུ་ད་བུ་རི༌ཝ། ཉི་ལ་ཉི་ངམ་ ཞི་ད་བུ་རང་ཙ་ལུ་རི༌ཝ།

¹³ ཉི་རི་དི་ཆི་ལུ་གི་ ཝག་པ་ཀབ་ཉི་ ལྕོག་མ་སེ་ལྕོག་མ་ཤིང་གེ་ ཞུད་པ་ད་བུ་རང་ ངབ་ཀ་སྐར་མ་སྨིན་དྲུག་བ་བུ་ འཛམ་གླིང་ག་ཏཱན་ ཞུད་ཉི་ཁེ༌ཝ།

¹⁴ ཉི་མོང་ནང་དྲི་ཝ་པུརུས་ཀིན་ཨ་ཉི་ ངམ་བུ་དྲི་ཉི་ མ་ཝ་རིན་ཇོང༌མ། ཉི་ཕུ་དང་མཚོ་བར་ཀ་ཆོ་ཁཱན་ས་ ཐམས་ཅན་རང་ རོག་ཏེ་བ་ཀ་བཱརང་ཀེ་ མ་ཝ་ཅོད༌པ།

¹⁵ ཉི་གེ་ འཛམ་གླིང་ག་དཔོན་བ་དང་ དབང་ཁཱན་བ་ དམག་དཔོན་དང་ སོ་ངོ་བེ་དིང་བ་ ཉི་དབང་ཚད་ཆི་ལུ་ཆོ་ཁཱན་ སོ་ངོ་བ་ ཉི་ཟ་པ་བ་དང་ ཟ་པ་མང་གི་ཁཱན་བ་ ཐམས་ཅན་རང་ ཕུང་ཀ་པང་དང་ ཕུ་ག་ལུང་ཆི་ལུ་བ་ཀ་བར་ཀ་ གུམ་ཆོ༌ཝ།

¹⁶ ཉི་རོག་ཏེ་བ་ཀི་ ཕུ་དང་ལུང་ཆི་ལུ་བ་རཱན་ཐཱན་ ཡེག་ཆོ་ཝ་ ན་ཧ་བ་ ཨ་ཧ་ཐུང་ཀ་ཏཱན་ངཱས་ཐཱན་ ཁྲི་ཐུང་ཀ་བཞུགས་ཁཱན་དང་ ཤི་ཤ་ཀ་ཏོང་ག་ཁྲིམས་གེ་ ཨ་ཧ་བ་གུམ་ཉི་ཐའི་དག༌ཉི།

¹⁷ ཧང་ཡ་དག་ནེ་ལ་ དཀོན་མཆོག་དང་ ཤི་ཤ་ཀ་ཏོང་ དགོངསམ་ཁྲེལ་པ་ག་ ནོང་ཆི་ལུ་ཁེ་པ་ ཤེག་པ༌ཅ། ཉི་ཨི་བི་གི་ ཐེས་པེ་རེ་བེ༌ཡ༎