མཇལ་ཁ། 5 - Tshangla New Testament (BSI)

དཔེ་ཆ་དང་ཤི་ཤ་ཀ་ཏོང་།

¹ ཉི་ཇི་གི་གོད་པ་ཀབ་ཉི་ གསེར་ཁྲི་ཐུང་ཀ་ བཞུགས་ཁཱན་ ལ་ཉོང་ལོ་ཀ་ཕྱག་ཀ་ ནང་ཀེ་དང་ཕིས་ཀེ་ འབྲི་བ་ཨ་ཝ་དཔེ་ཆ་ཐུར་ཐོང༌མ། ཉི་ཨོ་ཉ་དཔེ་ཆ་ཁེ་པ་ ཐེལ་ཙི་ཁ་ཟུམ་ཕི་ཉི་ དམ་པ་ཆོ༌ཝ།

² ཉི་ཇི་གི་ ཤུགས་སྟོབས་ཆི་ལུ་ཆོ་ཁཱན་ ཞིང་ཁམས་ག་འཐེན་པ་ཐུར་མཇལ༌བ། ཉི་རོ་ཀི་ གསུང་སྐད་ཆི་ལུ་ཨ་ཉི་ ཨོ་ཐེན་གསུངས་མ་ག་ ན་ཐ་ཝ་ ཨོ་ཐ་དཔེ་ཆ་ ཆོག་པེ་ག་དང་ ཨོ་ཉ་ག་ཕི་ཁཱན་ཐེལ་ཙི་བ་ ཕེག་པེ་རུང་ཁཱན་ ཨི་བི་ཅ་ཡ་དག༌ཉི།

³ ཨོ་ཉ་དཔེ་ཆ་ ཆོག་པེ་ག་དང་ ལྷག་པེ་རུང་ཁཱན་ ཞིང་ཁམས་ག་བཞུགས་ཁཱན་དང་ འཛམ་གླིང་ག་ཆོ་ཁཱན་ ཉི་འཛམ་གླིང་ཕརའ་ཁ་ཆོ་ཁཱན་ ཐུར་རང་མཱན་ཆི།

⁴ ཨོ་ཉ་དཔེ་ཆ་ཁེ་པ་ ཆོག་པེ་དང་ ལྷག་པེ་རུང་ཁཱན་ ཐུར་བུ་མ་ཝ་ཨ་དེན་གེ་ ཇང་གནམ་མེད་ས་མེད་གེ་ཕ།

⁵ དག་པ་ཀབ་ཉི་ ཨོ་ཉ་སོ་ངོ་ཆི་ལུ་ ཁེ་ཐུར་དང་ཕིཤི་ག་པོང་ཀེ་ ཇ་ག་གསུངས་ཆོ་ཝ་ གེ་ཕེ་ག་ནོར་ཤོ། གོད་ཅོ་ མི་རིགས་ཡ་ཧུ་ད་ག་ སེང་གེ་དང་ དཔོན་ད་ཝུད་ག་ མི་རྒྱུད་ཆི་ལུ་གི་ རྒྱལ་ཁ་ཉོང་པ་ཨ་དེན་གེ་ ཨོ་ཉ་དཔེ་ཆ་དང་ ཐེལ་ཙི་ཟུམ་ རོ་ཀི་ཨ་ཉི་ ཆོག་གནང་མེ་དག༌ཉི།

⁶ ཉི་ཇི་གི་གོད་པ་ཀབ་ཉི་ ཤི་ཤ་ཀ་ཏོང་ཐུར་ གསེར་ཁྲི་དང་ གསོན་པོ་ཨ་ཉི་ཆོ་ཁཱན་ སེམས་ཅན་ཕིཤི་ ཉི་སོ་ངོ་ཆི་ལུ་ ཁེ་ཐུར་དང་ཕིཤི་ག་བར་ཀ་ཐིང་ཉི་ བཞུགས་པ་མཇལ༌བ། རོག་ཤོ་ གོད་པ་ཀབ་ཉི་ གོ་མ་ཤེབ་ཐུར་ བཀྲོངས་མ་ད་བུ་ཆོ༌ཝ། ཉི་རོ་ཀ་ ཝ་རོང་ཟུམ་དང་ སྤྱན་ཟུམ་ཆོ༌ཝ། ཉི་ཨུ་ཉུ་ཤོ་ འཛམ་གླིང་ཐམས་ཅན་ག་ ཀུན་ཏི་ཁཱན་ དཀོན་མཆོག་ག་ ཐུགས་ཉིད་ཟུམ་གི་ཝ་ཆོ༌ཝ།

⁷ ཉི་རོ་ཀི་བྱོན་ཐཱན་ གསེར་ཁྲི་ཐུང་ཀ་བཞུགས་ཁཱན་ག་ ལ་ཉོང་ག་ལོ་ཀ་ཕྱག་གེ་ ཨོ་ཉ་དཔེ་ཆ་ཁེ་པ་ བསྣམས༌པ།

⁸ རོ་ཀི་ དཔེ་ཆ་བསྣམས་ཅ་ཨ་ཉི་ གསོན་པོ་ཨ་ཉི་ཆོ་ཁཱན་ སེམས་ཅན་ཕིཤི་དང་ སོ་ངོ་ཆི་ལུ་ཁེ་ཐུར་དང་ཕིཤི་གི་ རོ་ཀ་ཏཱན་ཕྱག་འཚལ་ཆོ༌ཝ། རོག་ཏེ་བ་ ཐམས་ཅན་གི་ པི་ཝང་དང་ པོས་གི་ཕུང་ཁཱན་ གསེར་ག་ཁོ་ བསྣམས་པ་ཆོ༌ཝ། ཉི་ཨུ་ཉུ་ཤོ་ དཀོན་མཆོག་ག་ དམ་པའི་སོ་ངོ་བ་ཀ་ སྨོན་ལམ་གི་ཝ་ཆོ༌ཝ།

⁹ ཉི་རོག་ཏེ་བ་ཀི་ མགུར་མ་སིང་མ་ཕུལ་ཆོ༌ཝ། ནཱན་ཤོ་ དཔེ་ཆ་བསྣམས་པེ་ག་དང་ ཨོ་ཉ་ཐེལ་ཙི་བ་ ཆོག་པེ་ག་རུང་ཁཱན་གི༌ལ། ཧང་ཡ་དག་ནེ་ལ་ ནཱན་ཤོ་ བཀྲོངས་མ་ཆོ༌ཝ། ན་ག་སྐུ་ཁྲག་གི་ཨ་ཉི་ དཀོན་མཆོག་ག་དེན་གེ་ མི་རིགས་མ་འདྲ་ཝ་བ་དང་ ལོ་མ་འདྲ་ཝ་ཨ་ཁཱན་བ་ ཉི་རྒྱལ་ཁབ་མ་འདྲ་ཝ་བ་དང་ འཛམ་གླིང་ག་སོ་ངོ་ཐམས་ཅན་རང་ ནཱན་གི་ ཤོག་ཉི་གནང༌མ།

¹⁰ ནཱན་གི་ རོག་ཏེ་བ་ བླ་མ་བ་ཀ་རྒྱལ་སྲིད་ ཅོད་ཉི་གནང་ཉི་ ཨ་ཧ་དཀོན་མཆོག་ག་ ཕྱག་ཞུ་ཁཱན་བ་ ཅོད་ཉི་གནང༌མ། ཉི་རོག་ཏེ་བ་ཀི་ འཛམ་གླིང་དབང་པེ་དག༌ཉི།

¹¹ ཨོ་ཉ་ཚི་ངེ་ ཇི་གི་ ཨོམ་ཆང་རང་ གོད་པ་ཀབ་ཉི་ ཞིང་ཁམས་ག་འཐེན་པ་བ་ སྟོང་ཕྲག་སྟོང་ཕྲག་དང་ ས་ཡ་ས་ཡ་ཨ་ཉི་ཆོ་ཁཱན་དང་ གསོན་པོ་ཨ་ཉི་ཆོ་ཁཱན་ སེམས་ཅན་བ་ ཉི་སོ་ངོ་ཆི་ལུ་ ཁེ་ཐུར་དང་ཕིཤི་ག་ཀཱན་ ན་ཐ༌ཝ། རོག་ཏེ་བ་ གསེར་ཁྲི་ཀོ་ལོ་ལོ་ ཛོ་མ་ཆོ༌ཝ།

¹² རོག་ཏེ་བ་ཀི་ ཀཱན་ཤོ་ཉི་ཞུན་ཆོ་ཝ་ བཀྲོངས་ཁཱན་ཤི་ཤ་ཀ་ཏོང་ཤོ་ རུང་ཁཱན་གི༌ལ། རོག་ཤོ་ སྟོབས་དབང་དང་ རྒྱུ་ནོར་ ཉི་རིག་པ་ ཤུགས་སྟོབས་ ཉི་གུས་ཞབས་དང་ གཟི་བརྗིད་ ཉི་གེ་ བྱིན་རླབས་ཉོང་པེ་རུང་ཁཱན་གི་ལ་དག༌ཉི།

¹³ ཉི་ཞིང་ཁམས་ག་ཆོ་ཁཱན་དང་ འཛམ་གླིང་ག་ཆོ་ཁཱན་ ཉི་འཛམ་གླིང་ཕརའ་ཁ་ཆོ་ཁཱན་དང་ རྒྱམ་མཚོ་ནང་ཀ་ཆོ་ཁཱན་ སེམས་ཅན་ ཐམས་ཅན་ག་ཀཱན་ ན་ཐ༌ཝ། རོག་ཏེ་བ་ཀི་ ཞུན་ཆོ་ཝ་ བྱིན་རླབས་དང་ གུས་ཞབས་ གཟི་བརྗིད་དང་ སྟོབས་དབང་ཤོ་ མ་འགྱུར་བརྟན་པ་ག་དེན་གེ་ གསེར་ཁྲི་ཐུང་ཀ་ བཞུགས་ཁཱན་དང་ ཤི་ཤ་ཀ་ཏོང་ག་གི་ལ་དག༌ཉི།

¹⁴ ཉི་གསོན་པོ་ཨ་ཉི་ཆོ་ཁཱན་ སེམས་ཅན་ཕིཤི་གི་ ཨ་མེན་དག་ཉི་ ཞུ་ལ་ཀབ་ཉི་ སོ་ངོ་ཆི་ལུ་ ཁེ་ཐུར་དང་ཕིཤི་གི་ ཕྱག་འཚལ་ཐཱན་ གསོལ་ཝ་ཏབ་ཆོ་ཝ༎