མཇལ་ཁ། 4 - Tshangla New Testament (BSI)

ཞིང་ཁམས་ག་ཁྲི།

¹ ཨོ་ཉ་ཚི་ངེ་ ཇི་གི་གོད་པ་ཀབ་ཉི་ ཞིང་ཁམས་ག་ ཀོ་ཕེག་པ་ཆོ༌ཝ། ཉི་ཇི་གི་ གོ་མ་བུ་ ན་ཐ་ཁཱན་ དམག་དུང་ག་ ཀཱན་པུརུས་ཀིན་ཨ་ཝ་ཆོ་ཁཱན་ གསུང་སྐད་གི་ ཇ་ག་གསུངས་ཆོ་ཝ་ ཐ་ཨོ་དོ། ཉི་ཨོ་ཐ་བ་ཀ་ཚི་ངེ་ ཧང་ཇུང་མེ་གི་ལ་སྨོ་ ཇི་གི་ ན་ག་ཡེག་པེ་དག༌ཉི།

² ཉི་ཤེབ་ཐུར་ག་རང་ ཇང་དམ་པའི་ཐུགས་ཉིད་གི་ དབང་པ་ཆོ༌ཝ། ཉི་ཇི་གི་གོད་པ་ཀབ་ཉི་ ཞིང་ཁམས་ག་ཁྲི་ཐུང་ཀ་ སོ་ངོ་ཐུར་ བཞུགས་པ་ཆོ༌ཝ།

³ ཉི་ཨོ་ཉ་ཁྲི་ག་ བཞུགས་ཁཱན་ཁེ་པ་ ནོར་བུ་ཡེང་ལུ་དང་ཙ་ལུ་ག་ འོད་ཆར་བ་ད་བུ་རང་ འོད་ཆར་བ་ཆོ༌ཝ། ཉི་ཁྲི་ག་ཀོ་ལོ་ལོ་ བྱུ་རུ་ཡེང་ལུ་ད་བུ་ཨ་ཉི་ མིག་དུམ་ཆར་བ་ཆོ༌ཝ།

⁴ ཨོ་ཉ་ཁྲི་ག་ཀོ་ལོ་ལོ་ ཁྲི་ཁེ་ཐུར་དང་ཕིཤི་ཆོ༌ཝ། ཉི་ཨོ་ཉ་ཁྲི་ ཁེ་ཐུར་དང་ཕིཤི་ག་ སོ་ངོ་ཆི་ལུ་ཁེ་ཐུར་དང་ཕིཤི་ བཞུགས་པ་ཆོ༌ཝ། རོག་ཏེ་བ་ཀ་ ནམ་བཟའ་ བ་ལིང་མིན་ཨ་ཝ་ཆོ༌ཝ། ཉི་རོག་ཏེ་བ་ཀ་དབུ་ག་ གསེར་ག་རི་ང་བཞེས་ཝ་ཆོ༌ཝ།

⁵ ཉི་ཁྲི་གེ་ ཏང་ལེ་ཕ་པུརུས་ཀིན་ཨ་ཉི་ འོད་ཤོ་ཉི་ མུང་ཕོག་པ་ག་ ཀཱན་ན་ཐཱན་ཆོ༌ཝ། ཉི་ཁྲི་ག་གུབ་ཀ་ མི་ཐོག་ཉི་ཐ་ཁཱན་ ག་ཙ་ཟུམ་ཆོ༌ཝ། ཉི་ཨོ་ཉ་བ་ཤོ་ དཀོན་མཆོག་ག་ ཐུགས་ཉིད་ཟུམ་གི་ཝ་ཆོ༌ཝ།

⁶ ཉི་ཨོ་ཉ་ཁྲི་ག་གུབ་ཀ་ གོད་པ་ཀབ་ཉི་ ཤེ་ག་མཚོ་ད་བུ་ཐུར་ཆོ༌ཝ། ཉི་གནམ་མེད་ས་མེད་ ཝང་ཝང་ཆོ༌ཝ། ཉི་ཁྲི་ག་ཀོ་ལོ་ལོ་ ཟུར་དྲང་རང་ གསོན་པོ་ཨ་ཉི་ཆོ་ཁཱན་ སེམས་ཅན་ཕིཤི་ཆོ༌ཝ། ཉི་རོག་ཏེ་བ་ཀ་ གུབ་ཀེ་དང་ཚི་ཁེ་རང་ མིང་གི་ཕུང་མ་ཆོ༌ཝ།

⁷ སེམས་ཅན་དང་པ་ཁེ་པ་ སེང་གེ་ད་བུ་ཆོ༌ཝ། ཉི་སེམས་ཅན་ཉིག་ཙིང་པ་ཁེ་པ་ ཇ་ཚ་ད་བུ་ཆོ༌ཝ། ཉི་སེམས་ཅན་སམ་པ་ག་ ཟུག་ཁེ་པ་ སོ་ངོ་ག་ཟུག་ད་བུ་རང་ཆོ༌ཝ། ཉི་སེམས་ཅན་ཕིཤི་པ་ཁེ་པ་ ཕེན་ཁཱན་ཝུན་བ་ད་བུ་ཆོ༌ཝ།

⁸ ཨོ་ཉ་གསོན་པོ་ཨ་ཉི་ཆོ་ཁཱན་ སེམས་ཅན་ཐམས་ཅན་ག་ ཡེ་ལམ་ཁུང་ཁུང་ཆོ༌ཝ། ཉི་རོག་ཏེ་བ་ ནང་ཀེ་ཨ་ནེ་བུ་ ཕིས་ཀེ་ཨ་ནེ་བུ་ མིང་གི་ཕུང་མ་ཆོ༌ཝ། ཉི་ངམ་བི་ནང་མ་ཝ་ རོག་ཏེ་བ་ཀི་ དམ་པ་དམ་པ་ དམ་པ་ཤོ་ གཙོ་བོ་ ཤུགས་སྟོབས་ཆི་ལུ་ཆོ་ཁཱན་ དཀོན་མཆོག་གི༌ལ། རོག་ཤོ་ གོ་མ་གེ་རང་ བཞུགས་ཁཱན་དང་ ཨོ་མ་བུ་བཞུགས་ཁཱན་ ཉི་ཇུ་ཀེ་བུ་བཞུགས་ཁཱན་གི་ལ་དག་ཉི་ ཞུ་ལུ་ཞུ་ས་རང་ཆོ་ཝ༌ལ།

⁹ ཁྲི་ཐུང་ཀ་བཞུགས་ཁཱན་དང་ མ་འགྱུར་བརྟན་པ་ག་དེན་གེ་ གསོན་པོ་ཨ་ཉི་བཞུགས་ཁཱན་ག་ཏཱན་ ཨོ་ཉ་གསོན་པོ་ཨ་ཉི་ཆོ་ཁཱན་ སེམས་ཅན་ཕིཤི་གི་ གཟི་བརྗིད་དང་ གུས་ཞབས་ ཉི་བཀའ་དྲིན་བསམ་མེ་དྲང་རང་

¹⁰ སོ་ངོ་ཆི་ལུ་ ཁེ་ཐུར་དང་ཕིཤི་གི་ ཁྲི་ག་བཞུགས་ཁཱན་ག་ཏཱན་ ཕྱག་འཚལ་ཉི་ མ་འགྱུར་བརྟན་པ་ཨ་ཉི་ བཞུགས་ཁཱན་ག་ གསོལ་ཝ་ཏབ་ཆོ༌ཝ། རོག་ཏེ་བ་ཀི་ རོག་ཏེ་བ་ཀ་རི་ང་ ཁྲི་ག་གུབ་ཀ་ཀེ་ཐཱན་ ཞུན་ཆོ་ཝ་

¹¹ ནཱན་ཤོ་ གཟི་བརྗིད་དང་གུས་ཞབས་ ཉི་སྟོབས་དབང་ ཐམས་ཅན་རང་ ཉོང་པེ་རུང་ཁཱན་ ཨ་ཧ་གཙོ་བོ་དང་ དཀོན་མཆོག་གི༌ལ། ཧང་ཡ་དག་ནེ་ལ་ བཀོད་ཉི་ཐ་ཁཱན་ ཐམས་ཅན་རང་ ནཱན་གི་ བཀོད་པ་གི༌ལ། ཉི་ན་ག་ཐུགས་བཞེད་གི་ཨ་ཉི་ ནཱན་གི་ རོག་ཏེ་བ་བཀོད་པ་ཨ་དེན་གེ་ རོག་ཏེ་བ་ཅ་གི་ལ་ དག༌ཉི༎