མཇལ་ཁ། 22 - Tshangla New Testament (BSI)

ཚེ་ག་རི།

¹ ཉི་ཞིང་ཁམས་ག་འཐེན་པ་གི་ ཇ་ག་ ཚེ་ག་རི་ག་རི་དྲང་ གེན་ཉི་གནང༌མ། ཉི་ཨོ་ཉ་རི་ཁེ་པ་ ཧིང་སང་སང་ ཤེ་ལེག་པུ་ད་བུ་རང་ཆོ༌ཝ། ཉི་ཨོ་ཉ་རི་ཤོ་ དཀོན་མཆོག་དང་ ཤི་ཤ་ཀ་ཏོང་ག་ གསེར་ཁྲི་གེ་ཤོ་ཉི་

² ཁྲོམ་ཆེན་ག་ གཞུང་ལམ་བར་ཀེ་ དོང་དིན་ཆོ༌ཝ། ཉི་རི་དྲང་ ཉ་གེ་ཐ་གེ་ སེ་མ་འདྲ་ཝ་ སོང་ཉིག་ཙིང་སེ་ཁཱན་ ཚེ་ག་ཤིང་བ་ ལིག་པ་ཆོ༌ཝ། ཨོ་ཉ་ཤིང་བ་ཤོ་ ལ་ཉི་དྲང་རང་ སེ་མ་འདྲ་ཝ་སེ་ཁཱན་ གི་ཝ་ཆོ༌ཝ། ཉི་ཤིང་ཤ་བ་བ་ཤོ་ རྒྱལ་ཁབ་ག་ སོ་ངོ་བ་དྲག་པེ་ག་ མཱན་ནཱན་ཆོ༌ཝ།

³ ཉི་ཨོ་ཉ་ཁྲོམ་ཆེན་ག་ཆོ་ཁཱན་བ་ཀི་ དཀོན་མཆོག་གེ་ ཧ་ལ་རང་ ཁྲིམས་ཉོང་པེ་མ་ཁེ༌ལ། ཧང་ཡ་དག་ནེ་ལ་ དཀོན་མཆོག་དང་ ཤི་ཤ་ཀ་ཏོང་ག་གསེར་ཁྲི་ ཉ་ག་ཨོ་ཕེ། ཉི་རོ་ཀ་གཡོག་པ་བ་ཀི་ རོ་ཀ་གསོལ་ཝ་ཏ༌པེ།

⁴ རོག་ཏེ་བ་ཀི་ རོ་ཀ་ཞལ་མཇལ༌བེ། ཉི་རོག་ཏེ་བ་ཀ་ པ་ཏོང་ག་ རོ་ཀ་མཚན་འབྲི་བ་ཨོ་ཕེ།

⁵ ཉི་ཉ་ག་ བི་ནང་ཧ་ལ་རང་མ་རི༌ལ། གཙོ་བོ་དཀོན་མཆོག་གི་ རོག་ཏེ་བ་ཀ་ཐུང་ཀ་ འོད་ཟེར་གནང་མེ་ གི་ཝ་ཨ་དེན་གེ་ ལ་ཝང་དང་ ངམ་མ་ཚཱས༌པ། ཉི་དུས་ཏ་བུ་ག་དེན་གེ་ རོག་ཏེ་བ་ཀི་དབང༌པེ།

⁶ ཉི་རོ་ཀི་ ཇ་ག་གསུངས་ཆོ་ཝ་ ཨོ་ཐ་ཆཱས་བ་ཤོ་ ཏེན་ཏོག་ཏོ་དང་ དེན་པ་གི༌ལ། མ་འོངས་པ་ག་ ཧང་ཇུང་མེ་གི་ལ་སྨོ་ གསུངས་མེ་དེན་གེ་ རོ་ཀ་ལུང་བསྟན་པ་བ་ ཀུན་ཏི་ཁཱན་ གཙོ་བོ་དཀོན་མཆོག་གི་ དོ་ཟོ་རང་ ཧང་ཇུང་མེ་གི་ལ་སྨོ་ གཡོག་པ་བ་ཀ་ གསུངས་མེ་དེན་གེ་ རོ་ཀ་ཞིང་ཁམས་ག་འཐེན་པ་ ཀུན་ཏི་ཝ་གི༌ལ༎

ཡི་ཤུ་བྱོན་མ་ཀོར་གེ།

⁷ གོད་ཅོ་ ཇང་དོ་ཟོ་རང་ལོག༌པེ། ཉི་ཨོ་ཐ་དཔེ་ཆ་ནང་ཀ་ ལུང་བསྟན་ཁཱན་ གསུང་ག་བ་ཀ་ ཆ་གནས་ཐ་ཁཱན་ སོ་ངོ་བ་ བྱིན་རླབས་ཅན་གི་ལ་དག༌ཉི།

⁸ ཨོ་ཐ་བ་ ན་ཐ་ཁཱན་དང་ མཇལ་ཁཱན་ཤོ་ ཇང་ཡུ་ཧན་ན་གི༌ལ། ཇི་གི་ ཨོ་ཐ་བ་མཇལ་ཉི་ ན་ཐ་ལ་ཀབ་ཉི་ ཇ་ག་ཏཱན་ ཨོ་ཐ་བ་གེན་ཉི་གནང་ཁཱན་ ཞིང་ཁམས་ག་འཐེན་པ་ག་ གསོལ་ཝ་ཏ་པེ་དེན་གེ་ ཇི་གི་ཕྱག་འཚལ༌བ།

⁹ དག་པ་ཀབ་ཉི་ རོ་ཀི་ ཇ་ག་གསུངས་ཆོ་ཝ་ ནཱན་གི་ ཇ་ག་གསོལ་ཝ་མ་ཏབ༌ཅོ། ཇང་བུ་ ནཱན་དང་ ན་ག་ལུང་བསྟན་པ་ ཡུང་ཟི་བ་ ཉི་ཨོ་ཐ་ དཔེ་ཆ་ག་འབྲི་ཉི་ཐ་ཁཱན་ ཆ་གནས་ཐ་ཁཱན་བ་ད་བུ་ གཡོག་པ་ཐུར་ཤ་གི༌ལ། དཀོན་མཆོག་ཐུར་ག་ཤ་ གསོལ་ཝ་ཏབ་ཅོ་དག༌ཉི།

¹⁰ ཉི་གེ་ རོ་ཀི་ ཇ་ག་གསུངས་ཆོ་ཝ་ ནཱན་གི་འབྲི་ཁཱན་ ལུང་བསྟན་ག་གསུང་ཁེ་པ་ ཐེལ་ཙི་ཕི་ཉི་ མ་དམ་ཅོ་ན། ཧང་ཡ་དག་ནེ་ལ་ དུས་ཙུན་རེན་པ༌ཅ།

¹¹ ལའི་ངན་པ་ཨ་ཁཱན་བ་ ངན་པ་རང་ཨན་ཆེན། ཙོག་པ་ཨ་ཉི་ཆོ་ཁཱན་བ་ ཙོག་པ་ཨ་ཉི་རང་ཆོན་ཆེན། དག་པ་ཀབ་ཉི་ དྲང་པུ་ཆོ་ཁཱན་བ་ཀི་ དྲང་པུ་ཨ་ཉི་རང་ཆོན་ཆེན། ཉི་དམ་པ་ཆོ་ཁཱན་བ་ཀི་ དམ་པ་ཨ་ཉི་རང་ཆོན་ཆེན།

¹² གོད་ཅོ་ ཇང་དོ་ཟོ་རང་ལོག༌པེ། ཉི་ཐམས་ཅན་ག་ རོག་ཏེ་བ་ཀི་ ཨ་ཁཱན་ལའི་དང་ཏུ་ཉི་ ཚ་མང་ཏ་པེ་དེན་གེ་ ཇ་ག་སེ་རབ་ ཇང་ཀབ་ཉི༌ཅ།

¹³ ཇང་ཤོ་ ཨལ་ཕ་དང་ཨོ་མེ་ག་ གོ་དང་ཇུག་ ཉི་གོ་ཙུག་ཁཱན་དང་ ཇུག་དུང་ཁཱན་གི༌ལ།

¹⁴ རང་རང་ས་ ཁ་མུང་བ་ཟིག་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ རོག་ཏེ་བ་ ཁྲོམ་ཆེན་ག་ སྒོ་རེ་ཁ་བ་ཀ་ནང་ཀ་ནུབ་ཐཱན་ ཚེ་ག་ཤིང་གེ་ སེ་ཟ་ལེ་ཉོང༌པེ།

¹⁵ ཁུ་ག་བ་དང་ ངཱན་ཕི་ཁཱན་བ་ ལུས་འབྲེལ་མ་ཙང་མ་ཨ་ཁཱན་དང་ སོ་ངོ་ཤེ་ཁཱན་བ་ ཉི་སྐུ་ག་ གསོལ་ཝ་ཏབ་ཁཱན་བ་དང་ སོ་ད་ཕི་ལེ་ག་ ཤོ་ནང་ཕེ་ཁཱན་ ཐམས་ཅན་རང་ ཁྲོམ་ཆེན་ག་ཕིས་ཀ་ཨོ་ཕེ།

¹⁶ ཇང་ཤོ་ ཡི་ཤུ་གི༌ལ། ཆོས་ཚོགས་བ་ཀ་དེན་གེ་ ཨོ་ཐ་བ་ ཐམས་ཅན་རང་ ན་ག་ཡེག་ཅོ་དག་ཉི་ ཇི་གི་ ཞིང་ཁམས་ག་འཐེན་པ་ ན་ག་བཱརང་ཀ་ ཀུན་ཏི་ཝ་གི༌ལ། ཇང་ཤོ་ དཔོན་ད་ཝུད་ག་ རྒྱུད་པ་གི༌ལ། ཉི་ཇང་ཤོ་ ཝུན་བེད་པེ་ ཝང་ཝང་ཨ་ཉི་ཤར་ཁཱན་ བོ་ཇུ་ལུ་གི༌ལ།

¹⁷ ཉི་དམ་པའི་ཐུགས་ཉིད་དང་ གཉེན་ཕི་ལེ་ཅམ་ཁཱན་ ཟ་མིན་གི་ བྱོན་ཤོ་དག་ཉི་ ཞུན་ཆོ་ཝ་ ཉི་རོག་ཏེ་བ་ཀི་ ཞུ་ཝ་ག་ན་ཐ་ཁཱན་ ཐམས་ཅན་གི་ བྱོན་ཤོ་དག་ཉི་ཞུའི། ཉི་རི་ནང་སོབ་ཁཱན་བ་ཨུན་ཆེན། ཉི་ཨི་བི་གི་ སེམས་ཨ་ཝ་ཐུར་ ཚེ་ག་རི་ཁེ་པ་ སེ་རབ་ཨ་ཉི་ཇམ་ཆེན།

¹⁸ ཨོ་ཐ་ལུང་བསྟན་ག་ དཔེ་ཆ་ནང་ཀ་ཆོ་ཁཱན་གསུང་ ན་ཐ་ཁཱན་ ཐམས་ཅན་ག་ ཇི་གི་ ན་སྒྲིང་སྒྲིང་ཨ་ཉི་ཡེག༌ཅ། ཨི་བི་གི་ ཨོ་ཐ་འབྲི་ཁཱན་ག་ཐུང་ཀ་ པོན་མ་ཐུར་ ཨོ་ཐ་དཔེ་ཆ་ནང་ཀ་འབྲི་བ་ག་ རེམ་པ་བ་ དཀོན་མཆོག་གི་ ཨོ་ཉ་སོ་ངོ་ག་ཐུང་ཀ་ པོན་ཉི་གནང༌མེ།

¹⁹ ཉི་ཨི་བི་གི་ ཨོ་ཐ་ལུང་བསྟན་ག་ དཔེ་ཆ་ནང་ཀ་ཆོ་ཁཱན་ གསུང་ཐུར་བུ་ ཤོ་ཉི་གེ་མ་ཐུར་ ཨོ་ཐ་དཔེ་ཆ་ནང་ཀ་འབྲི་ཁཱན་ ཚེ་ག་ཤིང་དང་ དམ་པའི་ཁྲོམ་ཆེན་གེ་ ཨོ་ཉ་སོ་ངོ་ག་ ཐོབ་ཐང་ཁེ་པ་ དཀོན་མཆོག་གི་བསྣམས༌པེ།

²⁰ ཨོ་ཐ་བ་ ཐམས་ཅན་ག་ གསུངས་ཁཱན་གི་གསུངས་ལ་ ཇང་དེན་པ་རང་ དོ་ཟོ་ཨོ་ཕེ་དག༌ཉི། ཨ་མེན། བྱོན་ཤོ་ གཙོ་བོ་ཡི་ཤུ།

²¹ གཙོ་བོ་ཡི་ཤུ་ག་ཐུགས་རྗེ་ དཀོན་མཆོག་ག་ དམ་པའི་སོ་ངོ་ ཐམས་ཅན་ཀབ་ཉི་ བཞུགས་ཅེན། ཨ་མེན༎