མཇལ་ཁ། 21 - Tshangla New Testament (BSI)ཡ་རུ་ཤ་ལེམ་སིང༌མ། 1 ཉི་གེ་ ཇི་གི་གོད་པ་ཀབ་ཉི་ ཞིང་ཁམས་སིང་མ་དང་ འཛམ་གླིང་སིང་མ་ཐོང༌མ། ཧང་ཡ་དག་ནེ་ལ་ གོ་མ་ག་ ཞིང་ཁམས་དང་ གོ་མ་ག་འཛམ་གླིང་ མ་ཝ་རི་ཝ་ཆོ༌ཝ། ཉི་རྒྱམ་མཚོ་བུ་མཱན་ཆི། 2 ཉི་ཇི་གི་ ཨོ་ཉ་དམ་པའི་ཁྲོམ་ཆེན་ ཡ་རུ་ཤ་ལེམ་སིང་མ་ཁེ་པ་ གཉེན་ཕི་ལེ་ཅམ་ཁཱན་ ཟ་མིན་གི་ རོ་ཀ་ཕེ་ཝག་ཙ་ག་དེན་གེ་ ཅམ་པ་པུརུས་ཀིན་ཨ་ཉི་ ཞིང་ཁམས་ག་བཞུགས་ཁཱན་ དཀོན་མཆོག་ག་ སྐུན་མདུན་གེ་དོང་ ཨོ་ཕ་ཐོང༌མ། 3 ཉི་གསེར་ཁྲི་གེ་ གསུང་སྐད་ཆི་ལུ་ཨ་ཉི་ གསུངས་མ་ག་ ཇི་གི་ན་ཐ༌ཝ། ཉི་ཨོམ་ དཀོན་མཆོག་ག་ཕོ་བྲང་ཤོ་ རོ་ཀ་སོ་ངོ་བ་ཀབ་ཉི་གི༌ལ། རོག་ རོག་ཏེ་བ་ཀབ་ཉི་བཞུགས༌པེ། ཉི་རོག་ཏེ་བ་ཤོ་ རོ་ཀ་སོ་ངོ་གི༌ལ། ཉི་དཀོན་མཆོག་ རོག་ཏེན་བུ་ རོག་ཏེ་བ་ཀབ་ཉི་བཞུགས༌པེ། 4 རོ་ཀི་ རོག་ཏེ་བ་ཀ་མིང་གེ་ མིང་རི་ཕག་ཉི་གནང༌མེ། ཉི་ཨོ་ཉ་གེ་ག་ཏཱན་ ཤི་ལེ་དག་ཉི་མཱན༌ཅ། དཀའ་ཝ་ཅཱད་པེ་མཱན༌ཅ། གེ་ཕེ་མཱན༌ཅ། ང་མེ་ཤོག་པེ་བུ་མཱན༌ཅ། ཧང་ཡ་དག་ནེ་ལ་ གོ་མ་ཆོ་ཁཱན་བ་ དུས་ཏ་བུ་ག་དེན་གེ་ མ་ཝ་རི་ཝ་དག༌ཉི། 5 ཉི་གེ་ གསེར་ཁྲི་ཐུང་ཀ་ བཞུགས་ཁཱན་གི་ གསུངས་ཆོ་ཝ་ གོད་ཅོ་ ཇི་གི་ ཐམས་ཅན་རང་ སིང་མ་ཅོད༌ཅ། ཇི་གི་ཡེག་ཁཱན་ཁེ་པ་ འབྲི་ཤོ། ཧང་ཡ་དག་ནེ་ལ་ ཇ་ག་ཆཱས་བ་ཤོ་ དེན་པ་དང་ ལོ་དི་ལེ་རེ་ཁཱན་གི༌ལ། 6 རོ་ཀི་ ཇ་ག་གསུངས་ཆོ་ཝ་ ཐམས་ཅན་རང་ཆུ༌མ། ཇང་ཤོ་ ཨལ་ཕ་དང་ ཨོ་མེ་ག་ གོ་དང་ཇུག་གི༌ལ། རི་ནང་སོབ་ཁཱན་ ཐམས་ཅན་ག་ ཇི་གི་ ཚེ་ག་ཕོག་ཅི་རི་གེ་ ཏོང་པ་གེ་ ཇ་མེ་བི༌ལེ། 7 ཉི་རྒྱལ་ཁ་ཉོང་ཁཱན་ ཐམས་ཅན་ག་ ཇི་གི་ ཨོ་ཐ་བྱིན་རླབས་བ་བི༌ལེ། ཉི་ཇང་ཤོ་ རོག་ཏེ་བ་ཀ་ དཀོན་མཆོག་དང་ རོག་ཏེ་བ་ཤོ་ ཇ་ག་ཝག་ཙ་བ་རི༌ལེ། 8 དག་པ་ཀབ་ཉི་ ཡོང་བ་ལུ་ཆོ་ཁཱན་བ་དང་ དད་པ་མ་ཨ་ཁཱན་བ་ མ་ཐྲང་ཁཱན་བ་དང་ སོ་ངོ་ཤེ་ཁཱན་ ལུས་འབྲེལ་མ་ཙང་མ་ཨ་ཁཱན་བ་དང་ ངཱན་ཕི་ཁཱན་བ་ སྐུ་ག་གསོལ་ཝ་ཏབ་ཁཱན་བ་དང་ སོ་ད་ཕི་ཁཱན་ ཐམས་ཅན་རང་ མི་དང་སཱལ་ཕར་གི་དིར་ཁཱན་མཚོ་ནང་ཀ་ ཆོ་ལེ་ཁེ༌ལེ། ཉི་ཨུ་ཐུ་ཤོ་ ཤི་སྲོག་ཉིག་ཙིང་པ་གི༌ལ། 9 ཉི་ཞིང་ཁམས་ག་འཐེན་པ་ ཟུམ་ག་པོང་ཀེ་ རེམ་པ་མཇུག་དུས་ ཟུམ་གི་ཕུང་ཁཱན་ གུར་བུ་ཟུམ་མེན་ཁཱན་ ཞིང་ཁམས་ག་འཐེན་པ་བྱོན་ཐཱན་ ཇ་ག་གསུངས་ཆོ་ཝ་ ཇང་ཀབ་ཉི་ཨོ་དོ། ཉི་ཇི་གི་ ན་ག་ཤི་ཤ་ཀ་ཏོང་ག་ གསང་ཡུམ་གེན་མེ་དག༌ཉི། 10 ཉི་རོ་ཀི་ ཇང་དམ་པའི་ཐུགས་ཉིད་ག་ཐུང་ཀེ་ཨ་ཉི་ ཕུ་ཅེན་མུ་ཐུར་ག་ཐུང་ཀ་ བུན་ཐཱན་ ཨོ་ཉ་དམ་པའི་ཁྲོམ་ཆེན་ ཡ་རུ་ཤ་ལེམ་ སིང་མ་ཁེ་པ་ ཞིང་ཁམས་ག་བཞུགས་ཁཱན་ དཀོན་མཆོག་ག་ སྐུན་མདུན་གེ་དོང་ བབ་ཕ་ག་གེན་ཉི་གནང༌མ། 11 ཨོ་ཉ་ཁྲོམ་ཆེན་ཤོ་ དཀོན་མཆོག་ག་ གཟི་བརྗིད་གི་ཕུང་མ་ཆོ༌ཝ། ཉི་འོད་ཡེང་ལུ་དང་ ཙ་ལུ་ཤོ་ཁཱན་ ནོར་བུ་པུརུས་ཀིན་ཆོ༌ཝ། ཉི་ཤེ་ད་བུ་རང་ ཧིང་སང་སང་ཆོ༌ཝ། 12 ཨོ་ཉ་དེང་ཙི་བ་ཤོ་ ཆི་ལུ་དང་ཅེན་མུ་ ཨ་ཝ་ཆོ༌ཝ། ཉི་སྒོ་རེ་ཁ་སོང་ཉིག་ཙིང་ཆོ༌ཝ། ཉི་སྒོ་རེ་ཁ་སོང་ཉིག་ཙིང་ག་ ཞིང་ཁམས་ག་འཐེན་པ་ སོང་ཉིག་ཙིང་ ཁུང་མ་ཆོ༌ཝ། ཉི་ཨོ་ཉ་སྒོ་རེ་ཁ་ཐུང་ཀ་ ཨིས་རེལ་ག་ མི་རིགས་སོང་ཉིག་ཙིང་ག་ མིང་འབྲི་བ་ཆོ༌ཝ། 13 ཤར་ཕྱོགས་ལོ་ཀ་ སྒོ་རེ་ཁ་སམ་ཆོ༌ཝ། བྱང་ཕྱོགས་ལོ་ཀ་ སྒོ་རེ་ཁ་སམ་ཆོ༌ཝ། ལྷོ་ཕྱོགས་ལོ་ཀ་ སྒོ་རེ་ཁ་སམ་ཆོ༌ཝ། ཉི་ནུབ་ཕྱོགས་ལོ་ཀ་ སྒོ་རེ་ཁ་སམ་ཆོ༌ཝ། 14 ཨོ་ཉ་ཁྲོམ་ཆེན་ག་དེང་ཙི་ག་ རྨང་སོང་ཉིག་ཙིང་ ཆེ་ཝ་ཆོ༌ཝ། ཉི་ཨོ་ཉ་ རྨང་སོང་ཉིག་ཙིང་ག་ཐུང་ཀ་ ཤི་ཤ་ཀ་ཏོང་ག་ སྐུ་ཚབ་སོང་ཉིག་ཙིང་ག་ མིང་འབྲི་བ་ཆོ༌ཝ། 15 ཉི་ཇང་ཀབ་ཉི་ གསུང་གྲོས་མཛད་ཁཱན་ ཞིང་ཁམས་ག་འཐེན་པ་གི་ ཁྲོམ་ཆེན་དང་ ཨོ་ཉ་སྒོ་རེ་ཁ་ག་བ་ ཉི་དེང་ཙི་བ་ཟེར་བེ་དེན་གེ་ རོ་ཀ་ཕྱག་ཀ་ གསེར་གི་ཅོད་ཁཱན་ ཕྱག་འཁར་ཐུར་ བསྣམས་པ་ཆོ༌ཝ། 16 ཉི་རོ་ཀི་ཟེར་ཉི་ གཟིགས་པ་ཀབ་ཉི་ ཨོ་ཉ་ཁྲོམ་ཆེན་ག་ རིང་ཐུང་དང་ ཡང་དོ་ཉི་ གྲུབ་བཞི་ཨ་ཝ་ཆོ༌ཝ། ཉི་ཨོ་ཉ་ཁྲོམ་ཆེན་ག་ རིང་ཐུང་དང་ཡང་ཤོ་ ཀི་ལོ་མི་ཊར་ 2400 ཆོ༌ཝ། 17 ཉི་རོ་ཀི་ དེང་ཙི་ཟེར་བ་ཀབ་ཉི་ དེང་ཙི་ཤོ་ རོང་ནང་ 35 ཆོ༌ཝ། སོ་ངོ་གི་ ཟེར་ཁཱན་ཚཱད་གི་རང་ ཞིང་ཁམས་ག་འཐེན་པ་གི་ ཟེར་བ་གི༌ལ། 18 དེང་ཙི་ཤོ་ འོད་ཡེང་ལུ་དང་ ཙ་ལུ་ཤོ་ཁཱན་ ནོར་བུ་གི་ བཞེངས་པ་ཆོ༌ཝ། ཉི་ཁྲོམ་ཆེན་ཤོ་ གསེར་རང་ཇུང་གི་ཨ་ཉི་ བཞེངས་པ་ཆོ༌ཝ། ཉི་ཤེ་ད་བུ་རང་ ཧིང་སང་སང་ཆོ༌ཝ། 19 ཉི་དེང་ཙི་ག་རྨང་ཤོ་ ནོར་བུ་མ་འདྲ་ཝ་བ་ཀི་ ཅེམ་པུ་ཅོད་པ་ཆོ༌ཝ། གོ་རང་ ཡས་པིས་དག་ཁཱན་ ཉིག་ཙིང་པ་ཤོ་ སབ་ཕི་རོས་དག་ཁཱན་ ཉི་སམ་པ་ཤོ་ ཁལ་ཀེ་དོན་དག་ཁཱན་ ཕིཤི་པ་ཤོ་ས་མ་རག་དོས་དག་ཁཱན་ 20 ལྔ་པ་ཤོ་ སར་དོ་ནུགས་དག་ཁཱན་ ཉི་ཁུང་པ་ཤོ་ སར་དི་ཡོན་དག་ཁཱན་ ཟུམ་པ་ཤོ་ ཁུརུ་སོ་ལི་ཐོས་དག་ཁཱན་ ཡེན་པ་ཤོ་ བེ་རུལ་ལོས་དག་ཁཱན་ ཉི་དགུ་པ་ཤོ་ ཏོ་པ་ཟི་ཡོན་དག་ཁཱན་ ཉི་སེ་པ་ཤོ་ ཁུརུ་སོ་ཕརའ་སོས་དག་ཁཱན་ སོང་ཐུར་པ་ཤོ་ ཧཝའ་ཀིན་ཐོས་དག་ཁཱན་ ཉི་སོང་ཉིག་ཙིང་པ་ཤོ་ ཨ་མེ་ཐུས་ཏོས་དག་ཁཱན་ཆོ་ཝ༌ལ། 21 ཉི་སྒོ་རེ་ཁ་སོང་ཉིག་ཙིང་ག་ མོ་ཏི་སོང་ཉིག་ཙིང་ཆོ༌ཝ། ཉི་སྒོ་རེ་ཁ་ཐུར་རེ་རེ་ཤོ་ མོ་ཏི་ཐུར་རེ་རེ་གི་ཅོད་པ་ཆོ༌ཝ། ཉི་ཁྲོམ་ཆེན་ག་ལམ་ཤོ་ གསེར་རང་ཇུང་གི་ཝ་ཆོ༌ཝ། ཉི་ཤེ་ད་བུ་རང་ ཧིང་སང་སང་ཆོ༌ཝ། 22 ཉི་ཇི་གི་གོད་པ་ཀབ་ཉི་ ཁྲོམ་ཆེན་ག་ མཆོད་ཁང་མཱན་ཆི། ཧང་ཡ་དག་ནེ་ལ་ ཤུགས་སྟོབས་ཆི་ལུ་ཆོ་ཁཱན་ གཙོ་བོ་དཀོན་མཆོག་དང་ ཤི་ཤ་ཀ་ཏོང་ཤོ་ མཆོད་ཁང་གི་ཝ་ཆོ༌ཝ། 23 ཉི་ཨོ་ཉ་ཁྲོམ་ཆེན་ག་ འོད་ཆར་བེ་ག་དེན་གེ་ ངམ་དང་ལ་ཉི་ངམ་ ཚཱས་པ་མཱན་ཆི། ཧང་ཡ་དག་ནེ་ལ་ དཀོན་མཆོག་ག་ གཟི་བརྗིད་ཤོ་ འོད་ཟེར་གི་ཝ་ཆོ༌ཝ། ཉི་ཤི་ཤ་ཀ་ཏོང་ཤོ་ ལ་ཝང་གི་ཝ་ཆོ༌ཝ། 24 རྒྱལ་ཁབ་ག་བ་ ཨོ་ཉ་ཁྲོམ་ཆེན་ག་ འོད་ཟེར་ནང་ཀེ་དང༌མེ། ཉི་དཔོན་བ་ཀི་ རོག་ཏེ་བ་ཀ་ རྒྱུ་ནོར་ལོངས་སྤྱོད་ ཨོ་ཉ་ཁྲོམ་ཆེན་ག་ཏཱན་ཕ༌ལེ། 25 ཉི་ཨོ་ཉ་ཁྲོམ་ཆེན་ག་ སྒོ་རེ་ཁ་ག་བ་ ནོང་ཐུར་རང་ མ་དམ༌པ། ཧང་ཡ་དག་ནེ་ལ་ ཨོ་ཉ་ཁྲོམ་ཆེན་ག་ བི་ནང་ ཧ་ལ་རང་ མ་རི༌ལ། 26 ཉི་རྒྱལ་ཁབ་ ཐམས་ཅན་གེ་ གཟི་བརྗིད་དང་ གུས་ཞབས་ ཨོ་ཉ་བ་ ཁྲོམ་ཆེན་ག་ཏཱན་ཕ༌ལེ། 27 དག་པ་ཀབ་ཉི་ མ་ཙང་མ་ཆོ་ཁཱན་ ཧང་རང་ ཨོ་ཉ་ཁྲོམ་ཆེན་ནང་ཀ་ ནུ་ཕེ་མ་བི༌ལ། ཉི་ཙོག་པ་ཨ་ཝ་ ལའི་ཨ་ཁཱན་དང་ རྫུས་མ་ཆོ་ཁཱན་བ་བུ་ ཨོ་ཉ་ནང་ཀ་ ནུ་ཕེ་མ་བི༌ལ། དག་པ་ཀབ་ཉི་ ཤི་ཤ་ཀ་ཏོང་ག་ ཚེ་ག་དཔེ་ཆ་ནང་ཀ་ མིང་ཆོ་ཁཱན་བ་ཤ་ ཨོ་ཉ་ཁྲོམ་ཆེན་ནང་ཀ་ ནུ་ཕེ་བི༌ལེ༎ |