མཇལ་ཁ། 20 - Tshangla New Testament (BSI)ཉིང་ 1000། 1 ཉི་གེ་ ཇི་གི་གོད་པ་ཀབ་ཉི་ ཞིང་ཁམས་ག་འཐེན་པ་ཐུར་ ཞིང་ཁམས་གེ་དོང་ བྱོན་མ་ག་མཇལ༌བ། ཉི་རོ་ཀ་ཕྱག་ཀ་ ར་ཅི་མ་ཁཱན་ཧོང་ཅི་ག་ དེ་མེ་ཟུ་དང་ ལྕགས་ཐག་ཅིད་པུ་ཨ་ཝ་ཐུར་ བསྣམས་པ་ཆོ༌ཝ། 2 ཉི་རོ་ཀི་ འབྲུག་ཙུང་ཐཱན་ ཉིང་ 1000 ག་དེན་གེ་ ཐིག་ཆོ༌ཝ། ཉི་ཨོ་ཉ་འབྲུག་ཤོ་ དང་པོ་ག་ རུ་གེ་ནང་དང་ རོག་ཤོ་ བདུད་སེ་ཏཱན་གི་ཝ་ཆོ༌ཝ། 3 ཉི་ཞིང་ཁམས་ག་འཐེན་པ་གི་ འབྲུག་ར་ཅི་མ་ཁཱན་ ཧོང་ཀང་ག་ཏཱན་ཐུབ་གེ༌མ། ཉི་ཉིང་ 1000 ཐུར་ མ་ཆུ་མ་སག་པུ་ རོ་ཀི་རྒྱལ་ཁབ་བ་ཀ་ མགུ་སྐོར་ཕི་ལེ་ མར་ཆེན་དག་པ་གི་ ཞིང་ཁམས་ག་འཐེན་པ་གི་ ཨོ་ཉ་ཧོང་ཀང་དམ་ཐཱན་ ཐེལ་ཙི་ཕི་ཉི་གནང༌མ། ཉི་ཉིང་ 1000 ཐུར་ག་ཚི་ངེ་ རོག་རེབ་ཀིན་ཐུར་ག་དེན་གེ་ ཐར༌བེ། 4 ཉི་གེ་ ཇི་གི་གོད་པ་ཀབ་ཉི་ ཁྲི་བ་ཆོ༌ཝ། ཉི་ཁྲིམས་ཅཱད་པེ་ག་དབང་ཚད་ ཨོ་ཉ་ཁྲི་ཐུང་ཀ་ བཞུགས་ཁཱན་བ་ཀ་ གནང་མ་ཆོ༌ཝ། ཉི་ཡི་ཤུ་ག་ འཛོམས་དཔང་ ཨ་ཝ་ཨ་དེན་གེ་དང་ དཀོན་མཆོག་ག་ གསུང་ག་ཡོར་ཀེ་ རོག་ཏེ་བ་ ཤ་རང་ཅཱད་ཉི་ གེམ་ཁཱན་བ་ཀ་ རྣམ་ཤེས་བ་བུ་ ཇི་གི་ཐོང༌མ། རོག་ཏེ་བ་ཀི་ ཏེ་ངན་སེམས་ཅན་དང་ རོ་ཀ་སྐུ་ག་གསོལ་ཝ་མ་ཏབ་ཅི། ཉི་ཨོ་ཉ་ ཏེ་ངན་སེམས་ཅན་ག་རྟགས་ རོག་ཏེ་བ་ཀ་ པ་ཏོང་ག་ ལ་ཝ་མཱན་ཆི། ཉི་རོག་ཏེ་བ་ཀ་ ག་དང་ག་བུ་ ལ་ཝ་མཱན་ཆི། རོག་ཏེ་བ་ ལོག་ཉི་གསོན་པོ་ཨ་ཉི་ བཞེངས་ཐཱན་ ཁིརིས་ཀབ་ཉི་ ཉིང་ 1000 ཐུར་དབང༌པ། 5 ཨུ་ཐུ་ཤོ་ གསོན་པོ་ཨ་ཉི་ བཞེངས་པེ་ག་ གོ་དང་པ་གི༌ལ། ཉི་ཨོ་ཉ་ ཉིང་ 1000 ཐུར་ མ་ཆུ་མ་སག་པུ་ བཱརའ་ཤི་ཁཱན་བ གསོན་པོ་ཨ་ཉི་ མ་ཝུ་ཝ༌ལ། 6 ཨོ་ཐ་ གོ་དང་པ་གསོན་པོ་ཨ་ཉི་ ཝུ་ལེ་ཉོང་ཁཱན་བ་ བྱིན་རླབས་ཅན་དང་ དམ་པ་གི༌ལ། རོག་ཏེ་བ་ཀ་ཐུང་ཀ་ ཤི་སྲོག་ཉིག་ཙིང་པ་ག་དབང་ཚད་ ཧང་རང་མཱན༌ཅ། དག་པ་ཀབ་ཉི་ རོག་ཏེ་བ་ཤོ་ དཀོན་མཆོག་དང་ ཁིརིས་ག་ བླ་མ་རི་ཉི་ རོག་ཀབ་ཉི་ ཉིང་ 1000 ཐུར་དབང༌པེ༎ སེ་ཏཱན་ཕ་མ༌ལ། 7 ཉིང་ 1000 ཐུར་ཆུམ་དེན་གེ་ སེ་ཏཱན་བཙོན་གེ་ཐར༌བེ། 8 ཉི་རོག་ཕིས་ཀ་དེན་ཐཱན་ འཛམ་གླིང་ག་ཟུར་ཅི་ ཐམས་ཅན་གེ་ གོག་དང་ མ་གོག་དག་ཁཱན་ རྒྱལ་ཁབ་བ་ཀ་ མགུ་སྐོར་ཕི༌ལེ། ཉི་རོ་ཀི་ རོག་ཏེ་བ་ ཕྱད་མདའ་ཕི་ལེ་དེན་གེ་ ཏབ་ཐུར་དུས༌པེ། ཉི་རྒྱམ་མཚོ་ནེ་མ་ག་ཆོ་ཁཱན་ བེ་ཙ་ད་བུ་རང་ དྲང་ཨ་ལེ་མར་བ་ག་ སོ་ངོ་ཨོ་ཕེ། 9 ཉི་རོག་ཏེ་བ་ འཛམ་གླིང་ཐམས་ཅན་ག་དི་ཉི་དུས་ཐཱན་ དཀོན་མཆོག་ག་ དམ་པའི་སོ་ངོ་བ་དང་ ཕང་ཁཱན་ཁྲོམ་ཆེན་བ་ རོག་ཏེ་བ་ཀི་ ཉ་གེ་ཐ་གེ་ལོམ་ཆོ༌ཝ། དག་པ་ཀབ་ཉི་ ཞིང་ཁམས་གེ་དོང་ མི་ཞུད་ཉི་ཁེན་ཐཱན་ རོག་ཏེ་བ་ ཐམས་ཅན་རང་ མི་གི་ཞུམ༌པ། 10 ཉི་གེ་ རོག་ཏེ་བ་ཀ་ མགུ་སྐོར་ཕི་ཁཱན་ བདུད་ཁེ་པ་ སཱལ་ཕར་ག་མི་ཙང་དང་མི་ག་མཚོ་ནང་ཀ་ཏཱན་ ཐུབ་གེ༌མ། ཉི་ཨོ་ཉ་ནང་ཀ་ ཏེ་ངན་སེམས་ཅན་དང་ ལུང་བསྟན་པ་རྫུས་མ་བ་བུ་ ཅ་གི་ཝ༌ལ། ཉི་རོག་ཏེ་བ་ ངམ་བི་ནང་དག་པེ་མ་ཝ་ ཨོ་ཉ་ནང་ཀ་ ཧ་ལ་ཨ་ནེ་བུ་ དུས་ཏ་བུ་རང་ དཀའ་ཝ་ཅཱད༌པེ༎ ཁྲིམས་མཇུག་དུས། 11 ཉི་ཇི་གི་གོད་པ་ཀབ་ཉི་ གསེར་ཁྲི་ཅེན་མུ་ བ་ལིང་མིན་ཨ་ཝ་ཐུར་ཆོ༌ཝ། ཉི་ཨོ་ཉ་ཐུང་ཀ་ བཞུགས་ཁཱན་བུ་ ཇི་གི་མཇལ༌བ། ཉི་རོ་ཀ་སྐུན་མདུན་གེ་ འཛམ་གླིང་དང་ ཞིང་ཁམས་ གཱན་ཉི་ཇོང༌མ། དག་པ་ཀབ་ཉི་ རོག་ཏེ་བ་ གུ་མེ་ག་དེན་གེ་ བཱརང་མ་ཉོང་ཅི། 12 ཉི་ཇི་གི་ ཟེ་མུ་དང་ ཆི་ལུ་དག་པེ་མ་ཝ་ ཤི་ཁཱན་བ་ དཀོན་མཆོག་ག་ སྐུན་མདུན་ག་ ཐིང་མ་ཐོང༌མ། ཉི་དཔེ་ཆ་མང་པུ་ཐུར་ ཆོག་ཆོ༌ཝ། ཉི་ཚེ་ག་དཔེ་ཆ་བུ་ ཆོག་ཆོ༌ཝ། ཉི་ཤི་ཁཱན་བ་ རོག་ཏེ་བ་ཀི་ ཨ་ཝ་ག་ལའི་ཁེ་པ་ ཨོ་ཉ་དཔེ་ཆ་བ་ཀ་ནང་ཀ་ འབྲི་བ་དང་ཏུ་ཉི་ རོག་ཏེ་བ་ཀ་ ཁྲིམས་ཅཱད་ཆོ༌ཝ། 13 ཉི་རྒྱམ་མཚོ་ནང་ཀ་ ཤི་ཁཱན་བ་ རྒྱམ་མཚོ་གི་ རྩིས་སྤྲོད་ཆོ༌ཝ། ཉི་ཤི་སྲོག་དང་ ཤི་ཁཱན་བ་ཆོ་ས་བཱརང་ཀི་བུ་ རོག་ཏེ་བ་ཀ་ནང་ཀ་ ཆོ་ཁཱན་བ་ཀ་ རྩིས་སྤྲོད་ཆོ༌ཝ། ཉི་རོག་ཏེ་བ་ ཐམས་ཅན་རང་ རོག་ཏེ་བ་ཀ་ ལའི་དང་ཏུ་ཉི་ ཁྲིམས་ཅཱད་ཆོ༌ཝ། 14 ཨོ་ཉ་ཚི་ངེ་ ཤི་སྲོག་དང་ཤི་ཁཱན་བ་ཆོ་ས་བཱརང་ མི་ག་མཚོ་ནང་ཀ་ཏཱན་ ཐུབ་ཉི་གེམ་ཆོ༌ཝ། ཉི་ཨུ་ཐུ་ཤོ་ ཤི་སྲོག་ཉིག་ཙིང་པ་གི༌ལ། 15 ཉི་ཚེ་ག་དཔེ་ཆ་ནང་ཀ་ ཨི་བི་ག་ མིང་མ་ཝ་ཐུར་ ཨོ་ཉ་སོ་ངོ་ཁེ་པ་ མི་ག་མཚོ་ནང་ཀ་ཏཱན་ ཐུབ་ཉི་གེམ་ཆོ་ཝ༎ |