མཇལ་ཁ། 19 - Tshangla New Testament (BSI)ཞིང་ཁམས༌ག་ངལ་རངས༌པ༌ལ། 1 ཨོ་ཐ་ཚི་ངེ་ ཇི་གི་ཞིང་ཁམས་ག་ སོ་ངོ་གནམ་མེད་ས་མེད་ མང་པུ་གི་ ཤ་དར་ཕི་ཝ་པུརུས་ཀིན་ཨ་ཝ་ གསུང་སྐད་ཐུར་ ན་ཐ་ཝ་ ཧ་ལེ་ལུ་ཡ་ ཐར་པ་དང་གཟི་བརྗིད་ ཉི་སྟོབས་དབང་ཤོ་ དཀོན་མཆོག་ག་གི༌ལ། 2 ཧང་ཡ་དག་ནེ་ལ་ དེན་པ་ཨ་ཉི་ ཁྲིམས་ཐྲང་ཉི་གནང༌ཅ། ལུས་འབྲེལ་མ་ཙང་མ་ ཨ་ལེ་རིག་ཉི་ འཛམ་གླིང་མེ་པ་ཕི་ཁཱན་ གཞང་བཙོང་མ་ཆི་ལུ་ག་ རོ་ཀི་ཁྲིམས་ཀེ་ཉི་གནང༌མ། ཉི་རོ་ཀ་གཡོག་པ་བ་ ཤེ་ཝ་ཨ་དེན་གེ་ རོ་ཀི་ཧིང་འགྲམ་ལོག་པ་དག༌ཉི། 3 ཉི་རོག་ཏེ་བ་ཀི་ ཨོམ་ཆང་རང་ ཤེབ་ཐུར་ཞུ་ཝ༌ལ་ ཧ་ལེ་ལུ་ཡ་ རོ་ཀ་མུ་གུ་ཁེ་པ་ ཧ་ལ་ཨ་ནེ་བུ་ དུས་ཏ་བུ་རང་ ག་ཏཱན་དི་ལེ་དག༌ཉི། 4 ཨོ་ཐ་ཚི་ངེ་ སོ་ངོ་ཆི་ལུ་ཁེ་ཐུར་དང་ཕིཤི་ ཉི་གསོན་པོ་ཨ་ཉི་ཆོ་ཁཱན་ སེམས་ཅན་ཕིཤི་གི་ གསེར་ཁྲི་ག་བཞུགས་ཁཱན་ དཀོན་མཆོག་ག་ ཕྱག་འཚལ་ཐཱན་ རོ་ཀ་གསོལ་ཝ་ཏབ་ཉི་ ཨ་མེན་ ཧ་ལེ་ལུ་ཡ་དག་ཉི་ ཞུ་ཝ༌ལ། 5 གསེར་ཁྲི་གེ་ གསུང་སྐད་བྱོན་ཐཱན་ གསུངས་ཆོ༌ཝ་ ནའི་རོ་ཀ་གཡོག་པ་ ཐམས་ཅན་གི་ ཟེ་མུ་དང་ ཆི་ལུ་དག་པེ་མ་ཝ་ རོ་ཀེ་ཡོང་ཁེ་ཁཱན་བ་ཀི་ དཀོན་མཆོག་ག་ བསྟོད་པ་ཕུལ་ཤོ་དག༌ཉི། 6 ཇི་གི་ སོ་ངོ་གནམ་མེད་ས་མེད་མང་པུ་ ཤ་དར་ཕི་ཝ་ག ཀཱན་ཐུར་ན་ཐ༌ཝ། མཚོ་རི་ཆི་ལུ་ལག་པ་ད་བུ་དང་ མུང་ཤུག་ཨ་ཉི་ ཕོག་པ་ད་བུ་རང་ ཀཱན་ཇིག་ཆོ༌ཝ། ཧ་ལེ་ལུ་ཡ་ ཧང་ཡ་དག་ནེ་ལ་ ཨ་ཧ་ཤུགས་སྟོབས་ཆི་ལུ་ཆོ་ཁཱན་ གཙོ་བོ་དཀོན་མཆོག་གི་དབང༌ཅ། 7 ཉི་ཨ་ཧ་བ་ ངལ་རངས་ཉི་ ཤོ་ནང་ཕི་ཉི་ རོ་ཀ་གཟི་བརྗིད་ཕུལ་ཁེ། ཧང་ཡ་དག་ནེ་ལ་ ཤི་ཤ་ཀ་ཏོང་གཉེན་ཕི་ལེ་ག་ དུས་ཙུན་རེན་པ༌ཅ། ཉི་རོག་ཀབ་ཉི་ གཉེན་ཏག་པེ་ཅབ་ཁཱན་ ཟ་མིན་ཅམ་ཉི་ གྲ་སྒྲིག་རི་ཝ༌ཅ། 8 ཉི་ཨོ་ཉ་ཟ་མིན་ག་ གནམ་མེད་ས་མེད་ དབང་དབང་དང་ ཙང་མ་ཨ་ཝ་ཆོ་ཁཱན་ ཁ་ཤ་བ་ལིང་མིན་ཁེ་པ་ ཡེ་ལེ་བི་ཝ་ཆོ༌ཝ། ཧང་ཡ་དག་ནེ་ལ་ ཁ་ཤ་ལེག་པུ་ བ་ལིང་མིན་ཤོ་ དཀོན་མཆོག་ག་ དམ་པའི་སོ་ངོ་བ་ཀ་ དྲང་པུ་ལའི་ག་བ་གི༌ལ། 9 ཉི་ཞིང་ཁམས་ག་འཐེན་པ་གི་ ཇ་ག་ཨོ་ཐ་ཆཱས་འབྲི་ཤོ་དག་ཉི་ གསུངས་ཆོ་ཝ་ ཤི་ཤ་ཀ་ཏོང་ག་གཉེན་ག་ མཛར་ཅུམ་ཟ་ལེ་ག་ར་ཁཱན་བ་ བྱིན་རླབས་ཅན་གི༌ལ། ཉི་རོ་ཀི་ ཨོ་ཐེན་གསུངས་ཆོ་ཝ་ ཨོ་ཐ་བ་ཤོ་ དཀོན་མཆོག་ག་གསུང་ དེན་པ་གི་ལ་དག༌ཉི། 10 ཉི་རོ་ཀ་གསོལ་ཝ་ཏ་པེ་དེན་གེ་ ཇི་གི་ རོ་ཀ་ཞབས་ཀ་ ཕྱག་འཚལ་བ་ཀབ་ཉི་ རོ་ཀི་ ཇ་ག་གསུངས་ཆོ་ཝ་ ཇ་ག་གསོལ་ཝ་མ་ཏབ༌ཅོ། ཧང་ཡ་དག་ནེ་ལ་ ཇང་བུ་ ནཱན་དང་ ན་ག་ཡུང་ཟི་བ་ད་བུ་ ཡི་ཤུ་ག་ཀོར་གེ་ འཛོམས་དཔང་ཨ་ཁཱན་ ཡི་ཤུ་ག་གཡོག་པ་ཐུར་ཤ་གི༌ལ། དག་པ་ཀབ་ཉི་ དཀོན་མཆོག་ག་ གསོལ་ཝ་ཏབ༌ཅོ། ཧང་ཡ་དག་ནེ་ལ་ ཡི་ཤུ་ག་ཀོར་གེ་འཛོམས་དཔང་ཨ་ཁཱན་ཤོ་ དམ་པའི་ཐུགས་ཉིད་གི་ རིག་པ་ཨ་དེན་གེ་གི་ལ་དག་ཉི༎ ཀུར་ཏ་བ་ལིང༌མིན༌ག་ཐུང༌ཀ་བཞུགས་ཁཱན། 11 ཉི་ཇི་གི་གོད་པ་ཀབ་ཉི་ ཞིང་ཁམས་ཕེག༌པ། ཉི་ཀུར་ཏ་བ་ལིང་མིན་ ཨ་ཝ་ཐུར་ཆོ༌ཝ། ཉི་ཨོ་ཉ་ཐུང་ཀ་ བཞུགས་ཁཱན་ག་མཚན་ཤོ་ དམ་ཚིག་ཙུང་ཁཱན་དང་ དེན་པ་ཨ་ཉི་རཱན་ཆོ༌ཝ། ཉི་རོ་ཀི་ དྲང་པུ་ཨ་ཉི་ ཁྲིམས་ཅཱད་ཉི་ ཕྱད་མདའ་ཕིན་ཆོ༌ཝ། 12 རོ་ཀ་སྤྱན་ཤོ་ མི་གང་ད་བུ་ཆོ༌ཝ། ཉི་རོ་ཀ་དབུ་ག་ རྒྱལ་ཞྭ་མང་པུ་ཆོ༌ཝ། རོ་ཀ་ཐུང་ཀ་ མཚན་འབྲི་བ་ཆོ༌ཝ། ཉི་ཨོ་ཉ་མཚན་ག་དེན་ཐ་ཤོ་ རོག་ཐུར་གི་ཤ་ མཁྱེན་ཆོ༌ཝ། 13 ཀུར་ཏ་ཐུང་ཀ་བཞུགས་ཁཱན་གི་ ཞི་གི་ཕུང་མ་ཨ་ཝ་ ནམ་བཟའ་བཞེས་ཝ་ཆོ༌ཝ། ཉི་རོ་ཀ་གོ་སར་ཤོ་ དཀོན་མཆོག་ག་ གསུང་གི་ཝ་ཆོ༌ཝ། 14 ཁ་ཤ་གནམ་མེད་ས་མེད་ བ་ལིང་མིན་སིང་སིང་ཨ་ཝ་གི་ ཅོད་པ་ག་ཁ་མུང་ཡེ་ཁཱན་ ཞིང་ཁམས་ག་དམག་མི་བ་ ཀུར་ཏ་བ་ལིང་མིན་ ཨ་ཝ་བ་ཀ་ཐུང་ཀ་ལང་ཉི་ རོ་ཀ་ཚིང་ཚིང་ཆོ༌ཝ། 15 ཉི་རོ་ཀ་ཞལ་གེ་ གི་རིང་ཚེ་བུ་ཨ་ཝ་ཐུར་ ཤོན་ཆོ༌ཝ། ཉི་ཨོ་ཉ་ གི་རིང་ག་ཐུང་ཀེ་ཨ་ཉི་ རོ་ཀི་རྒྱལ་ཁབ་བ་ཀ་ ཁྲིམས་གནང་ཆོ༌ཝ། པེར་ག་ཕྱག་འཁར་ག་ཐུང་ཀེ་ཨ་ཉི་ རོ་ཀི་ རོག་ཏེ་བ་དབང་ཆོ༌ཝ། ཤུགས་སྟོབས་ཆི་ལུ་ཆོ་ཁཱན་ དཀོན་མཆོག་ གནམ་མེད་ས་མེད་ དགོངསམ་ཁྲེ་པ་ཨ་དེན་གེ་ ཨང་གུར་སེ་དྲ་ཕ་པུརུས་ཀིན་ཨ་ཉི་ རོ་ཀི་ རོག་ཏེ་བ་དྲ་ཕེ། 16 དཔོན་བ་ཀ་དཔོན་ གཙོ་བོ་བ་ཀ་གཙོ་བོ་དག་ཉི་ རོ་ཀ་ནམ་བཟའ་དང་ རོ་ཀ་ལུམ་ག་ འབྲི་བ་ཆོ་ཝ༎ ཏེ་ངན་སེམས༌ཅན་དང་ རོ༌ཀ་དམག༌མི༌བ་ ཕ་མ༌ལ། 17 ཉི་ཇི་གི་གོད་པ་ཀབ་ཉི་ ཞིང་ཁམས་ག་འཐེན་པ་ཐུར་ ངམ་ནང་ཀ་ཐིང་ཉི་ བཞུགས་པ་ཨ་ཝ་མཇལ༌བ། ཉི་རོ་ཀི་ ངབ་ཀེ་ཕེན་ཁཱན་ ཁ་ཐམས་ཅན་ག་ཏཱན་ གསུང་སྐད་ཆི་ལུ་ཨ་ཉི་ གསུངས་ཆོ་ཝ་ ཨུན་ཐཱན་ དཀོན་མཆོག་ག་ མཛར་ཅུམ་ཆི་ལུ་ ཟ་ལེ་ག་ཛོམ་ཤོ། 18 ཨུན་ཐཱན་ དཔོན་བ་དང་ དམག་དཔོན་བ་ ཉི་ཕྱད་མདའ་ཆི་ལུ་ཕི་ཁཱན་བ་ ཉི་ཀུར་ཏ་བ་དང་ ཀུར་ཏ་ཐུང་ཀ་ལང་ཁཱན་བ་ ཉི་སོ་ངོ་ཐམས་ཅན་རང་ ཟ་པ་གི་ནེ་བུ་ མང་གི་ནེ་བུ་ ཟེ་མུ་གི་ནེ་བུ་ ཆི་ལུ་གི་ནེ་བུ་ རོག་ཏེ་བ་ ཐམས་ཅན་ག་ ཤ་ངམ་ཤོ་དག༌ཉི། 19 ཉི་ཇི་གི་གོད་པ་ཀབ་ཉི་ ཀུར་ཏ་ཐུང་ཀ་ བཞུགས་ཁཱན་དང་ རོ་ཀ་དམག་མི་བ་ཀབ་ཉི་ ཕྱད་མདའ་ཕི་ལེ་དེན་གེ་ ཏེ་ངན་སེམས་ཅན་དང་ འཛམ་གླིང་ག་ དཔོན་ག་བ་དང་ རོག་ཏེ་བ་ཀ་ དམག་མི་བ་ ཛོ་མ་ཐོང༌མ། 20 དག་པ་ཀབ་ཉི་ ཏེ་ངན་སེམས་ཅན་དང་ ལུང་བསྟན་པ་རྫུས་མ་ཙུང༌མ། ཏེ་ངན་སེམས་ཅན་ག་ རྟགས་དང་ རོ་ཀ་སྐུ་ག་ གསོལ་ཝ་ཏབ་ཁཱན་བ་ཀ་ མགུ་སྐོར་ཕི་ལེ་དེན་གེ་ ཨོ་ཉ་ལུང་བསྟན་པ་རྫུས་མ་གི་ ཏེ་ངན་སེམས་ཅན་ག་དེན་གེ་ རྫུ་འཕྲུལ་ཆི་ལུ་ གེན་མ་ཆོ༌ཝ། ཉི་ཏེ་ངན་སེམས་ཅན་དང་ ལུང་བསྟན་པ་རྫུས་མ་ ཉིག་ཙིང་རང་ གསོན་པོ་ཨ་ཉི་རང་ སཱལ་ཕར་གི་དིར་ཁཱན་མི་ག་མཚོ་ནང་ཀ་ཏཱན་ ཐུབ་ཉི་གེ༌མ། 21 དག་པ་ཀབ་ཉི་ རོག་ཉིག་ཙིང་ག་ བཱརའ་དམག་མི་བ་ཤོ་ ཀུར་ཏ་ཐུང་ཀ་ བཞུགས་ཁཱན་ག་ ནོ་ཝང་གེ་ཤོ་ཁཱན་ གི་རིང་གི་ཨ་ཉི་ཤེ༌ཝ། ཉི་ངབ་ཀེ་ཕེན་ཁཱན་ཁ་བ་ཀི་ རོག་ཏེ་བ་ཀ་ ལུས་པུ་ག་ཤ་ ང་མེ་རེ་བ་སག་པུ་ང༌མ༎ |