མཇལ་ཁ། 18 - Tshangla New Testament (BSI)བེ་བི་ལོན་ རོ་ཁེ་དི་ཝ༌ལ། 1 ཨོ་ཐ་ཚི་ངེ་ ཇི་གི་གོད་པ་ཀབ་ཉི་ ཨོམ་ཆང་རང་ བཱརའ་ཞིང་ཁམས་ག་འཐེན་པ་ཐུར་ ཞིང་ཁམས་གེ་དོང་ བྱོན་མ་ག་མཇལ༌བ། རོ་ཀ་དབང་ཚད་ཆི་ལུ་ཆོ༌ཝ། ཉི་རོ་ཀེ་ཤོ་ཁཱན་འོད་གི་ འཛམ་གླིང་ཝང་ཝང་ཅོད་ཆོ༌ཝ། 2 ཉི་རོ་ཀི་ གསུང་སྐད་ཆི་ལུ་ཨ་ཉི་ གསུངས་ཆོ་ཝ་ བེ་བི་ལོན་ཆི་ལུ་ཁེ་པ་ རོ་ཁེ་དི་ཝ་ རོ་ཁེ་དི༌ཝ། དཱན་ཤོ་ བདུད་བ་ཀ་ཕའི་རི༌ཝ། ཉི་མ་ཙང་མ་ཆོ་ཁཱན་རྣམ་ཤེས་ ཐམས་ཅན་ག་བཱརང་དང་ མ་ཙང་མ་དང་ ཙོག་པ་ཨ་ཝ་ཆོ་ཁཱན་ ཁ་བ་ཀ་ བཱརང་རི་ཝ༌ཅ། 3 ཧང་ཡ་དག་ནེ་ལ་ རྒྱལ་ཁབ་ཐམས་ཅན་གི་ འདོད་ཆགས་ཨ་ཉི་ རོ་ཀ་ལུས་འབྲེལ་མ་ཙང་མ་ག་ ཞུ་ཇ་མ༌ཅ། ཉི་འཛམ་གླིང་ག་ དཔོན་བ་ཀི་ རོག་ཀབ་ཉི་ ལུས་འབྲེལ་མ་ཙང་མ་ ཨ་ཝ༌ཅ། ཉི་རོ་ཀི་ ཇོབ་ཇོབ་ག་བག་ཆགས་ ཨ་ཝ་ཨ་དེན་གེ་ འཛམ་གླིང་ག་ཚོང་པ་བ་ བེ་དིང་རི་ཝ་ཅ་དག༌ཉི། 4 ཉི་ཇི་གི་ ཞིང་ཁམས་གེ་ བཱརའ་གསུང་སྐད་ཐུར་ ན་ཐ་ཝ་ ཇ་ག་སོ་ངོ་བ་ ན་ཧ་བ་ བེ་བི་ལོན་གེ་གཱན་ཇོང་ཤོ། རོ་ཀ་སྡིག་པ་ག་ དྲེ་ཀ་མ་ནུབ༌ཅོ། ཉི་ན་ཤི་ རོ་ཀ་ཁྲིམས་བང་མེ་མ་ཁེ༌ལ། 5 ཧང་ཡ་དག་ནེ་ལ་ རོ་ཀ་སྡིག་པ་བ་ཙེག་ཉི་ ཐོ་ལ་ཞིང་ཁམས་ག་ནོག་པ༌ཅ། རོ་ཀི་ཨ་ཁཱན་ངན་པ་བ་ དཀོན་མཆོག་གི་ ཡིད་ཀ་ཨ་ཉི་གནང་མ༌ཅ། 6 རོ་ཀི་བཱརའ་ག་ ཨ་ཝ་པུརུས་ཀིན་ཨ་ཉི་ རོ་ཀ་བུ་ཨའི། རོ་ཀི་ཨ་ཁཱན་ལའི་ག་ངེ་ལོང་ ལོག་ཏབ་ཨ་ཉི་ཏ་པེ་བི། རོ་ཀི་བཱརའ་ག་གུར་བུ་ག་ ཀ་ལུ་ལུག་པ་ཆོ༌ཝ། ཉི་རོ་ཀི་ བི་ཝ་གེ་ལོག་ཏབ་ རོ་ཀ་གུར་བུ་ག་ལུག༌ཅོ། 7 རོག་གནམ་མེད་ས་མེད་ སྤྲོ་བ་ཀེ་ཉི་ ཇོབ་ཇོབ་ཨ་ཉི་ཆོ༌ཝ། ཉི་ཨོམ་ ཨོམ་ཏུར་རང་ རོག་གནམ་མེད་ས་མེད་ དཀའ་ཝ་ཅཱད་ཉི་ ནང་དོག་པེ་བི། ཇང་ཤོ་ དབང་ཁཱན་ཨ་ཞེ་གི༌ལ། ཉི་ཇང་ མོ་རེན་མ་མང་གི། ཉི་ཇང་ ཧ་ལ་རང་ ཁོ་དང་ཆཱད་པེ་ མ་ཁེ་ལ་དག་ཉི་མི་ཉི་ རོ་ཀི་ཁམ་ཙོང་ཆོ༌ཝ། 8 ཨོ་ཉི་ཨ་དེན་གེ་ རོ་ཀི་ནོང་ཐུར་ག་རང་ ཁྲིམས་ཉོག་ཉི་ ཤི་ལེ་ཁེ་ལེ་ མརང་ཉི་གེ་ཕེ་ཁེ་ལེ་ ཉི་ཟ་ལེ་ག་བེས༌པེ། ཉི་རོག་ མི་གི་ཨ་ཉི་ཞུམ༌པེ། ཧང་ཡ་དག་ནེ་ལ་ རོ་ཀ་ཁྲིམས་ཀེ་ཁཱན་ གཙོ་བོ་དཀོན་མཆོག་ ཤུག་ཅཱན༌ཅ། 9 རོག་ཀབ་ཉི་ ལུས་འབྲེལ་མ་ཙང་མ་ཨ་ཉི་ ཇོབ་ཇོབ་ཨ་ཉི་ཆོ་ཁཱན་ དཔོན་ག་བ་ མརང་ཉི་གེ་ཕེ་ཁེ༌ལེ། རོག་ཞུམ་པ་ག་མུ་གུ་ ཐོང་མ་ཀབ་ཉི་ རོག་ཏེ་བ་གེབ་ཉི་ ཤ་དར་ཕི༌ལེ། 10 རོག་དཀའ་ཝ་ཅཱད་པ་ག་ཐོང་ཉི་ གནམ་མེད་ས་མེད་ ཡོང་ཙུང༌མེ། རོག་ཏེ་བ་ ཇང་ཀིན་ག་ཆོ་ཉི་ཡེག་པེ་ ཨའི་ ཨོ་ཉ་ཁྲོམ་ཆེན་ཆི་ལུ་ ཨོ་ཉ་ཤུག་ཅཱན་ཁྲོམ་ཆེན་ བེ་བི་ལོན། ཧང་ཡ་དག་ནེ་ལ་ ཤེབ་ཐུར་ག་རང་ ནཱན་གི་ ཁྲིམས་ཉོང་པ་དག༌ཉི། 11 འཛམ་གླིང་ག་ ཚོང་པ་ཐམས་ཅན་གི་ རོ་ཀ་དེན་གེ་ གེབ་ཉི་མརང༌མེ། ཧང་ཡ་དག་ནེ་ལ་ རོག་ཏེ་བ་ཀ་ ནོ་ཙང་ངོ་ཁཱན་ ཨི་བི་རང་མ་ཝ་རི༌ལེ། 12 རོག་ཏེ་བ་ཀ་ གསེར་དང་དངུལ་ བྱུ་རུ་དང་མོ་ཏི་ ཁ་ཤ་ལེག་པུ་དང་གོས་ཆེན་ ཉི་སེ་ཤུ་དང་ཙ་ལུ་ ཤེར་སུང་སུང་ནམ་ཁཱན་ ཤིང་བ་དང་ གླང་པོ་ཆེ་ག་ཆེཝ་གི་ཅོད་ཁཱན་ ཅ་ལ་བ་ ཟངས་དང་པེར་ ཉི་ལུང་ཅེམ་པུ་ངོ་ཁཱན་ མ་ཝ་རི༌ལེ། 13 ཤེར་སུང་སུང་ནམ་ཁཱན་ ཤིང་ཁོབ་ཏང་དང་ མ་ས་ལ་ པོས་དང་གོང་ཆི་ལུ་ཆོ་ཁཱན་སི་ དྲི་བཟང་དང་ཨ་ར་ ཨོ་ལིབ་ཤིང་ག་སི་དང་ བོག་པི་ལེག་པུ་ བོང་དང་ཝ་ ཤི་ཤ་ ཀུར་ཏ་དང་ ཀུར་ཏ་ག་རི་ ཉི་ཟ་པ་བ་དང་ སོ་ངོ་ག་ཚེ་ག་བ་ ཨི་བི་གི་རང་ རོག་ཏེ་བ་ཀེ་ མ་ངོ༌ལ། 14 རོག་ཏེ་བ་ཀི་ཡེག་པེ་ ན་ག་སྲོག་གི་ཕང་ཁཱན་ སེ་ག་བ་ ཐམས་ཅན་རང་ ནཱན་གེ་ཇོང༌མ། ཉི་ན་ག་རྒྱུ་ནོར་དང་ ཇོབ་ཇོབ་ཆོ་ཁཱན་བ་ ན་ག་མ་ཝ་རི༌ཝ། ཉི་ཨོམ་ ནཱན་གི་ ཧ་ལ་རང་ ལོག་ཉི་མ་ཉོང་པ་དག༌ཉི། 15 རོ་ཀ་ཡོར་ཀེ་ ཚོང་པ་བ་ བེ་དིང་རི༌ཝ། དག་པ་ཀབ་ཉི་ རོག་ཏེ་བ་ཀི་ རོག་དཀའ་ཝ་ཅཱད་པ་ག་ ཐོང་མ་ཀབ་ཉི་ རོག་ཏེ་བ་ ཡོང་ཙུང༌མེ། ཉི་རོག་ཏེ་བ་ ཇང་ཀིན་ག་ཆོན་ཐཱན་ མརང་ཉི་གེ་ཕེ། 16 ཉི་རོག་ཏེ་བ་ཀི་ ཤ་དར་ཕི་ཉི་ཡེག་པེ་ ཨའི་ ཨོ་ཉ་ཁྲོམ་ཆེན་ཆི་ལུ་ རོ་ཀི་ ཁ་ཤ་ལེག་པུ་དང་ གོས་ཆེན་ ཉི་ཁ་མུང་ཙ་ལུ་ཡེན་ཆོ༌ཝ། ཉི་རོ་ཀི་ གསེར་དང་ བྱུ་རུ་ ཉི་མོ་ཏི་ ཨོ་ཉ་བ་ ལིག་པ་ཆོ༌ཝ། 17 ཧང་ཡ་དག་ནེ་ལ་ རེབ་ཀིན་ཐུར་ག་རང་ ཨོ་ཐ་རྒྱུ་ཅ་ལ་བ་ མ་ཝ་རི་ཝ་དག༌ཉི། ཉི་གྲུ་ཆེན་ག་ འགོ་དཔོན་བ་དང་ དང་ཁཱན་སོ་ངོ་བ་ ཉི་གྲུ་ཇུག་ཁཱན་བ་དང་ ཨོ་ཉ་གྲུ་ཆེན་ནང་ཀ་ ལའི་ཨ་ཁཱན་བ་ ཐམས་ཅན་ ཇང་ཀིན་ག་ཐིང༌མེ། 18 རོག་ཞུམ་པ་ག་མུ་གུ་ ཤོ་ཝ་ཐོང་མ་ཀབ་ཉི་ རོག་ཏེ་བ་ཀི་གེབ་ཉི་ ཡེག་པེ་ ཨོ་ཐ་ཁྲོམ་ཆེན་ཆི་ལུ་ད་བུ་ ཨོ་ག་རང་མཱན་ཆི་དག༌ཉི། 19 རོག་ཏེ་བ་ གནམ་མེད་ས་མེད་ ཁོ་དང་ཆཱད་པ་ཨ་དེན་གེ་ རོག་ཏེ་བ་ཀི་ རོག་ཏེ་བ་ཀ་ ཤ་རང་ག་ཕུར་ཙི་ཡ་ཕེ། ཉི་རོག་ཏེ་བ་ཀི་ གེབ་ཉི་ཡེག་པེ་ ཨའི་ ཨའི་ ཁྲོམ་ཆེན་ཆི་ལུ་ རྒྱམ་མཚོ་ག་ཇུག་ཁཱན་ གྲུ་ཡོན་ད་ ཐམས་ཅན་རང་ རོ་ཀ་རྒྱུ་ནོར་གེ་ཨ་ཉི་ བེ་དིང་རི་ཝ་ཆོ༌ཝ། དག་པ་ཀབ་ཉི་ ཤེབ་ཐུར་ག་རང་ རོག་ཇཝ་ཆུ་མ་དག༌ཉི། 20 དག་པ་ཀབ་ཉི་ རོ་ཀ་གོད་ཉི་ ཞིང་ཁམས་ག་ ངལ་རངས༌ཅོ། ཉི་ནའི་ དཀོན་མཆོག་ག་ དམ་པའི་སོ་ངོ་བ་དང་ སྐུ་ཚབ་བ་ ཉི་ལུང་བསྟན་པ་བ་བུ་ ངལ་རངས༌ཅོ། ཧང་ཡ་དག་ནེ་ལ་ དཀོན་མཆོག་གི་ ན་ཧ་ཁ་ཨ་ཉི་ ཨོ་ཉ་ཁྲོམ་ཆེན་ཆི་ལུ་ག་ ཁྲིམས་ཀེ་ཉི་གནང་མ་དག༌ཉི། 21 ཉི་གེ་ ཞིང་ཁམས་ག་འཐེན་པ་ ཤུག་ཅཱན་གི་རཱན་ཐཱན་ རང་ཐང་ལུང་ཆི་ལུ་ད་བུ་ཆོ་ཁཱན་ ལུང་ཐུར་དུང་ཐཱན་ རྒྱམ་མཚོ་ག་ཏཱན་ ཐུབ་གེ་མ༌ལ། ཉི་རོ་ཀི་ ཨོ་ཐེན་གསུངས་མ་ལ་ ཁྲོམ་ཆེན་ཆི་ལུ་ བེ་བི་ལོན་བུ་ ཨོ་ཐེན་ཐུབ་ཉི་གེ་མེ་གི༌ལ། ཉི་ལོག་ཉི་ ཧ་ལ་རང་ མ་ཐོང་མ་ཅོད༌པེ། 22 ཉི་ལོག་ཉི་ ཧ་ལ་རང་ སྙན་ཆ་ཏྲོག་པ་ག་ཀཱན་ ན་མ་ཐ༌ལ། པི་ཝང་དང་ངང་ ནམ་བུརུང་དང་ དམག་དུང་བ་ལོག་ཉི་ ཧ་ལ་རང་ མ་ཐེད༌པ། ཉི་ཚོང་ག་འཕྲུལ་དང་ རང་ཐང་ཞུ་མ་ག་ཀཱན་ ཧ་ལ་རང་ལོག་ཉི་ མ་ཐ༌ལ། 23 ཉི་བེ་བི་ལོན་ག་ ཨོ་ག་རང་གི་ནེ་བུ་ ལ་ཝང་གེ་ འོད་ཟེར་མ་ཤོ༌ལ། གཉེན་ཕི་ཁཱན་ ཟ་དང་ཟ་མིན་ག་ཀཱན་ ཧ་ལ་རང་ ན་མ་ཐ༌ལ། ཧང་ཡ་དག་ནེ་ལ་ རོ་ཀ་ཚོང་པ་བ་ཀི་ འཛམ་གླིང་དབང་པ་ཆོ༌ཝ། ཉི་རྒྱལ་ཁབ་ ཐམས་ཅན་རང་ རོ་ཀ་ངཱན་གི་ མགུ་སྐོར་ཕི་ཝ་ཆོ༌ཝ། 24 ཉི་རོ་ཀ་ལམ་ཁོན་ ལུང་བསྟན་པ་བ་དང་ དཀོན་མཆོག་ག་ དམ་པའི་སོ་ངོ་བ་ཀ་ ཞི་ཁྲབ་ཆོ༌ཝ། ཉི་འཛམ་གླིང་ ཐམས་ཅན་ག་ སོ་ངོ་ཤེ་ཁཱན་ཤོ་ དཱན་གི་ཝ་ཆོ་ཝ་དག་ཉི༎ |