མཇལ་ཁ། 17 - Tshangla New Testament (BSI)

གཞང་བཙོང་མིན་ཆི་ལུ།

¹ གུར་བུ་ཟུམ་མེན་ཁཱན་ ཞིང་ཁམས་ག་འཐེན་པ་ ཟུམ་ག་པོང་ཀེ་ ཐུར་ཇང་ཆོ་ས་བྱོན་ཐཱན་ གསུངས་ཆོ་ཝ་ ཇང་ཀབ་ཉི་ཨོ་དོ། རི་མང་པུ་ཐུར་ག་ཐུང་ཀ་ལང་ཁཱན་ གཞང་བཙོང་མ་ཆི་ལུ་ག་ དཀོན་མཆོག་ག་ཁྲིམས་ ཧང་ད་བུ་ཀེ་བེ་གི་ལ་སྨོ་ ཇི་གི་ ན་ག་གེན༌མེ།

² འཛམ་གླིང་ག་དཔོན་བ་ཀི་ རོག་ཀབ་ཉི་ ལུས་འབྲེལ་མ་ཙང་མ་ཨ་ཝ༌ཅ། ཉི་ལུས་འབྲེལ་མ་ཙང་མ་ག་ ཞུ་ཇམ་ཉི་ འཛམ་གླིང་ག་སོ་ངོ་བ་ ཞུ་སུང་ཁུ་ཝ༌ཅ།

³ ཨོ་ཐེན་ཨ་ཉི་ དམ་པའི་ཐུགས་ཉིད་ག་ཐུང་ཀེ་ཨ་ཉི་ ཞིང་ཁམས་ག་འཐེན་པ་གི་ ཇང་ ས་ཏོང་པ་ག་ཏཱན་ རིག་ཉི་བསྣམས༌པ། ཉི་ཇི་གི་ མེ་ཝག་ཙ་ཐུར་ ཏེ་ངན་སེམས་ཅན་ ཙ་ལུ་ཨ་ཝ་ཆོ་ཁཱན་ག་ཐུང་ཀ་ ལང་མ་ཐོང༌མ། ཉི་ཨོ་ཉ་སེམས་ཅན་ག་ ཤ་རང་ཟུམ་དང་ ཝ་རོང་སེ་ཆོ༌ཝ། ཉི་རོག་ཁེ་པ་ དཀོན་མཆོག་ག་ སྐུར་པ་ཞུ་ཁཱན་ མིང་གི་ཕུང་མ་ཆོ༌ཝ།

⁴ ཉི་ཨོ་ཉ་མེ་ཝག་ཙ་གི་ ཁ་མུང་ག་ཚོ་རྒྱ་སྨུག་དང་ ཙ་ལུ་ཨ་ཝ་ཡེ་ཝ་ཆོ༌ཝ། ཉི་གསེར་ མོ་ཏི་དང་ གཟི་ག་བྱུ་རུ་བ་ ལིག་པ་ཆོ༌ཝ། ཉི་ལུས་འབྲེལ་མ་ཙང་མ་གི་ཅོད་ཁཱན་ ཙོག་པ་དང་ དམ་པ་མ་ཁཱན་བ་ཀི་ཕུང་ཁཱན་ གསེར་ག་གུར་བུ་ཐུར་ རོ་ཀ་ག་དང་ག་མེན་མ་ཆོ༌ཝ།

⁵ ཉི་ཧ་གོ་ལེ་མར་བ་ག་ མིང་ཐུར་ རོ་ཀ་པ་ཏོང་ག་ འབྲི་བ་ཆོ༌ཝ། གནམ་མེད་ས་མེད་ཆི་ལུ་ཆོ་ཁཱན་ བེ་བི་ལོན་ཤོ་ འཛམ་གླིང་ག་ གཞང་བཙོང་མ་བ་དང་ ཙོག་པ་བ་ཀ་ ཨ་མ་གི་ལ་དག༌ཉི།

⁶ ཉི་ཇི་གི་གོད་པ་ཀབ་ཉི་ ཨོ་ཉ་མེ་ཝག་ཙ་ཁེ་པ་ དཀོན་མཆོག་ག་ དམ་པའི་སོ་ངོ་བ་ཀ་ཞི་དང་ ཡི་ཤུ་ག་ འཛོམས་དཔང་ཨ་ཁཱན་བ་ཀ་ཞི་གི་ ཞུ་སུང་ཁུ་ཝ་ཆོ༌ཝ། ཉི་ཇི་གི་ རོག་ཐོང་མ་ཀབ་ཉི་ ཇང་གནམ་མེད་ས་མེད་ ཡིད་ཆི༌ཝ།

⁷ ཞིང་ཁམས་ག་འཐེན་པ་གི་ ཇ་ག་ཡེག་ཆོ་ཝ་ ནཱན་ཧང་ཨ་ཉི་ ཡིད་ཆིན་ཅ་ཡ། ཨོ་ཐ་མེ་ཝག་ཙ་དང་ རོག་ཐུང་ཀ་ལང་ཁཱན་ ཤ་རང་ཟུམ་དང་ ཝ་རོང་སེ་ཆོ་ཁཱན་ ཏེ་ངན་སེམས་ཅན་ག་ གུམ་ནང་ཆཱས་ཁེ་པ་ ཇི་གི་ན་ག་ཡེག༌པེ།

⁸ ནཱན་གི་ཐོང་ཁཱན་ སེམས་ཅན་ཏེ་ངན་ཁེ་པ་ གསོན་པོ་ཆོ༌ཝ། དག་པ་ཀབ་ཉི་ ཨོམ་ཤོ་ ཤི་ཝ༌ཅ། ཨོ་ཉེ་རང་གི་ནེ་བུ་ མ་འགྱུར་བརྟན་པ་ག་ ཁྲིམས་ཉོང་པེ་དེན་གེ་ དོ་ཟོ་རང་ ར་ཅི་མ་ཁཱན་ཧོང་ཅི་ནང་ཀེ་ ལོག་ཉི་ཨོ་ཕེ། ཉི་འཛམ་གླིང་ མ་བཀོད་པེ་གོ་མ་ ཚེ་ག་དཔེ་ཆ་ནང་ཀ་ མིང་མ་འབྲི་ཁཱན་ འཛམ་གླིང་ག་ སོ་ངོ་བ་ཀི་ ཨོ་ཐ་ཤི་ཁཱན་ ཏེ་ངན་སེམས་ཅན་ཁེ་པ་ ལོག་ཉི་ཤོ་ཝ་ཐོང་མ་ཀབ་ཉི་ རོག་ཏེ་བ་ གནམ་མེད་ས་མེད་ ཡིད་ཆི༌ལེ།

⁹ ཉི་ཨོམ་ རིག་པ་ཆོ་ཁཱན་སེམས་ཀི་ ཨོ་ཐ་ཆཱས་ ཧ་གོ་ལེ་ཁེ༌ལེ། ཤ་རང་ཟུམ་ཤོ་ མེ་ཝག་ཙ་ལང་ཁཱན་ ཕུ་ཟུམ་གི༌ལ། ཉི་ཨོམ་ཆང་རང་ རོག་ཏེ་བ་ཤོ་ དཔོན་ཟུམ་བུ་གི༌ལ།

¹⁰ དཔོན་ལྔ་ཤི་ཝ༌ཅ། ཉི་དཔོན་ཐུར་ཤོ་ ཨོ་མ་དབང་པེ་གང༌ཅ། ཉི་དཔོན་ཐུར་ཤོ་ ཨོ་མ་ མ་ཤོ་ཝ༌ཅ། དག་པ་ཀབ་ཉི་ རོག་ཤོ་དེན་གེ་ རོ་ཀི་རེབ་ཀིན་ཐུར་ཤ་དབང༌པེ།

¹¹ རོག་གོ་མ་གསོན་པོ་ཆོ༌ཝ། ཉི་ཨོམ་ཤོ་ ཤི་ཁཱན་ཏེ་ངན་སེམས་ཅན་ཁེ་པ་ དཔོན་ཡེན་པ་གི༌ལ། དག་པ་ཀབ་ཉི་ རོག་བུ་ རོག་ཏེ་ཟུམ་ད་བུ་ ཆོ་ཝ་ཨ་དེན་གེ་ རོག་ཇཝ་ཆུ་མེ་ག་ དིན་ཅ་གི༌ལ།

¹² ཉི་ཝ་རོང་སེ་ཤོ་ ཨོ་མ་སག་པུ་ རྒྱལ་སྲིད་མ་ཉོང་ཁཱན་ དཔོན་སེ་གི༌ལ། རོག་ཏེ་བ་ཀི་ རེབ་ཀིན་ཐུར་ག་དེན་གེ་ ཏེ་ངན་སེམས་ཅན་ཀབ་ཉི་ ཏབ་ཐུར་དབང༌པེ།

¹³ རོག་ཏེ་བ་ ཐམས་ཅན་གི་ རོག་ཏེ་བ་ཀ་ སྟོབས་དབང་དང་ དབང་ཚད་ ཏེ་ངན་སེམས་ཅན་ག་ཏཱན་ བི་ལེ་དག་ཉི་ ཁ་ཐུན་མ༌ཅ།

¹⁴ ཉི་རོག་ཏེ་བ་ཀི་ ཤི་ཤ་ཀ་ཏོང་ཀབ་ཉི་ ཕྱད་མདའ་ཕི༌ལེ། ཉི་ཤི་ཤ་གི་ རོག་ཏེ་བ་ཕ༌མེ། ཧང་ཡ་དག་ནེ་ལ་ རོག་ཤོ་ གཙོ་བོ་བ་ཀ་ གཙོ་བོ་དང་ དཔོན་བ་ཀ་ དཔོན་གི༌ལ། རོག་ཀབ་ཉི་ཆོ་ཁཱན་བ་ཤོ་ ར་ཁཱན་བ་དང་ སི་ཁཱན་བ་ ཉི་དམ་ཚིག་ཙུང་ཁཱན་བ་གི༌ལ།

¹⁵ ཉི་ཞིང་ཁམས་ག་འཐེན་པ་གི་ ཇ་ག་གསུངས་ཆོ་ཝ་ ནཱན་གི་ གོད་པ་ཀབ་ཉི་ རྒྱམ་མཚོ་ཐུང་ཀ་ ཨོ་ཉ་གཞང་བཙོང་མིན་ ལང་མ་ཆོ༌ཝ། ཉི་ཨོ་ཉ་རྒྱམ་མཚོ་ཤོ་ རྒྱལ་ཁབ་མ་འདྲ་ཝ་ ཐམས་ཅན་དང་ ལོ་མ་འདྲ་ཝ་ ཐམས་ཅན་ག་ སོ་ངོ་མང་པུ་བ་གི༌ལ།

¹⁶ ཝ་རོང་སེ་དང་ ཏེ་ངན་སེམས་ཅན་གི་ ངི་ནང་མ་ཁུ་ཁཱན་ ཨོ་ཉ་གཞང་བཙོང་མ་ མ་ཟེས་པ་ཨ་ལེ་ གོ་ཙུག༌པེ། རོག་ཏེ་བ་ཀི་ རོ་ཀ་ཁ་མུང་ཕེག་ཉི་ ཙ་ཏི་ལིང་པ་ཅོད༌པེ། རོག་ཏེ་བ་ཀི་ རོ་ཀ་ཤ་ང༌མེ། ཉི་ལཱན་ཇུ་ལུས་ཁཱན་ བཱརའ་ལུས་པུ་ཤོ་ མི་ག་གོག་ཉི་གེ༌མེ།

¹⁷ ཧང་ཡ་དག་ནེ་ལ་ དཀོན་མཆོག་ག་ མིག་པ་དང་ཏུ་ཉི་ ཨ་ལེ་དེན་གེ་ དཀོན་མཆོག་གི་ རོག་ཏེ་བ་ཀ་སེམས་ཀ་ རོ་ཀ་འཆར་གཞི་ ཙུག་ཉི་གནང་མ༌ཅ། རོག་ཏེ་བ་ཀི་ རོག་ཏེ་བ་ཀ་རྒྱལ་སྲིད་ ཨོ་ཉ་ཏེ་ངན་སེམས་ཅན་ག་ བི་ལེ་དག་ཁ་ཆ༌མེ། ཉི་ཨོ་ཐེན་ཨ་ཉི་ དཀོན་མཆོག་ག་གསུང་ག་ དེན་ཐ་འགྲུབ་ཕེ་གི༌ལ།

¹⁸ ཉི་ནཱན་གི་ཐོང་ཁཱན་ མེ་ཝག་ཙ་ཤོ་ ཁྲོམ་ཆེན་ཆི་ལུ་གི༌ལ། ཉི་ཨོ་ཉ་ཁྲོམ་ཆེན་གི་ འཛམ་གླིང་ག་ དཔོན་བ་ཀ་ཐུང་ཀེ་ དབང་ཅ་དག་ཉི༎