མཇལ་ཁ། 16 - Tshangla New Testament (BSI)དཀོན་མཆོག༌ག་ཆདཔ༌གི་ཕུང༌ཁཱན་ གུར༌བུ་ཟུམ། 1 ཉི་མཆོད་ཁང་ནང་ཀེ་ གསུང་སྐད་ཆི་ལུ་ཨ་ཝ་ཐུར་གི་ ཞིང་ཁམས་ག་འཐེན་པ་ཟུམ་ག་ཏཱན་ དིན་ཐཱན་ དཀོན་མཆོག་ག་ ཆདཔ་གི་ཕུང་ཁཱན་ གུར་བུ་ཟུམ་ཁེ་པ་ འཛམ་གླིང་ག་ཏཱན་ལུག་ཅོ་དག་ཉི་ གསུངས་ཆོ༌ཝ། 2 ཉི་ཞིང་ཁམས་ག་འཐེན་པ་ དང་པ་གི་དིན་ཐཱན་ རོ་ཀ་གུར་བུ་ཁེ་པ་ ས་ག་ཏཱན་ལུག་ཆོ༌ཝ། ཉི་ཏེ་ངན་སེམས་ཅན་ག་མིང་ག་ རྟགས་ལ་ཁཱན་བ་དང་ རོ་ཀ་སྐུ་ག་ གསོལ་ཝ་ཏབ་ཁཱན་བ་ གནམ་མེད་ས་མེད་ མ་ལེག་པ་ཨ་ཉི་ སོ་ཕུ་ཤོ་ཉི་ནང་དོག༌པ། 3 ཉི་ཞིང་ཁམས་ག་འཐེན་པ་ཉིག་ཙིང་པ་གི་ རོ་ཀ་གུར་བུ་ རྒྱམ་མཚོ་ག་ལུག་པ་ཀབ་ཉི་ ཤི་ནང་རོ་ག་ཞི་ད་བུ་རི་ཉི་ རྒྱམ་མཚོ་ནང་ཀ་ གསོན་པོ་ཨ་ཉི་ཆོ་ཁཱན་ ཐམས་ཅན་རང་ཤི༌ཝ། 4 ཉི་ཞིང་ཁམས་ག་འཐེན་པ་སམ་པ་གི་ རོ་ཀ་གུར་བུ་ རི་དྲང་བ་དང་ ཕོག་ཅི་རི་བ་ཀ་ཏཱན་ ལུག་པ་ཀབ་ཉི་ རི་དྲང་བ་དང་ ཕོག་ཅི་རི་བ་ ཐམས་ཅན་རང་ ཞི་རི༌ཝ། 5 ཉི་རི་ག་ཐུང་ཀེ་ དབང་ཚད་ཆོ་ཁཱན་ ཞིང་ཁམས་ག་འཐེན་པ་གི་ ཨོ་ཐེན་ཞུ་ཝ་ག་ ཇི་གི་ན་ཐ༌ཝ་ དམ་པའི་དཀོན་མཆོག་ ནཱན་ཤོ་ གོ་མ་གེ་རང་བཞུགས་པ་ཆོ༌ཝ། ཉི་ཨོ་མ་བུ་བཞུགས་པ༌ཅ། ཉི་ནཱན་གི་ ཨོ་ཐེན་ཨ་ཉི་ ཁྲིམས་ཀེ་བེ་ག་དེན༌མེ། 6 ཧང་ཡ་དག་ནེ་ལ་ རོག་ཏེ་བ་ཀི་ ན་ག་དམ་པའི་སོ་ངོ་བ་དང་ ལུང་བསྟན་པ་བ་ཤེ་ཉི་ རོག་ཏེ་བ་ཀ་ ཞི་ཤོ་ལེ་རིག་པ༌ཅ། ཉི་ཨོམ་ ནཱན་གི་ རོག་ཏེ་བ་ ཞི་ཇ་མེ་གནང༌མ། རོག་ཏེ་བ་ཀ་ཐོབ་ཐང་ཤོ་ ཨུ་ཉུ་གི་ལ་དག༌ཉི། 7 ཉི་ཇི་གི་ མཆོད་གཤམ་གེ་ལན་ ཨོ་ཐེན་ཞུ་ཝ་ག་ ན་ཐ་ཝ་ གི་ལ་ ཤུགས་སྟོབས་ཆོ༌ཁཱན་ གཙོ༌བོ་ དཀོན༌མཆོག་ ནཱན་གི་ ཧ་ལ་ཨ་ནེ་བུ་ ཁྲིམས་དེན་པ་དང་ ཐྲང་ཉི་གནང་ཅ་དག༌ཉི། 8 ཉི་ཞིང་ཁམས་ག་འཐེན་པ་ཕིཤི་པ་གི་ རོ་ཀ་གུར་བུ་ ངམ་ག་ཏཱན་ལུག༌པ། ཉི་མི་གི་ཨ་ཉི་ སོ་ངོ་ཐམས་ཅན་རང་ ཞུམ་པེ་བི་ཝ་ཆོ༌ཝ། 9 རོག་ཏེ་བ་ དྲེ་ཀི་ཞུམ༌པ། དག་པ་ཀབ་ཉི་ ཨོ་ཐ་རེམ་པ་བ་ཀ་ཐུང་ཀེ་ དབང་ཚད་ཆོ་ཁཱན་ དཀོན་མཆོག་ག་མཚན་ག་ རོག་ཏེ་བ་ཀི་ སྐུར་པ་ཞུན་ཆོ༌ཝ། རོག་ཏེ་བ་ཀི་ སྡིག་པ་གེ་ལོག་ཉི་ དཀོན་མཆོག་ག་ བསྟོད་པ་མ་ཕུལ་ཤི། 10 ཞིང་ཁམས་ག་འཐེན་པ་ལྔ་པ་གི་ རོ་ཀ་གུར་བུ་ ཏེ་ངན་སེམས་ཅན་ག་ཁྲི་ག་ ལུག་པ་ཀབ་ཉི་ རོ་ཀ་རྒྱལ་སྲིད་ མེར་བུ་ནང་ཀ་ཏཱན་ ཐུབ་ཉི་གེ༌མ། ཉི་རོ་ཀ་ཕརའ་ཁེ་ཆོ་ཁཱན་ སོ་ངོ་བ་ གནམ་མེད་ས་མེད་ ནང་དོག་ཉི་ རང་ཏེན་ག་ནོ་ཝང་གི་ རང་ཏེན་ག་ ལེ་ཅཱད༌པ། 11 ཉི་རོག་ཏེ་བ་ སོ་ཕུ་སེ་ཉི་ ཉི་ནང་དོག་པ་ཨ་དེན་གེ་ རོག་ཏེ་བ་ཀི་ ཞིང་ཁམས་ག་ དཀོན་མཆོག་ག་ སྐུར་པ་ཞུ༌ཝ། དག་པ་ཀབ་ཉི་ རོག་ཏེ་བ་ཀི་ རོག་ཏེ་བ་ཀ་ ལའི་ངན་པ་གེ་ སྡིག་པ་གེ་ལོག་པེ་མ་ནཱན་ཤི། 12 ཨོ་ཉ་ཚི་ངེ་ ཞིང་ཁམས་ག་འཐེན་པ་ཁུང་པ་གི་ རོ་ཀ་གུར་བུ་ རི་དྲང་ཆི་ལུ་ ཡུ་ཕེར་ཏྲིས་ག་ཏཱན་ལུག༌པ། ཉི་ཤར་ག་དཔོན་བ་ཀི་ རོག་ཏེ་བ་ཀ་དམག་མི་བ་ ནུབ་ཕྱོགས་ལོ་ཀ་ཏཱན་ ཐོག་ཆ་ཧང་རང་མ་ཝ་ཨ་ཉི་ བུ་ལེ་རེན་ཆེན་དག་པ་གི་ ཨོ་ཉ་རི་དྲང་ཆི་ལུ་ སང་ཉི་ཀུན་ཏི༌ཝ། 13 ཉི་ཇི་གི་ རྣམ་ཤེས་ངན་པ་སམ་ ཏག་ཏག་པ་པུརུས་ཀིན་ཨ་ཝ་ འབྲུག་ག་ནོ་ཝང་གེ་དང་ ཏེ་ངན་སེམས་ཅན་ག་ནོ་ཝང་གེ་ ཉི་ལུང་བསྟན་པ་རྫུས་མ་ག་ ནོ་ཝང་གེ་ ཤོ་ཝ་ཐོང༌མ། 14 རོག་ཏེ་བ་ཤོ་ དོན་བ་ཀ་རྣམ་ཤེས་བ་གི་ཝ་ཆོ༌ཝ། ཉི་ཤུགས་སྟོབས་ཆི་ལུ་ཆོ་ཁཱན་ དཀོན་མཆོག་ཀབ་ཉི་ ཨོ་ཉ་ནོང་ཀ་ ཕྱད་མདའ་ཕི་ལེ་དེན་གེ་ རོག་ཏེ་བ་ཀི་ རྫུ་འཕྲུལ་གེན་ཉི་ འཛམ་གླིང་ག་དཔོན་བ་ ཏབ་ཐུར་ཛོ་མེ་རིག་ཆོ༌ཝ། 15 གོད་ཅོ་ ཇང་དྲོ་ཝཱན་པ་པུརུས་ཀིན་ཨ་ཉི་ཨོ་ཕེ། མ་ཡི་ཕཱན་ཆོ་ཁཱན་དང་ ཁ་མུང་ཕྲིག་ཀིན་ཅབ་ཉི་ཐ་ཁཱན་ཁེ་པ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ རོག་ཙ་ཏི་ལིང་པ་ཨ་ཉི་ དང་མེ་མ་ཁེ་ལཱན་ ངི་ནང་མ་ཁུ༌ལ། 16 ཉི་རོག་ཏེ་བ་ཀི་ དཔོན་བ་དང་ དམག་མི་བ་ ཧི་བུརུ་གེ་ ཨར་མ་གེ་དྲོན་དག་ཉི་ར་ཁཱན་ ས་ཆ་ག་ ཛོ་མེ་རིག་པ་ཆོ༌ཝ། 17 ཉི་གེ་ ཞིང་ཁམས་ག་འཐེན་པ་ཟུམ་པ་གི་ རོ་ཀ་གུར་བུ་ རི་དི་ག་ཏཱན་ལུག་པ་ཀབ་ཉི་ མཆོད་ཁང་ནང་ཀ་གསེར་ཁྲི་གེ་ ཆུ་མ་དག་ཉི་ གསུང་སྐད་ཆི་ལུ་ཨ་ཉི་ གསུངས་ཆོ༌ཝ། 18 ཉི་གེ་ ཏང་ལེབ་ཉི་ ཀཱན་ཇིག་ཉི་ མུང་ཕོག༌པ། ཉི་ན་ཀ་གནམ་མེད་ས་མེད་ ཆི་ལུ་ཨོ་ཕ། སོ་ངོ་བ་ འཛམ་གླིང་ག་ ཆོ་དེན་ཐུར་གེ་ག་ཏཱན་ ཨུ་ཉུ་ད་བུ་ན་ཀ་ཆི་ལུ་ ཧ་ལ་རང་མང་ཕ་ཆོ༌ཝ། 19 བེ་བི་ལོན་ག་ཁྲོམ་ཆེན་ཆི་ལུ་ ཁང་ཇོང་ཉི་ སམ་རི༌ཝ། ཉི་རྒྱལ་ཁབ་བ་ཀ་ ཁྲོམ་ཆེན་བ་ ཆེད་ཉི་ཇོང༌མ། བེ་བི་ལོན་གི་ཨ་ཁཱན་ སྡིག་པ་བ་ ཐམས་ཅན་རང་ དཀོན་མཆོག་གི་ ཡིད་ཀ་ཨ་ཉི་ རོག་གནམ་མེད་ས་མེད་ དགོངསམ་ཁྲེལ་པ་ག་ ཞུ་གི་ཕུང་ཁཱན་ གུར་བུ་གེ་ བེ་བི་ལོན་ག་ ཇ་མེ་བི༌ཝ། 20 མཚོ་བར་ཀ་ཆོ་ཁཱན་ ས་ཆ་ཐམས་ཅན་རང་ ཡེན་ཇོང༌མ། ཉི་ཕུ་ཐམས་ཅན་རང་ དེད་ཉི་ཇོང༌མ། 21 ཉི་སེར་བ་ ཆི་ལུ་ཆི་ལུ་ཨ་ཝ་བ་ཁེ༌ཝ། སེར་བ་ག་ཇིན་ ཤེར་ 30 ཕང་ ཤོ་ཝ་ག་ཆོ་ཁཱན་བ་ ངམ་ཐུང་ཀེ་དོང་ སོ་ངོ་བ་ཀ་ཐུང་ཀ་ཏཱན་ ཞུད་ཉི་ཁེ༌ཝ། ཉི་རོག་ཏེ་བ་ཀི་ སེར་བ་ ཡོང་ཁེ་སི་སི་ཨ་ཝ་ ཆོ་ཝ་ཨ་དེན་གེ་ དཀོན་མཆོག་ག་ སྐུར་པ་ཞུན་ཆོ་ཝ༎ |