མཇལ་ཁ། 15 - Tshangla New Testament (BSI)

མོ་ས་དང་ ཤི་ཤ་ཀ༌ཏོང༌ག་མགུར༌མ།

¹ ཉི་གེ་ ཇི་གི་གོད་པ་ཀབ་ཉི་ ཞིང་ཁམས་ག་ ཨོམ་ཆང་རང་ མཇལ་ཁ་ཐུར་ཉོང༌པ། ཉི་ཨུ་ཉུ་ཤོ་ གནམ་མེད་ས་མེད་ཆི་ལུ་དང་ ཡིད་ཆི་ཝ་ཨ་ཝ་ཐུར་ཉོང༌པ། ཞིང་ཁམས་ག་འཐེན་པ་ཟུམ་གི་ རེམ་པ་མཇུག་དུས་ཟུམ་ཕཱན་ཆོ༌ཝ། ཉི་ཨོ་ཉ་རེམ་པ་ཟུམ་ཆུམ་དེན་གེ་ དཀོན་མཆོག་དགོངསམ་ཁྲེལ་པ་ ནོར་བེ་གི་ཝ༌ལ།

² ཇི་གི་གོད་པ་ཀབ་ཉི་ ཤེ་ག་རྒྱམ་མཚོ་ མི་ཀབ་ཉི་ ཡ་ཝ་ཨ་ཝ་ཐོང༌མ། ཉི་ཏེ་ངན་སེམས་ཅན་དང་ རོ་ཀ་སྐུ་ ཉི་རོ་ཀ་མིང་ག་རྟགས་གེ་ རྒྱལ་ཁ་ཉོང་ཁཱན་ སོ་ངོ་བ་ ཨོ་ཉ་ཐུང་ཀ་ཐིང་མ་ཆོ༌ཝ། ཉི་རོག་ཏེ་བ་ ཐམས་ཅན་གི་ དཀོན་མཆོག་གི་གནང་ཁཱན་ པི་ཝང་མེན་མ་ཆོ༌ཝ།

³ ཉི་རོག་ཏེ་བ་ཀི་ དཀོན་མཆོག་ག་གཡོག་པ་ མོ་ས་ག་མགུར་མ་དང་ ཤི་ཤ་ཀ་ཏོང་ག་མགུར་མ་ཕུལ་ཆོ༌ཝ་ ཤུགས༌སྟོབས༌ཆོ༌ཁཱན་གཙོ༌བོ་དཀོན་མཆོག་ ན་ག་ཕྱག་ལཱ་བ་ཆི་ལུ་དང་ ཡིད་ཆི་ཝ་ག༌ལ། རྒྱལ་ཁབ་ཐམས་ཅན་ག་དཔོན་ ན་ག་ལམ་ག་བ་ཤོ་ ཐྲང་པུ་དང་དེན་པ༌ལ།

⁴ གཙོ་བོ་ ཨི་བི་གི་ ནཱན་གེ་ཡོང་མ་ཁེ་ལ༌ཡ། ཉི་ན་ག་མཚན་ག་ བསྟོད་པ་མ་ཕུལ་ལ༌ཡ། ཧང་ཡ་དག་ནེ་ལ་ ནཱན་ཐུར་ཤ་དམ་པ༌ཅ། རྒྱལ་ཁབ་ཐམས་ཅན་གི་ ན་ག་སྐུན་མདུན་ག་ཨུན་ཐཱན་ ན་ག་གསོལ་ཝ་ཏ༌པེ། ཧང་ཡ་དག་ནེ་ལ་ ནཱན་ཤོ་ ཁྲིམས་ཐྲང་ཉི་གནང་ཁཱན་གི་ལ་དག་ཉི་ ནཱན་གི་ གེན་གནང་མ༌ཅ༎

རེམ་པ་ཟུམ༌ག་གུར་བུ་ཟུམ།

⁵ ཨོ་ཐ་ཚི་ངེ་ ཇི་གི་གོད་པ་ཀབ་ཉི་ ཞིང་ཁམས་ག་ མཆོད་ཁང་ཐུར་ཕེག་པ་ཐོང༌མ། ཉི་ཨུ་ཉུ་ཤོ་ དཀོན་མཆོག་ག་ འཛོམས་དཔང་ག་གུར་ཁང་ཁེ་པ་ གི་ཝ་ཆོ༌ཝ།

⁶ ཉི་གེ་ རེམ་པ་ཟུམ་མེན་ཁཱན་ ཞིང་ཁམས་ག་འཐེན་པ་ཟུམ་ མཆོད་ཁང་གེ་ཕིས་ཀ་ བྱོན་ཆོ༌ཝ། རོག་ཏེ་བ་ཀི་ ཁ་ཤ་བ་ལིང་མིན་ཨ་ཝ་ཆོ་ཁཱན་ ནམ་བཟའ་བཞེས་ཝ་ཆོ༌ཝ། ཉི་རོག་ཏེ་བ་ཀ་ ནམ་བཟའ་ག་ ཙོག་པ་ད་སུར་རང་ མ་ཁེ་ཝ་ཆོ༌ཝ། ཉི་རོག་ཏེ་བ་ཀ་ བཱརང་ཏོང་ཀོ་ལོ་ལོ་ གསེར་ག་ཐེ་མུ་ཆུ་ཝ་ཆོ༌ཝ།

⁷ གསོན་པོ་ཨ་ཉི་ཆོ་ཁཱན་ སེམས་ཅན་ཐུར་གི་ ཞིང་ཁམས་ག་འཐེན་པ་ཟུམ་ག་ཏཱན་ གསེར་ག་གུར་བུ་ ཐུར་རེ་རེ་བིན་ཆོ༌ཝ། ཉི་ཧ་ལ་ཨ་ནེ་བུ་ དུས་ཏ་བུ་རང་ གསོན་པོ་ཨ་ཉི་བཞུགས་ཁཱན་ དཀོན་མཆོག་ག་དགོངསམ་གི་ ཨོ་ཉ་གུར་བུ་བ་ ཕུང་མ་ཆོ༌ཝ།

⁸ ཉི་མཆོད་ཁང་ཁེ་པ་ དོ་ཟོ་རང་ དཀོན་མཆོག་ག་ གཟི་བརྗིད་དང་ སྟོབས་དབང་ག་ མུ་གུ་གི་ཕུང༌མ། ཉི་ཞིང་ཁམས་ག་འཐེན་པ་ཟུམ་གི་ རེམ་པ་མཇུག་དུས་ཟུམ་ཁེ་པ་ ལུག་ཉི་མ་ཆུ་མ་སག་པུ་ ཨི་བི་རང་ མཆོད་ཁང་ནང་ཀ་ ནུ་ཕེ་མར་ཤི༎