མཇལ་ཁ། 14 - Tshangla New Testament (BSI)ཤི་ཤ་ཀ་ཏོང་དང་ 144000 སློ༌མ༌བ་ཆོ༌ཝ། 1 ཇི་གི་གོད་པ་ཀབ་ཉི་ ཕུ་སི་ཡོན་ག་ ཤི་ཤ་ཀ་ཏོང་ཐིང་ཉི་བཞུགས་པ་ཆོ༌ཝ། ཉི་རོག་ཀབ་ཉི་ རོ་ཀ་མཚན་དང་ རོ་ཀ་ཡབ་ག་མཚན་ པ་ཏོང་ག་འབྲི་ཁཱན་ 144000། 2 ཉི་ཇི་གི་ ཞིང་ཁམས་གེ་ རི་ཇོག་ཆི་ལུ་ག་ཀཱན་ ཨུ་ཉུ་མ་ནེ་ལ་ མུང་ཆི་ལུ་ཨ་ཉི་ཕོག་པ་ག་ ཀཱན་ད་བུ་ཐུར་ ན་ཐ༌ཝ། ཉི་པི་ཝང་ཚབ་ཁཱན་ མང་པུ་ཐུར་གི་ པི་ཝང་ཚ་ཕ་ག་ཀཱན་ད་བུ་ཆོ༌ཝ། 3 ཉི་རོག་ཏེ་བ་ཀི་ གསེར་ཁྲི་ག་གུབ་ཀ་དང་ གསོན་པོ་ཨ་ཉི་ཆོ་ཁཱན་ སེམས་ཅན་ཕིཤི་ག་གུབ་ཀ་ ཉི་སོ་ངོ་ཆི་ལུ་བ་ཀ་གུབ་ཀ་ མགུར་མ་སིང་མ་ཕུལ་བ༌ལ། འཛམ་གླིང་གེ་ཤོག་ཁཱན་ 144000 མ་ཏོག་པ་ བཱརའ་ཐུར་གི་རང་ ཨོ་ཉ་མགུར་མ་ ལམ་པེ་མར་བ༌ལ། 4 ཧང་ཡ་དག་ནེ་ལ་ རོག་ཏེ་བ་ཤོ་ མེ་ཝག་ཙ་ཀབ་ཉི་ མ་ཙང་མ་རི་ཝ་མཱན་ཆི། ཉི་རོག་ཏེ་བ་ཤོ་ ཙང་མ་ཆོ༌ཝ། ཉི་ཤི་ཤ་ཀ་ཏོང་ ཨོ་ག་ཏཱན་བྱོན་མ་ཐུར་ རོག་ཏེ་བ་བུ་ རོ་ཀ་ཕྱག་ཞུ་ཉི་བྱོན་ཆོ༌ཝ། ཉི་རོག་ཏེ་བ་ཤོ་ དཀོན་མཆོག་དང་ ཤི་ཤ་ཀ་ཏོང་ག་དེན་གེ་ ཐོང་ཨ་ཉི་ སོ་ངོ་བ་ཀ་པོང་ཀེ་ ཤོག་པ་གི་ཝ༌ལ། 5 རོག་ཏེ་བ་ཀ་ནོ་ཝང་ག་ སོ་ད་ཐོང་མ་མཱན་ཆི། ཉི་རོག་ཏེ་བ་ཤོ་ ཅོན་ད་སུར་རང་མ་ཁཱན་ གི་ཝ་ཆོ་ཝ༎ ཞིང་ཁམས༌ག་འཐེན༌པ་སམ། 6 ཉི་གེ་ ཇི་གི་གོད་པ་ཀབ་ཉི་ ཨོམ་ཆང་རང་ ཞིང་ཁམས་ག་འཐེན་པ་ཐུར་ ཨོ་ཐ་འཛམ་གླིང་ག་སོ་ངོ་བ་ཀ་ མ་འགྱུར་བརྟན་པ་ག་ འཐེན་ལེག་པུ་ བཤད་པེ་དེན་གེ་ ཞིང་ཁམས་བར་ཀེ་ ཕེན་མ་ཨ་ཝ་མཇལ༌བ། ཨུ་ཉུ་ཤོ་ མི་རིགས་མ་འདྲ་ཝ་བ་དང་ ལོ་མ་འདྲ་ཝ་ཨ་ཁཱན་བ་ ཉི་རྒྱལ་ཁབ་མ་འདྲ་ཝ་བ་དང་ འཛམ་གླིང་ག་སོ་ངོ་ཐམས་ཅན་ག་ བཤད་པེ་གི་ཝ༌ལ། 7 རོ་ཀི་གསུང་སྐད་ཆི་ལུ་ཨ་ཉི་ གསུངས་ཆོ་ཝ་ དཀོན་མཆོག་གེ་ཡོང་ཁེ། ཉི་རོ་ཀ་གཟི་བརྗིད་ཕུལ་ཤོ། ཧང་ཡ་དག་ནེ་ལ་ རོ་ཀི་ཁྲིམས་ཅཱད་པེ་ག་ དུས་ཙུན་རེན་པ༌ཅ། ཉི་རོ་ཀ་གསོལ་ཝ་ཏབ༌ཅོ། ཧང་ཡ་དག་ནེ་ལ་ རོག་ཤོ་ ཞིང་ཁམས་དང་འཛམ་གླིང་ ཉི་རྒྱམ་མཚོ་དང་ ཕོག་ཅི་རི་བ་བཀོད་ཁཱན་གི་ལ་དག༌ཉི། 8 ཉི་ཞིང་ཁམས་ག་འཐེན་པ་ཉིག་ཙིང་པ་ ཤོན་ཐཱན་ གསུངས་མ་ལ་ བེ་བི་ལོན་ཇཝ་ཆུ༌མ། ཁྲོམ་ཆེན་ཆི་ལུ་ཇཝ་ཆུ༌མ། ཧང་ཡ་དག་ནེ་ལ་ ཨོ་ཐ་ཁྲོམ་ཆེན་གི་ འཛམ་གླིང་ག་རྒྱལ་ཁབ་བ་ འདོད་ཆགས་ཨ་ཉི་ རོ་ཀ་ལུས་འབྲེལ་མ་ཙང་མ་ག་ ཞུ་ཇ་མེ་རིག༌པ། 9 ཉི་རོག་ཉིག་ཙིང་ག་ཚིང་ཚིང་ ཞིང་ཁམས་ག་འཐེན་པ་སམ་པ་ཤོན་ཐཱན་ གསུང་སྐད་ཆི་ལུ་ཨ་ཉི་ གསུངས་མ་ལ་ ཏེ་ངན་སེམས་ཅན་དང་ རོ་ཀ་སྐུ་ག་གསོལ་ཝ་ཏབ་ཁཱན་བ་ ཉི་རོ་ཀ་རྟགས་ པ་ཏོང་དང་ ག་དང་ག་ལ་ཁཱན་བ་ཀི་ 10 དཀོན་མཆོག་ དགོངསམ་ཁྲེལ་པ་ག་ ཞུ་ཇ་མེ་ཁེ༌ལེ། ཉི་ཨོ་ཉ་ཞུ་ཁེ་པ་ རི་ད་སུར་རང་མ་ཡ་ལཱན་ དཀོན་མཆོག་ དགོངསམ་ཁྲེལ་པ་ག་ གུར་བུ་ནང་ཀ་ཏཱན་ལུག་པ༌ཅ། ཉི་དམ་པའི་ཞིང་ཁམས་ག་འཐེན་པ་བ་དང་ ཤི་ཤ་ཀ་ཏོང་ག་སྐུན་མདུན་ག་ མི་དང་སཱལ་ཕར་གི་ཞུབ་ཉི་ རོག་ཏེ་བ་ གནམ་མེད་ས་མེད་ དཀའ་ཝ་ཅཱད༌པེ། 11 ཉི་རོག་ཏེ་བ་ དཀའ་ཝ་ཅཱད་པེ་བི་ཁཱན་ མི་ག་མུ་གུ་ དུས་ཏ་བུ་ག་དེན་གེ་ ག་ཏཱན་དིན༌ཅ། ཉི་རོག་ཏེ་བ་ ངབ་ཀ་ཨ་ནེ་བུ་ བི་ནང་ག་ཨ་ནེ་བུ་ ཤོང་ལ་ལེ་མ་ཉོང༌པ། ཧང་ཡ་དག་ནེ་ལ་ རོག་ཏེ་བ་ཀི་ ཏེ་ངན་སེམས་ཅན་དང་ རོ་ཀ་སྐུ་ག་གསོལ་ཝ་ཏ་པ༌ཅ། ཉི་རོ་ཀ་མིང་ག་ རྟགས་ལ་ཝ༌ཅ། 12 དག་པ་ཀབ་ཉི་ དཀོན་མཆོག་ག་བཀའ་རྒྱ་ག་ ཆ་གནས་ཐ་ཉི་ ཉི་ཡི་ཤུ་ག་ཏཱན་ དད་པ་ཀེ་ཁཱན་ཁེ་པ་ སྒྲིང་སྒྲིང་ཨ་ཉི་ཙུང་ཁཱན་ དཀོན་མཆོག་ག་ དམ་པའི་སོ་ངོ་བ་ཀི་ ཐེས་པེ་ཁེ་ལེ་དག་ཉི་ ར་ཝ༌ཅ། 13 ཉི་ཇི་གི་ ཞིང་ཁམས་གེ་ གསུང་སྐད་ཐུར་ ན་ཐ་ཝ་ ཨོ་ཐ་ཆཱས་འབྲི་ཤོ་དག་ཉི་ གསུངས་ཆོ༌ཝ། ཨོ་ཐ་གེ་ག་ཏཱན་ གཙོ་བོ་ག་དད་པ་ཨ་ཉི་ ཤི་ཁཱན་བ་ཤོ་ བྱིན་རླབས་ཅན་གི༌ལ། གི་ལ་ རོག་ཏེ་བ་ཤོ་ རོག་ཏེ་བ་ཀ་ལའི་ཅིད་པུ་གེ་ ཤོང་ལ་ལེ་ཉོང་པེ་དག་ཉི་ དམ་པའི་ཐུགས་ཉིད་གི་གསུངས༌ལ། ཧང་ཡ་དག་ནེ་ལ་ རོག་ཏེ་བ་ཀ་ལའི་ལེག་པུ་བ་ རོག་ཏེ་བ་ཀབ་ཉི་ དིན་ཅ་གི་ལ༎ འཛམ་གླིང༌ག་ ཐོག་དུས་པ༌ལ། 14 ཉི་གེ་ ཇི་གི་གོད་པ་ཀབ་ཉི་ སོ་ངོ་ག་ཟ་པུརུས་ཀིན་ཨ་ཝ་ མུག་པ་བ་ལིང་མིན་ ཨ་ཝ་ག་ཐུང་ཀ་ བཞུགས་པ་ཨ་ཝ་མཇལ༌བ། རོ་ཀ་དབུ་ག་ གསེར་ག་རྒྱལ་ཞྭ་ཆོ༌ཝ། ཉི་རོ་ཀ་ཕྱག་ཀ་ ནང་ཁ་ཅི་ཚེ་བུ་ཨ་ཝ་ཐུར་ བསྣམས་པ་ཆོ༌ཝ། 15 ཉི་མཆོད་ཁང་གེ་ ཞིང་ཁམས་ག་འཐེན་པ་ཐུར་བྱོན་ཐཱན་ གསུང་སྐད་ཆི་ལུ་ཨ་ཉི་ མུག་པ་ཐུང་ཀ་བཞུགས་ཁཱན་ག་ཏཱན་ ཞུན་ཆོ་ཝ་ ནང་ཁ་ཅི་ཐུབ༌ཅོ། ཧང་ཡ་དག་ནེ་ལ་ ནཱན་གི་ཐོག་དུང་མེ་ག་ དུས་ཙུན་རེན༌པ། ཉི་འཛམ་གླིང་ག་ ཐོག་ཕུག་པ་ཅ་དག༌ཉི། 16 ཉི་མུག་པ་ཐུང་ཀ་བཞུགས་ཁཱན་གི་ རོ་ཀ་ནང་ཁ་ཅི་ འཛམ་གླིང་ཐུང་ཀ་ཏཱན་རིང་ཐཱན་ འཛམ་གླིང་ག་ཐོག་དུང༌མ། 17 ཨོ་ཉ་ཚི་ངེ་ ཞིང་ཁམས་ག་མཆོད་ཁང་གེ་ ཨོམ་ཆང་རང་ ཞིང་ཁམས་ག་འཐེན་པ་ཐུར་ བྱོན་ཆོ༌ཝ། ཉི་རོ་ཀ་ཕྱག་ཀ་བུ་ ནང་ཁ་ཅི་ ཚེ་བུ་ཨ་ཝ་ཐུར་ཆོ༌ཝ། 18 ཉི་གེ་ མི་ག་ཐུང་ཀེ་ དབང་ཚད་ཆོ་ཁཱན་ ཞིང་ཁམས་ག་འཐེན་པ་ མཆོད་གཤམ་གེ་བྱོན་ཐཱན་ ནང་ཁ་ཅི་མེན་ཁཱན་ ཞིང་ཁམས་ག་འཐེན་པ་ག་ཏཱན་ གསུང་སྐད་ཆི་ལུ་ཨ་ཉི་ གསུངས་ཆོ་ཝ་ ན་ག་ནང་ཁ་ཅི་གི་ འཛམ་གླིང་ག་ཆོ་ཁཱན་ ཨང་གུར་ཤིང་གེ་ ཨང་གུར་སེ་ ཁག་ཏང་ཁག་ཏང་ཨ་ཉི་ ཆོ་ཁཱན་བ་དུས༌ཅོ། ཧང་ཡ་དག་ནེ་ལ་ ཨང་གུར་སེ་མིན་པ་ལ་དག༌ཉི། 19 ཉི་ཞིང་ཁམས་ག་འཐེན་པ་གི་ རོ་ཀ་ནང་ཁ་ཅི་ འཛམ་གླིང་ག་ཏཱན་རིང་ཉི་ འཛམ་གླིང་ག་ ཨང་གུར་སེ་བ་དུས་ཐཱན་ སེ་དྲབ་ས་ག་ཏཱན་ གེམ་ཀུན་ཏི༌ཝ། ཉི་ཨུ་ཉུ་ཤོ་ དཀོན་མཆོག་ དགོངསམ་ཁྲེལ་པ་ཨ་དེན་གེ་ ཁྲིམས་གི༌ལ། 20 ཨོ་ཉ་སེ་དྲབ་ཁཱན་ཤོ་ ཁྲོམ་ཆེན་གེ་ཕིས་ཀ་ཆོ༌ཝ། ཉི་ཨང་གུར་སེ་དྲ་ཕ་ཀབ་ཉི་ ཞི་རི་དྲང་ད་བུ་ཤོ་ཉི་ ཀི་ལོ་མི་ཊར་ 320 ཕང་དབ་ཏུར་ དི་ཝ་ཆོ༌ཝ། ཉི་ཞི་ག་ཏིང་བུ་ ཀུར་ཏ་ཐུར་ ཟེག་པེ་རེ་བ་ག་ཏིང་ཆོ་ཝ༎ |