མཇལ་ཁ། 13 - Tshangla New Testament (BSI)ཏེ་ངན་སེམས༌ཅན་དང༌པ། 1 ཉི་ཨོམ་ ཇི་གི་ ཇ་ག་མཇལ་ཁ་ནང་ཀ་ ཏེ་ངན་སེམས་ཅན་ཐུར་ རྒྱམ་མཚོ་གེ་ཤོ་ཝ་ཨ་ཝ་ ཐོང༌མ། རོ་ཀ་ཤ་རང་ཟུམ་ཆོ༌ཝ། ཝ་རོང་སེ་ཆོ༌ཝ། ཉི་ཝ་རོང་ཐུང་ཀ་ རི་ང་སེ་ཆོ༌ཝ། ཉི་ཤ་རང་དྲང་རང་ དཀོན་མཆོག་ག་ སྐུར་པ་ཞུ་ཁཱན་ མིང་འབྲི་བ་ཆོ༌ཝ། 2 ཨོ་ཐ་ ཏེ་ངན་སེམས་ཅན་ཤོ་ གོད་པ་ཀབ་ཉི་ བར་ཏ་ད་བུ་ཆོ༌ཝ། དག་པ་ཀབ་ཉི་ རོ་ཀ་བི་ཤོ་ ཨོམ་ཤ་ག་བི་དང་ ནོ་ཝང་ཤོ་ སེང་གེ་ག་ནོ་ཝང་གི་ཝ་ཆོ༌ཝ། ཉི་འབྲུག་གི་ རོག་ཏེན་ག་ སྟོབས་དབང་དང་ རོག་ཏེན་ག་ཁྲི་ ཉི་རོག་ཏེན་ག་ དབང་ཚད་ཆི་ལུ་ཁེ་པ་ སེམས་ཅན་ག་ཏཱན་བི༌ཝ། 3 ཏེ་ངན་སེམས་ཅན་ག་ ཤ་རང་ཐུར་ དྲག་པེ་མར་བ་ཨ་ཉི་རང་ ཅོན་མ་ཆོ༌ཝ། དག་པ་ཀབ་ཉི་ ཨོ་ཉ་མ་ཁ་ཁེ་པ་ དྲག་པ་ཆོ༌ཝ། ཨོ་ཐ་གོད་ཉི་ འཛམ་གླིང་ག་སོ་ངོ་བ་ ཐམས་ཅན་རང་ ཡིད་ཆི་ཉི་ ཨོ་ཉ་ཏེ་ངན་སེམས་ཅན་ག་ ཚིང་ཁོན་ཆོ༌ཝ། 4 རོག་ཏེན་ག་དབང་ཚད་ འབྲུག་གི་ ཨོ་ཉ་ཏེ་ངན་སེམས་ཅན་ག་ བི་ཝ་ཨ་དེན་གེ་ སོ་ངོ་བ་ཀི་ འབྲུག་ག་གསོལ་ཝ་ཏ་པ༌ལ། ཉི་ཏེ་ངན་སེམས་ཅན་ག་བུ་ གསོལ་ཝ་ཏབ་ཉི་ ཡེག་པ་ལ་ ཨོ་ཐ་ཏེ་ངན་སེམས་ཅན་ད་བུ་ ཨི་བི་ཅ་ཡ། ཉི་ཨི་བི་གི་ རོག་ཀབ་ཉི་ ཕྱད་མདའ་ཕི་ལེ་ རེ་བེ་ཡ་དག༌ཉི། 5 ཨོ་ཉ་ཏེ་ངན་སེམས་ཅན་ག་ ནོ་ཝང་ཁེ་པ་ ཁམ་ཙོང་ཁཱན་དང་ དཀོན་མཆོག་ག་ སྐུར་པ་ཞུ་ཁཱན་ ཅོད་པ་ཆོ༌ཝ། ཉི་རོ་ཀི་ ཧང་ཨ་ལེ་ལ་མ་ཐུར་ ཨ་ལེ་ག་དབང་ཚད་ ལ་ཉི་ 42 སག་པུ་ བི་ཝ་ཆོ༌ཝ། 6 དཀོན་མཆོག་ག་ སྐུར་པ་ཞུ་ལེ་དེན་གེ་དང་ རོ་ཀ་མཚན་ག་ སྐུར་པ་ཞུ་ལེ་དེན་གེ་ ཉི་རོག་བཞུགས་ས་ག་དང་ ཞིང་ཁམས་ག་ཆོ་ཁཱན་བ་ཀ་ སྐུར་པ་ཞུ་ལེ་དེན་གེ་ ཨོ་ཉ་ཏེ་ངན་སེམས་ཅན་གི་ རོ་ཀ་ནོ་ཝང་ཆོག་ཆོ༌ཝ། 7 ཉི་ཨོམ་ཆང་རང་ དཀོན་མཆོག་ག་ དམ་པའི་སོ་ངོ་བ་ཀབ་ཉི་ ཕྱད་མདའ་ཕི་ཉི་ རོག་ཏེ་བ་ ཕ་མེ་ག་བི་ཝ་ཆོ༌ཝ། མི་རིགས་མ་འདྲ་ཝ་བ་དང་ ལོ་མ་འདྲ་ཝ་ཨ་ཁཱན་བ་ ཉི་རྒྱལ་ཁབ་མ་འདྲ་ཝ་བ་དང་ འཛམ་གླིང་ག་སོ་ངོ་ཐམས་ཅན་རང་ དབང་པེ་ག་དབང་ཚད་བུ་ རོ་ཀ་ཏཱན་བི་ཝ་ཆོ༌ཝ། 8 ཉི་འཛམ་གླིང་ག་ཆོ་ཁཱན་ ཐམས་ཅན་གི་ ཨོ་ཉ་ཏེ་ངན་སེམས་ཅན་ག་ གསོལ་ཝ་ཏ༌པེ། ཉི་རོག་ཏེ་བ་ཤོ་ འཛམ་གླིང་ག་ རྨང་ཆེ་ལེ་གོ་མ་ བཀྲོངས་ཁཱན་ཤི་ཤ་ཀ་ཏོང་ག་ ཚེ་ག་དཔེ་ཆ་ནང་ཀ་ མིང་མ་འབྲི་ཁཱན་བ་གི༌ལ། 9 ཨི་བི་ག་ན་ཆོ་ཝ་ཐུར་ཉཱན༌ཅོ། 10 ཙུང་ཉི་བུ་ལེ་ཁེ་ཁཱན་བ་ ཙུང་ཉི་བུ༌ལེ། ཉི་གི་རིང་ག་ཐུང་ཀེ་ཨ་ཉི་ ཤི་ལེ་ཁེ་ཁཱན་བ་ གི་རིང་གི་རང་ཤེ༌ལེ། དག་པ་ཀབ་ཉི་ དཀོན་མཆོག་ག་ དམ་པའི་སོ་ངོ་བ་ཀི་ཤོ་ཐེས་ཉི་ ཉི་དམ་ཚིག་ཙུང་ཉི་ ཆོ་ལེ་དེན་གེ་ར་ཝ་གི་ལ༎ ཏེ་ངན་སེམས༌ཅན་ཉིག་ཙིང༌པ། 11 ཉི་གེ་ ཇི་གི་གོད་པ་ཀབ་ཉི་ ཨོམ་ཆང་རང་ ཏེ་ངན་སེམས་ཅན་ཐུར་ ས་ནང་ཀེ་ཤོ་ཝ་ཐོང༌མ། ཤི་ཤ་ཀ་ཏོང་ག་པུརུས་ཀིན་ཨ་ཉི་ རོ་ཀ་བུ་ ཝ་རོང་ཉིག་ཙིང་ཆོ༌ཝ། ཉི་རོ་ཀི་ འབྲུག་ད་བུ་རང་ཆཱས་ཨན་ཆོ༌ཝ། 12 གོ་དང་པ་ ཏེ་ངན་སེམས་ཅན་ག་དབང་ཚད་ ཐམས་ཅན་ག་ཐུང་ཀེ་ཨ་ཉི་ ཨོ་ཐ་ཏེ་ངན་སེམས་ཅན་ ཉིག་ཙིང་པ་གི་ ལའི་ཨན་ཆོ༌ཝ། ཉི་རོ་ཀི་ འཛམ་གླིང་དང་ འཛམ་གླིང་ག་སོ་ངོ་ ཐམས་ཅན་གི་ ཤི་སྲོག་ག་ མ་ཁ་ཤོ་ཝ་གེ་དྲག་ཁཱན་ ཏེ་ངན་སེམས་ཅན་ དང་པ་ག་ཏཱན་ གསོལ་ཝ་ཏ་པེ་བིན་ཆོ༌ཝ། 13 རོ་ཀི་རྟགས་མཚན་ཆི་ལུ་བ་གེན་ཉི་ སོ་ངོ་ཐམས་ཅན་གི་ གོད་ཅ་ཨ་ཉི་ ཞིང་ཁམས་གེ་དོང་ འཛམ་གླིང་ག་ཏཱན་ མི་བུ་ཞུད་ཉི་ཁེ་ལེ་བིན་ཆོ༌ཝ། 14 སེམས་ཅན་དང་པ་ག་ཚབ་ཀ་ རྟགས་མཚན་བ་གེན་ཉི་ རོ་ཀི་འཛམ་གླིང་ག་ སོ་ངོ་བ་ཀ་ མགུ་སྐོར་ཕི་ལེ་བི་ཝ་ཆོ༌ཝ། གི་རིང་གི་ མ་ཁ་ཆི་ལུ་ཤོ་ནེ་བུ་ ལོག་ཉི་གསོན་པོ་རི་ཁཱན་ ཏེ་ངན་སེམས་ཅན་དང་པ་ག་ སྐུ་ཅོད་ཅོ་དག་ཉི་ རོ་ཀི་འཛམ་གླིང་ག་ སོ་ངོ་བ་ཀ་ཏཱན་ བཀའ་བིན་ཆོ༌ཝ། 15 ཉི་ཨོ་ཉ་སྐུ་གི་ ཆཱས་ཨ་ལེ་རེ་བེ་དེན་གེ་དང་ སྐུ་ག་ཏཱན་གསོལ་ཝ་ཏ་པེ་མ་ན་ཁཱན་ ཨི་བི་རང་གི་ནེ་བུ་ ཤེ་ལེ་དེན་གེ་ རོ་ཀི་ཨོ་ཉ་སྐུ་ག་ཏཱན་ ཚེ་བི་ལེ་ག་དབང་ཚད་ བི་ཝ་ཆོ༌ཝ། 16 ཉི་རོ་ཀི་ སོ་ངོ་ཆི་ལུ་དང་ཟེ་མུ་ བེ་དིང་དང་དུག་པུ་ ཟ་པ་དང་ ཟ་པ་མང་གི་ཁཱན་ ཐམས་ཅན་ག་ ག་དང་ལ་ཉོང་ག་གི་ནེ་བུ་ པ་ཏོང་ག་གི་ནེ་བུ་ རྟགས་ཀེ་བེ་བིན་ཆོ༌ཝ། 17 ཉི་ཨོ་ཉ་རྟགས་མ་ནེ་ལ་ ཐུར་གི་བུ་ ཧང་རང་ ངོ་ལེ་རེ་བུ་མཱན་ཆི། ཉི་ཧང་རང་ ཙོང་མེ་བུ་རེ་བུ་མཱན་ཆི། ཉི་ཨོ་ཉ་རྟགས་ཤོ་ ཏེ་ངན་སེམས་ཅན་ དང་པ་ག་མིང་གི་ཝ་ཆོ༌ཝ། ཡང་ན་ལ་ རོ་ཀ་མིང་ག་ ཁ་གྱངས་གི་ཝ་ཆོ༌ཝ། 18 ཨོ་ཐ་ཁ་གྱངས་ ཧ་གོ་ལེ་དེན་གེ་ རིག་པ་ཚཱས༌པེ། ཉི་ཨི་བི་གི་ ཧ་གོ་ལེ་རེ་བ་ཐུར་ ཨོ་ཐ་ཁ་གྱངས་ག་རྩིས་ཕི། ཧང་ཡ་དག་ནེ་ལ་ ཨུ་ཉུ་ཤོ་ སོ་ངོ་ག་ཁ་གྱངས་གི༌ལ། ཉི་རོ་ཀ་ཁ་གྱངས་ཤོ་ 666 གི་ལ༎ |