མཇལ་ཁ། 12 - Tshangla New Testament (BSI)མེ་ཝག་ཙ་དང་འབྲུག། 1 ཉི་ཇི་གི་ ཞིང་ཁམས་ག་རྟགས་ ཆི་ལུ་ཐུར་ཐོང༌མ། མེ་ཝག་ཙ་ཐུར་གི་ ཁ་མུང་ངམ་ཡེ་ཝ་ཆོ༌ཝ། ཉི་ལ་ཉི་ངམ་ཤོ་ རོ་ཀ་བི་ཕརའ་ཁ་ཆོ༌ཝ། ཉི་རོ་ཀ་ཤ་རང་ག་ སྐར་མ་སྨིན་དྲུག་ སོང་ཉིག་ཙིང་གི་ཅོད་ཁཱན་ རུམ་ནང་ཆོ༌ཝ། 2 ཉི་རོག་ཤོ་ ལུས་པུ་མ་ཉམ་པ་ཆོ༌ཝ། ཉི་རོ་ཀི་ ཝག་ཙ་སིང་མེ་ཅམ་པ་ཨ་དེན་གེ་ ན་ཚ་ཨུ་ཉི་ གནམ་མེད་ས་མེད་ གེབ་ཆོ༌ཝ། 3 ཡིད་ཀ་རྣམ་ཏོག་མ་ཝ་ ཇི་གི་ཞིང་ཁམས་ག་ ཨོམ་ཆང་རང་ རྟགས་ཆི་ལུ་ཐུར་ཐོང༌མ། ཙ་ལུ་ཨ་ཝ་ འབྲུག་ཆི་ལུ་ཐུར་ག་ ཤ་རང་ཟུམ་དང་ ཝ་རོང་སེ་ཆོ༌ཝ། ཉི་རོ་ཀ་ཤ་རང་ཟུམ་ག་ རི་ང་ཟུམ་ཙུག་པ་ཆོ༌ཝ། 4 རོ་ཀ་ཤམ་པི་གི་ སྐར་མ་སྨིན་དྲུག་ཅ་སམ་གེ་ ཅ་ཐུར་དོང་ཕབ་ཐཱན་ འཛམ་གླིང་ག་ཏཱན་ཐུབ་ཉི་གེ༌མ། ཉི་ཨོ་ཉ་མེ་ཝག་ཙ་གི་ རོ་ཀ་ཝག་ཙ་ སིང་མེ་ཅམ་ཅ་ཨ་ཉི་ ཝག་ཙ་སིང་མ་ཐུར་ག་རང་ ང་མེ་དེན་གེ་ རོག་མེ་ཝག་ཙ་ག་གུབ་ཀ་ ཐིང་ཉི་ཆོ༌ཝ། 5 ཉི་ཨོ་ཉ་མེ་ཝག་ཙ་གི་ ཝག་ཙ་ཟ་ཐུར་སིང༌མ། ཉི་ཨོ་ཉ་ཝག་ཙ་གི་ པེར་ག་ཕྱག་འཁར་ག་ཐུང་ཀེ་ཨ་ཉི་ རྒྱལ་ཁབ་བ་ ཐམས་ཅན་རང་ དབང་པེ་གི་ཝ༌ལ། ཉི་ཨོ་ཉ་ཝག་ཙ་ འབྲུག་གེ་རུ་ཉི་བུན་ཐཱན་ དཀོན་མཆོག་དང་ རོ་ཀ་གསེར་ཁྲི་གུབ་ཀ་ཏཱན་བསྣམས༌པ། 6 ཉི་མེ་ཝག་ཙ་ཤོ་ དཀོན་མཆོག་གི་ རོ་ཀ་དེན་གེ་ཅམ་ཉི་ཐ་ཁཱན་ ས་ཏོང་པ་ག་ཏཱན་ གཱན་ཇོང༌མ། ཉི་རོག་ ནོང་ 1260 སག་པུ་ བདག་འཛིན་ཨ་ཉི་ ཉ་ག་ཐ༌ལེ།། མི་ཁ་ཨེལ༌གི་ འབྲུག་ཕ༌མ༌ལ། 7 ཉི་ཞིང་ཁམས་ག་ཕྱད་མདའ་རུ༌མ། མི་ཁ་ཨེལ་དང་ རོ་ཀ་ཕརའ་ཁེ་ཆོ་ཁཱན་ ཞིང་ཁམས་ག་འཐེན་པ་བ་ཀི་ འབྲུག་དང་ འབྲུག་ག་ཕརའ་ཁེ་ཆོ་ཁཱན་བ་ཀབ་ཉི་ ཕྱད་མདའ་རུ༌མ། 8 དག་པ་ཀབ་ཉི་ འབྲུག་དང་ འབྲུག་ག་ཕརའ་ཁེ་ཆོ་ཁཱན་བ་ཕ༌མ། ཉི་ཞིང་ཁམས་ག་ རོག་ཏེ་བ་ཀ་དེན་གེ་ ཆོ་ལེ་ག་བཱརང་མ་ཝ་རི༌ཝ། 9 ཨོ་ཉ་འབྲུག་ཆི་ལུ་ འཛམ་གླིང་ཐམས་ཅན་ག་ མགུ་སྐོར་ཕི་ཁཱན་ བདུད་སེ་ཏཱན་ཨ་ཉི་ཆིན་ཁཱན་ དང་པོ་ག་ རུ་གེ་ནང་ཁེ་པ་ རོ་ཀ་ཕརའ་ཁེ་ཆོ་ཁཱན་བ་ཀབ་ཉི་ དོང་འཛམ་གླིང་ག་ཏཱན་ ཐུབ་ཉི་གེ༌མ། 10 ཉི་གེ་ ཇི་གི་ཞིང་ཁམས་གེ་ གསུང་སྐད་ཆི་ལུ་ཐུར་ ན་ཐ༌ཝ། ཉི་ཇུ་ཀ་དག་པ་ཀབ་ཉི་ཇུང༌མ། ཐར་པ་དང་ སྟོབས་དབང་ ཨ་ཧ་དཀོན་མཆོག་ག་ རྒྱལ་སྲིད་དང་ རོ་ཀ་ཁིརིས་ག་ དབང་ཚད་གི༌ལ། ཧང་ཡ་དག་ནེ་ལ་ ཨ་ཧ་དགྲ་ཨ་ཁཱན་ཁེ་པ་ དོང་འཛམ་གླིང་ག་ཏཱན་ གེམ་ཀུན་ཏི༌ཝ། ངམ་བི་ནང་དག་པེ་མ་ཝ་ ཨ་ཧ་དཀོན་མཆོག་ག་ སྐུན་མདུན་ག་ རོ་ཀི་ཨ་ཧ་ཡུང་ཟི་བ་ཀ་ ཅོན་ཏག་ཆོ༌ཝ། 11 ཉི་རོག་ཏེ་བ་ཀི་ ཤི་ཤ་ཀ་ཏོང་ག་སྐུ་ཁྲག་དང་ རོག་ཏེ་བ་ཀ་ ནོ་ཝང་གེ་ཤོ་ཁཱན་ གསུང་ག་ཐུང་ཀེ་ཨ་ཉི་ རོག་ཕ་མ་གི༌ལ། ཉི་རོག་ཏེ་བ་ཀི་ ཤི་ལེ་ག་བུ་ ཡོང་མ་ཁེན་ཤི། 12 ཞིང་ཁམས་ཤོ་ནང་ཕེ་ ཉི་ཞིང་ཁམས་ག་ཆོ་ཁཱན་བ་ ཤོ་ནང་ཕེ། དག་པ་ཀབ་ཉི་ འཛམ་གླིང་དང་ རྒྱམ་མཚོ་ག་ གནམ་མེད་ས་མེད་ ཀ་ལུ་ཨོ་ཕེ། ཧང་ཡ་དག་ནེ་ལ་ བདུད་གནམ་མེད་ས་མེད་ རོ་ཙིག་ཉི་ དོང་ན་ཧ་བ་ཆོ་ས་ག་ཏཱན་ ཨོ་ཕ༌ཅ། ཉི་རོ་ཀ་དུས་ཙུན་ ད་སུར་ཤ་ཅ་དག་ཉི་ བདུད་ཀི་སེན༌ཅ། 13 ཉི་ཨོམ་ འབྲུག་གི་ རོག་དོང་འཛམ་གླིང་ག་ཏཱན་ ཐུབ་ཉི་གེ་མ་ལ་དག་ཉི་ དྲཱན་མ་ཀབ་ཉི་ ཝག་ཙ་ཟ་སིང་ཁཱན་མེ་ཝག་ཙ་ ཁོན་ཉི་བུན་ཆོ༌ཝ། 14 དག་པ་ཀབ་ཉི་ ཝུན་བ་ག་ ཡེ་ལམ་པུརུས་ཀིན་ཨ་ཉི་ མེ་ཝག་ཙ་ག་ཏཱན་ ཡེ་ལམ་ཉིག་ཙིང་གནང་མ༌ལ། ཉི་ཡེ་ལམ་ག་ཐུང་ཀེ་ཨ་ཉི་ འབྲུག་གེ་གཱན་ཇོང་ཐཱན་ རོ་ཀ་དེན་གེ་ཅམ་ཁཱན་ ས་ཏོང་པ་ག་ཏཱན་ ཕེན་ཉི་དི་ལེ་ག་ ཇ་རོ་ཨ༌ཝ། ཉི་ཉིང་ཕེ་དང་ཕིཤི་ག་དེན་གེ་ རོག་བདག་འཛིན་ཨ་ཉི་ཐ༌ལེ། 15 ཉི་མེ་ཝག་ཙ་ རི་གི་ཕག་ཉི་བུན་ཆེན་དག་པ་གི་ འབྲུག་གི་ རོ་ཀ་ནོ་ཝང་གེ་ རི་རི་དྲང་ད་བུ་རང་ཤོན་ཐཱན་ མེ་ཝག་ཙ་ག་ཏཱན་ ལུག་ཆོ༌ཝ། 16 དག་པ་ཀབ་ཉི་ ས་གི་ནོ་ཝང་ཏིན་ཐཱན་ འབྲུག་ག་ནོ་ཝང་གེ་ཤོ་ཁཱན་ རི་དྲང་ཁེ་པ་ཇམ་ཉི་ མེ་ཝག་ཙ་ག་ ཇ་རོ་ཨ༌ཝ། 17 ཉི་གེ་ འབྲུག་ མེ་ཝག་ཙ་ཀབ་རོ་ཙིག་ཉི་ རོ་ཀ་བཱརའ་ཝག་ཙ་བ་ཀབ་ཉི་ ཕྱད་མདའ་ཕི་ལེ་ག་དི༌ཝ། ཉི་རོ་ཀ་ཝག་ཙ་བ་ཤོ་ དཀོན་མཆོག་ག་ བཀའ་རྒྱ་ག་ ཆ་གནས་ཐ་ཁཱན་བ་དང་ ཡི་ཤུ་ག་གསུང་ ཙུང་ཁཱན་བ་གི་ཝ་ཆོ༌ཝ། 18 ཉི་འབྲུག་ རྒྱམ་མཚོ་ནབ་ཀ་ཐིང་ཐཱན་ ནོང་ཉི་ཆོན་ཆོ་ཝ༎ |