མཇལ་ཁ། 11 - Tshangla New Testament (BSI)འཛོམས་དཔང༌དཔང༌བཞག་ཨ༌ཁཱན་ཉིག༌ཙིང་། 1 ཇ་ག་ཏཱན་ཟེར་བེ་ག་ ཏོ་ཀང་ཐུར་གནང་ཐཱན་ གསུངས་ཆོ་ཝ་ དིན་ཐཱན་ དཀོན་མཆོག་ག་ མཆོད་ཁང་དང་ མཆོད་གཤམ་ཟེར་ཤོ། ཉི་ཉ་ག་གསོལ་ཝ་ཏབ་ཁཱན་བ་ཀ་ དྲང་ཨའི། 2 དག་པ་ཀབ་ཉི་ མཆོད་ཁང་ག་ཕིས་ཀ་ཆོ་ཁཱན་ཝུང་ཤོ་ མ་ཟེར་བཱན་ཐུབ་ཐའི། ཧང་ཡ་དག་ནེ་ལ་ ཨོ་ཉ་ཝུང་ཤོ་ དཀོན་མཆོག་ གུམ་མ་ཡེ་ཁཱན་ སོ་ངོ་བ་ཀ་ཏཱན་ སྤྲོད་པ༌ཅ། ཉི་དམ་པའི་ཁྲོམ་ཆེན་ཁེ་པ་ རོག་ཏེ་བ་ཀི་ ལ་ཉི་ 42 སག་པུ་ བི་གི་ཏབ་ཉི་དབང༌པེ། 3 ཇི་གི་ ཇ་ག་སྟོབས་དབང་ ཇ་ག་འཛོམས་དཔང་དཔང་བཞག་ཨ་ཁཱན་ ཉིག་ཙིང་ག་བི༌ལེ། ཉི་རོག་ཉིག་ཙིང་གི་ བོ་ར་ཕ་ཙ་ཡེན་ཐཱན་ ནོང་ 1260 སག་པུ་ དཀོན་མཆོག་ག་གསུང་བཤད༌པེ། 4 ཨོ་ཐ་འཛོམས་དཔང་དཔང་བཞག་ཨ་ཁཱན་ཉིག་ཙིང་ཤོ་ འཛམ་གླིང་ཐམས་ཅན་ག་ གཙོ་བོ་ག་སྐུན་མདུན་ག་ཆོ་ཁཱན་ ཨོ་ལིབ་ཤིང་ཉིག་ཙིང་དང་ ག་ཙ་ཉིག་ཙིང་གི༌ལ། 5 ཉི་ཨི་བི་གི་ རོག་ཉིག་ཙིང་ག་ ནོད་པ་ཀེ་བེ་གོད་པ་ཐུར་ རོག་ཉིག་ཙིང་ག་ ཞལ་གེ་ཤོ་ཁཱན་ མི་གི་དགྲ་བྱང་ཕིཤི་བ་ཞུམ༌པེ། རོག་ཉིག་ཙིང་ག་ ནོད་པ་ཀེ་བེ་གོད་ཁཱན་ ཐམས་ཅན་རང་ ཨོ་ཐེན་ཨ་ཉི་ ཤི་ལེ་ཁེ༌ལེ། 6 རོག་ཉིག་ཙིང་གི་ དཀོན་མཆོག་ག་གསུང་བཤད་པེ་གང་ཀ་ ངམ་སུ་མ་ཁེན་ཆེན་དག་པ་གི་ ངམ་དམ་པེ་ག་དབང་ཚད་ རོག་ཉིག་ཙིང་ག༌ཅ། ཉི་རི་ཐམས་ཅན་རང་ ཞི་འགྱུར་བེ་ག་དབང་ཚད་དང་ འཛམ་གླིང་ག་ ཀ་ལུ་མ་འདྲ་ཝ་ མང་པུ་ཐུར་ཅོད་པེ་ག་ དབང་ཚད་བུ་ རོག་ཉིག་ཙིང་ག༌ཅ། 7 རོག་ཉིག་ཙིང་གི་ དཀོན་མཆོག་ག་གསུང་ བཤད་ཉི་ཆུམ་དེན་གེ་ ར་ཅི་མ་ཁཱན་ཧོང་ཀང་ནང་ཀེ་ ཏེ་ངན་སེམས་ཅན་ཤོན་ཐཱན་ རོག་ཉིག་ཙིང་ཀབ་ཉི་ ཕྱད་མདའ་ཕི༌ལེ། ཨོ་ཉ་ཏེ་ངན་སེམས་ཅན་གི་ རོག་ཉིག་ཙིང་ཕམ་ཐཱན་ ཤེ་ཉི་གེ༌མེ། 8 རོག་ཉིག་ཙིང་ག་ཕུང་པུ་ ཨོ་ཉ་ཁྲོམ་ཆེན་ཆི་ལུ་ག་གཞུང་ལམ་ག་ ཐང་ཉི་ལུས༌པེ། ཉི་ཨོ་ཉ་ཁྲོམ་ཆེན་ག་རང་ རོ་ཀ་གཙོ་བོ་བུ་ ཁྲིམས་ཤིང་ག་ཇཱན་ཉི་ བཀྲོངས་མ་ཆོ་ཝ༌ལ། ཉི་ཨོ་ཉ་ཁྲོམ་ཆེན་ག་དཔེ་ཁེ་པ་ ཁྲོམ་ས་དོམ་དང་ རྒྱལ་ཁབ་ཨི་ཇིབ་ག་ཏཱན་གེན་མ༌ཅ། 9 ཉི་ནོང་ཕེ་དང་ཕིཤི་སག་པུ་ མི་རིགས་མ་འདྲ་ཝ་བ་དང་ ལོ་མ་འདྲ་ཝ་ཨ་ཁཱན་བ་ ཉི་རྒྱལ་ཁབ་མ་འདྲ་ཝ་བ་དང་ འཛམ་གླིང་ག་སོ་ངོ་ཐམས་ཅན་གི་ རོག་ཉིག་ཙིང་ག་ ཕུང་པུ་ག་ཏཱན་ ཐེ་རེ་རེ་གོད༌པེ། ཉི་རོག་ཉིག་ཙིང་ག་ཕུང་པུ་ དུར་ནང་ཀ་ཙུག་པེ་མ་བི༌ལ། 10 ཉི་རོག་ཏེ་བ་ ཀ་ལུ་ཏཱད་ཁཱན་ ལུང་བསྟན་པ་ཉིག་ཙིང་ གཤགས་པ་ཨ་དེན་གེ་ འཛམ་གླིང་ག་སོ་ངོ་བ་ ཐམས་ཅན་རང་ གནམ་མེད་ས་མེད་ ཤོ་ནང་ཕེ་ཉི་ ཐུར་དང་ཐུར་ག་ཏང་བ་བི་ཉི་ སྤྲོ་བ་ཙི༌ལེ། 11 དག་པ་ཀབ་ཉི་ ནོང་ཕེ་དང་ཕིཤི་ག་ཚི་ངེ་ དཀོན་མཆོག་གི་ རོག་ཉིག་ཙིང་ག་ ནོ་ཝང་ག་ ཚེ་ག་ཤོང་མུ་ཉི་གནང༌མེ། ཉི་རོག་ཉིག་ཙིང་གི་ ག་ཐིང་མ་ཀབ་ཉི་ རོག་ཉིག་ཙིང་ཐིང་མ་ཐོང་ཁཱན་བ་ གནམ་མེད་ས་མེད་ ཡོང་ཁེ༌ལེ། 12 ཉི་ཞིང་ཁམས་གེ་ གསུང་སྐད་ཆི་ལུ་ཐུར་གི་ གསུངས་མ་ལ་ ཐ་ཞིང་ཁམས་ག་ཏཱན་ ཨོ་དོ་དག༌ཉི། ཉི་རོག་ཉིག་ཙིང་ག་ དགྲ་བྱང་ཕིཤི་བ་ཀི་ གོད་ཅ་ཨ་ཉི་ རོག་ཉིག་ཙིང་ ཞིང་ཁམས་ག་ མུག་པ་ནང་ཀ་ཏཱན་བསྣམས་པ༌ལ། 13 ཉི་ཨོ་ཉ་གང་ཀ་རང་ ན་ཀ་གནམ་མེད་ས་མེད་ ཤུག་ཨན་ཨུ་ཉི་ ཁྲོམ་ཆེན་ཅ་སེ་གེ་ ཐུར་མེ་པ་ཕིན་གེ་མ༌ལ། ཉི་ཨོ་ཉ་ན་ཀ་གི་ སོ་ངོ་ 7000 ཤེ་ཝ༌ལ། ཉི་བཱརའ་མ་ཤི་ཝ་ ལུས་ཁཱན་བ་ གནམ་མེད་ས་མེད་ ཡོང་ཁེ་ཉི་ ཞིང་ཁམས་ག་ དཀོན་མཆོག་ག་ གཟི་བརྗིད་ཕུལ་བ༌ལ། 14 ཉི་གནམ་མེད་ས་མེད་ ཀ་ལུ་ཏཱད་པེ་ཁེ་ཁཱན་ ཉིག་ཙིང་པ་ཁེ་པ་ ཆུ་མ༌ལ། དག་པ་ཀབ་ཉི་ གནམ་མེད་ས་མེད་ ཀ་ལུ་ཏཱད་པེ་ཁེ་ཁཱན་ སམ་པ་ཁེ་པ་ དོ་ཟོ་རང་ཨོ་ཕེ༎ དམག་དུང་ཟུམ༌པ། 15 ཞིང་ཁམས་ག་འཐེན་པ་ཟུམ་པ་གི་ དམག་དུང་ཐེད་པ་ཀབ་ཉི་ ཞིང་ཁམས་ག་ཆོ་ཁཱན་ ཀཱན་ཆི་ལུ་ཆི་ལུ་ ཨ་ཝ་བ་ཀི་ ཞུ་ཝ་ལ་ འཛམ་གླིང་ག་རྒྱལ་སྲིད་ཤོ་ ཨ་ཧ་གཙོ་བོ་དང་ རོ་ཀ་ཁིརིས་ག་ རྒྱལ་སྲིད་རི༌ཝ། ཉི་རོ་ཀི་ དུས་ཏ་བུ་རང་ དབང་ཉི་གནང་མེ་དག༌ཉི། 16 ཉི་གེ་ དཀོན་མཆོག་ག་སྐུན་མདུན་ག་ ལང་ཉི་བཞུགས་ཁཱན་ སོ་ངོ་ཆི་ལུ་ ཁེ་ཐུར་དང་ཕིཤི་གི་ ཕྱག་འཚལ་ཐཱན་ དཀོན་མཆོག་ག་ གསོལ་ཝ་ཏ་པ༌ལ། 17 ཉི་རོག་ཏེ་བ་ཀི་ ཞུ༌ཝ༌ལ་ ཤུགས་སྟོབས་ཆི་ལུ་ཆོ་ཁཱན་ གཙོ་བོ་དཀོན་མཆོག་ ཨ་ཤི་ ན་ག་བཀའ་དྲིན་བསམ༌ཅ། ནཱན་ཤོ་ ཨོ་མ་བུ་ གཙོ་བོ་གི༌ལ། ཉི་གོ་མ་གེ་རང་ གཙོ་བོ་ཨ་ཉི་བཞུགས་པ་ཆོ༌ཝ། ཧང་ཡ་དག་ནེ་ལ་ ནཱན་གི་ ན་ག་སྟོབས་དབང་ ཆི་ལུ་ག་ཐུང་ཀེ་ཨ་ཉི་ དབང་པེ་གོ་ཙུག་པ༌ཅ། 18 རྒྱལ་ཁབ་བ་ ནཱན་ཀབ་ཉི་ རོ་ཙིག་པ་ཆོ༌ཝ། དག་པ་ཀབ་ཉི་ ཨོམ་ཤོ་ ནཱན་དགོངསམ་ཁྲེལ་ཉི་ ཤི་ཁཱན་བ་ཀ་ ཁྲིམས་ཀེ་བེ་ག་ དུས་ཙུན་རེན་པ༌ཅ། ཉི་ན་ག་གཡོག་པ་ ལུང་བསྟན་པ་བ་ དཀོན་མཆོག་ག་ སོ་ངོ་བ་དང་ ན་ག་མཚན་ག་ཡོང་ཁེ་ཁཱན་ ཟེ་མུ་དང་ཆི་ལུ་ ཐམས་ཅན་ག་ སེ་རབ་གནང་མེ་ག་ དུས་ཙུན་རེན་པ༌ཅ། ཉི་འཛམ་གླིང་མེ་པ་ཕི་ཁཱན་བ་ མེ་པ་ཕིན་གེ་མེ་ག་ དུས་ཙུན་རེན་པ་དག༌ཉི། 19 ཉི་གེ་ ཞིང་ཁམས་ག་ཆོ་ཁཱན་ དཀོན་མཆོག་ག་ མཆོད་ཁང་ཕེག་པ༌ལ། ཉི་རོ་ཀི་ འགན་རྒྱ་ཅོད་ཉི་གནང་ཁཱན་ སྒྲོམ་ཁེ་པ་ རོ་ཀ་མཆོད་ཁང་ནང་ཀ་ ཐོང་ཆོ༌ཝ། ཏང་ལེབ་ཆོ༌ཝ། མུང་ཕོག་པ་ག་ཀཱན་དང་ སེར་བ་ ཆི་ལུ་ཆི་ལུ་ཨ་ཝ་བ་ཁེ༌ཝ། ཉི་ན་ཀ་ཆི་ལུ་གི་ འཛམ་གླིང་དྲེང་ཉི་གེ༌མ༎ |