མཇལ་ཁ། 10 - Tshangla New Testament (BSI)

ཞིང་ཁམས༌ག་འཐེན༌པ་དང་ དཔེ༌ཆ་ཟེ་མུ།

¹ ཨོམ་ཆང་རང་ གནམ་མེད་ས་མེད་ ཤུག་ཆོ་ཁཱན་ བཱརའ་ཞིང་ཁམས་ག་འཐེན་པ་ཐུར་ ཞིང་ཁམས་གེ་དོང་ བྱོན་མ་ཐོང༌མ། རོག་ཁེ་པ་ མུག་པ་གི་ལོ་མ་ཆོ༌ཝ། ཉི་རོ་ཀ་དབུ་ཐུང་ཀེ་ མིག་དུམ་ཆར་བ་ཆོ༌ཝ། རོ་ཀ་ཞལ་ཁེ་པ་ ངམ་ད་བུ་ཆོ༌ཝ། ཉི་རོ་ཀ་ཞབས་ཉིག་ཙིང་ མི་ག་ཀ་ཝ་ད་བུ་ཆོ༌ཝ།

² རོ་ཀ་ཕྱག་ཀ་ དཔེ་ཆ་ཟེ་མུ་ཁེ་པ་ བསྣམས་པ་ཆོ༌ཝ། ཉི་རོ་ཀི་ ཨོ་ཉ་དཔེ་ཆ་ཆོག་པ་ཆོ༌ཝ། རོ་ཀ་ཞབས་ལ་ཉོང་ཁེ་པ་ རྒྱམ་མཚོ་ནང་ཀ་ ཐ་ཝ་ཆོ༌ཝ། ཉི་རོ་ཀ་ཞབས་མི་ཉོང་ཁེ་པ་ ས་ཐུང་ཀ་ཐ་ཝ་ཆོ༌ཝ།

³ ཉི་གེ་ རོ་ཀི་ཤ་དར་ཤུག་ཨན་ ཕིན་ཅ་ཨ་ཉི་ སེང་གེ་ཇིག་པ་ད་བུ་རང་ཆོ༌ཝ། ཉི་རོ་ཀི་ ཤ་དར་ཕི་ལ་ཀབ་ཉི་ ཤེབ་ཟུམ་ཐེན་ མུང་ཕོག་པ༌ལ།

⁴ མུང་ཟུམ་པ་ཕོག་ཏེན་གེ་ རོ་ཀི་གསུངས་ཁཱན་ཁེ་པ་ ཇི་གི་འབྲི་བེ་ཅམ་པ་ཆོ༌ཝ། དག་པ་ཀབ་ཉི་ ཞིང་ཁམས་གེ་དོང་ གསུངས་ཆོ་ཝ་ ཨོ་ཉ་ཆཱས་གུམ་ཉི་ཐའི། ཨོ་ཉ་ཀོར་གེ་ མ་འབྲི་ཤོ་དག༌ཉི།

⁵ ཇི་གི་ཞིང་ཁམས་ག་འཐེན་པ་ཐུར་ རྒྱམ་མཚོ་དང་ ས་ག་ཐིང་མ་ཨ་ཝ་མཇལ༌བ། ཉི་རོ་ཀི་ རོ་ཀ་ཕྱག་ལ་ཉོང་ ཞིང་ཁམས་ལོ་ཀ་ཏཱན་ རིང་ཆོ༌ཝ།

⁶ དུས་ཏ་བུ་རང་ གསོན་པོ་ཨ་ཉི་བཞུགས་ཁཱན་དང་ ཞིང་ཁམས་དང་ འཛམ་གླིང་ ཉི་རྒྱམ་མཚོ་དང་ གསོན་པོ་ཨ་ཉི་ཆོ་ཁཱན་ ཐམས་ཅན་རང་ བཀོད་ཁཱན་ དཀོན་མཆོག་ག་མཚན་ག་ རོ་ཀི་ན་ཟཱན་ཆོ༌ཝ། ཨོ་ཉ་ཞིང་ཁམས་ག་འཐེན་པ་གི་ ཞུན་ཆོ་ཝ་ ཨོ་ཉ་གེ་ལག་ཉི་ མ་ནོང་མ་དག༌ཉི།

⁷ དག་པ་ཀབ་ཉི་ ཞིང་ཁམས་ག་འཐེན་པ་ཟུམ་པ་གི་ དམག་དུང་ཐེད་པ་ཀབ་ཉི་ ལུང་བསྟན་པ་བ་ཀ་ ཐུང་ཀེ་ཨ་ཉི་ གསུངས་ཁཱན་ ཧ་གོ་ལེ་མར་བ་ག་ཆཱས་བ་ ཐམས་ཅན་རང་ དཀོན་མཆོག་གི་ འགྲུབ་ཉི་གནང༌མེ།

⁸ ཉི་ཇི་གི་ཞིང་ཁམས་གེ་ གསུང་སྐད་ཐུར་ ན་ཐ་ཁཱན་གི་ ཇ་ག་ཏཱན་ ཨོམ་ཆང་གསུངས་ཆོ་ཝ་ ནཱན་དིན་ཐཱན་ རྒྱམ་མཚོ་དང་ ས་ག་བཞུགས་ཁཱན་ ཞིང་ཁམས་ག་འཐེན་པ་ག་ ཕྱག་ཀ་ཆོག་ཉི་ཐ་ཁཱན་ དཔེ་ཆ་ཁེ་པ་ ནཱན་གི་ལའི་དག༌ཉི།

⁹ ཉི་ཇང་དིན་ཐཱན་ ཞིང་ཁམས་ག་འཐེན་པ་ག་ཏཱན་ ཨོ་ཉ་དཔེ་ཆ་ཟེ་མུ་ཁེ་པ་ ཇ་ག་གའི་དག་ཉི་ ཞུ་ལ་ཀབ་ཉི་ ཞིང་ཁམས་ག་འཐེན་པ་གི་ ཇ་ག་གསུངས་ཆོ་ཝ་ ཨོ་ཐ་དཔེ་ཆ་བུན་ཐཱན་ ངམ་ཤོ། ན་ག་ནོ་ཝང་ག་ མི་ཟུ་མ་ཞིང་ད་བུ་རང་ ཞིམ་པུ་ཨོ་ཕེ། དག་པ་ཀབ་ཉི་ ན་ག་ཕོ་ལང་ག་ ཁ་ལུ་རི་ལེ་དག༌ཉི།

¹⁰ ཉི་ཇི་གི་ ཨོ་ཉ་དཔེ་ཆ་ཟེ་མུ་ཁེ་པ་ རོ་ཀ་ཕྱག་ཀེ་བུན་ཐཱན་ ང༌མ། ཇ་ག་ནོ་ཝང་ནང་ཀ་ མི་ཟུ་མ་ཞིང་ད་བུ་རང་ ཞིམ་པུ་ཆོ༌ཝ། དག་པ་ཀབ་ཉི་ ཇ་ག་ཕོ་ལང་ཁ་ལུ་ཅོད༌པ།

¹¹ ཉི་གེ་ རོ་ཀི་ ཇ་ག་ཏཱན་ཡེག་ཆོ་ཝ་ ནཱན་གི་ལོག་ཉི་རང་ མི་རིགས་དང་ ལོ་ ཉི་རྒྱལ་ཁབ་དང་ དཔོན་བ་ཀ་ཀོར་གེ་ ལུང་བསྟན་ཤོ་དག་ཉི༎