ཡ་ཀུབ། 5 - Tshangla New Testament (BSI)བེ་དིང་སོ་ངོ་བ་ ཉཱན༌ཅོ། 1 ནའི་བེ་དིང་སོ་ངོ་བ་ ཉཱན༌ཅོ། ན་ཧ་བ་ མརང་ཉི་གེབ༌ཅོ། ཧང་ཡ་དག་ནེ་ལ་ ན་ཧ་ཐུང་ཀ་ གནམ་མེད་ས་མེད་ ཀ་ལུ་ཨོ་ཕེ། 2 ན་ཧ་རྒྱུ་ཅ་ལ་བ་ ཞིད་ཉི་ཇོང༌ལ། ཉི་ན་ཧ་ཁ་མུང་ལེག་པུ་བ་ བུ་གི་ངམ་ཉི་ཆུམ༌ལ། 3 ན་ཧ་གསེར་དང་ དངུལ་ག་བ་ ཙག་ལག་ཉི་ ཆུ་མ༌ལ། ཉི་ཨོ་ཉ་ཙག་གི་ ན་ཧ་དགྲ་ཨ་ཉི་ འཛོམས་དཔང་ཨ༌ལེ། ཉི་མི་གི་ ཞུམ་པ་ད་བུ་ཨ་ཉི་ ཨོ་ཉ་ཙག་གི་ ན་ཧ་ཤ་ང༌མེ། ན་ཤི་ ཨོ་ཐ་དུས་ཇུ་ཀ་ ཨོ་ཐ་རྒྱུ་ཅ་ལ་བ་ སག་ཉི་ཐ་ཝ༌ལ། 4 ན་ཧ་ཨུང་ག་ ལའི་ཨ་ཁཱན་བ་ཀ་ ན་ཤི་ཉི་མ་བི་ཝ༌ལ། རོག་ཏེ་བ་ཀི་ ན་ཧ་ཁ་ཏང་ཉི་ཡེག་ཁཱན་ ཉཱན༌ཅོ། ན་ཧ་ཐོག་དུས་ཁཱན་ སོ་ངོ་བ་ཀི་ ཞུ་ཁཱན་ཁེ་པ་ ཤུགས་སྟོབས་ཆི་ལུ་ཆོ་ཁཱན་ གཙོ་བོ་དཀོན་མཆོག་གི་ སྙན་གསེང་པ༌ཅ། 5 ན་ཤི་ ཨོ་ཐ་འཛམ་གླིང་ག་ གནམ་མེད་ས་མེད་ ཇོབ་ཇོབ་ཨ་ཉི་ སྤྲོ་བ་ཀེ་ཉི་ཆོ༌ཝ། ཤེ་ལེ་ནོང་ཀ་དེན་གེ་ ནའི་ནའི་ཏེན་གི་ ཉམ་ཇག་པ་ཅོད་པ༌ལ། 6 རང་ཏེན་ག་ སྐྱབས་ཨ་ལེ་མ་གོད་ཁཱན་ སོ་ངོ་དྲང་པུ་བ་ མ་ངཱད་ནེ་བུ་ ངཱད་པ་ཅོད་ཉི་ ན་ཤི་ རོག་ཏེ་བ་ཤེ༌ཝ༎ དཀའ་ཝ་ཅཱད་པེ་གང་ཀ་ ཐེས་པེ་ཁེ༌ལེ། 7 ཇ་ག་ཡུང་ཟི་བ་ གཙོ་བོ་མ་བྱོན་མ་སག་པུ་ ཐེས་ཉི་ཆོའི། ཨུང་ག་ལའི་ཨ་ཁཱན་ ལའི་པ་བ་ཀི་ ཏོན་དང་བེར་ག་ ངམ་སུ་ཁེ་ལེ་དེན་གེ་ ཧང་ཏེན་ནོང་ལ་ཡ། ཉི་རོག་ཏེ་བ་ཀ་ ཐོག་མ་ཤོ་ཝ་སག་པུ་ ནོང་ཉི་ཆོན༌ཅ། 8 ན་ཧ་བ་བུ་ ནོང་ཉི་ཆོ་ལེ་ཁེ༌ལེ། ན་ཧ་བ་ སེམས་མ་ཤི། ཧང་ཡ་དག་ནེ་ལ་ ཨ་ཧ་གཙོ་བོ་ དོ་ཟོ་རང་བྱོན༌མེ། 9 ཇ་ག་ཡུང་ཟི་བ་ དཀོན་མཆོག་གི་ ན་ཧ་ཁྲིམས་མ་ཅཱད་པེ་དེན་གེ་ ན་ཤི་ཐུར་དང་ཐུར་ག་ཀོར་གེ་ ཁ་མ་ཏང་ཤོ། གོད་ཅོ་ དྲང་དཔོན་ ཀོ་ར་ག་ཐིང་ཉི་ བཞུགས་པ༌ཅ། 10 ཇ་ག་ཡུང་ཟི་བ་ དཀའ་ཝ་ཅཱད་པེ་གང་ཀ་ཐེས་ཉི་ ནོང་མེ་ག་ཤེག་པ་ཀབ་ཉི་ ཨ་ཧ་གཙོ་བོ་ག་མཚན་ག་ གསུངས་ཁཱན་ ལུང་བསྟན་པ་བ་ཀེ་ དཔེ་གོད༌ཅོ། 11 དཀའ་ཝ་ཅཱད་པེ་གང་ཀ་ ཐེས་པེ་རེ་ཁཱན་བ་ བྱིན་རླབས་ཅན་ཨ་ཉི་ཆིན༌ཅ། དཀའ་ཝ་ཅཱད་པེ་གང་ཀ་ ཨ་ཡུབ་གི་ ཧང་ཏེན་ཐེས་པ་གི་ལ་སྨོ་ ན་ཤི་སེན༌ཅ། ཉི་ཇུ་ཀ་དག་པ་ཀབ་ཉི་ རོ་ཀ་དེན་གེ་ གཙོ་བོ་ག་འཆར་གཞི་ ལེག་པུ་ཆོ་ཝ་ཨ་ཉི་ ན་ཤི་སེན༌ཅ། གཙོ་བོ་ཤོ་ གནམ་མེད་ས་མེད་ ཐུགས་རྗེ་ཅན་དང་ བྱམས་པར་ཀེ་ཉི་གནང་ཁཱན་གི༌ལ། 12 ཇ་ག་ཡུང་ཟི་བ་ ཐམས་ཅན་གེ་ ཁག་ཆི་ལུ་རང་ ཧང་གི་ལ་ཡ་དག་ནེ་ལ་ ཞིང་ཁམས་ག་ མིང་གེ་ཨ་ནེ་བུ་ འཛམ་གླིང་ག་ མིང་གེ་ཨ་ནེ་བུ་ ཉི་ཧང་ག་ མིང་གེ་རང་ ཁས་བླངས་མ་ཨའི། གི་ནེ་ལ་གི་ལ་ མང་གི་ནེ་ལ་མང་གི་དག་ཉི་ ཡེག༌ཅོ། ཉི་ཤ་ དཀོན་མཆོག་གེ་ ཁྲིམས་མ་ཉོང༌པ༎ སྨོན་ལམ་ག་ཤུག། 13 ན་ཧ་པོང་ཀ་ དཀའ་ཝ་ཅཱད་ཁཱན་ཅ་སྨོ། ཨོ་ཉ་སོ་ངོ་གི་ སྨོན་ལམ་ཏབ༌ཅོ། ན་ཧ་པོང་ཀ་ ཤོ་ནང་ཕེ་ཁཱན་ཅ་སྨོ། ཨོ་ཉ་སོ་ངོ་གི་ གཙོ་བོ་ག་བསྟོད་པ་ཕུལ་ཉི་ མགུར་མ་ཞུའི། 14 ན་ཧ་པོང་ཀ་ མར་ཁཱན་ཅ་སྨོ། ཨོ་ཉ་སོ་ངོ་གི་ ཆོས་ཚོགས་ག་ སོ་ངོ་ཆི་ལུ་བ་རཱན་ཐཱན་ གཙོ་བོ་ག་མཚན་ག་ སི་སོག་ཉི་ རོ་ཀ་དེན་གེ་ སྨོན་ལམ་ཏ་པེ་བི། 15 དད་པ་ཀེ་ཉི་ སྨོན་ལམ་ཏ་པ་ཀབ་ཉི་ ནཱད་པ་དྲག༌པེ། ཉི་གཙོ་བོ་གི་ དྲག་ཉི་གནང༌མེ། ཉི་རོ་ཀི་ སྡིག་པ་ཨ་ཝ་ཆོ་ནེ་ལ་ རོ་ཀ་སྡིག་པ་བུ་ བཤགས་པ་གནང༌མེ། 16 ཨོ་ཉི་ཨ་དེན་གེ་ ནའི་དྲག་པེ་དེན་གེ་ ཐུར་གི་ཐུར་ག་ཏཱན་ རང་ཏེན་གི་ཨ་ཁཱན་ སྡིག་པ་ག་ཁ་དོག༌ཅོ། ཉི་ཐུར་དང་ཐུར་ག་དེན་གེ་ སྨོན་ལམ་ཏབ༌ཅོ། སོ་ངོ་དྲང་པུ་ག་ སྨོན་ལམ་ག་ཤུག༌ཅ། ཉི་ཨོ་ཉ་སྨོན་ལམ་གི་ ལའི་ཆི་ལུ་ཨན༌ཅ། 17 ཨེ་ལི་ཡ་བུ་ ཨའི་ད་བུ་ སོ་ངོ་ཐུར་ཤ་གི་ཝ་ཆོ༌ཝ། ཉི་རོ་ཀི་ སེམས་ནང་ཀེ་ཨ་ཉི་རང་ ངམ་སུ་མ་ཁེན་ཆེན་ཨ་ཉི་ སྨོན་ལམ་ཏ་པ་ཨ་དེན་གེ་ འཛམ་གླིང་ག་ ཉིང་ཕེ་དང་ཕིཤི་སག་པུ་ ངམ་སུ་མ་ཁེན་ཤི། 18 ཉི་ཨོ་ཉ་ཚི་ངེ་ ཨོམ་ཆང་རང་ རོ་ཀི་སྨོན་ལམ་ཏ་པ་ཀབ་ཉི་ ངབ་ཀེ་དོང་ ངམ་སུ་ཁེ་ཝ་ཨ་དེན་གེ་ ཐོག་ཤོ་ལེ་གོ་ཙུག༌པ། 19 ཇ་ག་ཡུང་ཟི་བ་ ན་ཧ་པོང་ཀེ་ སོ་ངོ་ཐུར་ དེན་པ་གེ་ ལམ་རིང་མུ་ག་ དི་ལ་ཀབ་ཉི་ ཐུར་གི་ རོག་ལོག་ཉི་ཕ་ནེ་ལ་ 20 སེམས་ཀ་ཐའི་ ཨི་བི་གི་ སྡིག་ཅན་ཐུར་ ལམ་མ་ལེག་པ་གེ་ ལོག་ཉི་ཕ་ཝ་ཐུར་ རོ་ཀི་ རོ་ཀ་རྣམ་ཤེས་ ཤི་སྲོག་གེ་ སྐྱབས་ཨན་ཅ་གི༌ལ། ཉི་སྡིག་པ་མང་པུ་ཐུར་ བཀའ་དྲིན་བསྐྱང་མེ་ རིག་ཅ་གི༌ལ༎ |