ཡ་ཀུབ། 3 - Tshangla New Testament (BSI)

ལེ་ཏི་བེ་ཁེ༌ལེ།

¹ ཇ་ག་ཡུང་ཟི་བ་ ནའི་མང་པུ་ཐུར་གི་ ཆོས་ཚོགས་ག་སློབ་དཔོན་ རི་ལེ་མ་གོད༌ཅོ། ཧང་ཡ་དག་ནེ་ལ་ དཀོན་མཆོག་གི་ ཁྲིམས་ཅཱད་པེ་གང་ཀ་ བཱརའ་གེ་ ཨའི་ཡེ་ཁཱན་བ་ཀ་ ཁྲིམས་དམ་དམ་ཨ་ཉི་ ཅཱད་གནང༌མེ།

² ངཱད་པུ་ཏ་ ཨའི་ཐམས་ཅན་གི་རང་ངཱད༌ཅ། དག་པ་ཀབ་ཉི་ ཨི་བི་གི་ རང་ཏེན་ག་ལེ་ག་ བདག་འཛིན་ཨན་ཅ་གི་ལ་སྨོ་ ཨོ་ཉ་སོ་ངོ་གི་ རོ་ཀ་ལུས་པུ་ ཐམས་ཅན་རང་ སྒྲིགས་ཀ་ཙུག་ཉི་ ཕུག་པ་རིན་ཅ་གི༌ལ།

³ ཨ་ཤི་ ཀུར་ཏ་ནོ་ཝང་ག་ སབ་ཙུག་ནེ་ལ་ ཨ་ཤི་ ཀུར་ཏ་ཙུང་མེ་རེ༌ཅ། ཉི་ཨ་ཤི་ ཨོ་ག་ཏཱན་ ཝག་པེ་ལ་མ་ཐུར་ ཝག་པེ་རེ༌ཅ།

⁴ ཉི་གྲུ་ཆེན་བ་བུ་ ཆི་ལུ་ཆོན་ཐཱན་རང་གི་ནེ་བུ་ ཉི་རི་དི་གི་ཤུག་ཨ་ཉི་ ཝག་ཐཱན་རང་གི་ནེ་བུ་ གྲུ་ག་མཇུག་ཏོག་ཟེ་མུ་ཐུར་གི་ ཨོ་ག་ཏཱན་ ཝག་པེ་ལ་མ་ཐུར་ ཝག༌ཅ།

⁵ ཨུ་ཉུ་པུརུས་ཀིན་ཨ་ཉི་ ལེ་བུ་ཟེ་མུ་ཐུར་ཤ༌ཅ། དག་པ་ཀབ་ཉི་ ལེ་གི་གནམ་མེད་ས་མེད་ ཁམ་ཙོང༌ཅ། བོ་རང་ཆི་ལུ་བུ་ མི་ཟེ་མུ་ཐུར་གི་ ཞུམ་ཉི་ཆུམ༌ཅ།

⁶ ཉི་ལེ་བུ་ མི་ད་བུ་ཐུར་གི༌ལ། ཉི་ཨ་ཧ་ཚེ་ ཐམས་ཅན་རང་ མེ་པ་ཕི་ཁཱན་ ངན་པ་གི་ ཨོ་ཐ་ལེ་ཕུང་མ༌ཅ། ཉི་སོ་ངོ་ག་མི་ཚེ་ ཐམས་ཅན་རང་ དམྱལ་བ་གེ་ཤོ་ཁཱན་ མི་གི་ཞུབ་ཅ་གི༌ལ།

⁷ སོ་ངོ་གི་ སེམས་ཅན་བ་དང་ ཁ་ག་བ་ ཉི་ཕོ་ལང་ཤུག་ཉི་དང་ཁཱན་ སེམས་ཅན་བ་དང་ རི་ནང་ཀ་ཆོ་ཁཱན་ སེམས་ཅན་བ་ ཐམས་ཅན་རང་ ཏི་བེ་རེ༌ཅ།

⁸ དག་པ་ཀབ་ཉི་ ཐུར་གི་རང་ ལེ་ཏི་བེ་མར༌བ། ལེ་ཤོ་ ཏི་བེ་མར་ཁཱན་ ངན་པ་གི༌ལ། ཉི་ཡོང་ཁེ་སི་སི་ཨ་ཝ་ དུག་ཀི་ཕུང་མ༌ཅ།

⁹ ཆམ་ཆམ་ ལེ་གི་ གཙོ་བོ་དང་ ཡབ་ཀ་བསྟོད་པ་ཕུལ༌ཅ། ཉི་ཆམ་ཆམ་ ཨོ་ཐ་ལེ་གི་ དཀོན་མཆོག་གི་ རོག་པུརུས་ཀིན་ཨ་ཉི་ཅོད་ཁཱན་ སོ་ངོ་ག་ ཁ་རབ་ཕིན༌ཅ།

¹⁰ ཨོ་ཐེན་ཨ་ཉི་ བྱིན་རླབས་དང་ ཁ་རབ་ཉིག་ཙིང་རང་ ནོ་ཝང་གེ་ཤོན༌ཅ། ཇ་ག་ཡུང་ཟི་བ་ ཨུ་ཐུ་གི་ནེ་ལ་ ཏེན་ཏེན་རང་ ལེག་པུ་མང་གི།

¹¹ ཧང་ ཕོག་ཅི་རི་ཤོ་ལ་ཀབ་ཉི་ རི་ཞིམ་པུ་དང་ ཁ་ལུ་ཉིག་ཙིང་རང་ ཏབ་ཐུར་ཤོན་ཅ་སྨོ།

¹² ཧང་ ན་ཤི་ ལྕོག་མ་ཤིང་གེ་ ཨོ་ལིབ་སེ་ དུས་པེ་རེ་བེ་སྨོ། ཨུ་ཉུ་མ་ནེ་ལ་ ཨང་གུར་ཤིང་གེ་ ལྕོག་མ་སེ་ དུས་པེ་རེ་བེ་སྨོ། ཉི་ཨིན་ཆ་གི་ཕུང་ཁཱན་ རི་ཙང་གེ་ རི་ཞིམ་པུ་ ཤོ་ལེ་སྨོ༎

རིག་པ་ དཀོན་མཆོག་གེ་ ཉོང་ཅ་གི༌ལ།

¹³ ན་ཧ་པོང་ཀ་ མཁས་ཏྲ་དང་ ཧ་གོ་ཁཱན་ སོ་ངོ་ཅ་སྨོ། ཨོ་ཉ་སོ་ངོ་གི་ རོ་ཀ་ཚེ་ག་ རིག་པ་ག་ཐུང་ཀེ་ ཉམ་ཆུང་ཨན་ ལའི་ལེག་པུ་ཨ་ཉི་ ཁུངས་ཀེ་བེ་ཁེ༌ལེ།

¹⁴ དག་པ་ཀབ་ཉི་ སེམས་ཁ་ལུ་མི་ཉི་ སེར་སྣ་ཨ་ཉི་ ཉི་རང་ཏེན་ག་དེན་གེ་ཤ་མི་ནེ་ལ་ ན་ཤི་ ནའི་མཁས་ཏྲ་ཅ་དག་ཉི་མི་ཉི་ ཁམ་མ་ཙོང་ཤོ། ཉི་ཨུ་ཉུ་ཤོ་ དེན་པ་ག་དགྲ་གི༌ལ།

¹⁵ ཧང་ཡ་དག་ནེ་ལ་ ཨུ་ཉུ་ད་བུ་ རིག་པ་ཁེ་པ་ དཀོན་མཆོག་ག་ རིག་པ་མང་གི། ཨོ་ཉ་བ་ཤོ་ རྣམ་ཤེས་ག་མང་གི་ཝ་ འཛམ་གླིང་ག་གི༌ལ། ཉི་བདུད་ཀི་ཨ་ཉི་ ཨ་ལེ་རིག་པ་གི༌ལ།

¹⁶ སེར་སྣ་དང་ རང་ཏེན་ཆི་ལུ་རི་ལེ་ག་སེམས་ ཨོ་ག་ཆོ་ཝ་ཐུར་ ཨོ་ཉ་ག་སྐྱིད་པུ་ ཨོ་ཕུ་མཱན༌ཅ། དག་པ་ཀབ་ཉི་ ངན་པ་ ཐམས་ཅན་གི་ ཕུང་མ་ཨུན༌ཅ།

¹⁷ དག་པ་ཀབ་ཉི་ ཐམས་ཅན་གེ་ ཁག་ཆི་ལུ་རང་ ཞིང་ཁམས་གེ་དོང་ ཨུ་ཁཱན་རིག་པ་ཤོ་ གནམ་མེད་ས་མེད་ ཙང་མ༌ཅ། ཨོ་ཉ་རིག་པ་གི་ སྐྱིད་པེ་རིག༌ཅ། ཞི་ཇམ་པུ་ཨ་ཉི་ ཆོ་ལེ་རིག༌ཅ། ཆ་མེ་རིག༌ཅ། སྙིང་རྗེ་གི་ཕུང་ཉི་ ཆོ་ལེ་རིག༌ཅ། ཉི་ལའི་ལེག་པུ་ ཨ་ལེ་རིག༌ཅ། ཨོ་ཉ་རིག་པ་གི་ ཉེ་རིང་ཆི་ལེ་ རིག་པུ་མཱན༌ཅ། ཉི་ཀྲེམ་ཙོང་མུ་བུ་མཱན༌ཅ།

¹⁸ ཉི་སྐྱིད་པུ་ག་ལའི་ཨ་ཁཱན་ སོ་ངོ་བ་ཀི་ སྐྱིད་པུ་ག་ལི་ཡབ་ཉི་ ཐོག་ལེག་པུ་དུས་ཅ་གི༌ལ༎