ཡ་ཀུབ། 2 - Tshangla New Testament (BSI)

ཉེ་རིང་ཆི་ལེ་མང་ཕ།

¹ ཇ་ག་ཡུང་ཟི་བ་ ན་ཤི་ གཟི་བརྗིད་ཆི་ལུ་ཆོ་ཁཱན་ ཨ་ཧ་གཙོ་བོ་ཡི་ཤུ་ཁིརིས་ག་ དད་པ་ཨ་ཝ་ཨ་དེན་གེ་ ན་ཤི་ ཉེ་རིང་ཆི་ལེ་མང་ཕ།

² དཔེ་ཨ་ནེ་ལ་ སོ་ངོ་ཚེ་བང་གི་ གསེར་ག་ཚེ་དུམ་ཚོ་ཉི་ ཉི་ཁ་མུང་ལེག་པུ་ཡེ་ཉི་ ན་ཧ་ཆོས་ཚོགས་ག་ ཨུན་ཅ་གི་ཝ༌ལ། ཉི་ཚེ་བང་ཤོ་ དུག་པུ་གི་ཝ་ཨ་དེན་གེ་ ཁ་མུང་མཱན་མ་ཡེ་ཉི་ ཨུན་ཅ་གི་ཝ༌ལ།

³ ན་ཤི་ བེ་དིང་སོ་ངོ་བ་ཀ་ གུས་ཞབས་ཨ་ཉི་ ཨོ་ཐ་རྐང་ཁྲི་ག་ བཞུགས་ཅོ་ཨན་ཡེག་ཉི་ དག་པ་ཀབ་ཉི་ དུག་པུ་སོ་ངོ་བ་ཀ་ ན་ཧ་བ་ ལེང་ཨ་ཉི་ ཐིང་ཉི་ཆོའི། ཨུ་ཉུ་མ་ནེ་ལ་ ས་ག་ལང་ཤོ་དག་ཉི་ ཡེག་ནེ་ལ་

⁴ ཧང་ ནའི་ནང་དོ་ ཉེ་རིང་ཆི་ཉི་ ན་ཤི་སེམས་མ་ལེག་པ་མི་ཉི་ ཁྲིམས་ཅཱད་ཅ་མང་གི་སྨོ།

⁵ ཉཱན་ཅོ་ ཕང་ཁཱན་ཡུང་ཟི་བ་ འཛམ་གླིང་ག་ དུག་པུ་སོ་ངོ་བ་ དད་པ་ག་ བེ་དིང་རི་ལེ་དེན་གེ་ དཀོན་མཆོག་གི་ སི་ཝ་མང་གི་སྨོ། དཀོན་མཆོག་གི་ རོག་ཕང་ཁཱན་བ་ཀ་ རྒྱལ་སྲིད་གནང་མེ་ཨ་ཉི་ དབུ་མནའ་བཞེས་ཝ༌ཅ། ཧང་ ཨོ་ཉ་རྒྱལ་སྲིད་ རོག་ཏེ་བ་ཀི་ ཉོང་པེ་མང་གི་སྨོ།

⁶ ཨོ་ཉེ་རང་གི་ནེ་བུ་ ན་ཤི་ དུག་པུ་བ་ཀ་ ངལ་མ་རངས་པ་ཨ་ན། ཧང་ ན་ཧ་བ་ མ་ལེག་པ་ཨ་ཉི་ ཇག་བུན་ཐཱན་ ཁྲིམས་ཁང་ག་ ཀེ་ཁཱན་བ་ བེ་དིང་མང་གི་སྨོ།

⁷ ཧང་ ན་ཧ་གནང་ཁཱན་ ཨོ་ཉ་དམ་པའི་མཚན་ ཡི་ཤུ་ཁིརིས་ག་ སྐུར་པ་ཞུ་ཁཱན་ རོག་ཏེ་བ་ མང་གི་སྨོ།

⁸ ནའི་ནའི་ཏེན་ ཕང་པ་པུརུས་ཀིན་ཨ་ཉི་ ནོག་མིན་བ་བུ་ ཕང་ཅོ་ཨ་ཉི་ གསུང་རབ་གེ་ ཤོ་ཝ་དང་ཏུ་ཉི་ ཁག་ཆི་ལུ་ཆོ་ཁཱན་ བཀའ་ཁྲིམས་ག་ ཆ་གནས་ཐ་ནེ་ལ་ ན་ཤི་ཨ་ཁཱན་ཁེ་པ་ ལེག་པུ་གི༌ལ།

⁹ དག་པ་ཀབ་ཉི་ ན་ཤི་ཉེ་རིང་ཆི་ནེ་ལ་ ན་ཤི་སྡིག་པ་ཨན་ཅ་གི༌ལ། ཉི་བཀའ་ཁྲིམས་ག་ ཆ་གནས་མ་ཐ་ཁཱན་ཨ་ཉི་ ཆིན༌མེ།

¹⁰ ཉི་སོ་ངོ་གི་ བཀའ་ཁྲིམས་ ཐམས་ཅན་ག་ ཆ་གནས་ཐཱན་ཐཱན་ བཀའ་ཁྲིམས་ཐུར་ག་ ཆ་གནས་མ་ཐ་ནེ་བུ་ བཀའ་ཁྲིམས་ ཐམས་ཅན་ག་ ཆ་གནས་མ་ཐ་ཝ་ད་བུ་གི༌ལ།

¹¹ ཧང་ཡ་དག་ནེ་ལ་ གཉེན་གྲོགས་གེ་ཕིས་ཀ་ ལུས་འབྲེལ་མ་ཨའི་དག་ཉི་ གསུངས་ཁཱན་ དཀོན་མཆོག་གི་ སོ་ངོ་མ་ཤེ་ཨ་ཉི་བུ་ གསུངས་མ༌ཅ། ཨོ་ཉི་ཨ་དེན་གེ་ ན་ཤི་ སོ་ངོ་ཤེ་ནེ་ལ་ ན་ཤི་ གཉེན་གྲོགས་གེ་ཕིས་ཀ་ ལུས་འབྲེལ་མ་ཨ་ནེ་བུ་ བཀའ་ཁྲིམས་ ཐམས་ཅན་ག་ ཆ་གནས་མ་ཐ་ཝ་ཆིན༌མེ།

¹² ཨོ་ཉི་ཨ་དེན་གེ་ ཆཱས་ཨ་ནེ་བུ་ ལའི་ཨ་ནེ་བུ་ ཨ་ཧ་རང་དབང་རང་ཚད་གནང་ཁཱན་ བཀའ་ཁྲིམས་གི་ ཁྲིམས་ཅཱད་པེ་གི་ལ་ཨ་ཉི་ སེམས་ཀ་ཐའི།

¹³ ན་ཤི་ བཱརའ་ག་ སྙིང་རྗེ་མ་ཨ་ཝ་ཆོ་ནེ་ལ་ དཀོན་མཆོག་གི་ ན་ཧ་ཐུགས་རྗེ་གཟིགས་ཉི་ མ་གནང༌མ། ཨོ་ཉེ་རང་གི་ནེ་བུ་ ཁྲིམས་ཚེ་གེ་ ཐུགས་རྗེ་ཆི་ལུ་གི༌ལ༎

དད་པ་དང་ ལའི།

¹⁴ ཇ་ག་ཡུང་ཟི་བ་ ན་ཤི་ལའི་ཨ་ཉི་ མ་གེན་མ་སག་པུ་ ན་ཧ་དད་པ་ཅ་ཨན་ཡེག་ཉི་ ཁུངས་ཧང་རང་མཱན༌ཅ། ཧང་ ཨོ་ཉ་དད་པ་གི་ ན་ཧ་ཐར་པ་གནང་མེ་སྨོ།

¹⁵ དཔེ་ཨ་ནེ་ལ་ ཀོ་ཏ་ཐུར་ ཡང་ན་ལ་ ཨུ་ས་ཐུར་ ཟ་ལེ་ཇ་མེ་མ་ཝ༌ལ། ཉི་ཡེ་ལེ་ཡོག་པེ་བུ་ མ་ཝ༌ལ།

¹⁶ ཉི་ན་ཤི་ རོ་ཀ་ལུས་པུ་ག་དེན་གེ་ ཚཱས་ཁཱན་ཤོ་ མ་བི་ལཱན་ ཨོ་ཉ་སོ་ངོ་ག་ཏཱན་ སྐྱིད་པུ་ཨ་ཉི་དི་ ཉི་གེ་ལེག་པུ་ཨན་ཟའི་ ཉི་གོམ་པུ་ཨ་ཉི་ཆོའི་དག་ཉི་ ཡེག་ནེ་ལ་ ཕན་པ་ཧང་ཨོ་ཕེ་ཡ།

¹⁷ ཨོ་ཉི་ཨ་དེན་གེ་ དད་པ་ཐུར་ཤ་ཆོ་ཝ་གི་ མ་དྲིག༌པ། ལའི་ལེག་པུ་མ་ཨ་ཁཱན་ དད་པ་ཁེ་པ་ ཤི་ཝ་གི༌ལ།

¹⁸ ཉི་ཨོམ་ ཚེ་བང་གི་ཡེག་ཏུ་ ན་ག་དད་པ་ལ་ ཇ་ག་ལའི་ཅ་ཨ༌ཉི། ལའི་མ་ཨ་ལཱན་ ན་ཧ་དད་པ་ ཇ་ག་གེན་ཤོ། ཉི་ཇི་གི་ ཇ་ག་དད་པ་ ལའི་ཨ་ཉི་གེན༌མེ།

¹⁹ ནཱན་གི་ དཀོན་མཆོག་ཐུར་ཤ་ཅ་ཨ་ཉི་ དད་པ་ཨན་ཅ་སྨོ། ལེག་པུ་གི༌ལ། བདུད་བ་ཀི་བུ་ དད་པ་ཨན༌ཅ། ཉི་ཡོང་ཁེ་ཉི་ ཁང་ནེང་ནེང་ཨན༌ཅ།

²⁰ ནའི་ཡོང་བ་བ་ ལའི་ལེག་པུ་མ་ཨ་ཁཱན་ དད་པ་ཁེ་པ་ ཁུངས་མཱན་ཅ་ཨ་ཉི་ གེན་མེ་ཁེ་ལེ་སྨོ།

²¹ ཧང་ ཨ་ཧ་ཕ་མ་ ཨ་བཱརའ་ཧམ་གི་ རོ་ཀ་ཟ་ ཨི་སག་ མཆོད་གཤམ་ཐུང་ཀ་ ཀེ་བ་ཨ་དེན་གེ་ རོག་དཀོན་མཆོག་ག་ ཐུགས་ཀ་ཚུད་པ་མང་གི་སྨོ།

²² ན་ཤི་ གོད་ཅོ་ རོ་ཀ་དད་པ་དང་ཏུ་ཉི་ རོ་ཀི་ལའི་ཨ༌ཝ། ཉི་ལའི་གི་ཨ་ཉི་ རོ་ཀ་དད་པ་ ཚང་པ་ཅོད་པ་གི༌ལ།

²³ ཉི་གསུང་རབ་གེ་ཤོ་ཁཱན་ཁེ་པ་ དེན་ཐ་འགྲུབ་ཕ༌ཅ། ཨ་བཱརའ་ཧམ་གི་ དཀོན་མཆོག་ག་ དད་པ་ཨ་ཝ་ཨ་དེན་གེ་ དཀོན་མཆོག་གི་ རོག་དྲང་པུ་ཙི་ཝ་གི་ལ་ཨ༌ཉི། ཉི་རོག་ཁེ་པ་ དཀོན་མཆོག་ག་ ཇ་རོ་ཨ་ཉི་བུ་ ཆིན་མ༌ཅ།

²⁴ ན་ཤི་ གོད་ཅོ་ དད་པ་ཐུར་གི་ཨ་ཉི་ མང་གི་ཝ་ ལའི་ལེག་པུ་གི་ཨ་ཉི་ ཨའི་དཀོན་མཆོག་ག་སྤྱན་ག་ དྲང་པུ་རིན་ཅ་གི༌ལ།

²⁵ ཨུ་ཉུ་པུརུས་ཀིན་ཨ་ཉི་ གཞང་བཙོང་མིན་ ར་ཧབ་བུ་ རོ་ཀ་ལའི་གི་ཨ་ཉི་ རོག་དཀོན་མཆོག་ག་སྤྱན་ག་ དྲང་པུ་རི་ཝ་གི༌ལ། རོ་ཀི་ཨིས་རེལ་ག་ བྱ་གོད་ཁཱན་ སོ་ངོ་བ་གུམ་ཐཱན་ བཱརའ་ལབ་ཀེ་ཨ་ཉི་ གཱན་ཀུན་ཏི༌ཝ།

²⁶ རྣམ་ཤེས་མ་ནེ་ལ་ ལུས་པུ་ཤི་ཝ་པུརུས་ཀིན་ཨ་ཉི་ ལའི་ལེག་པུ་མ་ཨ་ཁཱན་ དད་པ་བུ་ ཤི་ཝ་གི༌ལ༎