ཧི་བུརུ། 9 - Tshangla New Testament (BSI)

གསོལ་ཝ་ཏ༌པེ༌ག་ཀོར༌གེ་ ལུགས༌སྲོལ་མཱན༌མ།

¹ ཉི་ཨོམ་ གོ་མ་ག་འགན་རྒྱ་ནང་ཀ་ གསོལ་ཝ་ཏ་པེ་ག་ ཁྲིམས་ལུགས་ཙམ་ཉི་ ཐ་ཝ་ཆོ༌ཝ། ཉི་ཨོམ་ཆང་རང་ འཛམ་གླིང་ག་དེན་གེ་ དམ་པའི་མགོན་ཁང་བུ་ཆོ༌ཝ།

² དམ་པའི་གུར་ཁང་ནང་ཀ་ ཕའི་ནང་ཉིག་ཙིང་ཆོ༌ཝ། ཕའི་ནང་ཐུར་ག་ ག་ཙ་དང་དོང་ཏཱན་ ཉི་ཚོགས་ཨ་ཉི་ཕུལ་ཁཱན་ཀེབ་ཏང་ ཐ་ཝ་ཆོ༌ཝ། ཉི་ཨོ་ཐ་ཕའི་ནང་ཤོ་ དམ་པའི་ཕའི་ནང་དག་ཉི་ ཆིན་ཆོ༌ཝ།

³ ཉི་ཡོ་ལུ་ཁ་ཤ་ག་ ཚི་ཁ་ཆོ་ཁཱན་ ཕའི་ནང་ཤོ་ ཐམས་ཅན་གེ་ དམ་པའི་ཕའི་ནང་དག་ཉི་ ཆིན་ཆོ༌ཝ།

⁴ ཉི་ཨོ་ཉ་ཕའི་ནང་ནང་ཀ་ པོས་ཐོག་པེ་དེན་གེ་ གསེར་ག་མཆོད་གཤམ་དང་ གསེར་གི་དྲོན་ཁཱན་ འགན་རྒྱ་ག་སྒྲོམ་ཆོ༌ཝ། ཨོ་ཉ་སྒྲོམ་ནང་ཀ་ མ་ན་ཐ་ཁཱན་ གསེར་ག་ཁོ་ལོམ་དང་ ཉོམ་ཐུང་ཁཱན་ ཧ་རུན་ག་ཕྱག་འཁར་ ཉི་བཀའ་རྒྱ་སེ་འབྲི་ཁཱན་ ལུང་བག་ཏང་ག་ འགན་རྒྱ་ཆོ༌ཝ།

⁵ ཉི་གཟི་བརྗིད་ཅན་ག་ ཡེ་ལམ་ཆོ་ཁཱན་སེམས་ཅན་ག་མིང་ ཆེ་རུ་བིམ་ དག་ཁཱན་ཉིག་ཙིང་ ཨོ་ཉ་སྒྲོམ་ཐུང་ཀ་ཆོ༌ཝ། ཉི་རོག་ཉིག་ཙིང་ག་ ཡེ་ལམ་ཁེ་པ་ མཆོད་པ་ཕུལ་ས་ཐུང་ཀེ་ལེང་ ཆོ་ཝ༌ལ། དག་པ་ཀབ་ཉི་ ཨ་ཤི་ ཨོ་ཐ་ཀོར་གེ་ འགོ་རིམ་བཞིན་དུ་ཨ་ཉི་ ཡེག་པེ་མར༌བ།

⁶ ཐམས་ཅན་རང་ ཨོ་ཐེན་ཅམ་ཏེན་གེ་ བླ་མ་བ་ ལོག་ཉི་ལོག་ཉི་རང་ ཕིས་ཀ་ཕའི་ནང་ཀ་བྱོན་ཉི་ རོ་ཀི་གནང་མེ་ཁེ་ཁཱན་ ཕྱག་ལཱ་བ་གནང་ཆོ༌ཝ།

⁷ དག་པ་ཀབ་ཉི་ བླ་མ་གོང་མ་ཐུར་གི་ཤ་ ནང་ཀ་ཆོ་ཁཱན་ ཕའི་ནང་ནང་ཀ་ བྱོན་མེ་ཆོག་ཆོ༌ཝ། རོག་དང་ ཨིས་རེལ་ག་ སོ་ངོ་བ་ཀི་ མ་སེ་ལཱན་ཨ་ཁཱན་ སྡིག་པ་ག་ཡོར་ཀེ་ ཞི་ག་མཆོད་པ་ཕུལ་བེ་དེན་གེ་ ཨུ་ཉུ་བུ་ ཉིང་ཐུར་ག་ཤེབ་ཐུར་ཤ་ བྱོན་མེ་ཆོག་ཆོ༌ཝ།

⁸ ཨོ་ཐ་ཁྲིམས་ལུགས་ག་ ཐུང་ཀེ་ཨ་ཉི་ དམ་པའི་ཐུགས་ཉིད་གི་ ཧང་གེན་ཉི་ གནང་ཅ་ཡ་དག་ནེ་ལ་ གོ་མ་ག་གུར་ཁང་ཁེ་པ་ ཆོ་ཝ་སག་པུ་ སོ་ངོ་བ་ ནང་ཀ་ཆོ་ཁཱན་ ཐམས་ཅན་གེ་ དམ་པ་ཅན་ནང་ཀ་ ནུ་ཕེ་མ་ཆོག་པ་དག་ཉི་ གེན་ཅ་གི༌ལ།

⁹ ཨོ་ཐ་དཔེ་གི་ ཨོ་མ་ཇུང་ཁཱན་ དུས་ཙུན་ག་གེན་ཅ་གི༌ལ། ཧང་ཡ་དག་ནེ་ལ་ མཆོད་པ་དང་ སྙན་དར་གི་ མཆོད་པ་དང་ སྙན་དར་ཕུལ་ཁཱན་ སོ་ངོ་བ་ཀ་སེམས་ ཙང་མ་ཅོད་པུ་མཱན༌ཅ།

¹⁰ ཨོ་ཐ་བ་ཤོ་ ཟཱན་ཇམ་དང་ ཙང་མ་ཅོད་པེ་ག་དེན་གེ་ ཟིག་ཁཱན་བ་ གི་ཝ་ཨ་དེན་གེ་ ཨོ་ཐ་ཕིས་ཀ་ ཁྲིམས་ལུགས་བ་ཤོ་ འགན་རྒྱ་སིང་མ་ མ་གནང་མ་སག་པུ་ག་ དེན་གེ་ཤ་གི༌ལ༎

ཁིརིས་ག་སྐུ་ཁྲག།

¹¹ ཁིརིས་ཤོ་ གི་ཚེ་གེ་ཤ་ ཐ་ག་ཆོ་ཁཱན་ ལེག་པུ་བ་ཀ་ བླ་མ་གོང་མ་རི་ཝ་གི༌ལ། ཉི་རོག་ཤོ་ གནམ་མེད་ས་མེད་ ཆི་ལུ་དང་ ཅོན་མ་ཁཱན་ ཞིང་ཁམས་ག་གུར་ཁང་ནང་ཀ་ བྱོན་མ༌ཅ། ཨོ་ཉ་གུར་ཁང་ཤོ་ སོ་ངོ་གི་ བཞེངས་པ་མང་གི། ཡེག་པེ་དེན་ཐ་ཤོ་ བཀོད་ཉི་ཐ་ཁཱན་བ་ཀ་པོང་ཀེ་མང་གི།

¹² རོ་ཀི་ར་བ་དང་ ཏོ་ཀ་ག་ ཞི་ག་ཐུང་ཀེ་ཨ་ཉི་མང་གི་ཝ་ རོག་ཏེན་ག་ སྐུ་ཁྲག་ག་ཐུང་ཀེ་ཨ་ཉི་ ཤེབ་ཐུར་ག་རང་ ཐམས་ཅན་ག་དེན་གེ་ ཐམས་ཅན་གེ་ དམ་པ་ཆོ་ཁཱན་ ཕའི་ནང་ནང་ཀ་བྱོན་ཐཱན་ མ་འགྱུར་བརྟན་པ་ག་ ཐར་པ་ཉོང༌པ།

¹³ ལུགས་སྲོལ་མཱན་མ་དང་ཏུ་ཉི་ ཨ་ནེ་ལ་ ར་བ་དང་ ཏོ་ཀ་ག་ཞི་ ཉི་ཝ་ད་ཟ་གོག་ཁཱན་ག་ཐུ་ལུ་གི་ མ་ཙང་མ་རི་ཁཱན་ སོ་ངོ་བ་ཀ་ཐུང་ཀ་ཡབ་ཉི་ ཕིས་ཀེ་ཙང་མ་ཅོད་ཆོ༌ཝ།

¹⁴ ན་ཤི་གསོན་པོ་ཨ་ཉི་བཞུགས་ཁཱན་ དཀོན་མཆོག་ག་ གསོལ་ཝ་ཏ་པེ་ རེ་བེ་དེན་གེ་ ཁིརིས་ག་སྐུ་ཁྲག་གི་ཏ་ ལག་ཏང་ ཧབ་ཏུར་མང་པུ་ཨ་ཉི་ ན་ཧ་སེམས་ཁེ་པ་ ཤི་ལེ་རིག་ཁཱན་ལའི་གེ་ སྐྱབས་ཨ་ཉི་གནང་མེ་ཡ། ཧང་ཡ་དག་ནེ་ལ་ མ་འགྱུར་བརྟན་པ་ ཐུགས་ཉིད་ག་ཐུང་ཀེ་ཨ་ཉི་ ཅོན་མ་ཁཱན་ མཆོད་པ་ཨ་ཉི་ རོ་ཀི་ རོག་རོག་ཏེན་ དཀོན་མཆོག་ག་ཏཱན་ཕུལ༌བ།

¹⁵ ཨོ་ཉི་ཨ་དེན་གེ་ དཀོན་མཆོག་གི་ དབུ་མནའ་བཞེས་ཝ་དང་ཏུ་ཉི་ མ་འགྱུར་བརྟན་པ་ག་ ཐོབ་ཐང་ཁེ་པ་ ར་ཁཱན་ཐམས་ཅན་གི་ ཉོང་ཅེན་དག་པ་གི་ ཁིརིས་ཤོ་ འགན་རྒྱ་སིང་མ་ག་ བར་ཀ་སོ་ངོ་གི༌ལ། ཧང་ཡ་དག་ནེ་ལ་ འགན་རྒྱ་མཱན་མ་ག་ཕརའ་ཁེ་ ཆོ་ལེ་གང་ཀ་ སོ་ངོ་བ་ཀི་ཨ་ཁཱན་ སྡིག་པ་ག་ ངེ་ལོང་ཏབ་ཐཱན་ རོག་ཏེ་བ་ཀ་ ཚེ་ཐར་ཐར་བེ་དེན་གེ་ ཁིརིས་གཤགས་པ་གི༌ལ།

¹⁶ ཉི་ཨོམ་ སོ་ངོ་ཤི་ཁཱན་གི་ ཁ་ཆེམས་ཏེ་ ཐ་ཝ་ཆོ་ནེ་ལ་ ཁ་ཆེམས་ཐ་ཁཱན་ སོ་ངོ་ཤི་ཝ་དག་ཉི་ ཁུངས་ཀེ་བེ་ཁེ༌ལེ།

¹⁷ ཧང་ཡ་དག་ནེ་ལ་ ཁ་ཆེམས་ཤོ་ སོ་ངོ་ཤི་དེན་གེ་ཤ་ ཨ་ལེ་ཁེ་ཁཱན་ལའི་གི༌ལ། ཉི་སོ་ངོ་གསོན་པོ་ཨ་ཉི་ ཆོ་ལེ་གང་ཀ་ ཁ་ཆེམས་ཐ་ཝ་དང་ཏུ་ཉི་ ཨ་ལུ་མཱན༌ཅ།

¹⁸ ཨོ་ཉི་ཨ་དེན་གེ་ གོ་མ་གནང་ཁཱན་ འགན་རྒྱ་མཱན་མ་གེ་ ཤོ་ཝ་དང་ཏུ་ཉི་ ཤི་ཝ་དག་ཉི་ ཁུངས་ཀེ་བེ་དེན་གེ་ ཞི་ཚཱས་པ་ཆོ༌ཝ།

¹⁹ མོ་ས་གི་ གོ་རང་ བཀའ་རྒྱ་བ་ སོ་ངོ་ཐམས་ཅན་ག་ ལྷག་ཉི་གནང་ཐཱན་ ཝ་ད་ཟ་དང་ ར་བ་ག་ཞི་བུ་ཉི་ རི་ཀབ་ཉི་ཡཱན་ཐཱན་ ཧི་སོབ་ཤིང་ག་ད་ཀ་གེ་ ཇ་ཆེན་ཙ་ལུ་གི་ཐིག་ཉི་ བཀའ་ཁྲིམས་ག་དཔེ་ཆ་ཐུང་ཀ་དང་ སོ་ངོ་ཐམས་ཅན་ག་ཏཱན་ ཡ་ཕ༌ལ།

²⁰ ཉི་རོ་ཀི་གསུངས་མ་ལ་ དཀོན་མཆོག་གི་ ན་ཧ་བཀའ་གནང་ཁཱན་ཁེ་པ་ ན་ཤི་ ཆ་གནས་ཐ་ལེ་ཁེ་ལེ་དག༌ཉི། ཨོ་ཐ་ཞི་གི་ འགན་རྒྱ་ག་ ཐེལ་ཙི་ཕིན་ཅ་གི༌ལ།

²¹ ཨུ་ཉུ་པུརུས་ཀིན་ཨ་ཉི་ རོ་ཀི་གུར་ཁང་དང་ གསོལ་ཝ་ཏ་པ་ཀབ་ཉི་ ཚཱས་ཁཱན་ཅ་ལ་ ཐམས་ཅན་ག་ཐུང་ཀ་བུ་ ཞི་ཡབ་ཉི་གནང་མ༌ལ།

²² ཤ་མ་ ཐམས་ཅན་རང་ ཞི་གི་ཨ་ཉི་ དག་པེ་ཁེ་ལེ་དག་ཉི་ བཀའ་ཁྲིམས་གེ་ཤོན༌ཅ། ཉི་ཞི་མ་ཤོ་ཝ་ད་བུ་ཨ་ནེ་ལ་ སྡིག་པ་ག་བཤགས་པ་མ་ཉོང༌པ།

²³ ཉི་ཞིང་ཁམས་ག་ཡོང་ག་བ་ ཨོ་ཐེན་ཨ་ཉི་ ཙང་མ་ཅོད་པེ་ཁེ་ཝ་ག་ ཁག་ཆི་ལུ་ཆོ༌ཝ། དག་པ་ཀབ་ཉི་ ཞིང་ཁམས་ག་ཅ་ལ་བ་ ཨོ་ཉ་བ་ཀེ་ལག་ཉི་ ལེག་པུ་ཆོ་ཁཱན་ མཆོད་པ་གི་ཨ་ཉི་ ཙང་མ་ཅོད་པེ་ཁེ༌ལེ།

²⁴ ཧང་ཡ་དག་ནེ་ལ་ ཁིརིས་ཤོ་ སོ་ངོ་གི་བཞེངས་ཁཱན་ མགོན་ཁང་ནང་ཀ་ མ་བྱོན་ཤི། སོ་ངོ་གི་བཞེངས་ཁཱན་ མགོན་ཁང་ཁེ་པ་ ཞིང་ཁམས་ག་ཡོང་ཤ་གི༌ལ། དག་པ་ཀབ་ཉི་ ཨ་ཧ་ཡོར་ཀེ་ དཀོན་མཆོག་ག་ སྐུན་མདུན་ག་བཞེངས་པེ་དེན་གེ་ རོག་ཤོ་ ཞིང་ཁམས་ག་རང་ བྱོན་མ༌ཅ།

²⁵ འཛམ་གླིང་ག་ བླ་མ་གོང་མ་གི་ ཉིང་དྲང་རང་ སེམས་ཅན་ག་ཞི་ག་ མཆོད་པ་ཕུལ་བེ་དེན་གེ་ ཐམས་ཅན་གེ་ དམ་པའི་མགོན་ཁང་ནང་ཀ་ ནུ་ཕ་པུརུས་ཀིན་ཨ་ཉི་ རོག་ཤོ་ རོ་ཀི་ རོག་ཏེན་ ལོག་ཉི་ལོག་ཉི་རང་ ཕུལ་བེ་དེན་གེ་ ཞིང་ཁམས་ག་བྱོན་མ་མང་གི།

²⁶ ཨོ་ཉེན་གི་ནེ་ཏ་ འཛམ་གླིང་བཀོད་ཏེན་ཐུར་གེ་ག་ཏཱན་ ཤེབ་མང་པུ་ཐུར་ ཁིརིས་ནང་དོག་པེ་ཁེ་ཝ་ཨོ་ཕེ། དུས་ཇུ་ཀ་དག་པ་ཀབ་ཉི་ ཤེབ་ཐུར་ག་རང་ ཏ་བུ་ག་དེན་གེ་ ཁིརིས་བྱོན་ཐཱན་ སྡིག་པ་ཐམས་ཅན་རང་ མ་ཝ་ཅོད་པེ་དེན་གེ་ རོ་ཀི་ རོག་ཏེན་ག་ མཆོད་པ་གནང༌མ།

²⁷ སོ་ངོ་བ་ཤོ་ ཤེབ་ཐུར་ ཤི་ལེ་རང་ཁེ༌ལེ། ཉི་རོག་ཏེ་བ་ཀ་ ཁྲིམས་ཅཱད་པེ༌ཅ།

²⁸ ཨུ་ཉུ་པུརུས་ཀིན་ཨ་ཉི་ སོ་ངོ་མང་པུ་ཐུར་ག་སྡིག་པ་ བཀའ་དྲིན་བསྐྱང་མེ་དེན་གེ་ ཁིརིས་གི་བུ་ རོག་ཏེན་ག་མཆོད་པ་ཕུལ་ཉི་ ཤེབ་ཐུར་ཤ་གཤགས༌པ། རོག་ལོག་ཉི་རང་བྱོན༌མེ། དག་པ་ཀབ་ཉི་ ཨ་ཧ་སྡིག་པ་ བསྣམས་པེ་དེན་གེ་ མང་གི་ཝ་ རོ་ཀ་དེན་གེ་ནོང་ཁཱན་བ་ཀ་ ཐར་པ་གནང་མེ་དེན་གེ་གི་ལ༎