ཧི་བུརུ། 8 - Tshangla New Testament (BSI)

ཁིརིས་ཤོ་ ཨ་ཧ་བླ༌མ་གོང༌མ་གི༌ལ།

¹ ཨ་ཤི་ཡེག་པེ་ག་དེན་ཐ་ཤོ་ ཙོ་རང་ ཨུ་ཐུ་གི༌ལ། ཨ་ཧ་བླ་མ་གོང་མ་ཁེ་པ་ ཞིང་ཁམས་ག་ གཟི་བརྗིད་ཅན་ཆོ་ཁཱན་ དཀོན་མཆོག་ག་གསེར་ཁྲི་ག་ ལ་ཉོང་ལོ་ཀ་བཞུགས་པ༌ཅ།

² སོ་ངོ་གི་མང་གི་ཝ་ གཙོ་བོ་གི་ བཞེངས་ཉི་གནང་ཁཱན་ དམ་པའི་མགོན་ཁང་དང་ དེན་པ་གུར་ཁང་ནང་ཀ་ རོ་ཀི་ཕྱག་ཞུན༌ཅ།

³ བླ་མ་གོང་མ་ ཐམས་ཅན་གི་ སྙན་དར་དང་ མཆོད་པ་ཕུལ་བེ་ ཁེ་ཝ་ཨ་དེན་གེ་ ཨ་ཧ་བླ་མ་གོང་མ་གི་བུ་ ཕུལ་བེ་ཁེ༌ལེ།

⁴ རོག་འཛམ་གླིང་ག་ བཞུགས་པ་ཆོ་ནེ་ལ་ རོག་བླ་མ་ མ་རི་ཝ་ཨོ་ཕེ། ཧང་ཡ་དག་ནེ་ལ་ བཀའ་ཁྲིམས་དང་ཏུ་ཉི་ སྙན་དར་ཕུལ་ཁཱན་ བླ་མ་བ༌ཅ།

⁵ ཞིང་ཁམས་ག་ཡོང་དང་ པར་ག་བཱརང་ཀ་ཤ་ རོག་ཏེ་བ་ཀི་ ཕྱག་ཞུན་ཅ་གི༌ལ། ཧང་ཡ་དག་ནེ་ལ་ མོ་ས་གི་ དམ་པའི་གུར་ཁང་ བཞེངས་པེ་ཅམ་པ་ཀབ་ཉི་ དཀོན་མཆོག་གི་ རོ་ཀ་ཨོ༌ཐེན་གསུངས༌མ༌ཆོ༌ཝ་ ཨོ་ཐ་ཕུ་ཐུང་ཀ་ ཐམས་ཅན་རང་ ཇི་གི་ ན་ག་དཔེ་གེན་མ་དང་ཏུ་ཉི་ ཅོད་པེ་དེན་གེ་ རིག་པ་སྒྲིམ་ཅོ་ དག༌ཉི།

⁶ ཡི་ཤུ་གི་ དཀོན་མཆོག་དང་ སོ་ངོ་བ་ཀ་བར་ཀ་ ཅོད་ཉི་གནང་ཁཱན་ འགན་རྒྱ་ཁེ་པ་ ལག་ཏང་ ལེག་པུ་ཆོ་ཝ་པུརུས་ཀིན་ཨ་ཉི་ རོ་ཀ་ཕྱག་ལཱ་བུ་ རོག་ཏེ་བ་ཀ་ ལུགས་སྲོལ་མཱན་མ་གེ་ ལེག་པུ༌ཅ། ཧང་ཡ་དག་ནེ་ལ་ དབུ་མནའ་བཞེས་ཁཱན་བ་ ལག་ཏང་ ལེག་པུ་དང་ཏུ་ཉི༌ཅ།

⁷ འགན་རྒྱ་མཱན་མ་ཁེ་པ་ ཅོན་མ་ཝ་ཆོན་ཐཱན་ཨ་ནེ་ལ་ འགན་རྒྱ་སིང་མ་ གནང་མེ་མ་ཁེ་ཝ་ཨོ་ཕེ།

⁸ དག་པ་ཀབ་ཉི་ དཀོན་མཆོག་ རོག་ཏེན་གི་ རོག་ཏེ་བ་ཀབ་ཉི་ ཅོན་ཐོང་ཉི་ གསུངས་མ་ཅ་ ཨིས་རེལ་དང་ ཡ་ཧུ་ད་ག་ སོ་ངོ་བ་ཀབ་ཉི་ འགན་རྒྱ་སིང་མ་ཅོད་པེ་ག་ ནོང་ཐུར་ཤེག༌པེ།

⁹ ཨོ་ཐ་འགན་རྒྱ་ཁེ་པ་ ཇི་གི་ རོག་ཏེ་བ་ཀ་ ཕ་མ་བ་ ག་དང་གི་ཙུང་ཉི་ ཨི་ཇིབ་གེ་ ཕིས་ཀ་ཤོན་བུ་ལེ་གང་ཀ་ ཅོད་ཁཱན་འགན་རྒྱ་ད་བུ་མང་གི། རོག་ཏེ་བ་ཀི་ ཇ་ག་འགན་རྒྱ་ཀབ་ཉི་ དམ་ཚིག་མ་ཙུང་མ་ཨ་དེན་གེ་ ཇི་གི་ རོག་ཏེ་བ་ཀེ་ ཚིང་ཏ་གིར་པ་དག་ཉི་ གཙོ་བོ་གི་གསུངས་མ༌ལ།

¹⁰ ཨུ་ཐུ་ཤོ་ ཨོ་ཉ་ནོང་ཀ་ ཇི་གི་ ཨིས་རེལ་ག་ སོ་ངོ་བ་ཀབ་ཉི་ འགན་རྒྱ་སིང་མ་ ཅོད་པེ་ དག་ཉི་ གཙོ་བོ་གི་གསུངས་མ༌ལ། ཇི་གི་ ཇ་ག་བཀའ་ཁྲིམས་ རོག་ཏེ་བ་ཀ་ སེམས་ནང་ཀ་ཙུག༌པེ། ཉི་རོག་ཏེ་བ་ཀ་ ཐིང་ལོམ་ག་འབྲི༌བེ། ཇང་ཤོ་ རོག་ཏེ་བ་ཀ་ དཀོན་མཆོག་དང་ རོག་ཏེ་བ་ཤོ་ ཇ་ག་སོ་ངོ་རི་ལེ་གི༌ལ།

¹¹ ཨི་བི་གི་རང་ ནོག་མིན་བ་ཀ་ ཡེ་ལེ་མ་ཁེ༌ལ། ཉི་སོ་ངོ་གི་ རོ་ཀ་བོ་ཉིང་ག་ གཙོ་བོ་ གུམ་ཡེ་ལེ་ཁེ་ལེ་དག་ཉི་ ཡེག་པེ་མ་ཁེ༌ལ། ཧང་ཡ་དག་ནེ་ལ་ ཟེ་མུ་གེ་ གོ་ཙུག་ཉི་ ཆི་ལུ་ཐམས་ཅན་གི་ ཇང་གུམ་ཡེ༌ལེ།

¹² ཧང་ཡ་དག་ནེ་ལ་ ཇི་གི་ རོག་ཏེ་བ་ཀི་ ངན་པ་ཨ་ཁཱན་བ་ བཀའ་དྲིན་བསྐྱང༌མེ། ཉི་རོག་ཏེ་བ་ཀ་སྡིག་པ་ ཧ་ལ་རང་ ཡིད་ཀ་མ་ཨ་ལ་ དག༌ཉི།

¹³ ཨོ་ཐ་འགན་རྒྱ་ཁེ་པ་ དཀོན་མཆོག་གི་ སིང་མ་གི་ལ་དག་ཉི་ གསུངས་ཉི་ གོ་མ་ག་འགན་རྒྱ་ཁེ་པ་ མ་ཝ་ཅོད་གནང༌མ། ཧང་རང་གི་ནེ་བུ་ མཱན་མ་དང་ དུག་པིན་རི་དེན་གེ་ མ་ཝ་རིན༌ཅ༎