ཧི་བུརུ། 7 - Tshangla New Testament (BSI)

བླ་མ་མལ་ཀི་སེ་དེག།

¹ མལ་ཀི་སེ་དེག་ཤོ་ ཁྲོམ་ཆེན་ ཤ་ལེམ་ག་དཔོན་དང་ ཐམས་ཅན་གེ་ཆི་ལུ་ དཀོན་མཆོག་ག་ བླ་མ་གི་ཝ་ཆོ༌ཝ། ཨ་བཱརའ་ཧམ་གི་ ཕྱད་མདའ་ཕི་ཉི་ དཔོན་ག་བ་ཕམ་ཐཱན་ ཕའི་ག་ལོག་པེ་གང་ཀ་ མལ་ཀི་སེ་དེག་གི་ ཨ་བཱརའ་ཧམ་རུམ་ཐཱན་ བྱིན་རླབས་གནང་མ༌ལ།

² ཉི་ཨ་བཱརའ་ཧམ་གི་ རོ་ཀི་ཉོང་ཁཱན་རྒྱུ་ནོར་ ཐམས་ཅན་ག་ བརྒྱ་གེ་སེ་ཤོ་ཉི་བུན་ཐཱན་ མལ་ཀི་སེ་དེག་ག་ཏཱན་ ཕུལ་བ༌ལ། རོ་ཀ་མཚན་ག་དེན་ཐ་ཤོ་ ཐྲང་ཉི་གནང་ཁཱན་ དཔོན་དག་པེ་གི་ཝ༌ལ། ཤ་ལེམ་ག་དེན་ཐ་ཤོ་ སྐྱིད་པུ་གི་ཝ་ཨ་དེན་གེ་ རོག་ཤོ་ སྐྱིད་པུ་ག་དཔོན་བུ་ གི་ཝ་ཆོ་ཝ༌ལ།

³ རོ་ཀ་ཡབ་དང་ཡུམ་ རོ་ཀ་མི་རྒྱུད་ ཉི་རོ་ཀ་ཚེ་ག་ གོ་དང་ཇུག་ཀོར་གེ་ གསུང་རབ་གེ་ཧང་རང་མ་ཤོ་ཝ་ཨ་དེན་གེ་ དཀོན་མཆོག་ག་ སྲས་པུརུས་ཀིན་ཨ་ཉི་ རོག་བུ་ དུས་ཏ་བུ་ག་དེན་གེ་ བླ་མ་གི༌ལ།

⁴ མལ་ཀི་སེ་དེག་ ཧབ་ཏུར་ཆི་ལུ་ཆོ་ཝ་གི་ལ་སྨོ་ མིན་གོད་ཅོ༌ལེ། ཨ་བཱརའ་ཧམ་གི་ཆང་ རོ་ཀི་ཉོང་ཁཱན་གེ་ རོ་ཀ་ཏཱན་ བརྒྱ་གེ་སེ་ཕུལ་བ༌ལ།

⁵ ཉི་ཨོམ་ བཀའ་ཁྲིམས་དང་ཏུ་ཉི་ཨ་ནེ་ལ་ ལེ་ཝི་ག་རྒྱུད་པ་བ་ བླ་མ་རི་ཁཱན་བ་ཀི་ ཨིས་རེལ་སོ་ངོ་བ་ཀེ་ བརྒྱ་གེ་སེ་དུས་པེ་ཁེ༌ལེ། ཨིས་རེལ་ག་ སོ་ངོ་བ་ཤོ་ ཨ་བཱརའ་ཧམ་ག་ རྒྱུད་པ་གི་ཝ་ཨ་དེན་གེ་ རོག་ཏེ་བ་ཀ་ ཡུང་ཟི་བ་རང་གི༌ལ།

⁶ དག་པ་ཀབ་ཉི་ མལ་ཀི་སེ་དེག་ཤོ་ ལེ་ཝི་ག་རྒྱུད་པ་གེ་ མང་གི་ཝ་ཆོ༌ཝ། ཨོ་ཉེ་རང་གི་ནེ་བུ་ རོ་ཀི་ཨ་བཱརའ་ཧམ་གེ་ བརྒྱ་གེ་སེ་དུས་ཐཱན་ བྱིན་རླབས་གནང་མ༌ལ། ཉི་ཨ་བཱརའ་ཧམ་ཤོ་ དཀོན་མཆོག་གི་ དབུ་མནའ་བཞེས་ཁཱན་ཆོ་ཝ༌ལ།

⁷ བྱིན་རླབས་ཞུ་ཁཱན་གེ་ བྱིན་རླབས་བི་ཁཱན་ཁེ་པ་ ཆི་ལུ་གི་ལ་དག་ཉི་སེན༌ཅ། ཉི་ཨོ་ཐ་ཀོར་གེ་ དོག་པ་ད་སུ་རང་མཱན༌ཅ།

⁸ བརྒྱ་གེ་སེ་དུས་ཁཱན་ བླ་མ་བ་ ཤིན༌ཅ། དག་པ་ཀབ་ཉི་ མལ་ཀི་སེ་དེག་ཤོ་ རོག་ཏེ་བ་ཀེ་ཆི་ལུ་གི༌ལ། ཧང་ཡ་དག་ནེ་ལ་ རོག་ཤོ་ གསོན་པོ་ཨ་ཉི་ བཞུགས་པ་ཅ་དག་ཉི་ ཨ་ཤི་སེན༌ཅ།

⁹ ཐུར་ཕང་གི་ཡེག་ཏུ་ བརྒྱ་གེ་སེ་དུས་ཁཱན་ ལེ་ཝི་གི་ ཨ་བཱརའ་ཧམ་ག་ཐུང་ཀེ་ཨ་ཉི་ བརྒྱ་གེ་སེ་ཕུལ་ཅ་གི༌ལ།

¹⁰ ཧང་ཡ་དག་ནེ་ལ་ མལ་ཀི་སེ་དེག་གི་ ཨ་བཱརའ་ཧམ་རུ་མེ་གང་ཀ་ ལེ་ཝི་ཤོ་ ཀེ་ཝ་མཱན་ཆི། དག་པ་ཀབ་ཉི་ རོ་ཀ་ལི་ཁེ་པ་ རོ་ཀ་ཕ་མ་ ཨ་བཱརའ་ཧམ་ག་ནང་ཀ་ཆོ་ཝ་དག༌ཉི།

¹¹ ཨིས་རེལ་ག་ སོ་ངོ་བ་ཀ་བླ་མ་བ་ཤོ་ ལེ་ཝི་ག་རྒྱུད་པ་གེ་ ཨོ་ཕེ་ཁེ་ལེ་དག་ཉི་ བཀའ་ཁྲིམས་གེ་ཤོ་ནེ་བུ་ ཨོ་ཉ་བླ་མ་བ་ཀི་ སོ་ངོ་ཐུར་བུ་ ཅོན་ད་སུ་རང་མ་ཝ་ ཅོད་པེ་མར་ཤི། ཨོ་ཉི་ཨ་དེན་གེ་ ཧ་རུན་ག་མི་རྒྱུད་གེ་ མང་གི་ཝ་ མལ་ཀི་སེ་དེག་པུརུས་ཀིན་ཨ་ཉི་ བཱརའ་བླ་མ་ཐུར་ ཨོ་ཕེ་ཁེ་ཝ་ཆོ༌ཝ།

¹² བླ་མ་རི་ལེ་ཁེ་ཁཱན་བ་ སོར་ནེ་ལ་ བཀའ་ཁྲིམས་བུ་ སོར་པེ་ཁེ༌ལེ།

¹³ ཧང་ཡ་དག་ནེ་ལ་ ཨ་ཤི་ཆཱས་ཨ་ཁཱན་ཁེ་པ་ བླ་མ་ཨ་ཉི་ ཧ་ལ་རང་ མཆོད་གཤམ་ག་ ཕྱག་མ་ཞུ་ཁཱན་ བཱརའ་མི་རིགས་གེ་གི༌ལ།

¹⁴ ཇི་གི་ཡེག་པེ་དེན་ཐ་ཤོ་ ཨ་ཧ་གཙོ་བོ་ཁེ་པ་ ཡ་ཧུ་ད་ག་ མི་རིགས་གེ་ཨ་ཉི་ བྱོན་མ་གི༌ལ། ཉི་མོ་ས་གི་ བླ་མ་བ་ཀ་ཀོར་གེ་ གསུངས་མ་ཀབ་ཉི་ ཡ་ཧུ་ད་ག་ མི་རིགས་གེ་བྱོན་མེ་དག་ཉི་ ཧང་རང་མ་གསུངས་མ་ཆོ༌ཝ༎

ཁིརིས་ཤོ་ མལ༌ཀི༌སེ༌དེག་ད༌བུ་ཐུར་གི༌ལ།

¹⁵ ཉི་མལ་ཀི་སེ་དེག་ད་བུ་ཨ་ཉི་ བཱརའ་བླ་མ་ཁེ་པ་ བྱོན་མ་ཨ་དེན་གེ་ ཨ་ཤི་ཡེག་ཁཱན་ཁེ་པ་ ལག་ཏང་ དང་སང་ཀིན་རིན༌ཅ།

¹⁶ ཁྲིམས་ལུགས་དང་ཏུ་ཉི་ཨ་ནེ་ལ་ ལེ་ཝི་ག་མི་རིགས་གེ་ བླ་མ་རི་ལེ་ཁེ་ཝ་ཆོ༌ཝ། དག་པ་ཀབ་ཉི་ ཡི་ཤུ་ཤོ་ ལེ་ཝི་ག་ མི་རིགས་གེ་མང་གི་ཝ་ ཧ་ལ་རང་མེ་པ་ཕི་ལེ་མར་ཁཱན་ ཚེ་ག་སྟོབས་དབང་གེ་ཨ་ཉི་ བླ་མ་རི་ཝ་གི༌ལ།

¹⁷ རོ་ཀ་ཀོར་གེ་གསུང་རབ་གེ་ ཨོ་ཐེན་ཤོན་ཅ་ མལ་ཀི་སེ་དེག་ པུརུས་ཀིན་ཨ་ཉི་ ནཱན་ཤོ་ མ་འགྱུར་བརྟན་པ་ག་ བླ་མ་གི་ལ་ དག༌ཉི།

¹⁸ བླ་མ་ག་ཀོར་གེ་ཤོ་ཁཱན་ ཁྲིམས་ལུགས་མཱན་མ་ཁེ་པ་ སྒྲིང་སྒྲིང་དང་ ཁུངས་མ་ཝ་ ཆོ་ཝ་ཨ་དེན་གེ་ སིག་ཉི་གེ་མ༌ལ།

¹⁹ ཧང་ཡ་དག་ནེ་ལ་ བཀའ་ཁྲིམས་གི་ ཧང་རང་ཅོན་མ་ཝ་ ཅོད་པེ་རེ་བུ་མ༌ལ། ཉི་ཨོམ་ རོ་ཀ་ཚབ་ཀ་ རེ་ཆ་ལེག་པུ་ཁེ་པ་ ཙུག་པ༌ཅ། ཨོ་ཐེན་ཨ་ཉི་ ཨའི་དཀོན་མཆོག་ག་ སྐུན་མདུན་ག་ ར་ག་ཏཱན་ཏེབ༌ཅ།

²⁰ ཁིརིས་ཁེ་པ་ བླ་མ་རི་ལེ་གི་ལ་དག་ཉི་ དཀོན་མཆོག་གི་ དབུ་མནའ་བཞེས་ཝ༌ལ། དག་པ་ཀབ་ཉི་ རོ་ཀི་བཱརའ་བླ་མ་བ་ཀབ་ཉི་ ཧ་ལ་རང་ ཨུ་ཐུ་ད་བུ་ དབུ་མནའ་བཞེས་ཝ་མཱན༌ཅ།

²¹ དཀོན་མཆོག་གི་ ཨོ་ཐེན་གསུངས་ཉི་ དབུ་མནའ་བཞེས་དེན་གེ་ ཡི་ཤུ་ཤོ་ བླ་མ་རི་ཝ༌ལ། གཙོ་བོ་གི་ དབུ་མནའ་བཞེས་ཝ་ཅ་ ཉི་ཇི་གི་ ཇ་ག་སེམས་ཁེ་པ་ འགྱུར་བེ་མ་བི༌ལ། ནཱན་ཤོ་ མ་འགྱུར་བརྟན་པ་ག་དེན་གེ་ བླ་མ་གི་ལ་ དག༌ཉི།

²² དཀོན་མཆོག་གི་ དབུ་མནའ་བཞེས་ཝ་ཨ་དེན་གེ་ ཡི་ཤུ་ཤོ་ འགན་རྒྱ་ལེག་པུ་ག་ ཇ་མི་གི༌ལ།

²³ ཉི་ཨོམ་ཆང་རང་ ལུགས་སྲོལ་མཱན་མ་ག་ ཧང་སོ་སུ་ཅ་ཡ་དག་ནེ་ལ་ བླ་མ་ཐུར་གཤགས་པ་ཀབ་ཉི་ བཱརའ་ཐུར་གི་ རོ་ཀ་ཚབ་ཀ་ བླ་མ་ཨ་ཉི་ ལའི་ཨ་ལེ་ཁེན་ཆོ༌ཝ།

²⁴ དག་པ་ཀབ་ཉི་ ཡི་ཤུ་ཤོ་ མ་འགྱུར་བརྟན་པ་ག་དེན་གེ་ གསོན་པོ་ཨ་ཉི་ བཞུགས་ཁཱན་གི༌ལ། ཨོ་ཉི་ཨ་དེན་གེ་ རོག་ཁེ་པ་ མ་འགྱུར་བརྟན་པ་ག་དེན་གེ་ བླ་མ་གི༌ལ།

²⁵ ཨོ་ཉི་ཨ་དེན་གེ་ ཨི་བི་གི་ རོ་ཀ་ཐུང་ཀེ་ཨ་ཉི་ དཀོན་མཆོག་ག་སྐུན་མདུན་ག་ ཨུན་ཅ་གི་ལ་སྨོ་ རོ་ཀི་ཨོ་ཉ་སོ་ངོ་ག་ ཐམས་ཅན་རང་ མ་འགྱུར་བརྟན་པ་ག་དེན་གེ་ སྐྱབས་ཨ་ཉི་ གནང་མེ་རེ༌བེ། རོག་ཤོ་ རོག་ཏེ་བ་ཀ་དེན་གེ་ སྨོན་ལམ་ཏབ་ཉི་ དཀོན་མཆོག་ག་ཞུ་ལེ་དེན་གེ་ མ་འགྱུར་བརྟན་པ་ཨ་ཉི་ བཞུགས་ཅ་གི༌ལ།

²⁶ ཡི་ཤུ་ཤོ་ དམ་པ་དང་ ཅོན་ད་སུ་རང་མ་ཁཱན་དང་ ཙང་མ་ཆོ༌ཝ། ཉི་ཨོམ་ཤོ་ སྡིག་པ་དང་ སྡིག་ཅན་བ་ཀེ་ སོ་སུ་ཨ་ཉི་ཐ་ཁཱན་དང་ ཞིང་ཁམས་གེ་བུ་ ག་དུང་ཁཱན་ གི་ཝ་ཨ་དེན་གེ་ རོག་ཤོ་ ཨ་ཤི་ཚཱས་ཁཱན་ བླ་མ་གོང་མ་གི༌ལ།

²⁷ བཱརའ་བླ་མ་གོང་མ་བ་ཀི་ ཨ་ཝ་པུརུས་ཀིན་ཨ་ཉི་ རོ་ཀི་ནོང་དྲང་རང་ མཆོད་པ་ཕུལ་བེ་མ་ཁེ༌ལ། རོག་ཏེ་བ་ཀི་ གོ་མ་རང་ རང་ཏེན་ག་སྡིག་པ་དེན་གེ་ མཆོད་པ་ཕུལ་བེ་ཁེན་ཆོ༌ཝ། ཉི་ཤ་ སོ་ངོ་བ་ཀ་སྡིག་པ་དེན་གེ་ མཆོད་པ་ཕུལ་ཆོ༌ཝ། དག་པ་ཀབ་ཉི་ ཡི་ཤུ་ཁིརིས་གི་ ཤེབ་ཐུར་ག་རང་ ཐམས་ཅན་ག་དེན་གེ་ རོག་རོག་ཏེན་གི་ ཁྲིམས་ཤིང་ཐུང་ཀ་ མཆོད་པ་ཕུལ་ཉི་གནང༌མ།

²⁸ ཧང་ཡ་དག་ནེ་ལ་ བཀའ་ཁྲིམས་གི་ བླ་མ་གོང་མ་ཨ་ཉི་ ཀེ་ཁཱན་བ་ཤོ་ ཅོན་ཆོ་ཁཱན་ སོ་ངོ་བ་གི་ཝ་ཆོ༌ཝ། དག་པ་ཀབ་ཉི་ བཀའ་ཁྲིམས་གནང་དེན་གེ་ དཀོན་མཆོག་གི་ དབུ་མནའ་བཞེན་ཐཱན་ རོ་ཀ་སྲས་ཀེ་ཉི་གནང༌མ། ཉི་རོ་ཀ་སྲས་ཤོ་ མ་འགྱུར་བརྟན་པ་ག་དེན་གེ་ ཅོན་མ་ཁཱན་བླ་མ་གོང་མ་ ཅོད་ཉི་གནང༌མ༎