ཧི་བུརུ། 6 - Tshangla New Testament (BSI)

¹ ཨོ་ཉི་ཨ་དེན་གེ་ ཨ་ཤི་ གོ་ཙུག་པེ་གང་ཀ་ ཁིརིས་ག་ཀོར་གེ་ ལམ་པེ་ཁེ་ཁཱན་བ་ཀེ་ ཐེབ་ཨ་ཉི་ ཨ་ཧ་བ་ ཕུག་ཉི་རང་དི་ཁེ། སྡིག་པ་གེ་ལོག་པེ་ག་དང་ དཀོན་མཆོག་ག་ དད་པ་ཨ་ལེ་ག་ཤེག་པ་ ཨ་ཧ་བ་ཀི་ལོག་ཉི་རང་ རྨང་མ་ཆེ་ཁེ།

² ཁྲུས་གསོར་བ་ཀ་ཀོར་གེ་ ཡེ་ལེ་ག་དང་ ག་དང་ཀེ་བེ་ག་ ཉི་ཤི་ཁཱན་བ་ གསོན་པོ་ཨ་ཉི་ ཝུ་ལེ་ག་ཀོར་གེ་དང་ མ་འགྱུར་བརྟན་པ་ག་ ཁྲིམས་ག་ཀོར་གེ་ ན་ཧ་ཏཱན་ལོག་ཉི་ ཡེ་ལེ་མ་ཁེ༌ལ།

³ ཉི་དཀོན་མཆོག་ག་ ཐུགས་བཞེད་ཆོ་ནེ་ལ་ ཨ་ཤི་ ཨོ་ཐེན་ཨ༌ལེ།

⁴ ཧང་ཡ་དག་ནེ་ལ་ ཨི་བི་གི་ འོད་ཟེར་ཉོང་ཉི་ ཞིང་ཁམས་ག་སེ་རབ་ག་ ཉམས་མྱོང་དང་ དམ་པའི་ཐུགས་ཉིད་ཀབ་ཉི་ བོང་མེ་ག་ ཉོང་པ་ཅ་གི་ལ་སྨོ་

⁵ ཉི་ཨི་བི་གི་ དཀོན་མཆོག་ག་གསུང་ཁེ་པ་ ལེག་པུ་ཅ་དག་སེ་ཉི་ ཚེ་ཕྱི་མ་ག་ སྟོབས་དབང་ཀོར་གེ་ སེན་ཐཱན་རང་

⁶ དཀོན་མཆོག་གེ་ ལམ་རིང་མུ་རི་ཝ་ཐུར་ ཨོ་ཉ་སོ་ངོ་ཁེ་པ་ སྡིག་པ་གེ་ལོག་པེ་ བི་ལེ་མར༌བ། ཧང་ཡ་དག་ནེ་ལ་ རོག་ཏེ་བ་ཀི་ ལོག་ཉི་རང་ དཀོན་མཆོག་ག་སྲས་ ཁྲིམས་ཤིང་ཐུང་ཀ་ཇཱན་ཉི་ སོ་ངོ་མང་ཀ་གུབ་ཀ་ ངི་ནང་ཁུ་ལེ་རིག་ཅ་གི༌ལ།

⁷ ས་ག་ ངམ་སུ་ ལོག་ཉི་ལོག་ཉི་རང་ ཁེ་ལ་ཀབ་ཉི་ ས་གི་ རི་ཇམ་ཉི་ ལའི་ཨ་ཁཱན་ ལའི་པ་ག་དེན་གེ་ ཐོག་ཚོ་ཁཱན་ས་གི་ དཀོན་མཆོག་གེ་ བྱིན་རླབས་ཉོང༌པེ།

⁸ དག་པ་ཀབ་ཉི་ ཟུ་ཙོང་དང་ རི་བང་ཏེ་ལིག་ནེ་ལ་ ཨོ་ཉ་ས་ཁེ་པ་ ཁུངས་ཧང་རང་མ་ཝ་གི༌ལ། ཉི་ཨོ་ཉ་ས་ཁེ་པ་ སྨོན་ལམ་ཕོག་ཉི་ ཇུ་ཀ་དག་པ་ཀབ་ཉི་ མི་ག་གོག་ཉི་གེ༌མེ།

⁹ ཕང་ཁཱན་ཇ་རོ་བ་ ཨ་ཤི་ ཨོ་ཐེན་ཆཱས་ཨ་ནེ་བུ་ ན་ཤི་ ཐར་པ་ཉོང་པ་དང་ཏུ་ཉི་ ན་ཤི་ཏ་ ཨོ་ཉ་གེ་དྲག་པ་ཨ་ཉི་ ཨ་ལེ་དག་ཉི་ ཨ་ཤི་སེན༌ཅ།

¹⁰ ཧང་ཡ་དག་ནེ་ལ་ དཀོན་མཆོག་ཤོ་ ཐྲང་ཉི་མ་གནང་ཁཱན་མང་གི། ན་ཤི་ རོ་ཀ་དེན་གེ་ གནམ་མེད་ས་མེད་ ཙ་དྲེག་ཉི་ ལའི་ཨ་ཁཱན་བ་དང་ ན་ཤི་ དཀོན་མཆོག་ག་སོ་ངོ་བ་ཀ་ བདག་འཛིན་ཨ་ཉི་ ན་ཤི་ རོག་ཕང་ཅ་གི་ལ་དག་ཉི་ གེན་ཁཱན་ཁེ་པ་ རོ་ཀི་ཡིད་ཀ་མ་མི༌ལ། ཉི་ཨོ་མ་སག་པུ་བུ་ ཕང་པེ་གང༌ཅ།

¹¹ ན་ཤི་ རེ་ཆ་ཨ་ཁཱན་ཁེ་པ་ ཏེན་ཏེན་ཨ་ཉི་རང་ ཇུང་མེ་དེན་གེ་ ཇུ་ཀ་སག་པུ་རང་ ནའི་ཐམས་ཅན་གི་ བཱརའ་སོ་ངོ་བ་ཀ་དེན་གེ་ ཨོ་ཐེན་ཨ་ཉི་རང་ སྙིང་རྗེ་ཨན་ཆེན་དག་ཉི་ ཨ་ཤི་མིན༌ཅ།

¹² ན་ཧ་བ་ ཀ་ཤི་རིན་ཆེན་དག་ཉི་ ཨ་ཧ་སེམས་མཱན༌ཅ། དག་པ་ཀབ་ཉི་ དད་པ་ཀེ་ཉི་ བཟོད་པར་སྒོམ་པ་ཨ་དེན་གེ་ དཀོན་མཆོག་གི་ དབུ་མནའ་བཞེས་ཁཱན་ཁེ་པ་ ཉོང་པེ་གི་ཁཱན་ སོ་ངོ་བ་ཀ་དཔེ་གོད༌ཅོ༎

དཀོན་མཆོག༌གི་ དབུ༌མནའ་བཞེས༌ཁཱན་ཁེ༌པ་ ཏེན༌ཏེན༌རང་ཉོང༌པེ།

¹³ དཀོན་མཆོག་གི་ ཨ་བཱརའ་ཧམ་ཀབ་ཉི་ དབུ་མནའ་བཞེས་ལེ་གང་ཀ་ རོ་ཀེ་ལག་ཉི་ ཨི་བི་རང་ ཆི་ལུ་མ་ཝ་ཨ་དེན་གེ་ དཀོན་མཆོག་གི་ རོག་ཏེན་ག་ མཚན་གེ་ཨ་ཉི་ དབུ་མནའ་བཞེས་ཉི་

¹⁴ གསུངས་མ་ལ་ ཇི་གི་ ན་ག་ཏེན་ཏེན་ཨ་ཉི་རང་ བྱིན་རླབས་བི༌ལེ། ཉི་ཇི་གི་ ན་ག་རྒྱུད་པ་མང་པུ་ཅོད་པེ་ དག༌ཉི།

¹⁵ ཨ་བཱརའ་ཧམ་གི་ བཟོད་པར་སྒོམ་ཉི་ ནོང་མ་ཨ་དེན་གེ་ དཀོན་མཆོག་གི་ དབུ་མནའ་བཞེས་ཁཱན་ཁེ་པ་ ཉོང་པ༌ལ།

¹⁶ སོ་ངོ་གི་ ན་ཟ་ལ་ཀབ་ཉི་ རོག་ཏེ་བ་ཀེ་ ཆི་ལུ་ཐུར་ག་མིང་གེ་ཨ་ཉི་ ན་ཟཱན༌ཅ། ན་ཟ་ལ་ཀབ་ཉི་ ཡེག་ཁཱན་ཆཱས་ཁེ་པ་ ཏེན་ཏེན་རང་ གི་ལ་དག་ཉི་ ཁུངས་ཀེ་ཉི་ ཤག་ད་སུ་རང་ རུ་མེ་ཁེ་ལུ་མཱན༌ཅ།

¹⁷ རོ་ཀ་དེན་ཐ་ཁེ་པ་ ཧ་ལ་རང་མ་འགྱུར་བ་དག་ཉི་ རོ་ཀི་དབུ་མནའ་བཞེས་ཁཱན་བ་ ཉོང་པེ་གི་ཁཱན་ སོ་ངོ་བ་ཀ་ཏཱན་ གེན་མེ་དེན་གེ་ དཀོན་མཆོག་གི་བུ་ དབུ་མནའ་བཞེས་ཉི་གནང་མ༌ཅ།

¹⁸ དཀོན་མཆོག་གི་ ཨ་ཧ་ དབུ་མནའ་ཉིག་ཙིང་བཞེས་ཉི་གནང་མ༌ཅ། ཉི་ཨུ་ཐུ་ཉིག་ཙིང་ཤོ་ ཧ་ལ་རང་མ་འགྱུར༌བ། ཧང་ཡ་དག་ནེ་ལ་ དཀོན་མཆོག་གི་ སོ་ད་ཏི་ངེ་རང་ ཕི་ལེ་མར༌བ། ཨོ་ཉི་ཨ་དེན་གེ་ རོ་ཀེ་སྐྱབས་ལ་མེ་དེན་གེ་ ཨའི་རོ་ཀ་སྐུན་མདུན་ག་ཏཱན་ གཱན་ཇོང་ཁཱན་བ་ ཨ་ཧ་གུབ་ཀ་ཆོ་ཁཱན་ རེ་ཆ་ཁེ་པ་ ཙུང་ཅ་ཨ་ཉི་ སེམས་བོང་ཀིན་ཨ་ཉི་ ཆོ་ལེ་རེ༌ཅ། ཧང་ཡ་དག་ནེ་ལ་ རོ་ཀི་དབུ་མནའ་བཞེས་ཁཱན་ག་ ཨ་ཤི་གནམ་མེད་ས་མེད་ ལོ་དི་ཉི་ཆོ་ལེ་རེ༌ཅ།

¹⁹ གྲུ་ག་ཀོ་མར་ པུརུས་ཀིན་ཨ་ཉི་ ཨོ་ཐ་རེ་ཆ་གི་ ཨ་ཧ་སྲོག་ཁེ་པ་ ཅོན་མེ་མ་བི་ལཱན་ སྒྲིང་སྒྲིང་ཨ་ཉི་ཐཱན༌ཅ། ཉི་ཨོ་ཐ་རེ་ཆ་གི་ ཡོ་ལུ་ཁ་ཤ་ནང་ཀ་ཆོ་ཁཱན་ ཐམས་ཅན་གེ་ དམ་པ་མགོན་ཁང་ནང་ཀ་ ནུ་ཕེ་རིག་ཅ་གི༌ལ།

²⁰ ཨོ་ཉ་ དམ་པའི་མགོན་ཁང་ནང་ཀ་ ཨ་ཧ་དེན་གེ་ ཨ་ཧ་བ་ཀེ་གུམ་གུམ་ ཡི་ཤུ་གི་བྱོན་གནང་མ༌ཅ། མལ་ཀི་སེ་དེག་ག་པུརུས་ཀིན་ཨ་ཉི་ རོག་ཤོ་ དུས་ཏ་བུ་ག་དེན་གེ་ བླ་མ་གོང་མ་རི་ཝ་གི༌ལ༎