ཧི་བུརུ། 5 - Tshangla New Testament (BSI)

¹ ཉི་ཨོམ་ བླ་མ་གོང་མ་ཤོ་ སོ་ངོ་བ་ཀ་པོང་ཀེ་སིན་ཐཱན་ རོག་ཏེ་བ་ཀ་ཡོར་ཀེ་ དཀོན་མཆོག་ག་ ཕྱག་ཞུ་ལེ་དེན་གེ་ ཀེ་བ་གི༌ལ། ཉི་རོ་ཀི་ དཀོན་མཆོག་ག་ཏཱན་ སྡིག་པ་ག་མཆོད་པ་དང་ སྙན་དར་ཕུལ་ཅ་གི༌ལ།

² ཉི་རོག་ཏེན་བུ་ ཅོན་ཆོ་ཁཱན་ སོ་ངོ་གི་ཝ་ཨ་དེན་གེ་ མ་སེ་ལཱན་ བཱརའ་སོ་ངོ་བ་ཀི་ ངཱད་པ་ཀབ་ཉི་ རོ་ཀི་ རོག་ཏེ་བ་ཀབ་ འཁྲིལ་ལ་ཀབ་ཉི་ ཇམ་པུ་ཨ་ཉི་ འཁྲིལ་ལེ་རེ༌བེ།

³ ཨོ་ཉི་ཨ་དེན་གེ་ རོ་ཀི་མཆོད་པ་ཕུལ་བ་ཀབ་ཉི་ རོག་ཏེན་ག་སྡིག་པ་དང་ སོ་ངོ་བ་ཀ་སྡིག་པ་དེན་གེ་ མཆོད་པ་ཕུལ་བེ་ཁེན༌ཅ།

⁴ གུས་ཞབས་ཉོང་ཅེན་ དག་པ་ཐུར་གི་ བླ་མ་གོང་མ་རི་ལེ་མར༌བ། ཧ་རུན་པུརུས་ཀིན་ཨ་ཉི་ བླ་མ་གོང་མ་ཁེ་པ་ ཨོ་ཐ་ལའི་ཨ་ལེ་ག་དེན་གེ་ དཀོན་མཆོག་གི་ ར་ཝ་ག་ཚཱས༌པེ།

⁵ ཨོ་ཉི་ཨ་དེན་གེ་ ཁིརིས་གི་བུ་ རོག་བླ་མ་གོང་མ་ གི་ཝ་ཨ་དེན་གེ་ རོ་ཀི་གུས་ཞབས་ཉོང་པེ་ མ་གོད་ཅི། དག་པ་ཀབ་ཉི་ དཀོན་མཆོག་གི་ རོ་ཀ་གསུངས་མ་ཅ་ ནཱན་ཤོ་ ཇ་ག་ཟ་གི༌ལ། ཉི་ཐི་ནོང་ ཇང་ ན་ག་ཨ་པ་རི་ཝ་ དག༌ཉི།

⁶ ཉི་ཨོམ་ཆང་རང་ བཱརའ་རིམ་པང་ཐུར་ག་ རོ་ཀི་གསུངས་མ་ཅ་ མལ་ཀི་སེ་དེག་ པུརུས་ཀིན་ཨ་ཉི་ ནཱན་ཤོ་ དུས་ཏ་བུ་ག་ བླ་མ་གི་ལ་ དག༌ཉི།

⁷ ཡི་ཤུ་འཛམ་གླིང་ག་ བཞུགས་པེ་གང་ཀ་ ཤི་སྲོག་གེ་ རོ་ཀ་སྐྱབས་ཨ་ཁཱན་ག་ཏཱན་ གནམ་མེད་ས་མེད་བཤུམས་ཉི་ མིང་རི་ཤོ་ཉི་ ཉི་གསུང་སྐད་ཆི་ལུ་ཨ་ཉི་ སྨོན་ལམ་ཏབ་ཉི་ ཞུ་ཝ༌ལ། ཉི་རོ་ཀི་ དཀོན་མཆོག་ག་ གུས་ཞབས་ཨ་ཝ་ཨ་དེན་གེ་ དཀོན་མཆོག་གི་ རོ་ཀ་སྨོན་ལམ་ སྙན་གསེང་པ༌ལ།

⁸ རོག་ཤོ་ དཀོན་མཆོག་ག་སྲས་གི་ནེ་བུ་ དཀའ་ཝ་ཅཱད་ཅ་ཨ་ཉི་ རོ་ཀི་ཆ་གནས་ཐ་ལེ་ག་ལམ༌པ།

⁹ ཨོ་ཐེན་ཨ་ཉི་ དཀོན་མཆོག་གི་ རོག་ཤོ་ ཅོན་ད་སུ་རང་མ་ཁཱན་ བླ་མ་གོང་མ་ཅོད་ཉི་གནང་མ༌ལ། ཨོ་ཉི་ཨ་དེན་གེ་ རོ་ཀ་བཀའ་ག་ ཆ་གནས་ཐ་ཁཱན་ ཐམས་ཅན་ག་དེན་གེ་ རོག་ཤོ་ མ་འགྱུར་བརྟན་པ་ ཐར་པ་ག་ མུང་རི་ཝ༌ལ།

¹⁰ ཉི་མལ་ཀི་སེ་དེག་ག་ གནང་མ་པུརུས་ཀིན་ཨ་ཉི་ བླ་མ་གོང་མ་ག་གོ་སར་ དཀོན་མཆོག་གི་ རོ་ཀ་བུ་གནང་མ༌ལ༎

དད་པ༌གེ་ ཚིང་མ༌སིག༌ཅོ།

¹¹ ཨོ་ཐ་ཀོར་གེ་ ཡེག་པེ་ཁེ་ཝ་ག་ མང་པུ་ཐུར༌ཅ། དག་པ་ཀབ་ཉི་ ན་ཤི་དོ་ཟོ་ཨ་ཉི་ ལམ་པེ་མར་བ་ཨ་དེན་གེ་ ཨ་ཤི་ ན་ཧ་ཡེག་པེ་ཀ་ལུ༌ལ།

¹² མ་པ་ཏ་ ན་ཤི་བཱརའ་ག་ ཡེ་ལེ་རེ་བ་ག་ དུས་ཙུན་རེན༌པ། དག་པ་ཀབ་ཉི་ ན་ཧ་ཏཱན་ ཨོ་མ་བུ་ དཀོན་མཆོག་ག་གསུང་ ཡ་ལུ་བ་བུ་ བཱརའ་གི་ཡེ་ལེ་ཁེ་ན། ན་ཧ་བ་ཤོ་ ལྟོ་ཟ་ལེ་མང་གི་ཝ་ ཨོ་མ་བུ་ ནུ་ཇམ༌ལ།

¹³ ཨི་བི་གི་ ནུ་ཇམ་ཅ་གི་ལ་སྨོ་ ཨོ་ཉ་སོ་ངོ་ཤོ་ ཝག་ཙ་རང་གི༌ལ། ཉི་ལེག་པུ་དང་ མ་ལེག་པ་ག་ཀོར་གེ་ ཡེ་ཁཱན་ཁེ་པ་ ལེག་པུ་ཨ་ཉི་མ་སེ༌ལ།

¹⁴ དག་པ་ཀབ་ཉི་ ལྟོ་ཤོ་ ཕུག་ཁཱན་བ་ཀ་དེན་གེ་གི༌ལ། ཉི་རོག་ཏེ་བ་ཀི་ དཀོན་མཆོག་ག་གསུང་གེ་ ཤོ་ཝ་དང་ཏུ་ཉི་ ཨ་ཉི་རང་ཆོ་ཝ་ཨ་དེན་གེ་ ལེག་པུ་དང་མ་ལེག་པ་ག་ ཁྱད་པར་པག་པེ་རེ༌བེ།