ཧི་བུརུ། 4 - Tshangla New Testament (BSI)

¹ ཨོ་ཉི་ཨ་དེན་གེ་ དཀོན་མཆོག་གི་ ཤོང་ལ་ལེ་གནང་ཁཱན་ག་ནང་ཀ་ ནུ་ཕེ་ག་དབུ་མནའ་བཞེས་ཁཱན་ཁེ་པ་ ཆོ་ལེ་ནང་ཀེ་རང་ ནའི་ཐུར་བུ་ ནང་ཀ་མ་ནུ་ཕཱན་ མ་ལུས་པེ་དེན་གེ་ ཨ་ཧ་བ་ རིག་པ་སྒྲིམ་ཉི་ཆོ་ཁེ།

² ཧང་ཡ་དག་ནེ་ལ་ རོག་ཏེ་བ་ཀི་ ན་ཐ་ཝ་པུརུས་ཀིན་ཨ་ཉི་ ཨ་ཤི་བུ་ འཐེན་ལེག་པུ་ ན་ཐ་ཝ༌ཅ། རོག་ཏེ་བ་ཀི་ གསུང་ན་ཐ་ནེ་བུ་ དད་པ་མ་ཨ་ཝ་ཨ་དེན་གེ་ ཧང་རང་ཕཱན་མ་ཏོག་ཅི།

³ ཧང་ཡ་དག་ནེ་ལ་ ཨའི་དད་པ་ཨ་ཁཱན་བ་ཀི་ཤ་ རོ་ཀ་ཤོང་ལ་ལེ་ག་ ས་ཆ་ནང་ཀ་ནུ་ཕེ་རེ༌བེ། དཀོན་མཆོག་གི་ ཨོ་ཐེན་གསུངས་མ་ཅ་ ཇང་རོ་ཙིག་པ་ཨ་དེན་གེ་ ན་ཟ་ཉི་ རོག་ཏེ་བ་ཀི་ ཧ་ལ་རང་ ཇ་ག་ཤོང་ལ་ཁཱན་ས་ཆ་ག་ མ་ནུ་ཕ་ དག༌ཉི། འཛམ་གླིང་བཀོད་པེ་གང་ཀ་རང་ རོ་ཀ་ལའི་ཁེ་པ་ ཆུམ་ཐཱན་རང་གི་ནེ་བུ་ རོ་ཀི་ཨོ་ཐེན་གསུངས་མ༌ལ།

⁴ ཧང་ཡ་དག་ནེ་ལ་ ནོང་ཟུམ་ག་ནོང་ཀ་ཀོར་གེ་ དཀོན་མཆོག་གི་ གསུངས་མ་ཅ་ ནོང་ཟུམ་ག་ནོང་ཀ་ དཀོན་མཆོག་གི་ རོ་ཀ་ལའི་ཐམས་ཅན་གེ་ ཤོང་ལ་ཉི་བཞུགས་པ་དག༌ཉི།

⁵ དག་པ་ཀབ་ཉི་ བཱརའ་རིམ་པང་ནང་ཀ་ དཀོན་མཆོག་གི་ གསུངས་མ་ཅ་ རོག་ཏེ་བ་ ཧ་ལ་རང་ ཇ་ག་ཤོང་ལ་ཁཱན་ ས་ཆ་ནང་ཀ་མ་ནུ་ཕ་དག༌ཉི།

⁶ གོ་དང་པ་ འཐེན་ལེག་པུ་ན་ཐ་ཁཱན་བ་ཀི་ བཀའ་ག་ཆ་གནས་ མ་ཐ་ཝ་ཨ་དེན་གེ་ དཀོན་མཆོག་ག་ ཤོང་ལ་ཁཱན་ས་ཆ་ནང་ཀ་ ནུ་ཕེ་མར་ཤི། ཨོ་ཉི་ཨ་དེན་གེ་ བཱརའ་སོ་ངོ་བ་ ནུ་ཕེ་ག་དེན་གེ་ ཤོང་ལ་ཁཱན་ས་ཆ་ ཨོ་མ་བུ༌ཅ།

⁷ ཨོ་ཉ་ཤོང་ལ་ཁཱན་ ས་ཆ་ག་ནུ་ཕེ་དེན་གེ་ དཀོན་མཆོག་གི་ བཱརའ་དུས་ཙུན་ཐུར་ ཀག་ཉི་གནང་མ༌ཅ། ཉི་ཨོ་ཉ་དུས་ཙུན་ཤོ་ ཐི་ནོང་གི༌ལ། ཨོ་ཐ་ཀོར་གེ་ ཉིང་མང་པུ་ཐུར་ག་ཚི་ངེ་ ད་ཝུད་ག་ཐུང་ཀེ་ཨ༌ཉི་ གསུངས་གནང་མ༌ཅ། ཨོ་ཐ་གསུང་རབ་ཁེ་པ་ གོ་མ་བུ་ ཨ་ཤི་ ན་ཧ་ཡེག་པ་ཆོ༌ཝ། ཐི་ནོང་ ན་ཤི་ རོ་ཀ་གསུང་སྐད་ ན་ཐ་ནེ་ལ་ ན་ཧ་ཕ་མ་བ་ཀི་ ངོ་ལོག་པ་པུརུས་ཀིན་ཨ༌ཉི་ ན་ཤི་ ན་ཧ་སེམས་ ཀག་ཏར་མ་ཅོད༌ཅོ།

⁸ ཨོ་ཉ་ཤོང་ལ་ཁཱན་ནོང་ཁེ་པ་ དཀོན་མཆོག་གི་ ཡ་ཧོ་ཤུ་ག་གནང་མ་གི་ནེ་ཏ་ ཚི་ངེ་ དག་པ་ཀབ་ཉི་ ཨོམ་ཆང་རང་ ཤོང་ལ་ཁཱན་ག་ནོང་ཀོར་གེ་ དཀོན་མཆོག་གི་ མ་གསུངས་མེ་ཆོ༌ཝ།

⁹ ཨོ་ཐེན་ཤོ་ལེ་དེན་ཐ་ཤོ་ དཀོན་མཆོག་ག་ སོ་ངོ་བ་ ཤོང་ལ་ལེ་དེན་གེ་ དུས་བཟང་ག་ནོང་ཐུར་ཅ་དག་ཉི་ གེན་ཅ་གི༌ལ།

¹⁰ ཧང་ཡ་དག་ནེ་ལ་ ཨི་བི་གི་ དཀོན་མཆོག་ག་ ཤོང་ལ་ཁཱན་ ས་ཆ་ནང་ཀ་ནུ་ཕ་ཐུར་ དཀོན་མཆོག་གི་ རོ་ཀ་ཕྱག་ལཱ་ཐམས་ཅན་གེ་ ཤོང་ལ་ཉི་ བཞུགས་པ་པུརུས་ཀིན་ཨ་ཉི་ ཨོ་ཉ་སོ་ངོ་གི་བུ་ རོ་ཀ་ལའི་ཐམས་ཅན་གེ་ ཤོང་ལ་ལེ་ཉོང༌པེ།

¹¹ ཨོ་ཉི་ཨ་དེན་གེ་ ཨོ་ཉ་ཤོང་ལ་ཁཱན་ ས་ཆ་ནང་ཀ་ ནུ་ཕེ་ཉོང་པེ་དེན་གེ་ ཨའི་ཐམས་ཅན་གི་ ཙ་དྲེག་ཀེ། ཨི་བི་གི་ བཀའ་ག་ཆ་གནས་མ་ཐ་ཁཱན་བ་ཀ་ དཔེ་གོད་པ་ཐུར་ ཨོ་ཉ་སོ་ངོ་ཁེ་པ་ རོག་ཏེ་བ་པུརུས་ཀིན་ཨ་ཉི་ རོ་ཁེ་ཇོང༌མེ།

¹² ཧང་ཡ་དག་ནེ་ལ་ དཀོན་མཆོག་ག་གསུང་ཤོ་ གསོན་པོ་དང་ དབང་ཚད་ཅན༌ཅ། ཉི་ཉ་གེ་ ཐ་གེ་རང་ ཡ་ཆོ་ཁཱན་ གི་རིང་ཐམས་ཅན་གེ་བུ་ ཚེ་བུ༌ཅ། ཨ་ཧ་སྲོག་དང་ རྣམ་ཤེས་གེ་ལེང་བོང་ཉི་ ཉི་ཨ་ཧ་ཚིག་བ་དང་ ཀང་སི་བ་ཆོ་ས་གེ་ལེང་བུ་ དཀོན་མཆོག་ག་གསུང་གི་ཅཱད༌ཅ། ཉི་སེམས་ཀི་མི་ཁཱན་བ་དང་ མི་ཐང་བ་ དཀོན་མཆོག་ག་གསུང་གི་ ཁྲིམས་ཅཱད་ཅ་གི༌ལ།

¹³ བཀོད་ཉི་ཐ་ཁཱན་བ་ཀ་པོང་ཀེ་ ཐུར་བུ་ དཀོན་མཆོག་ག་སྤྱན་གེ་ གུ་མ་མཱན༌ཅ། ཉི་རོ་ཀི་གཟིགས་པ་ཀབ་ཉི་ ཐམས་ཅན་རང་ རོ་ཀ་སྤྱན་ག་གུབ་ཀ་ དང་སང་ཀིན་ཨ་ཉི༌ཅ། ཉི་ཨོ་ཐ་ དཀོན་མཆོག་ག་ ཨ་ཤི་རྩིས་སྤྲོད་པེ་ཁེ༌ལེ༎

ཁིརིས་ཤོ་ ཨ་ཧ་བླ༌མ་གོང༌མ་གི༌ལ།

¹⁴ ཨོ་ཉི་ཨ་དེན་གེ་ ཞིང་ཁམས་ག་ཏཱན་བྱོན་ཁཱན་ དཀོན་མཆོག་ག་ སྲས་ཡི་ཤུ་ཤོ་ ཨ་ཧ་བླ་མ་གོང་མ་གི་ཝ་ཨ་དེན་གེ་ ཨ་ཤི་ ཁ་དོག་པ་དང་ཏུ་ཉི་ ཨ་ཤི་ རོ་ཀ་ཏཱན་ དད་པ་སྒྲིང་སྒྲིང་ཨ་ཉི་ཨ་ཁེ།

¹⁵ ཨོ་ཐ་བླ་མ་གོང་མ་གི་ ཨ་ཧ་ཚེ་ག་ཆོ་ཁཱན་ ཅོན་བ་ཀ་ཀོར་གེ་ ཧ་གོན༌ཅ། ཧང་ཡ་དག་ནེ་ལ་ ཨ་ཧ་ཚེ་ག་ ཇུང་མ་པུརུས་ཀིན་ཨ་ཉི་ རོ་ཀ་བུ་བར་ཆད་ཕ༌ཝ། གིན་ཐཱན་རང་གི་ནེ་བུ་ རོ་ཀི་ཧ་ལ་རང་ སྡིག་པ་མ་ཨན་ཤི།

¹⁶ ཨོ་ཉི་ཨ་དེན་གེ་ ཨ་ཧ་བ་ དོ་རི་རི་ཨ་ཉི་ ཐུགས་རྗེ་ཅན་ག་ གསེར་ཁྲི་ར་ག་ཏཱན་ཏེམ་ཀེ། ཉི་ཨ་ཧ་བ་ ཚཱས་པ་ཀབ་ཉི་ ཇ་རོ་ཨ་ཁཱན་ སྙིང་རྗེ་དང་ ཐུགས་རྗེ་ཁེ་པ་ ཨ་ཤི་ དཀོན་མཆོག་གེ་ཉོང༌པེ།