ཧི་བུརུ། 3 - Tshangla New Testament (BSI)ཡི་ཤུ་ཤོ་ མོ༌ས༌གེ་ཆི༌ལུ་གི༌ལ། 1 ཨོ་ཉི་ཨ་དེན་གེ་ དམ་པའི་ཡུང་ཟི་བ་ ན་ཧ་བ་ཤོ་ ཞིང་ཁམས་ག་ར་ཁཱན་ གི་ཝ་ཨ་དེན་གེ་ ནའི་ཤོ་ དཀོན་མཆོག་ག་གི༌ལ། ཉི་ན་ཤི་ ཡི་ཤུ་ག་ཀོར་གེ་ མི་ལེ་ཁེ༌ལེ། རོག་ཤོ་ ན་ཤི་ དཀོན་མཆོག་གི་ ཀུན་ཏི་ཁཱན་དང་ བླ་མ་གོང་མ་ཨ་ཉི་ ཁ་དོག༌ཅ། 2 དཀོན་མཆོག་ག་ཕོ་བྲང་ག་ ལའི་ཐམས་ཅན་ག་ མོ་ས་གི་ དམ་ཚིག་ཙུང་ཉི་ ཕྱག་ཞུ་ཝ་པུརུས་ཀིན་ཨ་ཉི་ རོ་ཀི་བུ་ རོག་ཀེ་ཉི་གནང་ཁཱན་ དཀོན་མཆོག་ཀབ་ཉི་ དམ་ཚིག་ཙུང་ཉི་བཞུགས༌པ། 3 ཕའི་གེ་ལག་ཉི་ ཕའི་ཅོད་ཁཱན་གི་ བསྟོད་པ་ཉོང་པེ་ ཁེ་ཝ་པུརུས་ཀིན་ཨ་ཉི་ མོ་ས་གེ་ལག་ཉི་ ཡི་ཤུ་གི་ གཟི་བརྗིད་མང་པུ་ ཉོང་པེ་ཁེ༌ལེ། 4 ཧང་ཡ་དག་ནེ་ལ་ ཕའི་ཐམས་ཅན་ག་ ཅོད་ཁཱན༌ཅ། དག་པ་ཀབ་ཉི་ དཀོན་མཆོག་ཤོ་ ཐམས་ཅན་རང་ མཛད་ཉི་གནང་ཁཱན་གི༌ལ། 5 མོ་ས་ཤོ་ དཀོན་མཆོག་ག་ གཡོག་པ་གི་ཝ་ཆོ༌ཝ། ཉི་མ་འོངས་པ་ག་ དཀོན་མཆོག་གི་ ཧང་གསུངས་མེ་གི་ལ་སྨོ་ ཨོ་ཉ་ཀོར་གེ་ སོ་ངོ་བ་ཀ་གསུངས་ཉི་ དཀོན་མཆོག་ག་ཕོ་བྲང་ག་ མོ་ས་གི་ དམ་ཚིག་ཙུང་ཉི་ཕྱག་ཞུ༌ཝ། 6 དག་པ་ཀབ་ཉི་ ཁིརིས་ཤོ་ དམ་ཚིག་ཙུང་ཁཱན་ སྲས་གི་ཝ་ཨ་དེན་གེ་ རོ་ཀི་ དཀོན་མཆོག་ག་ཕོ་བྲང་ བདག་འཛིན་ཨན་གནང་མ༌ལ། ཉི་ཨ་ཤི་རེ་ཆ་ཨ་ཁཱན་ག་ ཡོང་མ་ཁེ་ལཱན་ དཀོན་མཆོག་ག་ ལོ་དི་ནེ་ལ་ ཨ་ཧ་བ་བུ་ རོ་ཀ་ཕའི་ག་སོ་ངོ་གི༌ལ། 7 ཨོ་ཉི་ཨ་དེན་གེ་ དམ་པའི་ཐུགས་ཉིད་གི་ གསུངས་ལ་ ཐི་ནོང་ ན་ཤི་ རོ་ཀ་གསུང་སྐད་ ན་ཐ་ནེ་ལ་ 8 ས་ཏོང་པ་ནང་ཀ་ ན་ཧ་ཕ་མ་བ་ཀི་ དཀོན་མཆོག་གེ་ རྒྱུགས་ལ་ཉི་ ངོ་ལོག་པ་པུརུས་ཀིན་ཨ་ཉི་ ན་ཤི་ ན་ཧ་སེམས་ ཀག་ཏར་མ་ཅོད༌ཅོ། 9 རོག་ཏེ་བ་ཀི་ ཇ་ག་རྫུ་འཕྲུལ་བ་ ཉིང་ 40 སག་པུ་ ཐོང་ཐཱན་རང་གི་ནེ་བུ་ ས་ཏོང་པ་ནང་ཀ་ རོག་ཏེ་བ་ཀི་ ཇང་གེ་རྒྱུགས་ལ་ཉི་ ཇ་ག་ཚེ་གོད༌པ། 10 ཨོ་ཉི་ཨ་དེན་གེ་ ཇང་ཨོ་ཉ་མི་རབས་བ་ཀབ་ཉི་ རོ་ཙིག་པ་ཆོ༌ཝ། རོག་ཏེ་བ་ཀ་སེམས་ ཧ་ལ་ཨ་ནེ་བུ་ ལམ་མང་གི་ཝ་གེ་ ཇོང༌ལ། ཉི་རོག་ཏེ་བ་ཀི་ ཇ་ག་ལམ་གེ་ དང་མུ་མ་ལ་དག་ཉི་ ཇི་གི་ཡེག་ཆོ༌ཝ། 11 ཨོ་ཉི་ཨ་དེན་གེ་ ཇང་རོ་ཙིག་ཉི་ ཡེག་པ་ཆོ་ཝ་ རོག་ཏེ་བ་ཀི་ ཧ་ལ་རང་ ཇ་ག་ཤོང་ལ་ལེ་བཱརང་ཀ་ ནུ་ཕེ་མར་བ་ དག༌ཉི། 12 ཨོ་ཉི་ཨ་དེན་གེ་ ཇ་ག་ཡུང་ཟི་བ་ ན་ཧ་སེམས་ཁེ་པ་ སྡིག་པ་དང་ དད་པ་མ་ཁཱན་གི་ ཕུང་མེ་མ་བི་ལེ་དེན་གེ་ རིག་པ་སྒྲིམ༌ཅོ། ཨུ་ཉུ་ད་བུ་སེམས་ཀི་ གསོན་པོ་ཨ་ཉི་བཞུགས་ཁཱན་ དཀོན་མཆོག་གེ་ ལམ་རིང་མུ་ག་བུན༌ཅ། 13 དག་པ་ཀབ་ཉི་ ནའི་ཐུར་ག་བུ་ སྡིག་པ་གི་མགུ་སྐོར་ཕི་ཉི་ ལུང་ཏོང་མ་རི་ལེ་དེན་གེ་ ཐི་ནོང་དག་ཉི་ ཆིན་མ་སག་པུ་ ན་ཤི་ཐུར་དང་ཐུར་ག་ ཏ་བུ་རང་ ནོ་ཝང་ཨའི། 14 གོ་དང་པ་ དད་པ་ཨ་ལ་ཀབ་ཉི་ དཀོན་མཆོག་ག་ ལོ་དི་ཝ་པུརུས་ཀིན་ཨ་ཉི་ ཇུ་ཀ་སག་པུ་རང་ དཀོན་མཆོག་ག་ ལོ་དི་ཉི་རང་ཆོ་ནེ་ལ་ ཁིརིས་ཀབ་ཉི་ ཐམས་ཅན་རང་ ཨ་ཤི་བོང་མེ་རེ༌བེ། 15 གསུང་རབ་གེ་ ཨོ་ཐེན་ཤོ༌ན་ ཐི་ནོང་ ན་ཤི་ རོ་ཀ་གསུང་སྐད་ ན་ཐ་ནེ་ལ་ ན་ཧ་ཕ་མ་བ་ཀི་ ངོ་ལོག་པ་པུརུས་ཀིན་ཨ་ཉི་ ན་ཤི་ ན་ཧ་སེམས་ ཀག་ཏར་མ་ཅོད་ཅོ་ དག༌ཉི། 16 ན་ཐཱན་ཐཱན་རང་གི་ནེ་བུ་ ངོ་ལོག་ཁཱན་བ་ ཨི་བི་གི་ཝ་ཆོ་ཝ་ཡ། རོག་ཏེ་བ་ ཐམས་ཅན་རང་ མོ་ས་གི་ ཨི་ཇིབ་གེ་ཕིས་ཀ་ རིག་བུ་ཁཱན་བ་ མང་གི་ཝ་ཆོ་ཝ་སྨོ། 17 ཉི་ཉིང་ 40 སག་པུ་ དཀོན་མཆོག་ ཨི་བི་ཀབ་ཉི་ དགོངསམ་ཁྲེལ་པ་ཆོ་ཝ་ཡ། ཧང་སྡིག་པ་ཨ་ཉི་ ས་ཏོང་པ་ནང་ཀ་ ཤི་ཁཱན་བ་ཀབ་ཉི་ མང་གི་སྨོ། 18 ན་ཤི་ ཇ་ག་ཤོང་ལ་ཁཱན་བཱརང་ཀ་ ཧ་ལ་རང་མ་ནུ་ཕ་དག་ཉི་ དཀོན་མཆོག་གི་ དབུ་མནའ་བཞེས་ཁཱན་ཁེ་པ་ བཀའ་ག་ཆ་གནས་ མ་ཐ་ཁཱན་བ་ཀབ་ཉི་ བཞེས་ཝ་མང་གི་ནེ་ལ་ བཱརའ་ཨི་བི་ཀབ་ཉི་ བཞེས་ཝ་གི་ལ་ཡ། 19 ཨོ་ཐེན་ཨ་ཉི་ རོག་ཏེ་བ་ཀི་ དད་པ་མ་ཨ་ཝ་ཨ་དེན་གེ་ ས་ཆ་ནང་ཀ་ ནུ་ཕེ་མར་བ་གི་ལ་དག་ཉི་ ཨ་ཤི་སེན༌ཅ། |