ཧི་བུརུ། 2 - Tshangla New Testament (BSI)

ཐར་པ་ཆི་ལུ།

¹ ཨོ་ཉི་ཨ་དེན་གེ་ ཨ་ཧ་བ་ ད་ཟེ་རེ་ད་ཟེ་རེ་ཨ་ཉི་ ཕག་ཉི་མ་བུ་ལེ་དེན་གེ་ ཨ་ཤི་ ན་ཐ་ཁཱན་བ་ རིག་པ་སྒྲིམ་ཉི་ ཉཱན་པེ་ཁེ༌ལེ།

² ཧང་ཡ་དག་ནེ་ལ་ ཞིང་ཁམས་ག་འཐེན་པ་བ་ཀ་ ཐུང་ཀེ་ཨ་ཉི་གནང་ཁཱན་ གསུང་ཁེ་པ་ དེན་པ་གི་ཝ་ཆོ༌ཝ། བཀའ་ཁྲིམས་གེ་ ཤོ་ཝ་དང་ཏུ་ཉི་ མ་ཨ་ཁཱན་དང་ ཆ་གནས་མ་ཐ་ཁཱན་ སོ་ངོ་ཐམས་ཅན་ག་ ཁྲིམས་ཀེན་ཆོ༌ཝ།

³ ཨ་ཤི་ཐར་པ་ཆི་ལུ་ཁེ་པ་ མ་ཞུ་ནེ་ལ་ ཨ་ཧ་བ་ཤོ་ ཧང་ཏེན་གཱན་ཐར་བེ་ཡ། ཨོ་ཐ་ཐར་པ་ཀོར་གེ་ གོ་རང་ གཙོ་བོ་གི་ གསུངས་གནང་མ་ཆོ༌ཝ། ཉི་རང་ཏེན་ག་ ན་གི་ཐ་ཁཱན་བ་ཀི་ ཏེན་ཏེན་རང་གི་ལ་དག་ཉི་ ཨ་ཧ་ཏཱན་གསུངས་མ༌ཅ།

⁴ ཉི་དཀོན་མཆོག་གི་བུ་ ཨོ་ཐ་ཀོར་གེ་ འཛོམས་དཔང་ཨ་ཉི་ རྟགས་མཚན་བ་དང་ ཡིད་ཆི་ཝ་ག་ལའི་བ་ ཉི་རྫུ་འཕྲུལ་མ་འདྲ་ཝ་བ་ མཛད་ཉི་གནང་མ༌ཅ། ཉི་ཨུ་ཉུ་མ་ཚཱད་པ་ དམ་པའི་ཐུགས་ཉིད་ག་ སེ་རབ་བ་ རོ་ཀ་ཐུགས་བཞེད་དང་ཏུ་ཉི་ བོང་གནང་མ༌ཅ༎

ཡི་ཤུ་ ཨ་ཧ་ཐར༌པ་གནང༌ཁཱན་གི༌ལ།

⁵ ཨ་ཤི་ཆཱས་ཨ་ཁཱན་ མ་འོངས་པ་ག་ འཛམ་གླིང་སིང་མ་ཁེ་པ་ ཞིང་ཁམས་ག་འཐེན་པ་བ་ཀི་ དབང་པེ་མང་གི།

⁶ ལག་ཏང་ གསུང་རབ་ནང་ཀ་ ཨོ་གེ་སྨོ་ ཨོ་ཐེན་ཤོན་ཅ་ སོ་ངོ་ཤོ་ ཨི་བི་གི་ལ་ཡ། ཉི་སོ་ངོ་ག་ཟ་ཤོ་ ཨི་བི་གི་ལ་ཡ། ནཱན་གི་ རོ་ཀ་དེན་གེ་ ཐུགས་བསམ་བཞེས་ཉི་གནང༌ལ།

⁷ ནཱན་གི་ རོག་རེབ་ཀིན་ཐུར་ག་དེན་གེ་ ཞིང་ཁམས་ག་འཐེན་པ་བ་ཀེ་ ད་སུར་ཤ་ ཟེ་མུ་ཅོད་ཉི་གནང༌མ། ཉི་ནཱན་གི་ རོག་གཟི་བརྗིད་ཅན་དང་ གུས་ཞབས་ཨ་ལེ་རུང་པ་ ཅོད་ཉི་གནང༌མ།

⁸ ཉི་ཐམས་ཅན་རང་ རོ་ཀ་ཞབས་ཕརའ་ཁ་ ཙུག་ཉི་གནང་མ་དག༌ཉི། ཉི་ཨོམ་ ཐམས་ཅན་རང་དག་ཉི་ གསུངས་མེ་དེན་ཐ་ཤོ་ རོ་ཀ་ཕརའ་ཁེ་མ་ཁཱན་ ཧང་རང་མཱན༌ཅ། ཨོ་ཉེ་རང་གི་ནེ་བུ་ ཨོ་མ་ཤོ་ ཐམས་ཅན་རང་ རོ་ཀ་ཕརའ་ཁེ་ཆོ་ཝ་ག་ ཨ་ཤི་མ་ཐོང་མ་དག༌ཉི།

⁹ དག་པ་ཀབ་ཉི་ རེབ་ཀིན་ཐུར་ག་དེན་གེ་ ཞིང་ཁམས་ག་འཐེན་པ་བ་ཀེ་ ཟེ་མུ་ཅོད་ཁཱན་ ཡི་ཤུ་ཁེ་པ་ ཨ་ཤི་མཇལ༌ཅ། དཀོན་མཆོག་གི་ ཨ་ཧ་ཐུགས་རྗེ་གཟིགས་ཉི་ རོག་ཐམས་ཅན་ག་དེན་གེ་ གཤགས་པ་གི༌ལ། ཉི་ཨོམ་ རོག་ནང་དོག་ཉི་ གཤགས་པ་ཨ་དེན་གེ་ དཀོན་མཆོག་གི་ རོག་གཟི་བརྗིད་ཅན་དང་ གུས་ཞབས་ཨ་ལེ་རུང་པ་ ཅོད་ཉི་གནང༌མ།

¹⁰ ཐམས་ཅན་རང་ བཀོད་ཁཱན་དང་ རོག་ཏེན་ག་དེན་གེ་ བཀོད་ཁཱན་ དཀོན་མཆོག་གི་ སྲས་སྲས་མོ་བ་ མང་པུ་ཐུར་ གཟི་བརྗིད་ནང་ཀ་ ཕ་ལེ་དེན་གེ་ ཡི་ཤུ་དཀའ་ཝ་ཅཱད་པེ་བི་ཉི་ ཚང་པ་ཨ་ཉི་ ལྕོགས་གྲུབ་ཆོ་ཝ་ཅོད་གནང་མ༌ལ། ཉི་དཀོན་མཆོག་ཐུར་གི་ཤ་ ཨུ་ཉུ་ད་བུ་ མཛད་པེ་དེན༌མེ། ཧང་ཡ་དག་ནེ་ལ་ ཡི་ཤུ་ཤོ་ སོ་ངོ་བ་ཀ་ ཐར་པ་གནང་ཁཱན་གི༌ལ།

¹¹ ཉི་ཨོམ་ ཡི་ཤུ་དང་ རོ་ཀི་དམ་པ་ཅོད་ཉི་ གནང་ཁཱན་བ་ཀ་ ཡབ་ཐུར་རི་ཝ༌ཅ། ཨོ་ཉི་ཨ་དེན་གེ་ ངི་ནང་མ་ཁུ་ལཱན་ ཡི་ཤུ་གི་ རོག་ཏེ་བ་ཀ་ ཀོ་ཏ་ཨུ་ས་དག་ཉི་ རཱན་གནང་མ༌ཅ།

¹² ཧང་ཡ་དག་ནེ་ལ་ རོ་ཀི་ དཀོན་མཆོག་ག་ཞུ་ཝ་ཅ་ ན་ག་མཚན་ག་ཀོར་གེ་ ཇི་གི་ཇ་ག་ ཀོ་ཏ་ཨུ་ས་བ་ཀ་ཀཱད༌པེ། ཉི་ན་ག་སོ་ངོ་ ཐམས་ཅན་ག་པོང་ཀ་ ཇི་གི་ ན་ག་བསྟོད་པ་ཕུལ་བེ་ དག༌ཉི།

¹³ རོ་ཀི་ ཨོ་ཐེན་བུ་ཞུ་ཝ་ཅ་ ཇི་གི་ ན་ག་ལོ་དི་ལེ་ དག༌ཉི། ཉི་ཨོམ་ཆང་རང་ རོ་ཀི་ཞུ་ཝ་ཅ་ དཀོན་མཆོག་གི་གནང་ཁཱན་ ཝག་ཙ་བ་དང་ ཇང་ཐ་ག་ཅ་ དག༌ཉི།

¹⁴ དཀོན་མཆོག་ག་ སྲས་སྲས་མོ་བ་ ཤ་དང་ཞི་གི་བཀོད་པ་ག་ སོ་ངོ་གི་ཝ་ཨ་དེན་གེ་ ཡི་ཤུ་བུ་ རོག་ཏེ་བ་ད་བུ་ཨ་ཉི་རང་ སོ་ངོ་རི་ཉི་བྱོན༌མ། ཧང་ཡ་དག་ནེ་ལ་ རོག་གཤགས་ཉི་ ཤི་སྲོག་ག་སྟོབས་དབང་ཆོ་ཁཱན་ བདུད་ཁེ་པ་ མེ་པ་ཕི་ལེ་དེན་གེ་གི་ཝ༌ལ།

¹⁵ ཨོ་ཐེན་ཨ་ཉི་ ཤི་སྲོག་གེ་ཡོང་ཁེ་ཉི་ མི་ཚེ་ཐུར་ག་ ཟ་པ་རིན་ཆོ་ཁཱན་སོ་ངོ་བ་ ཚེ་ཐར་ཐར་བེ་དེན་གེ་གི་ཝ༌ལ།

¹⁶ ཡི་ཤུ་ཤོ་ ཞིང་ཁམས་ག་འཐེན་པ་བ་ མང་གི་ཝ་ ཨ་བཱརའ་ཧམ་ག་ མི་རྒྱུད་བ་ཀ་ སྐྱབས་གཟིགས་པེ་དེན་གེ་ བྱོན་མ་གི་ལ་དག་ཉི་ ཨའི་ཐམས་ཅན་གི་སེན༌ཅ།

¹⁷ རོག་ཁེ་པ་ དཀོན་མཆོག་ག་ སྐུན་མདུན་ག་ དམ་ཚིག་ཙུང་ཁཱན་དང་ སྙིང་རྗེ་ཨ་ཁཱན་ བླ་མ་གོང་མ་རི་ཉི་ སོ་ངོ་བ་ཀ་སྡིག་པ་ག་ གཤགས་པ་ཉོང་པེ་དེན་གེ་ རོ་ཀི་མཆོད་པ་ཕུལ་བེ་ གི་ཝ་ཨ་དེན་གེ་ རོག་ཤོ་ ཧང་གེ་ཨ་ནེ་བུ་ རོ་ཀ་ཡུང་ཟི་བ་ད་བུ་ ཨོ་ཕེ་ཁེ་ཝ་ག་ ཁག་ཆི་ལུ་ཆོ༌ཝ།

¹⁸ བར་ཆད་ཇུང་མ་ཀབ་ཉི་ རོག་རོག་ཏེན་བུ་ དཀའ་ཝ་ཅཱད་པ་ཨ་དེན་གེ་ བཱརའ་སོ་ངོ་བ་ཀ་ བར་ཆད་ཇུང་མ་ཀབ་ཉི་བུ་ རོ་ཀི་ཇ་རོ་ཨ་ཉི་གནང་མེ་རེ༌བེ༎