ཧི་བུརུ། 13 - Tshangla New Testament (BSI)

ཆཱས་མཇུག་དུས།

¹ ཡུང་ཟི་ནང་དོ་ གི་ཝ་ཨ་དེན་གེ་ ཐུར་གི་ཐུར་ག་ སྙིང་རྗེ་ཨ་ཉི་རང་ཆོའི།

² ཤི་མིན་བ་ཀ་ ཁབ་ཟང་ཨའི། ཧང་ཡ་དག་ནེ་ལ་ སོ་ངོ་ཚེ་བང་གི་ མ་སེ་ལཱན་ ཞིང་ཁམས་ག་འཐེན་པ་བ་བུ་ རང་ཏེན་ག་ཕའི་ག་ ཞུ་ཝ༌ཅ།

³ ན་ཧ་བ་བུ་ བཙོན་ག་ཁེ་ཝ་པུརུས་ཀིན་ཨ་ཉི་ བཙོན་ག་ཆོ་ཁཱན་སོ་ངོ་བ་ ཡིད་ཀ་ཨའི། ཉི་ན་ཧ་བ་ ནང་དོག་པ་པུརུས་ཀིན་ཨ་ཉི་ བཱརའ་ནང་དོག་ཁཱན་སོ་ངོ་བ་ ཡིད་ཀ་ཨའི།

⁴ སོ་ངོ་ཐམས་ཅན་གི་ གཉེན་གྲོགས་ག་ གུས་ཞབས་ཨ་ལེ་ཁེ༌ལེ། ཉི་ཕེ་ཝག་ཙ་དང་ མེ་ཝག་ཙ་ག་བར་ཀ་ དམ་ཚིག་ཨོ་ཕེ་ཁེ༌ལེ། ཧང་ཡ་དག་ནེ་ལ་ ལུས་འབྲེལ་མ་ཙང་མ་ ཨ་ཁཱན་བ་དང་ བཱརའ་ཀབ་ཉི་ ལུས་འབྲེལ་ཨ་ཁཱན་བ་ཀ་ དཀོན་མཆོག་གི་ ཁྲིམས་ཀེ་ཉི་གནང༌མེ།

⁵ ན་ཤི་ ཧ་ལ་རང་གི་ནེ་བུ་ ཏི་རུ་ག་བག་ཆགས་མ་ཨའི། ཉི་ན་ཧ་ཆོ་ཁཱན་ཀབ་ཉི་ ཤོ་ནང་ཕེ་ཉི་ཆོའི། ཧང་ཡ་དག་ནེ་ལ་ དཀོན་མཆོག་གི་ གསུངས་མ་ཅ་ ཇི་གི་ ནཱན་ཧ་ལ་རང་ ཐུབ་མ་ཐ༌ལ། ཉི་ཧ་ལ་རང་ མ་སྤང་མ་ དག༌ཉི།

⁶ ཨོ་ཉི་ཨ་དེན་གེ་ ལོ་དེ་ཏོག་ཏོ་ཨ་ཉི་ ཡེག་པེ་རེ་བེ་ གཙོ་བོ་ཤོ་ ཇ་ག་རུམ་ཁཱན་ གི་ཝ་ཨ་དེན་གེ་ ཇང་ཡོང་མ་ཁེ༌ལ། ཉི་སོ་ངོ་གི་ ཇ་ག་ཏཱན་ ཧང་ཨ་ལེ་ཡ་ དག༌ཉི།

⁷ གོ་མ་ དཀོན་མཆོག་ག་ གསུང་ཡེ་ཉི་གནང་ཁཱན་ ན་ཧ་འགོ་དཔོན་བ་ ཡིད་ཀ་ཨའི། རོག་ཏེ་བ་ཀ་ ཚེ་ག་ཀོར་གེ་མི་ཉི་ རོག་ཏེ་བ་ཀ་ དད་པ་ག་དཔེ་གོད༌ཅོ།

⁸ ཨི་ཉིང་ ཐི་ནོང་དང་ ཏ་བུ་ན་བུ་རང་ ཡི་ཤུ་ཁིརིས་ ཧ་ལ་རང་མ་འགྱུར༌བ།

⁹ ཨོ་ཉི་ཨ་དེན་གེ་ མ་འདྲ་ཝ་དང་ ཡིད་ཆི་ཝ་ཨ་ཉི་ ཡེ་ལ་ཀབ་ཉི་ ན་ཧ་བ་ ཡོང་བ་ཅོད་པེ་མ་བི། ན་ཧ་སེམས་ཤོ་ ལྟོ་ག་ལམ་ལུགས་ག་ཏུ་ཉི་ མང་གི་ཝ་ དཀོན་མཆོག་ག་ ཐུགས་རྗེ་གི་ཨ་ཉི་ ཤུག་ཅཱན་ཅོད་པེ་ཁེ༌ལེ། ཧང་ཡ་དག་ནེ་ལ་ ལྟོ་ག་ལམ་ལུགས་དང་ཏུ་ཉི་ ཨ་ལ་ཀབ་ཉི་ ཧང་རང་ཕཱན་མུ་མཱན༌ཅ།

¹⁰ འཛམ་གླིང་ག་གུར་ཁང་ནང་ཀ་ ཕྱག་ཞུ་ཁཱན་ བླ་མ་བ་ཀི་ཆང་ ཨ་ཧ་མཆོད་གཤམ་གེ་ བཞེས་ལེ་མ་ཆོག༌པ།

¹¹ བླ་མ་གོང་མ་གི་སྡིག་པ་ག་མཆོད་པ་ཕུལ་བེ་དེན་གེ་ སེམས་ཅན་ག་ཞི་ དམ་པའི་མགོན་ཁང་ནང་ཀ་ཏཱན་ ཕཱན་ཆོ༌ཝ། དག་པ་ཀབ་ཉི་ སེམས་ཅན་ག་ ཕུང་པུ་ཤོ་ ཀེམ་གེ་ཕིས་ཀ་བུན་ཐཱན་ གོག་ཉི་གེ་མ༌ལ།

¹² ཨོ་ཐེན་ཨ་ཉི་ ཡི་ཤུ་བུ་ རོ་ཀ་སྐུ་ཁྲག་ག་ཐུང་ཀེ་ཨ་ཉི་ སོ་ངོ་བ་ དམ་པ་ཅོད་པེ་དེན་གེ་ ཁྲོམ་ཆེན་ག་ མ་ཀོ་གེ་ཕིས་ཀ་གཤགས་པ༌ལ།

¹³ ཨོ་ཉི་ཨ་དེན་གེ་ ཨ་ཧ་བ་བུ་ ཀེམ་གེ་ཕིས་ཀ་ རོག་བཞུགས་ས་ག་དིན་ཐཱན་ རོ་ཀ་མེམ་ཅོར་བ་ པུརུས་ཀིན་ཨ་ཉི་ ཨ་ཧ་བུ་ མེམ་ཅོར་བེ་བི་ཁེ།

¹⁴ ཧང་ཡ་དག་ནེ་ལ་ ཨོ་ཐ་འཛམ་གླིང་ག་ ཨ་ཧ་དེན་གེ་ ཏ་བུ་ག་ཁྲོམ་ཆེན་མཱན༌ཅ། དག་པ་ཀབ་ཉི་ ཨ་ཧ་བ་མ་འོངས་པ་ག་ ཁྲོམ་ཆེན་ག་དེན་གེ་ ནོང་མ༌ཅ།

¹⁵ ཡི་ཤུ་ག་ཐུང་ཀེ་ཨ་ཉི་ ཨ་ཤི་མ་ཆཱད་པ་ཨ་ཉི་རང་ ཨ་ཧ་ནོ་ཝང་གི་ རོ་ཀ་མཚན་ཞུ་ཉི་ བསྟོད་པ་ག་མཆོད་པ་ དཀོན་མཆོག་ག་ཏཱན་ཕུལ་ཁེ།

¹⁶ ལེག་པུ་ཨ་ལེ་ག་ ཡིད་ཀ་མ་མི། ཉི་མ་ཁཱན་བ་ཀབ་ཉི་ ན་ཧ་ཆོ་ཁཱན་ཁེ་པ་ བོང་ཉི་བི། ཨུ་ཉུ་ད་བུ་ཨ་ཁཱན་བ་ཤོ་ དཀོན་མཆོག་ཐུགས་བཞེས་ཁཱན་ མཆོད་པ་གི༌ལ།

¹⁷ ན་ཧ་ཐུགས་ཉིད་ག་ འགོ་དཔོན་བ་ཀ་ ཆ་གནས་ཐའི། ཉི་རོག་ཏེ་བ་ཀི་ ཡེག་པ་ཀབ་ཉི་ཉཱན༌ཅོ། ཧང་ཡ་དག་ནེ་ལ་ རོག་ཏེ་བ་ཀི་ དཀོན་མཆོག་ག་ རྩིས་ཕུལ་བེ་ཁེ་ལེ་དག་ཉི་སེ་ཉི་ ན་ཧ་སྲོག་ག་ བདག་འཛིན་ཨན་ཅ་གི༌ལ། ན་ཤི་ རོག་ཏེ་བ་ཀ་ཉཱན་ཐ་ནེ་ལ་ རོག་ཏེ་བ་ ཤོ་ནང་ཕེ་ཉི་ལའི་ཨ༌ལེ། རོག་ཏེ་བ་ ཁོ་དང་ཆཱད་པེ་བི་ནེ་ལ་ ན་ཧ་བ་ ཧང་རང་མ་ཕཱན༌མ།

¹⁸ ཨ་ཧ་དེན་གེ་ སྨོན་ལམ་ཏབ༌ཅོ། ཨ་ཤི་ཧ་ལ་ཨ་ནེ་བུ་ ལའི་ལེག་པུ་ཤ་ ཨ་ལེ་ག་མིག་པ་ ཕི་ཝ་ཨ་དེན་གེ་ ཨ་ཧ་སེམས་མི་ཐང་ཁེ་པ་ ཙང་མ་རང་ཅ་དག་ཉི་ ཨ་ཤི་སེན༌ཅ།

¹⁹ ཉི་ཙོ་རང་ ཇ་ག་དེན་གེ་ སྨོན་ལམ་ཏབ་ཅོ་དག་ཉི་ ཇི་གི་ ན་ཧ་ཡེག༌ཅ། ཧང་ཡ་དག་ནེ་ལ་ ཇང་ན་ཧ་བཱརང་ཀ་ ཨོ་ཕེ་རེ་ཆེན།

²⁰ ཉི་ཨོམ་ ཨ་ཧ་གཙོ་བོ་ཡི་ཤུ་ གཤགས་པ་གེ་ལོག་ཉི་ བཞེངས་གནང་ཁཱན་ དཀོན་མཆོག་ཤོ་ སྐྱིད་པུ་ག་ དཀོན་མཆོག་གི༌ལ། ཉི་ཡི་ཤུ་ཤོ་ ཤི་ཤ་བ་ཀ་ ཤི་ཤ་དི་པ་ཆི་ལུ་གི༌ལ། རོ་ཀ་སྐུ་ཁྲག་ག་ཐུང་ཀེ་ཨ་ཉི་ མ་འགྱུར་བརྟན་པ་ག་ འགན་རྒྱ་ཅོད་ཉི་གནང་མ༌ཅ།

²¹ ཉི་རོ་ཀ་ཐུགས་དང་ཏུ་ཉི་ ཨ་ལེ་དེན་གེ་ ཚཱས་ཁཱན་ ཐམས་ཅན་རང་ རོ་ཀི་ ན་ཧ་གནང་ཆེན། ཉི་ཡི་ཤུ་ཁིརིས་ག་ སྟོབས་དབང་ག་ཐུང་ཀེ་ཨ་ཉི་ རོ་ཀི་ ན་ཧ་བ་ རོ་ཀ་ཐུགས་ཀ་ ཚུད་པ་ཅོད་ཉི་གནང་ཆེན། ཉི་ཧ་ལ་ཨ་ནེ་བུ་ དུས་ཏ་བུ་རང་ ཁིརིས་ག་ཏཱན་ གཟི་བརྗིད་ཕུལ་ཤོ། ཨ་མེན།

²² ཇ་ག་ཡུང་ཟི་བ་ ཇ་ག་ ཨོ་ཐ་ཡི་གུ་ཟེ་མུ་ནང་ཀ་ ཇི་གི་ ན་ཧ་ཡེག་ཁཱན་བ་ སེམས་ཀ་ཐའི་དག་ཉི་ ཇི་གི་ན་ཧ་ཡེག༌ཅ།

²³ ཨ་ཧ་ཀོ་ཏ་ཏི་མོ་ཐི་ བཙོན་གེ་ཐར་བ་ཅ་དག་ཉི་ ཇི་གི་ ན་ཧ་ཡེག་པེ་ག་ སེམས་ཨ་ཝ༌ཅ། རོག་ཐ་ག་དོ་ཟོ་རང་ ཤེག་པ་ད་བུ་ཨ་ནེ་ལ་ ཇི་གི་རོག་བུ་ ན་ཧ་བ་རུ་མེ་ག་ རིག་ཉི་ཕ༌ལེ།

²⁴ ན་ཧ་འགོ་དཔོན་དང་ དཀོན་མཆོག་ག་ སོ་ངོ་ཐམས་ཅན་ག་ སྐུ་གཟུགས་བཟང་པོ་དག་ཉི་ཡེག༌ཅོ། ཨི་ཏྲ་ལི་ག་ཆོ་ཁཱན་ དད་པ་ཨ་ཁཱན་བ་ཀི་བུ་ ན་ཧ་ཏཱན་ སྐུ་གཟུགས་བཟང་པོ་དག་ཉི་ཡེག༌ལ།

²⁵ དཀོན་མཆོག་ག་ཐུགས་རྗེ་ ནའི་ཐམས་ཅན་ཀབ་ཉི་རང་ བཞུགས་ཉི་གནང་ཆེན། ཨ་མེན༎