ཧི་བུརུ། 12 - Tshangla New Testament (BSI)

དཀོན་མཆོག༌གི་ རོ༌ཀ་སྲས་སྒྲིགས༌ཀ་ཙུག༌ཅ།

¹ ཨོ་ཉི་ཨ་དེན་གེ་ ཨ་ཧ་བ་ཤོ་ འཛོམས་དཔང་ཨ་ཁཱན་བ་ཀ་ མུག་པ་ཆི་ལུ་གི་ ཉ་གེ་ཐ་གེ་ ལོ་མ་ཨ་དེན་གེ་ ཏོག་ཁཱན་ཐམས་ཅན་རང་ གེམ་ཀུན་ཏི་ཁེ། ཙོ་རང་ ཨ་ཧ་བ་ ཡ་ལུ་ཨ་ཉི་ཐིག་ཁཱན་ སྡིག་པ་ཁེ་པ་སྤང་ཁེ། ཉི་ཨ་ཧ་གུབ་ཀ་ ཇུག་པེ་ཁེ་ཁཱན་ཁེ་པ་ ཙ་དྲེག་ཉི་ཇུག་ཁེ།

² ཨ་ཧ་མིང་ཁེ་པ་ ཡི་ཤུ་ག་ཏཱན་རང་ གོད་པེ་ཁེ༌ལེ། ཨ་ཧ་དད་པ་ཁེ་པ་ གོ་ཙུག་པ་གེ་ ཇུ་ཀ་སག་པུ་རང་ རོ་ཀ་ཏེན་ཅ་གི༌ལ། རོ་ཀི་ རོ་ཀ་གུབ་ཀ་ཐ་ཁཱན་ སྐྱིད་པུ་ག་ཡོར་ཀེ་ ཁྲིམས་ཤིང་ཐུང་ཀ་ ངི་ནང་ཁུ་སི་སི་ཨ་ཉི་གཤགས༌པ། ཉི་ཨོམ་ རོག་དཀོན་མཆོག་ག་ ལ་ཉོང་ལོ་ཀ་ཁྲི་ག་ བཞུགས་པ༌ཅ།

³ སྡིག་པ་གི་ཕུང་ཁཱན་ སོ་ངོ་བ་ཀི་ རོ་ཀ་མ་ལེག་པ་ཨ་ལ་ཀབ་ཉི་ རོ་ཀི་ ཨོ་ཉ་བ་ ཐམས་ཅན་རང་ ཧང་ཏེན་ཐེས་པ་གི་ལ་སྨོ་ མིན་གོད༌ཅོ། ཨོ་ཉི་ཨ་དེན་གེ་ ན་ཧ་བ་དབུགས་འགམ་ཉི་ སེམས་མ་ཤི།

⁴ ཧང་ཡ་དག་ནེ་ལ་ ན་ཤི་ སྡིག་པ་ག་དགྲ་ཨ་ཉི་ ཙ་དྲེག་ཅ་ཨ་ཉི་ ན་ཧ་ཚེ་ཏ་ བི་ལེ་མ་ཁེ་ཝ༌ཅ།

⁵ ཧང་ དཀོན་མཆོག་གི་ ན་ཧ་བ་ རོ་ཀ་སྲས་སྲས་མོ་དག་ར་ཉི་ སེམས་གསོ་ཨ་ཁཱན་ཁེ་པ་ ན་ཤི་ཡིད་ཀ་མི་ཝ་སྨོ། རོ་ཀི་གསུངས་མ་ཅ་ ཇ་ག་ཝག་ཙ་ གཙོ་བོ་གི་ ནཱན་སྒྲིགས་ཀ་ཙུག་པ་ཀབ་ཉི་ གནམ་མེད་ས་མེད་ ཡ་ལུ་ཨ་ཉི་མ་མི། ཉི་རོ་ཀི་ ཇུར་ཇང་གནང་མེ་གང་ཀ་ སེམས་མ་ཤི།

⁶ ཧང་ཡ་དག་ནེ་ལ་ རོ་ཀི་ཕང་ཁཱན་བ་ཤ་ གཙོ་བོ་གི་ སྒྲིགས་ཀ་ཙུག་ཅ་གི༌ལ། ཉི་རོ་ཀ་སྲས་སྲས་མོ་ཨ་ཉི་ ཙི་ཁཱན་ག་ རོ་ཀི་ཁྲིམས་ཀེ་ཉི་གནང་ཅ་ དག༌ཉི།

⁷ ཉི་སྒྲིགས་ཀ་ཙུག་པ་ཀབ་ཉི་ དཀའ་ཝ་ཅཱད་པེ་གང་ཀ་ ཐེས༌ཅོ། དཀོན་མཆོག་གི་ ན་ཧ་བ་ རོ་ཀ་སྲས་སྲས་མོ་ད་བུ་ཨན་ ཙི་ཉི་གནང་ཅ་གི༌ལ། ཨ་པ་གི་ སྒྲིགས་ཀ་མ་ཙུག་ཁཱན་ ཝག་ཙ་ཨོ་ག་ཅ་ཡ།

⁸ བཱརའ་ཝག་ཙ་བ་ ཐམས་ཅན་རང་ སྒྲིགས་ཀ་ཙུག་པ་ པུརུས་ཀིན་ཨ་ཉི་ ན་ཧ་བ་བུ་ སྒྲིགས་ཀ་མ་ཙུག་ནེ་ལ་ ན་ཧ་བ་ཤོ་ ཝག་ཙ་ངོ་མ་མང་གི་ཝ་ ཀོག་ཏི་བ་གི༌ལ།

⁹ ཨའི་ཐམས་ཅན་ག་ ཨ་ཧ་བ་ སྒྲིགས་ཀ་ཙུག་ཁཱན་ ཤ་དང་ཕུང་པུ་ག་ ཨ་པ༌ཅ། ཉི་ཨ་ཤི་ རོ་ཀ་གུས་ཞབས་ཨན༌ཅ། ཉི་ཐུགས་ཉིད་ག་ ཨ་པ་ག་ཏཱན་ ཨོ་ཉ་གེ་ལག་ཉི་ ཧབ་ཏུར་མང་པུ་ཨན་ ཆ་གནས་ཐ་ཉི་ ཆོ་ལེ་ཁེ་ལེ་ཡ།

¹⁰ ཨ་ཧ་ཤ་དང་ཕུང་པུ་ག་ ཨ་པ་གི་ རེབ་ཀིན་ཐུར་ག་དེན་གེ་ རོག་ཏེ་བ་ཀི་ ལེག་པུ་གི་ལ་དག་ཉི་ མི་ཝ་དང་ཏུ་ཉི་ ཨ་ཧ་བ་སྒྲིགས་ཀ་ཙུག༌ཅ། དག་པ་ཀབ་ཉི་ དཀོན་མཆོག་གི་ སྒྲིགས་ཀ་ཙུག་ཁཱན་ཤོ་ ཨ་ཧ་དེན་གེ་གི༌ལ། ཧང་ཡ་དག་ནེ་ལ་ དཀོན་མཆོག་ དམ་པ་ཆོ་ཝ་པུརུས་ཀིན་ཨ་ཉི་ ཨའི་བུ་ དམ་པ་རེ་ཆེན་ དག་པ་གི་གི༌ལ།

¹¹ སྒྲིགས་ཀ་ཙུག་པེ་གང་ཀ་ ཨི་བི་གི་རང་ ཤོ་ནང་ཕེ་ལུ་མཱན༌ཅ། སྒྲིགས་ཀ་ཙུག་པ་ཀབ་ཉི་ ནང་དོག༌ཅ། ཚི་ངེ་ དག་པ་ཀབ་ཉི་ ཨོ་ཐེན་ཨ་ཉི་ སློབ་སྦྱོང་བི་ཁཱན་བ་ཀི་ སྐྱིད་པུ་དང་ དྲང་པུ་ག་སེ་སེན༌ཅ།

¹² ཨོ་ཉི་ཨ་དེན་གེ་ ན་ཧ་ངའི་ཁཱན་ ག་དང་ཁེ་པ་ ག་དུང་ཤོ། ཉི་ཤུག་མ་ཁཱན་ ན་ཧ་ཏོང་ཟིང་ཁེ་པ་ སྒྲིང་སྒྲིང་ཅོད༌ཅོ།

¹³ ན་ཧ་བི་ག་དེན་གེ་ ལམ་ཐྲང་པུ་ཅོད༌ཅོ། ཧང་ཡ་དག་ནེ་ལ་ བི་ཞ་ཝ་ག་ ལག་ཏང་ཨ་ལེ་མང་གི་ཝ་ དྲག་ཅེན༎

དཀོན་མཆོག༌ག་ ཆ༌གནས་ཐའི།

¹⁴ སོ་ངོ་ཐམས་ཅན་ཀབ་ཉི་ སྐྱིད་པུ་དང་ དམ་པ་ཨ་ཉི་ ཆོ་ལེ་གོད༌ཅོ། ཧང་ཡ་དག་ནེ་ལ་ དམ་པ་མ་ནེ་ལ་ ཨི་བི་གི་རང་ གཙོ་བོ་མཇལ་བེ་མར༌བ།

¹⁵ དཀོན་མཆོག་ག་ ཐུགས་རྗེ་ཁེ་པ་ ཨི་བི་གི་རང་ མ་ཉོང་པ་མ་ཨ་ལེ་དེན་གེ་ ཐུར་གི་ཐུར་ག་ བདག་འཛིན་ཨའི། ཧང་ཡ་དག་ནེ་ལ་ ཤིང་ཁ་ལུ་ག་ ཙ་ད་བུ་ཨ་ཉི་ཟོག་ཐཱན་ མང་པུ་ཐུར་ག་བར་ཀ་ ཏབ་མ་ཉམ་པ་དང་ མ་ཙང་མ་ཅོད་པེ་མར་ཆེན།

¹⁶ ཨི་བི་གི་རང་གི་ནེ་བུ་ ལུས་འབྲེལ་མ་ཙང་མ་ ཨ་ལེ་མང་ཕ། ཉི་ཀེ་ཝ་ག་ཐོབ་ཐང་ཁེ་པ་ ལྟོ་ནམ་ཐུར་ག་དེན་གེ་ཙོང་ཁཱན་ ཨེ་སའུ་ད་བུ་ཨ་ཉི་ ཆོས་སེམས་མ་ཝ་མ་ཨའི།

¹⁷ ན་ཤི་སེན་ཅ་ ཚི་ངེ་ ཨེ་སའུ་གི་ གོ་སིང་ཁཱན་ག་ བྱིན་རླབས་ཞུ་ལེ་ ཅམ་པ་ཀབ་ཉི་ རོ་ཀི་མ་ཉོང་ཅི། རོ་ཀི་མིང་རི་ཤོ་ཉི་ བྱིན་རླབས་ཞུ་ལེ་གོད་ནེ་བུ་ རོ་ཀི་ཨ་ཁཱན་ག་ཀོར་གེ་ སོར་པེ་མར་ཤི།

¹⁸ ཧང་ཡ་དག་ནེ་ལ་ ན་ཧ་བ་ ཐོ་ཕེ་རེ་ཁཱན་ ཕུ་སི་ནའི་ག་ཏཱན་ ཨོ་ཕ་མཱན༌ཅ། མི་གི་དིར་ཁཱན་དང་ མུག་པ་ཆང་ལུ་ཨ་ཉི་སུབ་ཁཱན་ ཉི་ནག་དུང་དུང་དང་ རི་དི་ཆི་ལུ་

¹⁹ ཉི་དམག་དུང་ཐེད་ཁཱན་དང་ གསུང་སྐད་ཆི་ལུ་ག་ར་ག་བུ་ ཨོ་ཕ་མཱན༌ཅ། སོ་ངོ་བ་ཀི་ དཀོན་མཆོག་ག་གསུང་སྐད་ ན་ཐ་ལ་ཀབ་ཉི་ རོག་ཏེ་བ་ཀི་ཞུ་ཝ་ལ་ ཨོ་ཉ་གེ་ལག་ཉི་ མ་གསུངས་ཤོ་དག༌ཉི།

²⁰ ཧང་ཡ་དག་ནེ་ལ་ བཀའ་གནང་ཁཱན་ཁེ་པ་ རོག་ཏེ་བ་ཀི་ ཞུ་ལེ་མར་བ༌ལ། སེམས་ཅན་གི་ཆང་ ཕུ་ག་ཐོབ་ནེ་ལ་ ཨོ་ཉ་སེམས་ཅན་ཁེ་པ་ ཤེ་ལེ་ཁེ་ལེ་དག་ཉི་ བཀའ་གནང་མ་ཆོ༌ཝ།

²¹ ཡོང་ཁེ་སི་སི་ཨ་ཉི་ ཇུང་མ་ཨ་དེན་གེ་ མོ་ས་གི་གསུངས་མ་ཅ་ ཇང་ཡོང་ཁེ་ཝ་ཨ་དེན་གེ་ ཁང་ནེང་ནེང་ཨ་ཝ་ རི་ཝ་ཅ་དག༌ཉི།

²² དག་པ་ཀབ་ཉི་ ན་ཧ་བ་ཤོ་ ཕུ་སི་ཡོན་ག་ཏཱན་ ཨོ་ཕ༌ཅ། ཨུ་ཉུ་ཤོ་ གསོན་པོ་ཨ་ཉི་བཞུགས་ཁཱན་ དཀོན་མཆོག་ག་ ཁྲོམ་ཆེན་དང་ ཞིང་ཁམས་ག་ ཡ་རུ་ཤ་ལེམ་གི༌ལ། ཞིང་ཁམས་ག་འཐེན་པ་ སྟོང་ཕྲག་སྟོང་ཕྲག་ཨན་ ཤོ་ནང་ཕེ་ཉི་ ཛོམ་ས་ག་དང་

²³ ཞིང་ཁམས་ག་ མིང་འབྲི་ཉི་ཐ་ཁཱན་ གོ་སིང་ཁཱན་བ་ ཛོམ་ས་ག་ཏཱན་ ན་ཧ་བ་ ཨོ་ཕ༌ཅ། ཉི་ན་ཧ་བ་ཤོ་ དཀོན་མཆོག་ག་ སྐུན་མདུན་ག་ཏཱན་ ཨོ་ཕ༌ཅ། རོག་ཤོ་ སོ་ངོ་ཐམས་ཅན་ག་ དྲང་དཔོན་གི༌ལ། ཉི་ཅོན་ད་སུ་རང་མ་ཝ་ ཅོད་གནང་ཁཱན་ སོ་ངོ་ལེག་པུ་བ་ཀ་ རྣམ་ཤེས་བ་ཆོ་ས་ག་ཏཱན་ ཨོ་ཕ༌ཅ།

²⁴ ན་ཧ་བ་ འགན་རྒྱ་སིང་མ་ ཅོད་ཉི་གནང་ཁཱན་ ཡི་ཤུ་ག་ སྐུན་མདུན་ག་ཏཱན་ ཨོ་ཕ༌ཅ། ཉི་ཧ་བིལ་ག་ སྐུ་ཁྲག་ད་བུ་མང་གི་ཝ་ ཐུགས་རྗེ་ཅན་ཨ་ཉི་ བཀའ་དྲིན་བསྐྱང་མེ་དེན་གེ་ གསུང་གྲོས་མཛད་ཁཱན་ ཁིརིས་ག་སྐུ་ཁྲག་ ཡབ་ཁཱན་ག་ཏཱན་ ན་ཧ་བ་ ཨོ་ཕ༌ཅ།

²⁵ ཨོ་ཉི་ཨ་དེན་གེ་ དཀོན་མཆོག་གི་ ན་ཧ་ཏཱན་གསུངས་མ་ཀབ་ཉི་ ན་ཤི་ རོ་ཀ་ཆ་གནས་ཐའི། ཧང་ཡ་དག་ནེ་ལ་ ཨིས་རེལ་ག་སོ་ངོ་བ་ཀ་ རོ་ཀི་འཛམ་གླིང་ག་ གསུངས་མ་ཀབ་ཉི་ མ་ཉཱན་པ་ཨ་དེན་གེ་ རོག་ཏེ་བ་གཱན་མ་ཐར་ཤི། རོ་ཀི་ཞིང་ཁམས་གེ་ གསུངས་མ་ཀབ་ཉི་ ཨ་ཤི་མ་ཉཱན་ནེ་ཏ་ ཨ་ཧ་བ་ཤོ་ ཧང་ཏེན་གཱན་ཐར་བེ་ཡ།

²⁶ ཨུ་ཉུ་གང་ཀ་ རོ་ཀི་གསུངས་མ་ཀབ་ཉི་ འཛམ་གླིང་དྲེང་མ་ཆོ༌ཝ། དག་པ་ཀབ་ཉི་ ཇི་གི་ ཨོམ་ཆང་རང་ ཤེབ་ཐུར་ འཛམ་གླིང་ཤ་མང་གི་ཝ་ ཞིང་ཁམས་བུ་དྲེང་མེ་དག་ཉི་ རོ་ཀི་དབུ་མནའ་བཞེས་ཉི་ གསུངས་མ༌ཅ།

²⁷ ཨོམ་ཆང་རང་ ཤེབ་ཐུར་དག་ཉི་ གསུངས་མེ་དེན་ཐ་ཤོ་ བཀོད་ཉི་ཐ་ཁཱན་བ་དྲེང་ཐཱན་ ཤོ་ཉི་གེ་མེ་གི་ལ་དག་ཉི་ གེན་ཅ་གི༌ལ། ཉི་དྲེང་མེ་མར་ཁཱན་བ་ཤ་ ལུས༌པེ།

²⁸ ཨོ་ཉི་ཨ་དེན་གེ་ དྲེང་མེ་མར་ཁཱན་ རྒྱལ་སྲིད་ཁེ་པ་ ཨ་ཤི་ཉོང་པེ་གང་ ཆོ་ཝ་ཨ་དེན་གེ་ ཨ་ཤི་དཀོན་མཆོག་ག་ བཀའ་དྲིན་བསམ་ཁེ། ཉི་རོ་ཀ་གུས་ཞབས་ཨ་ཉི་ རོ་ཀེ་ཡོང་ཁེ་ཉི་ རོ་ཀ་ཐུགས་ཀ་ཚུད་པ་ཨ་ཉི་ གསོལ་ཝ་ཏབ་ཁེ།

²⁹ ཧང་ཡ་དག་ནེ་ལ་ ཨ་ཧ་དཀོན་མཆོག་ཤོ་ ཞུམ་ཁཱན་མི་གི༌ལ༎