ཧི་བུརུ། 11 - Tshangla New Testament (BSI)དད༌པ། 1 དད་པ་ཤོ་ རེ་ཆ་ཨ་ཁཱན་ཁེ་པ་ ཏེན་ཏེན་རང་ཉོང་པེ་དག་ཉི་ མི་ཁཱན་དང་ མ་ཐོང་ཁཱན་ཁེ་པ་ ཏེན་ཏེན་རང་ཅ་དག་ཉི་ སེ་ཁཱན་གི༌ལ། 2 ཧང་ཡ་དག་ནེ་ལ་ དད་པ་ག་ཐུང་ཀེ་ཨ་ཉི་ དང་པོ་ག་ སོ་ངོ་བ་ཀི་ དཀོན་མཆོག་ག་ སྤྱན་ག་ཚུད་པ་རི་ཝ་ཆོ༌ཝ། 3 དཀོན་མཆོག་གི་ བཀའ་གནང་མ་ཀབ་ཉི་ འཛམ་གླིང་ ཐམས་ཅན་རང་ བཀོད་པ་གི་ལ་དག་ཉི་ ཨ་ཤི་དད་པ་ག་ཐུང་ཀེ་ཨ་ཉི་སེན༌ཅ། ཨོ་ཐེན་ཨ་ཉི་ ཐོང་ཁཱན་ཁེ་པ་ ཐོང་མེ་མར་ཁཱན་གེ་ཨ་ཉི་ བཀོད་པ་གི༌ལ། 4 དད་པ་ཨ་ཝ་ཨ་དེན་གེ་ ཧ་བིལ་གི་ ཀ་ཡིན་གེ་ལག་ཉི་ མཆོད་པ་ལེག་པུ་ཕུལ༌བ། ཧ་བིལ་གི་ཕུལ་ཁཱན་ མཆོད་པ་ཁེ་པ་ དཀོན་མཆོག་གི་བཞེས་ཉི་ རོག་ཤོ་ དྲང་པུ་གི་ལ་དག་ཉི་ དཀོན་མཆོག་གི་ འཛོམས་དཔང་ཨ་ཉི་གནང་མ༌ཅ། རོག་གཤགས་ཐཱན་རང་གི་ནེ་བུ་ རོ་ཀ་དད་པ་གི་ ཨོ་མ་བུ་ ཨ་ཧ་ཡེན་གནང༌ཅ། 5 དད་པ་ག་ཐུང་ཀེ་ཨ་ཉི་ ཧ་ནོག་གི་ ཤི་སྲོག་མ་ཐོང་ཆེན་དག་པ་གི་ རོག་མ་གཤགས་པེ་གོ་མ་ དུང་ཉི་བསྣམས༌པ། དཀོན་མཆོག་གི་ རོག་ཞིང་ཁམས་ག་བསྣམས་པ་ཨ་དེན་གེ་ རོག་སོ་ངོ་བ་ཀི་ ཐོང་མེ་མར་ཤི། དག་པ་ཀབ་ཉི་ རོག་མ་བསྣམས་པེ་གོ་མ་ རོག་ཤོ་ དཀོན་མཆོག་ག་ ཐུགས་ཀ་ཚུད་ཁཱན་དག་ཉི་ ཆིན་མ༌ལ། 6 དད་པ་མ་ནེ་ལ་ དཀོན་མཆོག་ ཐུགས་བཞེས་ཝ་ཅོད་པེ་ ཏི་ངེ་རང་མར༌བ། ཧང་ཡ་དག་ནེ་ལ་ ཨི་བི་གི་ རོ་ཀ་སྐུན་མདུན་ག་ ཨོ་ཕ་ཐུར་ ཨོ་ཉ་སོ་ངོ་གི་ དཀོན་མཆོག་བཞུགས་པ༌ཅ། ཉི་ཚ་གྱང་བང་ཉི་ དཀོན་མཆོག་ལམ་ཁཱན་བ་ཀ་ རོ་ཀི་སེ་རབ་གནང་ཅ་དག་ཉི་ དད་པ་ཨ་ལེ་ཁེ༌ལེ། 7 དད་པ་ག་ཐུང་ཀེ་ཨ་ཉི་ ནོ་ཨ་གི་ རོ་ཀ་ཨམ་ཟ་བ་ཀ་ སྐྱབས་ཨ་ལེ་དེན་གེ་ གྲུ་ཆེན་ཅོད༌པ། གོ་མ་ ཧ་ལ་རང་ མ་ཇུང་ཁཱན་ག་ཀོར་གེ་ དཀོན་མཆོག་གི་ རོ་ཀ་གསུངས་མ་ཀབ་ཉི་ རོ་ཀི་དཀོན་མཆོག་ག་ ཆ་གནས་ཐ་ཉི་ འཛམ་གླིང་ག་ སོ་ངོ་བ་ཀ་ ན་ཤི་ངཱད་ལ་དག་ཉི་ གསུངས་མ༌ལ། ཉི་དད་པ་ག་ཐུང་ཀེ་ཨ་ཉི་ དཀོན་མཆོག་ག་སྤྱན་ག་ ནོ་ཨ་ དྲང་པུ་རི་ཝ༌ལ། 8 དཀོན་མཆོག་གི་ ཨ་བཱརའ་ཧམ་ག་ རོ་ཀ་ཕའི་ཐུབ་ཐཱན་ཐཱན་ དཀོན་མཆོག་གི་ རོ་ཀ་གནང་མེ་དག་ཉི་ དབུ་མནའ་བཞེས་ཁཱན་ ས་ཆ་ག་ཏཱན་དི་དག་ཉི་ གསུངས་མ་ཀབ་ཉི་ ཨ་བཱརའ་ཧམ་གི་ རོག་ཨོ་ག་ཏཱན་དིན་ཅ་གི་ལ་སྨོ་ མ་སེན་ཐཱན་རང་གི་ནེ་བུ་ རོ་ཀི་ དཀོན་མཆོག་ག་ དད་པ་ཨ་ཝ་ཨ་དེན་གེ་ དཀོན་མཆོག་ག་བཀའ་ག་ ཆ་གནས་ཐ༌ཝ། 9 ཉི་དཀོན་མཆོག་གི་ དབུ་མནའ་བཞེས་ཁཱན་ ས་ཆ་ག་ཕེབས་ཏེན་གེ་ ཕིས་ཀ་སོ་ངོ་གི་ནེ་བུ་ གུར་པུབ་ཐཱན་ དད་པ་ག་ཐུང་ཀེ་ཨ་ཉི་ བཞུགས་པ༌ལ། ཉི་ཨ་བཱརའ་ཧམ་ག་ དབུ་མནའ་བཞེས་ཝ་པུརུས་ཀིན་ཨ་ཉི་ གུར་པུབ་ཉི་ཆོ་ཁཱན་ ཨི་སག་དང་ ཡ་ཀུབ་ག་བུ་ དཀོན་མཆོག་གི་ དབུ་མནའ་བཞེས་ཝ་ཆོ་ཝ༌ལ། 10 ཧང་ཡ་དག་ནེ་ལ་ ཨ་བཱརའ་ཧམ་ཤོ་ མ་འགྱུར་བརྟན་པ་ག་ རྨང་ཆེ་ཁཱན་ ཁྲོམ་ཆེན་ག་དེན་གེ་ ནོང་ཉི་བཞུགས་པ་ཆོ༌ཝ། ཉི་ཨོ་ཉ་ཁྲོམ་ཆེན་ ཙམ་ཁཱན་དང་ བཞེངས་ཁཱན་ཤོ་ དཀོན་མཆོག་ རོག་ཏེན་རང་གི་ཝ༌ལ། 11 ཨ་བཱརའ་ཧམ་ ལོ་ན་གཱན་པ་ཆོ༌ཝ། ཉི་ས་ར་གི་ ཝག་ཙ་མང་ཕ་ཆོ༌ཝ། ཨོ་ཉེ་རང་གི་ནེ་བུ་ དད་པ་ག་ཐུང་ཀེ་ཨ་ཉི་ ཨ་བཱརའ་ཧམ་ ཨ་པ་རི་ལེ་རེ༌བ། དཀོན་མཆོག་གི་ དབུ་མནའ་བཞེས་ཁཱན་ཁེ་པ་ མཛད་ཉི་གནང་མེ་དག་ཉི་ རོ་ཀི་དད་པ་ཨ་ཝ་ཆོ༌ཝ། 12 མ་པ་ ཨ་བཱརའ་ཧམ་ག་ ལུས་པུ་ཤི་ཝ་ད་བུ་རང་ རིན་ཆུ་མ་ཆོ༌ཝ། ཨོ་ཉེ་རང་གི་ནེ་བུ་ རོ་ཀ་རྒྱུད་པ་ཁེ་པ་ ངབ་ཀ་སྐར་མ་སྨིན་དྲུག་དང་ མཚོ་ནེ་མ་ག་ བེ་ཙ་ད་བུ་རང་ གྱངས་ཁ་ ཙ་མ་ཆོད་པ་རི་ཝ༌ཅ། 13 ཨོ་ཐ་སོ་ངོ་བ་ ཐམས་ཅན་རང་ གཤགས་པེ་གང་ཀ་ དད་པ་ཨ་ཉི་རང་ བཞུགས་པ་ཆོ༌ཝ། དབུ་མནའ་བཞེས་ཁཱན་ཁེ་པ་ རོག་ཏེ་བ་ཀི་ མ་ཉོང་ཅི། དག་པ་ཀབ་ཉི་ དབུ་མནའ་བཞེས་ཁཱན་ཁེ་པ་ རོག་ཏེ་བ་ཀི་ ཇང་ཀིན་གེ་ཐོང་ཉི་ ཞུ་ཝ་ཆོ༌ཝ། ཉི་རོག་ཏེ་བ་ཤོ་ ཨོ་ཐ་འཛམ་གླིང་ག་དེན་གེ་ ཕིས་ཀ་སོ་ངོ་དང་ ཀོར་བེ་ཨུ་ཁཱན་བ་ཤ་ གི་ལ་དག་ཉི་ རོག་ཏེ་བ་ཀི་ ཁ་ཐུན་མ་ཆོ༌ཝ། 14 ཨུ་ཉུ་ད་བུ་ གསུངས་ཁཱན་སོ་ངོ་བ་ཀི་ རང་ཏེན་ག་རྒྱལ་ཁབ་ ལམ་ལ་དག་ཉི་ དང་སང་ཀིན་ཨ་ཉི་གེན༌ཅ། 15 རོག་ཏེ་བ་ཀི་ ཐུབ་ཐ་ཁཱན་ རྒྱལ་ཁབ་ཀོར་གེ་ གསུངས་མ་གི་ནེ་ཏ་ རོག་ཏེ་བ་ ལོག་ཉི་རང་ རང་རང་ས་ རྒྱལ་ཁབ་ག་ཏཱན་ བྱོན་མ་ཨོ་ཕེ། 16 དག་པ་ཀབ་ཉི་ རོག་ཏེ་བ་ཀི་ ལེག་པུ་ཆོ་ཁཱན་ རྒྱལ་ཁབ་ཁེ་པ་ ལམ་ཆོ༌ཝ། ཨུ་ཉུ་ཤོ་ ཞིང་ཁམས་ག་ རྒྱལ་ཁབ་གི༌ལ། ཨོ་ཉི་ཨ་དེན་གེ་ དཀོན་མཆོག་ཁེ་པ་ རོག་ཏེ་བ་ཀ་ དཀོན་མཆོག་གི་ལ་དག་ཉི་ ཞུ་ལ་ཀབ་ཉི་ ཐུགས་མ་བཞེས་ཝ་ ཨ་ལུ་མཱན༌ཅ། ཧང་ཡ་དག་ནེ་ལ་ རོག་ཏེ་བ་ཀ་དེན་གེ་ དཀོན་མཆོག་གི་ ཁྲོམ་ཆེན་ཐུར་ ཅམ་ཉི་གནང་མ༌ཅ། 17 དཀོན་མཆོག་གི་ ཨ་བཱརའ་ཧམ་གེ་ རྒྱུགས་ལ་ལེ་གང་ཀ་ རོ་ཀི་དད་པ་ག་ཐུང་ཀེ་ཨ་ཉི་ ཨི་སག་ མཆོད་པ་ཨ་ཉི་ཕུལ༌བ། དཀོན་མཆོག་གི་ ཨ་བཱརའ་ཧམ་ཀབ་ཉི་ དབུ་མནའ་བཞེས་ཝ་ཆོ༌ཝ། ཨོ་ཉེ་རང་གི་ནེ་བུ་ དཀོན་མཆོག་གི་ དབུ་མནའ་བཞེས་ཁཱན་ རོ་ཀ་སྲས་ ཐུར་ཨ་ཝ་ཆོ་ཁཱན་བུ་ རོ་ཀི་མཆོད་པ་ཕུལ་བེ་ཅམ༌པ། 18 མ་པ་ དཀོན་མཆོག་གི་ ཨ་བཱརའ་ཧམ་ག་ དབུ་མནའ་བཞེས་ཉི་ གསུངས་མ་ཆོ་ཝ་ ན་ག་རྒྱུད་པ་ཁེ་པ་ ཨི་སག་ག་ཐུང་ཀེ་ཨ་ཉི་ དར་བེ་ན་དག༌ཉི། 19 ཨི་སག་ ཤི་ནེ་བུ་ དཀོན་མཆོག་གི་ལོག་ཉི་ ཚེ་ག་ཕ་ཉི་གནང་མེ་དག་ཉི་ ཨ་བཱརའ་ཧམ་གི་ མི་ཝ་ཆོ༌ཝ། ཉི་ཡེག་པ་ད་བུ་ཨ་ནེ་ལ་ ཨ་བཱརའ་ཧམ་གི་ ཨི་སག་ ཤི་ཝ་གེ་ ལོག་ཉི་ཉོང༌པ། 20 དད་པ་ག་ཐུང་ཀེ་ཨ་ཉི་ ཨི་སག་གི་ ཡ་ཀུབ་དང་ ཨེ་སའུ་ག་ཚེ་ག་ མ་འོངས་པ་ག་དེན་གེ་ བྱིན་རླབས་ཞུ་ཝ༌ལ། 21 ཉི་ཡ་ཀུབ་གཱན་པ་ཨ་དེན་གེ་ གཤགས་པེ་ཅམ་པ་ཀབ་ཉི་ དད་པ་ག་ཐུང་ཀེ་ཨ་ཉི་ རོ་ཀི་ཡོ་སེཕ་ག་ཟ་བ་ཀ་ བྱིན་རླབས་གནང་མ༌ལ། ཉི་རོ་ཀ་ཕྱག་འཁར་ཐུང་ཀ་ཏཱན་ ཏེས་ཐཱན་གསོལ་ཝ་ཏ་པ༌ལ། 22 ཉི་ཡོ་སེཕ་ གཤགས་པེ་ཅམ་པ་ཀབ་ཉི་ དད་པ་ག་ཐུང་ཀེ་ཨ་ཉི་ ཨིས་རེལ་ག་སོ་ངོ་བ་ ཨི་ཇིབ་གེ་ཤོ་ཝ་ཀོར་གེ་ གསུངས་མ༌ལ། ཉི་རོག་གཤགས་ཏེན་གེ་ རོག་ཏེ་བ་ ཉ་གེ་དི་ལ་ཀབ་ཉི་ རོ་ཀ་སྐུ་ཕུང་ཁེ་པ་ རོག་ཏེ་བ་ཀབ་ཉི་བུའི་དག་ཉི་ གསུངས་མ༌ལ། 23 དད་པ་ག་ཐུང་ཀེ་ཨ་ཉི་ མོ་ས་ག་ཕ་མ་གི་ རོག་འཁྲུངས་དེན་གེ་ ལ་ཉི་སམ་སག་པུ་ གུམ་ཉི་ཐ་ཝ༌ལ། ཧང་ཡ་དག་ནེ་ལ་ རོ་ཀ་ཕ་མ་གི་ ཨོ་ཐ་ཝག་ཙ་ཁེ་པ་ མ་འདྲ་ཝ་རང་ཅ་དག་ཉི་ སེ་ཝ་ཨ་དེན་གེ་ དཔོན་ག་བཀའ་གེ་ ཡོང་མ་ཁེ་ཝ༌ལ། 24 དད་པ་ག་ཐུང་ཀེ་ཨ་ཉི་ མོ་ས་གི་ རོག་སྐུ་བྲོང་ཏེན་གེ་ རོག་ཁེ་པ་ དཔོན་ཕ་རོ་ག་སྲས་མོ་ག་ སྲས་གི་ལ་དག་ཉི་ ཙི་ལེ་མ་ན་ཝ༌ལ། 25 རེབ་ཀིན་ཐུར་ག་དེན་གེ་ སྡིག་པ་ནང་ཀ་ ཤོ་ནང་ཕེ་ཉི་ ཆོ་ལེ་མང་གི་ཝ་ རོ་ཀི་ རོ་ཀ་སོ་ངོ་བ་ཀབ་ཉི་ ནང་དོག་པེ་གོད་པ༌ལ། 26 མོ་ས་གི་ ཨི་ཇིབ་ག་རྒྱུ་ནོར་གེ་ལག་ཉི་ ཁིརིས་ག་ཡོར་ཀེ་ ངི་ནང་ཁུ་ལེ་ཁེ་ཁཱན་ཤོ་ ལེག་པུ་ཙི་ཝ༌ལ། ཧང་ཡ་དག་ནེ་ལ་ དཀོན་མཆོག་གི་ རོ་ཀ་སེ་རབ་གནང་མེ་དག་ཉི་ མཁྱེན་མ་ཆོ་ཝ༌ལ། 27 དད་པ་ག་ཐུང་ཀེ་ཨ་ཉི་ མོ་ས་གི་ དཔོན་དགོངསམ་ཁྲེལ་པ་གེ་ ཡོང་མ་ཁེ་ལཱན་ ཨི་ཇིབ་ཐུབ་ཐ་ཉི་ དི་ཝ༌ལ། རོ་ཀི་ཐོང་མེ་མར་ཁཱན་ དཀོན་མཆོག་ཁེ་པ་ མཇལ་བ་ཨ་དེན་གེ་ ཚིང་མ་གིར་པཱན་རང་ བྱོན་མ༌ལ། 28 གོ་སིང་ཁཱན་བ་ མེ་པ་ཕི་ཁཱན་བ་ཀི་ ཨིས་རེལ་ག་སོ་ངོ་བ་ཀ་ གོ་སིང་ཁཱན་ཟ་ག་བ་ མ་ཐོབ་ཅེན་དག་པ་གི་ དད་པ་ག་ཐུང་ཀེ་ཨ་ཉི་ མོ་ས་གི་ གོག་ཉི་དི་ཝ་ག་དུས་ཆེན་ ཙི་ཝ༌ལ། ཉི་ཀོ་ཤ་རང་ག་ ཞི་ཡ་ཕ༌ལ། 29 དད་པ་ག་ཐུང་ཀེ་ཨ་ཉི་ ཨིས་རེལ་ག་སོ་ངོ་བ་ཀི་ མཚོ་ཙ་ལུ་བར་ཀེ་ལེང་ ས་སང་མུ་གེ་ དང་མ་ད་བུ་རང་ དང་ཉི་དི་ཝ༌ལ། དག་པ་ཀབ་ཉི་ ཨི་ཇིབ་ག་སོ་ངོ་བ་ཀི་ རོག་ཏེ་བ་ཁོན་ཉི་བུ་ལ་ཀབ་ཉི་ རོག་ཏེ་བ་ ཐམས་ཅན་རང་ མཚོ་ག་ཐི་མ༌ལ། 30 དད་པ་ག་ཐུང་ཀེ་ཨ་ཉི་ ཨིས་རེལ་ག་ སོ་ངོ་བ་ཀི་ ཡ་རི་ཧོ་ཀོ་ལོ་ལོ་ ངམ་ཟུམ་སག་པུ་ དང་མ་ཀབ་ཉི་ དེང་ཙི་ཐམས་ཅན་རང་ ཆེད་ཉི་ཇོང་མ༌ལ། 31 དད་པ་ག་ཐུང་ཀེ་ཨ་ཉི་ གཞང་བཙོང་མིན་ ར་ཧབ་གི་ བྱ་གོད་ཁཱན་བ་ ཞུ་ཝ་ཨ་དེན་གེ་ ཆ་གནས་མ་ཐ་ཁཱན་ བཱརའ་སོ་ངོ་བ་ཀབ་ཉི་ ཤི་ལེ་མ་ཁེ་ཝ༌ལ། 32 ཨོ་ཐ་གེ་ལག་ཉི་ ཧབ་ཏུར་རང་ ཡེག་པེ་ཁེ་ལེ་ཡ། ཇི་གི་ གི་དོན་དང་ བ་རག་ ཤིམ་ཤོན་དང་ ཡིབ་ཏ་ ད་ཝུད་དང་ ཤ་མུ་ཨེལ་ ཉི་ལུང་བསྟན་པ་བ་ཀ་ཀོར་གེ་ ཡེག་པེ་ག་ ཇ་ག་དུས་ཙུན་མ༌ལ། 33 དད་པ་ག་ཐུང་ཀེ་ཨ་ཉི་ རོག་ཏེ་བ་ཀི་ རྒྱལ་སྲིད་བ་ཕ༌མ། ཉི་དྲང་པུ་ཨ་ཉི་དབང༌པ། ཉི་དཀོན་མཆོག་གི་ དབུ་མནའ་བཞེས་ཁཱན་ཁེ་པ་ རོག་ཏེ་བ་ཀི་ཉོང༌པ། ཉི་རོག་ཏེ་བ་ཀི་ སེང་གེ་བ་ཀ་ནོ་ཝང་བུ་དམ༌པ། 34 རོག་ཏེ་བ་ཀི་ མི་ཡོང་ཁེ་སི་སི་ ཨ་ཝ་བ་ཤེ༌ཝ། ཉི་མཚོན་ཆ་ག་ཐུང་ཀེ་ རོག་ཏེ་བ་ཤི་ལེ་མ་ཁེན་ཤི། རོག་ཏེ་བ་ ཤུག་མཱན་ཐཱན་རང་གི་ནེ་བུ་ ཤུག་ཅཱན་རི༌ཝ། ཉི་རོག་ཏེ་བ་ ཕྱད་མདའ་ཕི་ལེ་ག་ཤུག་ཅཱན་རི་ཉི་ ཕིས་ཀ་རྒྱལ་ཁབ་བ་ཀ་ དམག་མི་བ་ཕ༌མ། 35 མེ་ཝག་ཙ་བ་ཀི་ རོག་ཏེ་བ་ཀི་ཕང་ཁཱན་བ་ ཤི་ཝ་གེ་ཝུ་ཉི་ ལོག་ཉི་ཉོང༌པ། དག་པ་ཀབ་ཉི་ གསོན་པོ་ཨ་ཉི་ཝུ་ལེ་གང་ཀ་ ཚེ་ལེག་པུ་ཉོང་ཅེན་དག་པ་གི་ ཚེ་བང་ གནམ་མེད་ས་མེད་ ཀོང་ནེ་བུ་ཤོ་ལེ་མ་ནཱན་ཤི། 36 ཚེ་བང་ག་མེམ་ཅོར་ཉི་ ཉི་ཚེ་བང་ གནམ་མེད་ས་མེད་ ལ་ཕ་ཆོ༌ཝ། ཉི་ཚེ་བང་ ལྕགས་ཀེ་ཉི་ བཙོན་ག་ཙུག༌པ། 37 ཚེ་བང་ ལུང་གི་དྲོམ་ཉི་ཤེ༌ཝ། ཉི་ཚེ་བང་ བར་ཀེ་དྲག་ཉི་གེ༌མ། ཚེ་བང་ གི་རིང་གི་ཤེ༌ཝ། ཚེ་བང་ ཤི་ཤ་དང་ ར་བ་ག་མོང་ནང་ཡེ་ཉི་ གནམ་མེད་ས་མེད་དུག་ཉི་ ཀ་ལུ་ཏཱད་ཉི་ ཉི་མ་ལེག་པ་ཨ་ཉི་ དང་མ་རི༌ཝ། 38 རོག་ཏེ་བ་ ཨོ་ཐ་འཛམ་གླིང་ག་དེན་གེ་ ལེག་པུ་ཟག་པ་ཆོ༌ཝ། རོག་ཏེ་བ་ ས་ཏོང་པ་ཁོན་དང་ ཕུ་ཐུང་ཐུང་ ཉི་ཕུང་ཀ་པང་ཁོན་དང་ ས་གང་ནང་ནང་ ཀོར་ཉི་ཆོ་ལེ་ཁེ༌ཝ། 39 རོག་ཏེ་བ་ ཐམས་ཅན་གི་ དད་པ་ཨ་ཝ་ཨ་དེན་གེ་ དཀོན་མཆོག་ག་ ཐུགས་ཀ་ཚུད་པ་ཆོ༌ཝ། དག་པ་ཀབ་ཉི་ དབུ་མནའ་བཞེས་ཁཱན་ཁེ་པ་ རོག་ཏེ་བ་ ཐུར་གི་རང་མ་ཉོང་ཅི། 40 ཧང་ཡ་དག་ནེ་ལ་ དཀོན་མཆོག་གི་ ཨ་ཧ་དེན་གེ་ ཨོ་ཉ་གེ་བུ་ལག་ཉི་ ལེག་པུ་ཐུགས་བསམ་ བཞེས་ཝ་ཆོ༌ཝ། རོག་ཏེ་བ་བུ་ ཨ་ཧ་བ་ཀབ་ཉི་ཤ་ ཅོན་མ་ཝ་རིན་ཆེན་དག་ཉི་ དཀོན་མཆོག་ག་ འཆར་གཞི་ཆོ༌ཝ༎ |