ཧི་བུརུ། 10 - Tshangla New Testament (BSI)

ཁིརིས་གི་ཤེབ་ཐུར༌ག་ ཐམས༌ཅན༌ག་དེན༌གེ་ མཆོད༌པ་གནང་མ༌ལ།

¹ བཀའ་ཁྲིམས་ཤོ་ ངོ་མ་བ་མང་གི་ཝ་ ཨོ་ཕེ་ཁེ་ཁཱན་ལེག་པུ་བ་ཀ་ ཡོང་ཤ་གི༌ལ། ཨོ་ཉི་ཨ་དེན་གེ་ ཉིང་དྲང་ཨ་ཉི་ མཆོད་པ་ ལོག་ཉི་ལོག་ཉི་རང་ ཕུལ་ནེ་བུ་ གསོལ་ཝ་ཏབ་ཁཱན་བ་ཀ་ ཏི་ངེ་རང་ ཅོན་མ་ཝ་ཅོད་པེ་ རེ་བུ་མཱན་ཆི།

² གསོལ་ཝ་ཏབ་ཁཱན་བ་ཀ་ སྡིག་པ་དག་པེ་རེ་བ་གི་ནེ་ཏ་ རོག་ཏེ་བ་ཀི་ སེམས་མ་ཟཱན་པཱན་ མཆོད་པ་ཕུལ་བེ་ག་ ནོར་བ་ཨོ་ཕེ།

³ དག་པ་ཀབ་ཉི་ ཨོ་ཉ་མཆོད་པ་བ་ཀི་ ཉིང་དྲང་རང་ རོག་ཏེ་བ་ཀི་ཨ་ཁཱན་ སྡིག་པ་ག་ ཡིད་ཀ་ཨ་ཉི་བིན་ཆོ༌ཝ།

⁴ ཧང་ཡ་དག་ནེ་ལ་ ཏོ་ཀ་དང་ ར་བ་ག་ཞི་གི་ སྡིག་པ་དག་པེ་ག་ ཏི་ངེ་རང་མར༌བ།

⁵ ཨོ་ཉི་ཨ་དེན་གེ་ ཁིརིས་ འཛམ་གླིང་ག་ བྱོན་མེ་གང་ཀ་ རོ་ཀི་གསུངས་མ་ཅ་ སོ་ངོ་བ་ཀི་ མཆོད་པ་དང་ སྙན་དར་ཕུལ་ཆེན་དག་ཉི་ ན་ག་ཐུགས་བསམ་མཱན༌ཅ། དག་པ་ཀབ་ཉི་ ནཱན་གི་ ཇ་ག་དེན་གེ་ ལུས་པུ་མཛད་ཉི་གནང་མ༌ཅ།

⁶ མི་ག་མཆོད་པ་དང་ སྡིག་པ་ག་མཆོད་པ་བ་ཀབ་ཉི་ ནཱན་ཐུགས་མ་བཞེས་ཝ་ཆོ༌ཝ།

⁷ ཉི་ཇི་གི་ཞུ་ཝ་ དཀོན་མཆོག་ ཇ་ག་ཀོར་གེ་ བཀའ་ཁྲིམས་ག་ དཔེ་ཆ་ནང་ཀ་ འབྲི་བ་པུརུས་ཀིན་ཨ་ཉི་ ན་ག་ཐུགས་དང་ཏུ་ཉི་ ཕྱག་ཞུ་ལེ་དེན་གེ་ ཇང་ཅ་ དག༌ཉི།

⁸ གོ་རང་ ཁིརིས་གི་ ཞུ་ཝ་ལ་ མཆོད་པ་དང་སྙན་དར་ ཉི་མི་ག་མཆོད་པ་དང་ སྡིག་པ་ག་མཆོད་པ་ཁེ་པ་ བཞེས་ལེ་ག་ཐུགས་བསམ་ ན་ག་མཱན་ཅ་དག༌ཉི། མཆོད་པ་ ཐམས་ཅན་རང་ བཀའ་ཁྲིམས་གེ་ཤོ་ཝ་དང་ཏུ་ཉི་ ཕུལ་ཐཱན་རང་གི་ནེ་བུ་ རོ་ཀི་ཨོ་ཐེན་གསུངས་མ༌ལ།

⁹ ཉི་གེ་ ཨོམ་ཆང་ རོ་ཀི་ཞུ་ཝ་ལ་ ན་ག་ཐུགས་དང་ཏུ་ཉི་ ཕྱག་ཞུ་ལེ་དེན་གེ་ ཇང་ཅ་དག༌ཉི། ཨོ་ཐེན་ཨ་ཉི་ མཆོད་པ་སིང་མ་ཁེ་པ་ ཕུལ་ལེ་དེན་གེ་ མཆོད་པ་མཱན་མ་ཁེ་པ་ མ་ཝ་ཅོད་ཉི་གནང་མ༌ལ།

¹⁰ ཡི་ཤུ་ཁིརིས་གི་ ཤེབ་ཐུར་ག་རང་ ཐམས་ཅན་ག་དེན་གེ་ རོ་ཀ་སྐུ་གཟུགས་ག་ མཆོད་པ་ཕུལ་ཉི་ གནང་མ་ཨ་དེན་གེ་ དཀོན་མཆོག་ག་ ཐུགས་བཞེད་གི་ཨ་ཉི་ ཨ་ཧ་བ་ དམ་པ་ཅོད་ཉི་གནང་མ༌ལ།

¹¹ ལུགས་སྲོལ་མཱན་མ་དང་ཏུ་ཉི་ཨ་ནེ་ལ་ བླ་མ་བ་ ལོག་ཉི་ལོག་ཉི་རང་ མཆོད་གཤམ་གུབ་ཀ་ ཐིང་མེ་ཁེན་ཆོ༌ཝ། ཉི་སྡིག་པ་ ཏི་ངེ་རང་ དག་པེ་མར་ཁཱན་ མཆོད་པ་ཁེ་པ་ ལོག་ཉི་ལོག་ཉི་རང་ ཕུལ་བེ་ཁེན་ཆོ༌ཝ།

¹² དག་པ་ཀབ་ཉི་ ཁིརིས་གི་ ཏ་བུ་ག་དེན་གེ་ སྡིག་པ་ག་མཆོད་པ་ ཤེབ་ཐུར་ཕུལ་ཐཱན་ དཀོན་མཆོག་ག་ ལ་ཉོང་ལོ་ཀ་བཞུགས་པ༌ལ།

¹³ ཉི་ཨོམ་ རོ་ཀ་དགྲ་བྱང་ཕིཤི་བ་ དཀོན་མཆོག་གི་ རོ་ཀ་བི་ཏཱན་ ཅོད་པེ་དེན་གེ་ ནོང་ཉི་བཞུགས་པ༌ཅ།

¹⁴ ཧང་ཡ་དག་ནེ་ལ་ རོ་ཀི་དམ་པ་ཅོད་ཁཱན་ སོ་ངོ་བ་ ཐམས་ཅན་རང་ ཨོ་ཉ་མཆོད་པ་ཐུར་གི་ མ་འགྱུར་བརྟན་པ་ག་དེན་གེ་ ཅོན་མ་ཝ་ཅོད་ཉི་གནང་མ༌ཅ།

¹⁵ ཉི་དམ་པའི་ཐུགས་ཉིད་གི་བུ་ ཨོ་ཉ་ཀོར་གེ་ འཛོམས་དཔང་ཨ་ཉི་གནང༌ཅ། གོ་རང་ རོ་ཀི་ ཨོ་ཐེན་གསུངས་མ་ཅ་

¹⁶ ཨོ་ཉ་ནོང་ཀ་ ཇ་ག་སོ་ངོ་བ་ཀབ་ཉི་ ཇི་གི་ ཨོ་ཐ་འགན་རྒྱ་སིང་མ་ ཅོད་པེ་དག་ཉི་ གཙོ་བོ་གི་ གསུངས་མ༌ལ། ཇ་ག་བཀའ་ཁྲིམས་ཁེ་པ་ ཇི་གི་ རོག་ཏེ་བ་ཀ་ ཐིང་ལོམ་ནང་ཀ་ཙུག༌པེ། ཉི་རོག་ཏེ་བ་ཀ་ སེམས་ཀ་འབྲི་ཉི་ཐ་ལེ་ དག༌ཉི།

¹⁷ རོ་ཀི་ཨོ་ཐེན་བུ་ གསུངས་མ་ཅ་ ཉི་རོག་ཏེ་བ་ཀི་ ཨ་ཁཱན་སྡིག་པ་དང་ ངན་པ་བ་ ཇི་གི་ལོག་ཉི་ ཧ་ལ་རང་ ཡིད་ཀ་མ་ཨ་ལ་ དག༌ཉི།

¹⁸ ཉི་ཨོམ་ སྡིག་པ་བ་ བཤགས་པ་གནང་མ་ཆོ་ནེ་ལ་ ལོག་ཉི་རང་ མཆོད་པ་ཕུལ་བེ་ཁེ་ཝ་ག་ ལའི་རང་མཱན༌ཅ༎

ཨ་ཧ་བ་ དཀོན་མཆོག༌ག་ སྐུན༌མདུན༌ག་ཏེམ་ཀེ།

¹⁹ ཇ་ག་ཡུང་ཟི་བ་ ཨ་ཤི་ཡི་ཤུ་ག་ སྐུ་ཁྲག་ག་ཐུང་ཀེ་ཨ་ཉི་ ཐམས་ཅན་གེ་ དམ་པའི་ཕའི་ནང་ནང་ཀ་ ལོ་དེ་ཏོག་ཏོ་ཨ་ཉི་ ནུ་ཕེ་རེ་བ༌ཅ།

²⁰ རོ་ཀི་ཨ་ཧ་དེན་གེ་ ལམ་སིང་མ་དང་ ལམ་གསོན་པོ་ ཕེག་ཉི་གནང་མ༌ཅ། ཨུ་ཉུ་ཤོ་ ཡོ་ལུ་གེ༌ཉི། ཡེག་པེ་དེན་ཐ་ཤོ་ རོ་ཀ་སྐུ་གཟུགས་གེ་ཨ་ཉི་ ཨའི་ནང་ཀ་ནུབ་ཅ་གི༌ལ།

²¹ དཀོན་མཆོག་ག་ཕོ་བྲང་ བདག་འཛིན་ཨ་ཉི་གནང་ཁཱན་ ཨ་ཧ་བླ་མ་ཆི་ལུ་ཐུར་ ཆོ་ཝ་ཨ་དེན་གེ་

²² ཨའི་དཀོན་མཆོག་ག་ སྐུན་མདུན་ག་ཨུན་ཅ་ཨ་ཉི་ ཨ་ཧ་སེམས་ཀི་ དེན་པ་ཨ་ཉི་རང་ དད་པ་ཆི་ལུ་ཀེ་ཁེ། ཧང་ཡ་དག་ནེ་ལ་ ཨ་ཧ་སེམས་ཀི་ མ་ན་ལཱན་ ཅོན་ཏག་ཁཱན་བ་ ཡི་ཤུ་ག་སྐུ་ཁྲག་གི་ ཟིག་ཉི་དག་གནང་མ༌ཅ། ཉི་ཨ་ཧ་ལུས་པུ་ཁེ་པ་ རི་ཙང་མ་གི་ ཟིག་པ༌ཅ།

²³ ཨ་ཧ་རེ་ཆ་དག་ཉི་ཡེག༌ཅ། ཉི་ཨ་ཤི་ ཨོ་ཉ་རེ་ཆ་ཁེ་པ་ སྒྲིང་སྒྲིང་ཨན་ཙུང་ཉི་ཐ་ཁེ། ཧང་ཡ་དག་ནེ་ལ་ དཀོན་མཆོག་གི་ དབུ་མནའ་བཞེས་ཁཱན་ཁེ་པ་ མཛད་པེ་ཨ་ཉི་ ཨ་ཤི་ལོ་དིན༌ཅ།

²⁴ ཨ་ཤི་ ཐུར་དང་ཐུར་ག་དེན་གེ་ སྡུག་བསྔལ་ཨ་ཉི་ སྙིང་རྗེ་དང་ ལེག་པུ་ཨ་ལེ་ག་ ནོ་ཝང་ཨ་ཁེ།

²⁵ སོ་ངོ་ཚེ་བང་གི་ ཐུབ་ཐ་ཝ་པུརུས་ཀིན་ཨ་ཉི་ ཨ་ཤི་ ཏབ་ཐུར་ཛོ་མེ་ག་ ཐུབ་མ་ཐ་ཁེ། དག་པ་ཀབ་ཉི་ གཙོ་བོ་ ལོག་པེ་ག་ནོང་ཁེ་པ་ ར་ག་ཏེམ་པ་ཨ་དེན་གེ་ ཨ་ཤི་ ཐུར་གི་ཐུར་ག་ ལག་ཏང་མང་པུ་ཨ་ཉི་ ནོ་ཝང་ཨ་ཁེ།

²⁶ དེན་པ་ག་ཡོན་ཏན་ ཉོང་ཏེན་གེ་བུ་ ཨ་ཤི་སེ་ཉི་ཐོང་ཉི་རང་ སྡིག་པ་ཨ་ནེ་ལ་ ཨོ་ཉ་སྡིག་པ་ག་དེན་གེ་ མཆོད་པ་མཱན༌ཅ།

²⁷ ལག་ཏང་ དཀོན་མཆོག་ག་ དགྲ་ཨ་ཁཱན་བ་ ཞུམ་ཁཱན་མི་ཆི་ལུ་དང་ དཀོན་མཆོག་ག་ ཁྲིམས་ག་དེན་གེ་ ཡོང་ཁེ་སི་སི་ཨ་ཉི་ ནོང་མེ་ཁེ༌ལེ།

²⁸ ཨི་བི་གི་ མོ་ས་ག་ བཀའ་ཁྲིམས་ག་ ཆ་གནས་མ་ཐ་ཝ་ཐུར་ ཨོ་ཉ་སོ་ངོ་ཁེ་པ་ འཛོམས་དཔང་དཔང་བཞག་ཨ་ཁཱན་ ཉིག་ཙིང་སམ་ཕང་ཙུག་ཐཱན་ སྙིང་རྗེ་ད་སུ་རང་མ་ཝ་ཨ་ཉི་ ཤེན་གེམ་ཆོ༌ཝ།

²⁹ དཀོན་མཆོག་ག་སྲས་ རོ་ཀ་བི་ཕརའ་ཁ་ཙུག་ཉི་ ཉི་རོ་ཀ་སྡིག་པ་དག་ཁཱན་ སྐུ་ཁྲག་ག་འགན་རྒྱ་ཁེ་པ་ དམ་པ་མ་ཝ་ཅོད་ཉི་ ཉི་ཐུགས་རྗེ་གཟིགས་ཁཱན་ དམ་པའི་ཐུགས་ཉིད་ག་ མེམ་ཅོར་ཁཱན་ སོ་ངོ་གི་ཏ་ ཨོ་ཉ་གེ་ལག་ཉི་ ལག་ཏང་ ཧབ་ཏུར་ཁྲིམས་ཅིད་པུ་ ཉོང་པེ་ཡ།

³⁰ ཧང་ཡ་དག་ནེ་ལ་ ཇི་གི་ཧིང་འགྲམ་ལོག༌པེ། ཉི་ཉོང་པེ་ཁེ་ཁཱན་བ་ཀ་ ཇི་གི་ལོག་ཉི་བི་ལེ་དག་ཉི་ གསུངས་ཁཱན་ཁེ་པ་ ཨ་ཤི་སེན༌ཅ། རོ་ཀི་ཨོ་ཐེན་བུ་ གསུངས་མ་ཅ་ གཙོ་བོ་གི་ རོ་ཀ་སོ་ངོ་བ་ཀ་ ཁྲིམས་ཅཱད་ཉི་གནང་མེ་དག༌ཉི།

³¹ གསོན་པོ་ཨ་ཉི་བཞུགས་ཁཱན་ དཀོན་མཆོག་ག་ཕྱག་ཀ་ ཁེ་ཝ་ག་ཏེ་ ཡོང་ཁེ་སི་སི་ ཨ་ཝ་གི༌ལ།

³² གོ་ཙུག་པེ་གང་ཀ་ ན་ཤི་ ཁིརིས་ག་ཀོར་གེ་ ལམ་པེ་གང་ཀ་ ནའི་ཧང་ད་བུ་ཆོ་ཝ་གི་ལ་སྨོ་ ཡིད་ཀ་ཨའི། ན་ཧ་བ་ ཧབ་ཏུར་ ཀ་ལུ་ཏཱད་ནེ་བུ་ ན་ཤི་ ཧང་ཏེན་ དམ་ཚིག་ཙུང་ཉི་ ཆོ་ཝ་གི་ལ་སྨོ་ ཡིད་ཀ་ཨའི།

³³ ཆམ་ཆམ་རང་ ན་ཧ་བ་ སོ་ངོ་མང་ཀ་གུབ་ཀ་ ངི་ནང་ཁུ་སི་སི་ཨ་ཝ་ཅོད་ཉི་ མ་ལེག་པ་ཨ་ཝ་ཆོ༌ཝ། ཉི་ཆམ་ཆམ་ཏ་ ནའི་ད་བུ་ཨ་ཉི་ ནང་དོག་ཁཱན་བ་ཀ་ ན་ཤི་ ཇ་རོ་ཨ་ཝ་ཆོ༌ཝ།

³⁴ ཉི་བཙོན་ག་ཙུག་ཁཱན་ སོ་ངོ་བ་ཀབ་ཉི་ ན་ཧ་བ་བུ་ནང་དོག༌པ། ཉི་ན་ཧ་རྒྱུ་ཅ་ལ་ ཐམས་ཅན་རང་ བང་ཙོང་ཉི་བུ་ལ་ཀབ་ཉི་བུ་ ན་ཧ་དེན་གེ་ ཨོ་ཉ་གེ་ལག་ཉི་ ལེག་པུ་དང་ ཧ་ལ་རང་མ་ཆུམ་ཁཱན་ རྒྱུ་ནོར་ལོངས་སྤྱོད་ཅ་དག་ཉི་ ན་ཤི་སེ་ཝ་ཨ་དེན་གེ་ ན་ཧ་བ་ ཤོ་ནང་ཕེ་ཉི་ཆོན་ཆོ༌ཝ།

³⁵ ཨོ་ཉི་ཨ་དེན་གེ་ ན་ཤི་ ཨོ་ཐ་ལོ་དི་ཁཱན་ཁེ་པ་ མ་གེ་མཱན་ཐའི། ཉི་ན་ཤི་ བྱིན་རླབས་ཆི་ལུ་ཉོང༌པེ།

³⁶ ན་ཤི་ དཀོན་མཆོག་ག་ ཐུགས་བཞེད་དང་ཏུ་ཉི་ ཨ་ལ་ཀབ་ཉི་ དཀོན་མཆོག་གི་ དབུ་མནའ་བཞེས་ཁཱན་ཁེ་པ་ ན་ཤི་ཉོང༌པེ། ཨོ་ཉི་ཨ་དེན་གེ་ ན་ཤི་བཟོད་པར་སྒོམ་ཉི་ ཆོ་ལེ་ཁེ༌ལེ།

³⁷ ཧང་ཡ་དག་ནེ་ལ་ རེབ་ཀིན་ཐུར་ག་ཚི་ངེ་ རོག་བྱོན་ཁཱན་ཁེ་པ་བྱོན༌མེ། ཉི་ཇེ་པུ་མ་གོར༌བ།

³⁸ ཉི་སོ་ངོ་དྲང་པུ་བ་ཀི་ དད་པ་ག་ཐུང་ཀེ་ཨ་ཉི་ཆོ༌ལེ། དག་པ་ཀབ་ཉི་ ལོག་ཉི་ཇོང་ཁཱན་ སོ་ངོ་བ་ཀབ་ཉི་གི་ནེ་ལ་ ཇང་ཤོ་ནང་མ་ཕེ༌ལ།

³⁹ དག་པ་ཀབ་ཉི་ ཨ་ཧ་བ་ཤོ་ དཀོན་མཆོག་གེ་ ལོག་ཉི་དིན་ཐཱན་ མེ་པ་དི་ཁཱན་ སོ་ངོ་བ་ད་བུ་མང་གི་ཝ་ ཨ་ཧ་བ་ཤོ་ དད་པ་ཨ་ཁཱན་བ་དང་ ཐར་པ་ཉོང་ཁཱན་བ་གི༌ལ༎