ཨེ་ཕི་སི། 6 - Tshangla New Testament (BSI)

ཕ་མ་བ་དང་ཝག་ཙ༌བ།

¹ ཝག་ཙ་བ་ གཙོ་བོ་ག་མཚན་ག་ ཕ་མ་ག་ཆ་གནས་ཐའི། ཧང་ཡ་དག་ནེ་ལ་ ཨུ་ཉུ་ད་བུ་ཨ་ཁཱན་ཤོ་ དེན་པ་གི༌ལ།

² ན་ཧ་ཨ་པ་དང་ ཨ་མ་ག་ གུས་ཞབས་ཨའི་དག་ཉི་ བཀའ་གནང་ཁཱན་ཁེ་པ་ བཀའ་རྒྱ་གོ་དང་པ་གི༌ལ། ཉི་ཨོ་ཉ་བཀའ་རྒྱ་ནང་ཀ་ དབུ་མནའ་བཞེས་ཝ༌ཅ།

³ ན་ཧ་ཚེ་ག་ ལེག་པུ་ཇུང་ཆེན། ཉི་འཛམ་གླིང་ག་ ན་ཧ་མི་ཚེ་ རིང་མུ་ཨུན་ཆེན།

⁴ ཨ་པ་བ་ ཝག་ཙ་བ་ རོ་ཙིག་པེ་མ་བི་ཝ་ཨ་ཉི་ འཁྲིལ་ལེ་ཁེ༌ལེ། ལག་ཏང་ གཙོ་བོ་ག་ཀོར་གེ་ཡེ་ཉི་ སྒྲིགས་ཀ་ཐ་ལེ་ག་ གོད་པེ་ཁེ༌ལེ༎

ཡོན་ད་བ་དང་ ཟ་པ༌བ།

⁵ ཟ་པ་བ་ ན་ཤི་ཁིརིས་ག་ཆ་གནས་ ཐ་ཝ་པུརུས་ཀིན་ཨ་ཉི་ ན་ཧ་འཛམ་གླིང་ག་ ཡོན་ད་ག་བུ་ ཆ་གནས་ཐ་ཉི་ གུས་ཞབས་ཨ་ལེ་ཁེ༌ལེ། ཡོང་ཁེ་ལེ་ཁེ༌ལེ། ཉི་སེམས་ཤོ་ཉི་ ལའི་ཨ་ལེ་ཁེ༌ལེ།

⁶ ཡོན་ད་གི་ གོད་པ་ཀབ་ཉི་ཤ་ ཡོན་ད་ ཤོ་ནང་ཕེ་ལེ་ བི་ལེ་དེན་གེ་མང་གི་ཝ་ ཁིརིས་ག་ ཟ་པ་གི་ཝ་པུརུས་ཀིན་ཨ་ཉི་ དཀོན་མཆོག་ག་ ཐུགས་བཞེད་ཁེ་པ་ ན་ཧ་སེམས་ནང་ཀེ་ཨ་ཉི་རང་ ཨ་ལེ་ཁེ༌ལེ།

⁷ ན་ཤི་སོ་ངོ་ག་དེན་གེ་མང་གི་ཝ་ གཙོ་བོ་ག་ ཕྱག་ཞུ་ཝ་པུརུས་ཀིན་ཨ་ཉི་ ན་ཧ་སེམས་ནང་ཀེ་ཨ་ཉི་རང་ ཡོན་ད་ག་ཕྱག་ཞུའི།

⁸ ཧང་ཡ་དག་ནེ་ལ་ ཟ་པ་གི་ནེ་བུ་ མང་གི་ནེ་བུ་ ཨི་བི་གི་ ལའི་ལེག་པུ་ཨ་ཝ་ཐུར་ གཙོ་བོ་གི་ ཨོ་ཉ་སོ་ངོ་ག་ སེ་རབ་གནང་མེ་གི་ལ་དག་ཉི་ ན་ཤི་སེན༌ཅ།

⁹ ཡོན་ད་བ་ ན་ཤི་བུ་ ན་ཧ་ཟ་པ་བ་ཀ་ཏཱན་ ཨུ་ཉུ་པུརུས་ཀིན་ཨ་ཉི་རང་ ཨ་ལེ་ཁེ༌ལེ། རོག་ཏེ་བ་ཀ་ ཡོང་མ་ཨའི། ཧང་ཡ་དག་ནེ་ལ་ རོག་ཏེ་བ་དང་ ན་ཧ་ཡོན་ད་ཁེ་པ་ ཞིང་ཁམས་ག་ བཞུགས་པ་ཅ་དག་ཉི་ ན་ཤི་སེན༌ཅ། ཉི་རོ་ཀི་ ཉེ་རིང་མ་ཆི་ལཱན་ ཁྲིམས་ཅཱད་ཉི་གནང༌མེ༎

དཀོན་མཆོག་ག་མཚོན་ཆ།

¹⁰ ཇུ་ཀེ་རང་ གཙོ་བོ་ག་ ཤུགས་སྟོབས་ཆི་ལུ་གི་ ནའི་ཤུག་ཅཱན་ཅོད་ཉི་གནང་ཆེན།

¹¹ བདུད་ཀ་འཆར་གཞི་ག་ དགྲ་དོག་པེ་རེ་བེ་དེན་གེ་ དཀོན་མཆོག་གི་གནང་ཁཱན་ མཚོན་ཆ་བ་ཙུག༌ཅོ།

¹² ཧང་ཡ་དག་ནེ་ལ་ ཨའི་ཤོ་ ཤ་དང་ཞི་གི་ཅོད་ཁཱན་ སོ་ངོ་བ་ཀབ་ཉི་ ཕྱད་མདའ་ཕིན་ཅ་མང་གི། དག་པ་ཀབ་ཉི་ དབང་ཁཱན་བ་དང་ དབང་ཚད་ཙུང་ཁཱན་བ་ ཨོ་ཐ་འཛམ་གླིང་དབང་ཁཱན་ མེར་བུ་ག་ཤུག་བ་དང་ ཞིང་ཁམས་ག་ ས་ཆ་ཁོན་ ངན་པ་རྣམ་ཤེས་བ་ཀབ་ཉི་ ཐུགས་ཉིད་ག་ ཕྱད་མདའ་ཕིན་ཅ་གི༌ལ།

¹³ ཨོ་ཉི་ཨ་དེན་གེ་ དུས་ངན་པ་ ཤེག་པ་ཀབ་ཉི་ ཨའི་སྒྲིང་སྒྲིང་ཨ་ཉི་ ཆོ་ལེ་རེ་བེ་དེན་གེ་ དཀོན་མཆོག་གི་གནང་ཁཱན་ དགྲ་དོག་ཁཱན་ ཐམས་ཅན་རང་ཙུག༌ཅོ། ཧང་ཡ་དག་ནེ་ལ་ ཕྱད་མདའ་ཆུམ་དེན་གེ་བུ་ ནའི་སྒྲིང་སྒྲིང་ཨ་ཉི་ཆོ་ལེ་དེན་གེ།

¹⁴ ཨོ་ཉི་ཨ་དེན་གེ་ དོ་རི་རི་ཨ་ཉི་ཐིང་ཐཱན་ ན་ཧ་ཤ་ཅི་ནང་ཁེ་པ་ དེན་པ་ག་ ཐེ་མུ་ད་བུ་ཐིག༌ཅོ། ཉི་དྲང་པུ་གི་ དགྲ་དོག་ཁཱན་ བཱརང་ཏོང་དགྲ་ལི་པུརུས་ཀིན་ཨ་ཉི་ ན་ཧ་སྐྱབས་ཨན་ཆེན།

¹⁵ ཉི་སྐྱིད་པུ་ག་ཀོར་གེ་ འཐེན་ལེག་པུ་བཤད་པེ་ག་ ན་ཧ་སེམས་ཆོ་ཁཱན་ཁེ་པ་ ན་ཧ་བི་ག་ བི་དར་ད་བུ་ ཨོ་ཕེ་ཁེ༌ལེ།

¹⁶ ཨོ་ཐ་བ་ཐམས་ཅན་ག་ཐུང་ཀ་ ན་ཧ་དད་པ་ཁེ་པ་ དགྲ་དོག་ཁཱན་ད་བུ་ཨུན་ཆེན། ཉི་མི་དིར་ཉི་ཨུ་ཁཱན་ བདུད་ཀ་མི་ ཐམས་ཅན་རང་ ན་ཤི་ཁག་པེ་རེ༌བེ།

¹⁷ དཀོན་མཆོག་ག་ སྐྱབས་ཨ་ལེ་ག་དབང་ཁེ་པ་ ཤ་རང་ག་མུག་ཁཱན་ པེར་ག་མུ་ཁུ་ལུམ་ད་བུ་ཨུན་ཆེན། ཉི་ཐུགས་ཉིད་ག་ གི་རིང་མེན་ཤོ་ ཨུ་ཉུ་ཤོ་ དཀོན་མཆོག་ག་གསུང་གི༌ལ།

¹⁸ ཧ་ལ་རང་གི་ནེ་བུ་ ཉི་ཧང་ད་བུ་དུས་ཀབ་ག་རང་གི་ནེ་བུ་ དམ་པའི་ཐུགས་ཉིད་ག་ དབང་ག་ཐུང་ཀེ་ཨ་ཉི་ སྨོན་ལམ་ཞུའི། རིག་པ་སྒྲིམ་ཉི་ཆོའི། ཉི་དཀོན་མཆོག་ག་ སོ་ངོ་བ་ཀ་དེན་གེ་ སྨོན་ལམ་ཞུའི།

¹⁹ ཉི་ཇ་ག་ནོ་ཝང་ཆོག་པེ་དྲང་རང་ ཇི་གི་ཡོང་ད་སུར་རང་མ་ཁེ་ལཱན་ འཐེན་ལེག་པུ་ག་ གུམ་ནང་ཆཱས་བ་ཀ་ཀོར་གེ་ ཡེག་པེ་རེ་བེ་ག་གསུང་ ཇ་ག་གནང་ཆེན་དག་པ་གི་ ཇ་ག་དེན་གེ་བུ་ སྨོན་ལམ་ཏབ༌ཅོ།

²⁰ ཨོ་ཉ་དེན་གེ་ ཇང་ཤོ་ བཙོན་ག་ཁེ་ཁཱན་ གཞུང་ཚབ་གི༌ལ། ཇི་གི་བཤད་པེ་ཁེ་ཝ་དང་ཏུ་ཉི་ ཡོང་ད་སུར་རང་མ་ཁེ་ལཱན་ བཤད་པེ་རེ་ཆེན་དག་ཉི་ ཇ་ག་དེན་གེ་ སྨོན་ལམ་ཏབ༌ཅོ།

²¹ ཏུ་ཁི་ཀཱས་ཤོ་ ཇི་གི་ཕང་ཁཱན་ ཀོ་ཏ་དང་ དམ་ཚིག་ཙུང་ཉི་ཕྱག་ཞུ་ཁཱན་ གཙོ་བོ་ག་ གཡོག་པ་གི༌ལ། ཉི་ཇང་ཧང་ད་བུ་ཅ་གི་ལ་སྨོ་ ཇི་གི་ཧང་ཨན་ཅ་གི་ལ་སྨོ་ ཨོ་ཉ་ཀོར་གེ་ རོ་ཀི་ན་ཧ་ ཐམས་ཅན་རང་ཡེག༌པེ།

²² དེན་ཆེན་རང་ ཨོ་ཉ་ག་དེན་གེ་ ཇི་གི་ རོག་ཀུན་ཏིན་ཅ་གི༌ལ། ཧང་ཡ་དག་ནེ་ལ་ ཨའི་ཧང་ད་བུ་ཅ་གི་ལ་སྨོ་ ན་ཤི་སེན་ཆེན། ཉི་རོ་ཀི་ ན་ཧ་ནོ་ཝང་ཨ་ལེ་རེ་ཆེན།

²³ ཡུང་ཟི་བ་ཐམས་ཅན་ག་ སྐྱིད་པུ་ཨུན་ཆེན། ཉི་ཡབ་དཀོན་མཆོག་དང་ གཙོ་བོ་ཡི་ཤུ་ཁིརིས་ག་ སྙིང་རྗེ་དང་དྲག་ཉི་ དད་པ་གནང་ཆེན།

²⁴ ཉི་ཨ་ཧ་གཙོ་བོ་ཡི་ཤུ་ཁིརིས་ཁེ་པ་ ཧ་ལ་རང་ མ་ཆུ་མ་ཨ་ཉི་ཕང་ཁཱན་ ཐམས་ཅན་ག་ཐུང་ཀ་ དཀོན་མཆོག་གི་ ཐུགས་རྗེ་གཟིགས་ཉི་གནང་ཆེན༎