ཨེ་ཕི་སི། 5 - Tshangla New Testament (BSI)

འོད་ཟེར་ནང་ཀ་ཆོའི།

¹ ན་ཤི་ཧང་ཨ་ཝ་ཐུར་ དཀོན་མཆོག་གེ་ དཔེ་གོད༌ཅོ། ཧང་ཡ་དག་ནེ་ལ་ ན་ཧ་བ་ཤོ་ དཀོན་མཆོག་ག་ སྲས་སྲས་མོ་བ་གི༌ལ།

² ཉི་ཁིརིས་གི་ ཨའི་ཕང་པ་ཨ་དེན་གེ་ རོ་ཀི་རོག་ཏེན་ག་ཚེ་བུ་ ཨ་ཧ་དེན་གེ་ དཀོན་མཆོག་ག་ཏཱན་ཕུལ༌བ། ཉི་ཨུ་ཉུ་ཤོ་ དཀོན་མཆོག་ག་ ཐུགས་ཀ་ཚུད་ཁཱན་ བསང་དང་ མཆོད་པ་གི་ཝ་ཆོ༌ཝ། ཉི་ཁིརིས་གི་ མཛད་པ་པུརུས་ཀིན་ཨ་ཉི་ ན་ཧ་ཚེ་བུ་ སྙིང་རྗེ་གི་ཕུང་མ་ ཨོ་ཕེ་ཁེ༌ལེ།

³ ན་ཧ་པོང་ཀ་ ལུས་འབྲེལ་མ་ཙང་མ་དང་ ཙོག་པ་བ་ ཉི་ངན་པ་བག་ཆགས་ ཧང་རང་ཨོ་ཕེ་མང་ཕ། ཧང་ཡ་དག་ནེ་ལ་ ཨུ་ཉུ་ད་བུ་སྡིག་པ་བ་ དཀོན་མཆོག་ག་ དམ་པའི་སོ་ངོ་བ་ཀི་ ཧང་ཏེན་ཨ་ལེ་རེ་བེ་ཡ།

⁴ ངི་ནང་ཁུ་སི་སི་ཨ་ཝ་ ཆཱས་བ་དང་ ཇུང་ཁུངས་མ་ཁཱན་ཆཱས་བ་ ཉི་ཙོ་ཁ་ཇིག་ཉི་ གེ་ཏྲ་ཨ་ལེ་མང་ཕ། དག་པ་ཀབ་ཉི་ ན་ཤི་བཀའ་དྲིན་བསམ་མེ་ཁེ༌ལེ།

⁵ ཨོ་ཐ་ཆཱས་ ན་ཤི་ཏེན་ཏེན་ཨ་ཉི་ ཧ་གོ་ལེ་ཁེ༌ལེ། ལུས་འབྲེལ་མ་ཙང་མ་དང་ ཙོག་པ་ ཉི་ངན་པ་བག་ཆགས་ཨ་ཁཱན་ སོ་ངོ་བ་ཀི་ (ངན་པ་བག་ཆགས་ཨ་ཁཱན་ སོ་ངོ་གི་ འཛམ་གླིང་ག་རྒྱུ་ཅ་ལ་བ་ཀ་ གསོལ་ཝ་ཏབ་ཅ་གི༌ལ།) ཁིརིས་དང་ དཀོན་མཆོག་ག་རྒྱལ་སྲིད་ ཉོང་པེ་མར༌བ།

⁶ ཧང་ཡ་དག་ནེ་ལ་ དཀོན་མཆོག་ག་ ཆ་གནས་མ་ཐ་ཁཱན་བ་ཀ་ཐུང་ཀ་ དཀོན་མཆོག་གི་ ཆདཔ་ཕོག་ཉི་གནང༌མེ། ཨོ་ཉི་ཨ་དེན་གེ་ ཇུང་ཁུངས་མ་ཁཱན་ཆཱས་བ་ཀི་ ན་ཧ་མགུ་སྐོར་ཕི་ལེ་མ་བི།

⁷ ཨོ་ཉི་ཨ་དེན་གེ་ ཨུ་ཉུ་ད་བུ་ སོ་ངོ་བ་ཀི་ཨ་ཁཱན་ཁེ་པ་ ན་ཤི་མ་ཨའི།

⁸ གོ་མ་ཤེབ་ཐུར་ ན་ཧ་བ་ མེར་བུ་ནང་ཀ་ཆོ༌ཝ། ཉི་ཨོམ་ ན་ཧ་བ་ གཙོ་བོ་ག་ འོད་ཟེར་ནང་ཀ་ ཤེག་པ༌ཅ། ཨོ་ཉི་ཨ་དེན་གེ་ འོད་ཟེར་ག་ སྲས་སྲས་མོ་རི་ཉི་ ཆོ་ལེ་ཁེ༌ལེ།

⁹ ཧང་ཡ་དག་ནེ་ལ་ འོད་ཟེར་ག་སེ་ཤོ་ ལེག་པུ་དང་དྲང་པུ་ ཉི་དེན་པ་གི༌ལ།

¹⁰ ཉི་གཙོ་བོ་ག་ ཐུགས་ཀ་ཚུད་ཁཱན་ཁེ་པ་ ན་ཤི་ལམ་ཤོ།

¹¹ ན་ཤི་ཁུངས་ཧང་རང་མ་ཁཱན་ མེར་བུ་ག་ལའི་ ཨ་ལེ་མང་གི་ཝ་ ལག་ཏང་ ཨུ་ཉུ་ད་བུ་ཨ་ཁཱན་སོ་ངོ་བ་ འོད་ཟེར་ནང་ཀ་ ཕ་ལེ་གོད༌ཅོ།

¹² ཧང་ཡ་དག་ནེ་ལ་ ཆ་གནས་མ་ཐ་ཁཱན་བ་ཀི་ ཙང་ཀེན་ཨ་ཉི་ ཧང་ཨན་ཅ་གི་ལ་སྨོ་ ཨོ་ཉ་ཀོར་གེ་ ཡེག་པེ་ག་བུ་ ངི་ནང་ཁུ་ན།

¹³ དག་པ་ཀབ་ཉི་ འོད་ཟེར་ནང་ཀ་ཆོ་ཁཱན་ ཐམས་ཅན་རང་ ཐོང་མེ་རེ་བ་རིན༌ཅ།

¹⁴ ཧང་ཡ་དག་ནེ་ལ་ ཐམས་ཅན་རང་ ཐོང་མེ་རེ་བ་ཅོད་ཁཱན་ཁེ་པ་ འོད་ཟེར་གི༌ལ། ཨོ་ཉི་ཨ་དེན་གེ་ ཨོ་ཐེན་ཤོན༌ཅ་ ཡིབ་ཁཱན་བ་ ག་ཝུའི། ཤི་ཝ་གེ་ལོག་ཉི་ཝུའི། ཉི་ཁིརིས་གི་ ན་ཧ་ཐུང་ཀ་ འོད་ཟེར་ཤར་ཉི་གནང་མེ་དག༌ཉི།

¹⁵ ཨོ་ཉི་ཨ་དེན་གེ་ ན་ཧ་བ་ ཧང་ཏེན་ཆོན་ཅ་གི་ལ་སྨོ་ རིག་པ་སྒྲིམ་ཉི་ ཡོང་བ་བ་ད་བུ་རི་ཉི་མང་གི་ཝ་ མཁས་ཏྲ་ད་བུ་ཨ་ཉི་ ཆོ་ལེ་ཁེ༌ལེ།

¹⁶ ཨོ་ཐ་ངན་པ་དུས་ག་ ཧབ་ཏུར་གོ་སྐབས་ཉོང་པ་ཐུར་ ལེག་པུ་ཨ་ལེ་ག་དེན་གེ་ ཙ་དྲེག༌ཅོ།

¹⁷ ཨོ་ཉི་ཨ་དེན་གེ་ ཡོང་བ་རི་ཉི་ ཆོ་ལེ་མང་གི་ཝ་ གཙོ་བོ་ག་ཐུགས་བཞེད་ ཧང་གི་ལ་སྨོ་ ན་ཤི་ཧ་གོའི།

¹⁸ ཞུ་ཇམ་ཉི་ ཞུ་སུང་མ་ཁུའི། ཧང་ཡ་དག་ནེ་ལ་ ཨུ་ཉུ་གི་ ན་ཧ་ཚེ་ མེ་པ་ཕིན༌ཅ། དག་པ་ཀབ་ཉི་ ན་ཧ་ཚེ་ཁེ་པ་ དམ་པའི་ཐུགས་ཉིད་གི་ཕུང་ཤོ།

¹⁹ མགུར་མ་དང་ བསྟོད་པ་ག་མགུར་མ་ ཉི་ཐུགས་ཉིད་ག་ངང་ག་ཐུང་ཀེ་ཨ་ཉི་ ཐུར་དང་ཐུར་ག་ཏཱན་ ཆཱས་ཨའི། ཉི་གཙོ་བོ་ག་ མགུར་མ་ཕུལ་ཉི་ ན་ཧ་སེམས་ཀ་ སྙན་ཆ་ཏྲོག༌ཅོ།

²⁰ ཉི་ཧ་ལ་ཨ་ནེ་བུ་ ཐམས་ཅན་ག་དེན་གེ་ ཨ་ཧ་གཙོ་བོ་ཡི་ཤུ་ཁིརིས་ག་ མཚན་གེ་ཨ་ཉི་ ཡབ་དཀོན་མཆོག་ག་ བཀའ་དྲིན་བསམ་ཤོ༎

ཕེ་ཝག་ཙ་བ་དང་ མེ་ཝག་ཙ༌བ།

²¹ ཁིརིས་གེ་ཡོང་ཁེ་ཉི་ ཐུར་དང་ཐུར་ག་ ཕརའ་ཁེ་ཆོའི།

²² ནའི་མེ་ཝག་ཙ་བ་ཀི་ གཙོ་བོ་ག་ཕརའ་ཁེ་ ཆོ་ཝ་པུརུས་ཀིན་ཨ་ཉི་ རང་རང་ས་ཕེ་ཝག་ཙ་ག་ ཕརའ་ཁེ་ཆོ་ལེ་ཁེ༌ལེ།

²³ ཧང་ཡ་དག་ནེ་ལ་ ཕེ་ཝག་ཙ་ཤོ་ མེ་ཝག་ཙ་ག་ ཤ་རང་གི༌ལ། ཉི་ཁིརིས་ཤོ་ རོ་ཀ་སྐུ་གཟུགས་ ཆོས་ཚོགས་ག་ཤ་རང་དང་ སྐྱབས་མགོན་གི༌ལ།

²⁴ ཆོས་ཚོགས་གི་ ཧང་ག་རང་གི་ནེ་བུ་ ཁིརིས་ག་ཕརའ་ཁེ་ ཆོ་ཝ་པུརུས་ཀིན་ཨ་ཉི་ མེ་ཝག་ཙ་བ་ཀི་བུ་ རང་རང་ས་ཕེ་ཝག་ཙ་ཕརའ་ཁེ་ ཆོ་ལེ་ཁེ༌ལེ།

²⁵ ཁིརིས་གི་ ཆོས་ཚོགས་ཕང་ཉི་ རོ་ཀ་ཚེ་ ཆོས་ཚོགས་ག་དེན་གེ་ གནང་མ་པུརུས་ཀིན་ཨ་ཉི་ ཕེ་ཝག་ཙ་བ་ཀི་བུ་ རང་རང་ས་མེ་ཝག་ཙ་ ཕང་པེ་ཁེ༌ལེ།

²⁶ རོག་གཤགས་ཉི་ ཆོས་ཚོགས་ཁེ་པ་ དམ་པ་ཅོད་པེ་དེན་གེ་ རི་གི་ཟིག་ཉི་ཆུམ་དེན་གེ་ རོ་ཀ་གསུང་ག་ཐུང་ཀེ་ཨ་ཉི་ ཟིག་གནང༌མ།

²⁷ ཆོས་ཚོགས་ཁེ་པ་ གནམ་མེད་ས་མེད་ གཟི་བརྗིད་ཅན་རི་ཉི་ མ་ཁ་དང་ངེར་མ་ ཉི་ཅོན་ཧང་རང་མ་ཝ་ཨ་ཉི་ ལག་ཏང་ དམ་པ་དང་ ཅོན་ད་སུར་རང་མ་ཁཱན་ཅོད་ཐཱན་ རོག་ཏེན་ག་ སྐུན་མདུན་ག་ ཀེ་བེ་དེན་གེ་གི་ཝ༌ལ།

²⁸ ཨུ་ཉུ་པུརུས་ཀིན་ཨ་ཉི་ ཕེ་ཝག་ཙ་བ་ཀི་བུ་ རང་རང་ས་མེ་ཝག་ཙ་ཁེ་པ་ རང་ཏེན་ག་ལུས་པུ་ཙི་ཉི་ ཕང་པེ་ཁེ༌ལེ། ཉི་རོ་ཀ་ མེ་ཝག་ཙ་ཕང་ཁཱན་ སོ་ངོ་གི་ རོག་ཏེན་བུ་ ཕང་ཅ་གི༌ལ།

²⁹ ཨི་བི་གི་རང་ རང་ཏེན་ག་ལུས་པུ་ག་ མ་ཟེས་པ་ཨ་ལུ་མཱན༌ཅ། དག་པ་ཀབ་ཉི་ ཁིརིས་གི་ ཆོས་ཚོགས་ག་ ཨ་ཝ་པུརུས་ཀིན་ཨ་ཉི་ རོ་ཀི་བུ་ རོ་ཀ་ལུས་པུ་ག་དེན་གེ་ བདག་འཛིན་ཨ་ཉི་ ཟཱན་ཇམ་བ་བིན༌ཅ།

³⁰ ཧང་ཡ་དག་ནེ་ལ་ ཨ་ཧ་བ་ ཐམས་ཅན་རང་ རོ་ཀ་སྐུ་གཟུགས་ག་ དབང་པོ་བ་གི༌ལ།

³¹ ཨོ་ཉི་ཨ་དེན་གེ་ ཕེ་ཝག་ཙ་གི་ རོ་ཀ་ཨ་པ་དང་ ཨ་མ་ཐུབ་ཐཱན་ཐཱན་ རོ་ཀ་མེ་ཝག་ཙ་ཀབ་ཉི་ཆོན༌ཅ། ཉི་རོག་ཉིག་ཙིང་ ལུས་པུ་ག་ ཐུར་རིན༌ཅ།

³² ཨོ་ཐ་ཆཱས་ཁེ་པ་ ཧ་གོ་ལེ་མར་བ་ག་ཆཱས་ ཆི་ལུ་ཐུར་གི༌ལ། དག་པ་ཀབ་ཉི་ ཇི་གི་དཔེ་གེན་ཁཱན་ཁེ་པ་ ཁིརིས་དང་ ཆོས་ཚོགས་ཁེ་པ་ ཐུར་གི་ཝ་ཀོར་གེ་གི༌ལ།

³³ ཧང་ག་རང་གི་ནེ་བུ་ ནའི་ཐམས་ཅན་གི་ རང་ཏེན་ཕང་པ་པུརུས་ཀིན་ཨ་ཉི་ ན་ཧ་མེ་ཝག་ཙ་བུ་ ཕང་པེ་ཁེ༌ལེ། ཉི་མེ་ཝག་ཙ་གི་ རོ་ཀ་ཕེ་ཝག་ཙ་ག་ གུས་ཞབས་ཨ་ལེ་ཁེ༌ལེ༎