ཨེ་ཕི་སི། 4 - Tshangla New Testament (BSI)

ལུས་པུ་ག་ཆ་མེ་ཁེ༌ལེ།

¹ ཨོ་ཉི་ཨ་དེན་གེ་ ཇ་ག་གཙོ་བོ་ག་ཡོར་ཀེ་ བཙོན་པ་རི་ཁཱན་གི་ཞུན་ཅ་ དཀོན་མཆོག་གི་ ན་ཧ་བ་ར་ཝ་དང་ཏུ་ཉི་ ན་ཧ་ཚེ་ག་ རུང་པ་ཨ་ཉི་ ཆོ་ལེ་ཁེ༌ལེ།

² གནམ་མེད་ས་མེད་ ཉམ་ཆུང་དང་ ཞི་ཇམ་པུ་ཨ་ཉི་ཆོའི། བཟོད་པར་སྒོམ་ཉི་ སྙིང་རྗེ་ག་ཐུང་ཀེ་ཨ་ཉི་ ཐུར་དང་ཐུར་ཀབ་ཉི་ ཐེས་པེ་གོད༌ཅོ།

³ ཆམ་ཉི་ཐ་ཁཱན་ སྐྱིད་པུ་ག་ཐུང་ཀེ་ཨ་ཉི་ ན་ཧ་བ་ཐུགས་ཉིད་ག་ ཐུར་རི་ཉི་ཆོ་ལེ་ག་ མིག་པ་ཕི་ཉི་ ཙ་དྲེག༌ཅོ།

⁴ ན་ཧ་བ་ ར་ལ་ཀབ་ཉི་ རེ་ཆ་ཐུར་ག་ཏཱན་ ར་ཝ་པུརུས་ཀིན་ཨ་ཉི་ སྐུ་གཟུགས་དང་ ཐུགས་ཉིད་བུ་ ཐུར་ཤ༌ཅ།

⁵ གཙོ་བོ་ཐུར་ཤ༌ཅ། དད་པ་ཐུར་ཤ༌ཅ། ཉི་ཁྲུས་གསོར་བུ་ཐུར་ཤ༌ཅ།

⁶ ཉི་དཀོན་མཆོག་བུ་ཐུར་ཤ༌ཅ། རོག་ཤོ་ ཐམས་ཅན་ག་ཡབ་གི༌ལ། ཐམས་ཅན་ག་ཐུང་ཀེ་གི༌ལ། ཐམས་ཅན་ག་ནང་ཀ༌ཅ། ཉི་ཐམས་ཅན་ག་ཐུང་ཀེ་ཨ་ཉི་བཞུགས༌ཅ།

⁷ ཨོ་ཉེ་རང་གི་ནེ་བུ་ ཁིརིས་གི་ ཨའི་ཐམས་ཅན་ག་ ཇོབ་ཇོབ་ཨ་ཉི་ རང་རང་ས་ སེ་རབ་རེ་གནང་མ༌ཅ།

⁸ གསུང་རབ་གེ་ཤོ་ཝ་པུརུས་ཀིན་ཨ་ཉི་ རོག་ ག་ཏཱན་བྱོན་མ་ཀབ་ཉི་ རོ་ཀི་བཙོན་པ་མང་པུ་ཐུར་ རིག་ཉི་བསྣམས༌པ། ཉི་རོ་ཀི་ སོ་ངོ་བ་ཀ་ སེ་རབ་གནང་མ་ དག༌ཉི།

⁹ རོག་ ག་ཏཱན་བྱོན་མ་དག་ཉི་ ཤོ་ཁཱན་གི་ རོག་གོ་མ་གེ་རང་ དོང་བྱོན་ཐཱན་ ཕརའ་ཁ་ཆོ་ཁཱན་ འཛམ་གླིང་ག་ བཞུགས་པ་དག་ཉི་ གེན་ཅ་གི༌ལ།

¹⁰ རོག་དོང་བྱོན་ཁཱན་ཁེ་པ་ ག་ཏཱན་བྱོན་ཁཱན་རང་གི༌ལ། ཉི་སྲིད་པ་ ཐམས་ཅན་རང་ དབང་པེ་དེན་གེ་ རོག་ཁེ་པ་ ཞིང་ཁམས་ ཐམས་ཅན་གེ་ ཐུང་ཀ་ཏཱན་ བྱོན་མ༌ལ།

¹¹ རོ་ཀི་ཨོ་ཐ་སེ་རབ་ཁེ་པ་ ཆོས་ཚོགས་ག་གནང་ཅ་གི༌ལ། རོ་ཀི་ཚེ་བང་སྐུ་ཚབ་ ཚེ་བང་ལུང་བསྟན་པ་ ཉི་ཚེ་བང་ཆོས་བཤད་ཁཱན་དང་ ཚེ་བང་ཤི་ཤ་དི་པ་ ཉི་ཚེ་བང་སློབ་དཔོན་ཨན་ ཀེ་ཉི་གནང་མ༌ལ།

¹² རོག་ཏེ་བ་ཀ་ འགན་ཁུར་ཤོ་ ཁིརིས་ག་ སྐུ་གཟུགས་ཁེ་པ་ བཞེངས་པེ་དེན་གེ་ དཀོན་མཆོག་ག་ སོ་ངོ་བ་ཕྱག་ཞུ་ལེ་ག་ ཅམ་པེ་དེན་གེ་གི༌ལ།

¹³ དད་པ་དང་ དཀོན་མཆོག་ག་ སྲས་ག་ཀོར་གེ་ ཡོན་ཏན་ག་ ཨ་ཧ་བ་ ཐུར་མ་རི་ཝ་སག་པུ་དང་ ཨ་ཧ་བ་ ལེག་པུ་ཨན་ཕུག་ཉི་ ཁིརིས་ད་བུ་རང་ མ་རི་ཝ་སག་པུ་གི༌ལ།

¹⁴ ཉི་ཨ་ཧ་བ་ ཝག་ཙ་བ་ད་བུ་ཨ་ཉི་རང་མ་ཆོ༌ལ། མགུ་སྐོར་དང་ ཇི་སྐོར་ཕི་ཁཱན་ སོ་ངོ་བ་ཀི་ སོ་ད་ཕི་ཉི་ཡེ་ལ་ཀབ་ཉི་ མ་ཉཱན༌པ། ཨོ་ཉ་བ་ཤོ་ ཨ་ཧ་བ་ ལེང་ཐེང་ཕག་ཉི་བུ་ཁཱན་ རི་དི་དང་ མཚོ་རི་ལག་ཁཱན་ ད་བུ་ཐུར་གི༌ལ།

¹⁵ ལག་ཏང་ སྙིང་རྗེ་ག་ཐུང་ཀེ་ཨ་ཉི་ ཨ་ཤི་དེན་པ་ཁེ་པ་ ཙུང་ཉི་ཐ་ལེ་ཁེ༌ལེ། ཉི་ཧང་ག་རང་གི་ནེ་བུ་ ཨ་ཧ་བ་ ཁིརིས་ད་བུ་ རི་ལེ་ཁེ༌ལེ། ཁིརིས་ཤོ་ རོ་ཀ་སྐུ་གཟུགས་ ཆོས་ཚོགས་ག་ ཤ་རང་གི༌ལ།

¹⁶ ལུས་པུ་ག་ བཱརའ་དབང་པོ་ ཐམས་ཅན་རང་ རོ་ཀེ་ཨ་ཉི་ཏབ་ཐུར་ཏུ་ཝ༌ཅ། ཉི་ལུས་པུ་ཁེ་པ་ ཚིག་བ་ཀི་ཨ་ཉི་ ཏབ་ཐུར་ཙུང་ཉི་ ཐ་ཝ༌ཅ། ཉི་དབང་པོ་ཐམས་ཅན་གི་ རང་རང་ས་ཨ་ལེ་ཁེ་ཁཱན་ ལའི་ཁེ་པ་ཨ་ལ་ཀབ་ཉི་ ལུས་པུ་ཐམས་ཅན་རང་ ཏབ་ཐུར་ཟོག༌ཅ། ཉི་སྙིང་རྗེ་ག་ཐུང་ཀེ་ཨ་ཉི་ རང་བཞིན་གེ་རང་ ག་བཞེངས༌ཅ༎

ཚེ་སིང་མ་དང་ཚེ་མཱན༌མ།

¹⁷ ཇི་གི་ན་ཧ་ གཙོ་བོ་ག་མཚན་ག་ བཀའ་བིན་ཅ་ དཀོན་མཆོག་མ་མཇལ་ཁཱན་བ་ ད་བུ་ཨ་ཉི་མ་ཆོའི། རོག་ཏེ་བ་ཀི་ མི་ཁཱན་ཁེ་པ་ ཁུངས་ཧང་རང་མཱན༌ཅ།

¹⁸ རོག་ཏེ་བ་ཀ་སེམས་ཁེ་པ་ མེར་བུ་ནང་ཀ༌ཅ། ཉི་རོག་ཏེ་བ་ཀི་ ལུང་ཏོང་ཨ་ཉི་ མ་སེ་ལཱན་ སེམས་ཀག་ཏར་ཅོད་པ་ཨ་དེན་གེ་ རོག་ཏེ་བ་ དཀོན་མཆོག་གི་ གནང་ཁཱན་ཚེ་གེ་ ལམ་རིང་མུ་རི་ཝ༌ཅ།

¹⁹ ཉི་རོག་ཏེ་བ་ ངི་ནང་ཁུ་ལེ་མ་སེ་ཝ་རི་ཉི་ ངན་པ་དང་ ཁམ་ལོག་པ་ཨ་ཝ་ ལའི་ཙང་པུ་རང་ཨ་ཉི་ ཨུ་ཉུ་ད་བུ་ལའི་ ལག་ཏང་ མང་པུ་ཨ་ལེ་ག་ བག་ཆགས་ཨ་ཁཱན་ སོ་ངོ་བ་རི་ཝ༌ཅ།

²⁰ དག་པ་ཀབ་ཉི་ ན་ཤི་ཁིརིས་ག་ཀོར་གེ་ ལམ་པེ་གང་ཀ་ ཨུ་ཉུ་ད་བུ་མ་ལམ་ཅི།

²¹ ན་ཧ་བ་ ཁིརིས་ག་ སློ་མ་གི་ཝ་ཨ་དེན་གེ་ ཡི་ཤུ་ག་ནང་ཀ་ཆོ་ཁཱན་ དེན་པ་ག་ཀོར་གེ་ ཏེན་ཏེན་རང་ ན་ཧ་ཏཱན་ཡེ་ཝ༌ཅ།

²² ཨོ་ཉི་ཨ་དེན་གེ་ ངན་པ་བག་ཆགས་དང་ མགུ་སྐོར་གི་ཕུང་ཁཱན་ ན་ཧ་ཚེ་མཱན་མ་ཁེ་པ་ ཐུབ་ཐའི། ཨུ་ཉུ་ཤོ་ ན་ཧ་གོ་མ་ག་ ཚེ་མཱན་མ་ཁེ་པ་གི༌ལ།

²³ ཉི་ན་ཧ་མི་ཐང་དང་ ཐིང་ལོམ་ཁེ་པ་ སིང་མ་རི་ལེ་ཁེ༌ལེ།

²⁴ ཉི་ཚེ་སིང་མ་ཁེ་པ་ ཡེ་ལེ་གོད་པེ་ཁེ༌ལེ། ཧང་ཡ་དག་ནེ་ལ་ ཚེ་སིང་མ་ཤོ་ དེན་པ་རང་ དྲང་པུ་དང་ དམ་པ་ག་ཤེག་པ་ དཀོན་མཆོག་པུརུས་ཀིན་ཨ་ཉི་རང་ བཀོད་ཉི་གནང་མ༌ཅ།

²⁵ ཨོ་ཉི་ཨ་དེན་གེ་ ནའི་ཐམས་ཅན་གི་ སོ་ད་ཕི་ལེ་ཐུབ་ཐ་ཉི་ ཐུར་དང་ཐུར་ག་ཏཱན་ དེན་པ་ཡེག་པེ་ཁེ༌ལེ། ཧང་ཡ་དག་ནེ་ལ་ ཨའི་ཐམས་ཅན་རང་ ལུས་པུ་ཐུར་ག་ དབང་པོ་བ་གི༌ལ།

²⁶ ཉི་ན་ཤི་ རོ་ཙིག་པ་ཀབ་ཉི་ སྡིག་པ་མ་ཨའི། ཉི་ངམ་མ་ནུ་ཕེ་གོ་མ་ ན་ཧ་རོ་ཤི་ལེ་ཁེ༌ལེ།

²⁷ ཉི་བདུད་ཀ་ བི་ཏ་པེ་ག་བཱརང་མ་བི།

²⁸ དྲོ་ཝཱན་པ་གི་ དྲོ་ཝཱན་ཨ་ལེ་ག་ཐུབ་ཐའི། ཉི་དྲང་པུ་ཨ་ཉི་ རང་ཏེན་ག་ ག་དང་གི་ལའི་ཨའི། ཉི་བཱརའ་ནང་དོག་ཉི་ཆོ་ཁཱན་བ་ཀ་ སེམས་ཤོ་ཉི་རུམ༌ཅོ།

²⁹ ན་ཧ་ནོ་ཝང་གེ་ ཆཱས་ཙོག་པ་བ་མ་ཤོའི། ཉི་ན་ཧ་ཆཱས་ཉཱན་ཁཱན་ག་ སེམས་གསོ་ཉོང་པེ་དེན་གེ་ ན་ཧ་ཆཱས་ཁེ་པ་ ལེག་པུ་དང་ ཕཱན་ཏོག་པ་ག་ཆཱས་ ཨོ་ཕེ་ཁེ༌ལེ།

³⁰ ཉི་དཀོན་མཆོག་ག་ དམ་པའི་ཐུགས་ཉིད་ ཐུགས་དོགས་པེ་མ་བི། ཧང་ཡ་དག་ནེ་ལ་ དཀོན་མཆོག་གི་ ཚེ་ཐར་གནང་མེ་ནོང་ཀ་ ན་ཤི་ཐར་པ་ཉོང་པེ་གི་ལ་དག་ཉི་ གེན་མེ་དེན་གེ་ དཀོན་མཆོག་གི་ དམ་པའི་ཐུགས་ཉིད་གི་ ན་ཧ་ཐུང་ཀ་ ཐེལ་ཙི་ཕི་ཉི་གནང་མ༌ཅ།

³¹ ཁ་ལུ་བ་དང་ མ་ཟེས་པ་ཨ་ལེ་ག་ ཉི་རོ་ཙིག་པེ་ག་ཐུབ་ཐའི། ཆཱས་མ་ལེག་པ་མ་ཨའི། ཉི་ཁ་མ་ཏང་ཤོ། ཉི་མ་ལེག་པ་ ཧང་རང་གི་ནེ་བུ་མ་ཨའི།

³² ལག་ཏང་ ཐུར་དང་ཐུར་ག་ཏཱན་ བྱམས་པར་ཀེ་ཉི་ཕང་ཉི་ དཀོན་མཆོག་གི་ ཁིརིས་ག་ཐུང་ཀེ་ཨ་ཉི་ ན་ཧ་སྡིག་པ་ག་ བཤགས་པ་གནང་མ་པུརུས་ཀིན་ཨ་ཉི་ ན་ཤི་བུ་ ཐུར་དང་ཐུར་ག་ བཀའ་དྲིན་བསྐྱང་ཤོ༎