ཨེ་ཕི་སི། 3 - Tshangla New Testament (BSI)པ་ཝལ་ཤོ་ ཡ་ཧུ་དི་པ་མང༌གི༌ཁཱན༌བ༌ཀ་ ཆོས་བཤད་ཁཱན་གི༌ལ། 1 ཨོ་ཉི་ཨ་དེན་གེ་ ཇི་གི་ནའི་ ཡ་ཧུ་དི་པ་མང་གི་ཁཱན་བ་ཀ་ འཐེན་ལེག་པུ་བཤད་པ་ཨ་དེན་གེ་ ཇང་ཁིརིས་ཡི་ཤུ་ག་ བཙོན་པ་རི་ཝ༌ཅ། 2 ན་ཧ་ཕཱན་ཏོག་ཅེན་དག་པ་གི་ དཀོན་མཆོག་གི་ ཐུགས་རྗེ་གཟིགས་ཉི་ ཨོ་ཐ་ལའི་ཁེ་པ་ ཇ་ག་ཏཱན་ གནང་མ་གི་ལ་དག་ཉི་ ན་ཤི་སེན༌ཅ། 3 ཨུ་ཉུ་ཤོ་ ཇ་ག་ཏཱན་མཇལ་ཁ་གནང་ཉི་ དཀོན་མཆོག་གི་ རོ་ཀ་གུམ་ནང་ཡོན་ཏན་ཁེ་པ་ གནང་མ་གི༌ལ། ཨོ་ཐ་ཡི་གུ་ནང་ཀ་ ཨོ་ཉ་ཀོར་གེ ཇི་གི་ན་ཧ་ཏཱན་ད་སུར་ འབྲི་བ༌ཅ། 4 ཉི་ཨོ་ཐ་ཡི་གུ་ལྷག་ཅ་ཨ་ཉི་ ཁིརིས་ག་ཀོར་གེ་ ཧ་གོ་ལེ་མར་ཁཱན་ཆཱས་ཁེ་པ་ ཇི་གི་ཧབ་ཏུར་ ཧ་གོ་ལེ་རེ་བ་ལ་སྨོ་ ན་ཤི་སེ་ལེ་རེ༌བེ། 5 ཨོ་ཐ་ཆཱས་ཁེ་པ་ དཀོན་མཆོག་གི་ བཱརའ་མི་རབས་བ་ཀ་ མཇལ་ཁ་མ་གནང་མ་ཆོ༌ཝ། དག་པ་ཀབ་ཉི་ ཨོམ་ཤོ་ ཐུགས་ཉིད་ག་ཐུང་ཀེ་ཨ་ཉི་ དམ་པའི་སྐུ་ཚབ་བ་དང་ ལུང་བསྟན་པ་བ་ཀ་ཏཱན་ མཇལ་ཁ་གནང་མ༌ལ། 6 དཀོན་མཆོག་ག་ གུམ་ནང་ཆཱས་ཤོ་ ཨུ་ཐུ་གི་ལ་ འཐེན་ལེག་པུ་ག་ཐུང་ཀེ་ཨ་ཉི་ ཡ་ཧུ་དི་པ་མང་གི་ཁཱན་བ་བུ་ ཨིས་རེལ་ག་ སོ་ངོ་བ་ཀབ་ཉི་ ཐོབ་ཐང་དོ་ལུ་ཉོང་ཁཱན་རི༌ཝ། ལུས་པུ་ཐུར་ག་ དབང་པོ་བ་གི༌ལ། ཉི་ཁིརིས་ཡི་ཤུ་ག་ཐུང་ཀེ་ཨ་ཉི་ དབུ་མནའ་བཞེས་ཁཱན་ བྱིན་རླབས་བུ་ བོང་མེ་ཉོང༌པེ། 7 རོ་ཀ་སྟོབས་དབང་གི་མཛད་ཁཱན་ ཕྱག་ལཱ་ག་ཐུང་ཀེ་ཨ་ཉི་ དཀོན་མཆོག་གི་ ཐུགས་རྗེ་གཟིགས་ཉི་ ཇ་ག་སེ་རབ་གནང་མ་ཨ་དེན་གེ་ ཇང་ཁེ་པ་ ཨོ་ཐ་འཐེན་ལེག་པུ་ག་ གཡོག་པ་རི་ཝ་གི༌ལ། 8 ཇང་ཁེ་པ་ དཀོན་མཆོག་ག་སོ་ངོ་ ཐམས་ཅན་གེ་ཟེ་མུ་ཐུར་ གིན་ཐཱན་རང་གི་ནེ་བུ་ ཁིརིས་ག་ནང་ཀ་ཆོ་ཁཱན་ རྒྱུ་ནོར་ཁེ་པ་ལམ་ནེ་བུ་ ཧ་ལ་རང་ལམ་ཉི་ མ་ཆུ་མ་ཀོར་གེ་ ཡ་ཧུ་དི་པ་མང་གི་ཁཱན་བ་ཀ་ཏཱན་ བཤད་པེ་ག་ཐུགས་རྗེ་ཁེ་པ་ རོ་ཀི་ཇ་ག་ཏཱན་གནང༌མ། 9 ཐམས་ཅན་རང་བཀོད་ཁཱན་ དཀོན་མཆོག་གི་ གོ་མ་གེ་རང་ གུམ་ཉི་ཐ་ཁཱན་ ཨོ་ཐ་འཆར་གཞི་ཁེ་པ་ སོ་ངོ་ཐམས་ཅན་ག་ཏཱན་ ཡེག་པེ་དེན་གེ་ དཀོན་མཆོག་གི་ ཇང་སི་ཝ་གི༌ལ། 10 དཀོན་མཆོག་གི་ ཨོ་ཐེན་མཛད་པེ་ག་དེན་ཐ་ཤོ་ ཆོས་ཚོགས་ག་ཐུང་ཀེ་ཨ་ཉི་ ཞིང་ཁམས་ནང་ཀ་རང་ དབང་ཁཱན་བ་དང་ དབང་ཚད་ཙུང་ཁཱན་བ་ཀི་ དཀོན་མཆོག་ག་ རིག་པ་མང་པུ་ཆོ་ཁཱན་ཀོར་གེ་ ཧ་གོན་ཆེན་དག་པ་གི་གི༌ལ། 11 ཨོ་ཐ་འཆར་གཞི་ཁེ་པ་ གོ་མ་གེ་རང་ཆོ་ཝ༌ལ། ཉི་ཨོམ་ཤོ་ ཨ་ཧ་གཙོ་བོ་ཡི་ཤུ་ཁིརིས་གི་ཨ་ཉི་ དེན་ཐ་འགྲུབ་ཉི་གནང་མ༌ལ། 12 ཨ་ཤི་རོ་ཀ་ཏཱན་ ཀེ་ཁཱན་དད་པ་དང་ ཁིརིས་ག་ཐུང་ཀེ་ཨ་ཉི་ ཡོང་ད་སུ་རང་མ་ཁེ་ལཱན་ ལོ་དེ་ཏོག་ཏོ་ཨ་ཉི་ དཀོན་མཆོག་ག་ སྐུན་མདུན་ག་ བཅག་པེ་རེ་བ༌ཅ། 13 ཨོ་ཉི་ཨ་དེན་གེ་ ཇི་གི་ན་ཧ་ཏཱན་ཞུན་ཅ་ ཇང་ན་ཧ་ཡོར་ཀེ་ དཀའ་ཝ་ཅཱད་ལ་ཨ་ཉི་ ན་ཧ་བ་སེམས་མ་ཤི། ཇང་དཀའ་ཝ་ཅཱད་ཁཱན་ཤོ་ ན་ཧ་གཟི་བརྗིད་ག་དེན་གེ་གི༌ལ༎ ཨེ་ཕི་སཱས་ག་སོ་ངོ་བ་ཀ་དེན་གེ་ སྨོན་ལམ། 14 ཨོ་ཉི་ཨ་དེན་གེ་ ཡབ་ཀ་སྐུན་མདུན་ག་ ཇི་གི་ ཇ་ག་ཏོང་ཟིང་ཏེས་ཉི་ སྨོན་ལམ་ཏབ༌ཅ། 15 ཉི་ཞིང་ཁམས་ག་ཆོ་ཁཱན་དང་ འཛམ་གླིང་ག་ཆོ་ཁཱན་ ཐམས་ཅན་ག་ཡབ་ཤོ་ རོག་གི༌ལ། 16 རོ་ཀ་ཐུགས་ཉིད་ག་ཐུང་ཀེ་ཨ་ཉི་ ན་ཧ་ནང་ཀ་སོ་ངོ་ཁེ་པ་ ཤུག་ཅཱན་རི་ལེ་དེན་གེ་ རོ་ཀ་གཟི་བརྗིད་ཅན་ག་ རྒྱུ་ནོར་གེ་ཨ་ཉི་ ན་ཧ་བ་སྒྲིང་སྒྲིང་ཅོད་ཉི་ གནང་ཆེན་དག་པ་གི་ ཇི་གི་སྨོན་ལམ་ཏབ༌ཅ། 17 ཉི་དད་པ་ག་ཐུང་ཀེ་ཨ་ཉི་ ཁིརིས་ ན་ཧ་སེམས་ནང་ཀ་ བཞུགས་ཅེན་དག་ཉི་ ཇི་གི་སྨོན་ལམ་ཏབ༌ཅ། ཉི་ན་ཧ་སྙིང་རྗེ་ག་ཙ་དང་ རྨང་ཁེ་པ་ སྒྲིང་སྒྲིང་རིན་ཆེན་དག་ཉི་ སྨོན་ལམ་ཏབ༌ཅ། 18 ཁིརིས་ག་སྙིང་རྗེ་ཁེ་པ་ ཧབ་ཏུར་ཆི་ལུ་ཅ་གི་ལ་སྨོ་ ལེང་ཐེང་ཧབ་ཏུར་ རིང་མུ་ཅ་གི་ལ་སྨོ་ ཡང་ཧབ་ཏུར་ ཅེན་མུ་ཅ་གི་ལ་སྨོ་ ཉི་ཏིང་པུ་ཧབ་ཏུར་ཅ་གི་ལ་སྨོ་ ནའི་དང་ བཱརའ་དཀོན་མཆོག་ག་ སོ་ངོ་ཐམས་ཅན་གི་ ཧ་གོ་ལེ་རེ་བ་ག་ སྟོབས་དབང་ཉོང་ཅེན། 19 རོ་ཀ་སྙིང་རྗེ་ཁེ་པ་ ཧ་ལ་རང་ལེག་པུ་ཨ་ཉི་ སེ་ལེ་མར་ནེ་བུ་ ན་ཤི་ རོ་ཀ་སྙིང་རྗེ་ཁེ་པ་ སེ་ལེ་རེ་ཆེན། ཉི་ཤ་ ན་ཧ་ཚེ་ཁེ་པ་ དཀོན་མཆོག་གི་ཨ་ཉི་ ཕུང༌མེ། 20-21 དཀོན་མཆོག་གི་ རོ་ཀ་སྟོབས་དབང་ག་ཐུང་ཀེ་ཨ་ཉི་ ཨ་ཧ་པོང་ཀ་ ཕྱག་ལཱ་གནང་མ་ཨ་དེན་གེ་ ཨ་ཤི་ཕུན་མ་གེ་དང་ མི་ཝ་གེ་ལག་ཉི་ ཟེར་བེ་མར་བ་ག་ ཕྱག་ལཱ་མང་པུ་གནང་མ་ཨ་དེན་གེ་ དུས་ཏ་བུ་རང་ ཆོས་ཚོགས་ནང་ཀ་དང་ ཁིརིས་ཡི་ཤུ་ག་ནང་ཀ་ དཀོན་མཆོག་ག་ གཟི་བརྗིད་ཕུལ་ཁེ། ཨ་མེན༎ |