ཨེ་ཕི་སི། 2 - Tshangla New Testament (BSI)ཁིརིས་ག་ཐུང་ཀེ་ཨ་ཉི་ ཨའི་གསོན་པོ་རི་ཝ་གི༌ལ། 1 ན་ཤི་དཀོན་མཆོག་ག་ ཆ་གནས་མ་ཐ་ལཱན་ སྡིག་པ་མང་པུ་ སག་པ་ཨ་དེན་གེ་ ན་ཧ་བ་ཤོ་ ཤི་ཝ་ཆོ༌ཝ། 2 ཨུ་ཉུ་གང་ཀ་ ན་ཤི་འཛམ་གླིང་ག་ཆོ་ཁཱན་ ངན་པ་ལམ་གེ་དང་ཆོ༌ཝ། ཉི་ན་ཤི་ ངམ་ཐུང་ཀ་ཆོ་ཁཱན་ ཐུགས་ཉིད་ག་དབང་ཚད་བ་ཀ་ ཆ་གནས་ཐཱན་ཆོ༌ཝ། ཉི་དཀོན་མཆོག་ག་ ཆ་གནས་མ་ཐ་ཁཱན་བ་ ཨོ་མ་ ཨོ་ཉ་ཐུགས་ཉིད་གི་རང་ དབང་པེ་གང༌ཅ། 3 མ་པ་ ཨ་ཧ་བ་བུ་ ཤེབ་ཐུར་ཏ་ ཨུ་ཉུ་ད་བུ་རང་ཆོ་ཉི་ ཨ་ཧ་ལུས་པུ་དང་ སེམས་གི་ ཧང་ཨ་ལེ་ལ་མ་ཐུར་ཨ་ཉི་ རང་ཏེན་ག་ ངན་པ་བག་ཆགས་དང་ཏུ་ཉི་ ཨན་ཆོ༌ཝ། ཉི་རོག་ཏེ་བ་ད་བུ་ཨ་ཉི་ ཨ་ཧ་བ་བུ་ རང་བཞིན་གེ་རང་ དཀོན་མཆོག་ག་ ཁྲིམས་ཉོང་པེ་ཁེ་ཁཱན་ སོ་ངོ་བ་གི་ཝ་ཆོ༌ཝ། 4 དག་པ་ཀབ་ཉི་ དཀོན་མཆོག་ག་སྙིང་རྗེ་ གནམ་མེད་ས་མེད་ཆི་ལུ་དང་ རོ་ཀི་ཨ་ཧ་བ་ གནམ་མེད་ས་མེད་ ཕང་པ་ཨ་དེན་གེ་ 5 རང་རང་ས་སྡིག་པ་ག་ཡོར་ཀེ་ ཨ་ཧ་བ་ ཤིན་ཐཱན་རང་གི་ནེ་བུ་ རོ་ཀི་ཁིརིས་ཀབ་ཉི་ ཨ་ཧ་བ་བུ་ གསོན་པོ་ཅོད་ཉི་གནང༌མ། དཀོན་མཆོག་ག་ ཐུགས་རྗེ་གི་ཨ་ཉི་ཤ་ ན་ཧ་བ་ ཐར་པ་ཉོང་པ་གི༌ལ། 6 ཧང་ཡ་དག་ནེ་ལ་ དཀོན་མཆོག་གི་ ཨ་ཧ་བ་ ཁིརིས་ཀབ་ཉི་ ཤི་ཝ་གེ་ཝུ་ཉི་གནང་ཐཱན་ ཁིརིས་ག་ཐུང་ཀེ་ཨ་ཉི་ ཨ་ཧ་བ་ རོག་ཀབ་ཉི་ ཞིང་ཁམས་ག་ ལང་མེ་ག་གནང་མ༌ཅ། 7 ཨོ་ཐེན་མཛད་པེ་དེན་ཐ་ཤོ་ མ་འོངས་པ་ག་ ཧ་ལ་རང་གི་ནེ་བུ་ ཁིརིས་ག་ཐུང་ཀེ་ཨ་ཉི་ དཀོན་མཆོག་གི་ ཨ་ཧ་ཏཱན་བྱམས་པར་ཀེ་ཉི་ ཟེར་བེ་མར་བ་ག་ ཐུགས་རྗེ་ཆི་ལུ་ གཟིགས་པ་གི་ལ་དག་ཉི་ གེན་མེ་དེན་གེ་ མཛད་པ་གི༌ལ། 8 ན་ཤི་དད་པ་ཀེ་ཉི་ ཐུགས་རྗེ་ཐུང་ཀེ་ཨ་ཉི་ ཐར་པ་ཉོང་པ་གི༌ལ། ཉི་ན་ཤི་ ཙ་དྲེག་ཉི་ཉོང་པ་མང་གི། དག་པ་ཀབ་ཉི་ དཀོན་མཆོག་གི་གནང་ཁཱན་ སེ་རབ་གི༌ལ། 9 ཉི་ལའི་ལེག་པུ་ ཨ་ཝ་ཨ་དེན་གེ་བུ་མང་གི། ཨོ་ཉི་ཨ་དེན་གེ་ ཨི་བི་གི་རང་ ཁམ་ཙོང་མེ་མར༌བ། 10 ཧང་ཡ་དག་ནེ་ལ་ ཨ་ཧ་བ་ དཀོན་མཆོག་གི་བཀོད་པ་ག་ སོ་ངོ་གི༌ལ། ཉི་ཁིརིས་ཡི་ཤུ་ག་ཐུང་ཀེ་ཨ་ཉི་ ལའི་ལེག་པུ་ཨན་ཆེན་དག་པ་གི་ དཀོན་མཆོག་གི་ ཨ་ཧ་དེན་གེ་ གོ་མ་གེ་རང་ ཅབ་ཉི་ཐཱན་གནང་མ༌ཅ༎ ཁིརིས་ག་ནང་ཀ་ཐུར་གི༌ལ། 11 སེམས་ཀ་ཐའི། ན་ཧ་བ་ཤོ་ ཡ་ཧུ་དི་པ་མང་གི་ཁཱན་བ་ གི་ཝ་ཨ་དེན་གེ་ ཤ་ཅཱད་ཁཱན་དག་ཉི་ ཆིན་ཁཱན་སོ་ངོ་བ་ཀི་ ན་ཧ་བ་ཤོ་ ཤ་མ་ཅཱད་ཁཱན་དག་ཉི་ ཆིན་ཆོ༌ཝ། (ཉི་ཨོ་ཉ་ཤ་ཤོ་ སོ་ངོ་ག་ག་དང་གི་ཅཱད་ཆོ༌ཝ།) 12 ཨུ་ཉུ་གང་ཀ་ ན་ཧ་བ་ ཁིརིས་གེ་སོ་སུ་ཨ་ཉི་ ཆོ་ཝ་ཨ་དེན་གེ་ ཨིས་རེལ་ག་ མི་ཁུངས་མང་གི་ཝ་ཆོ༌ཝ། ཉི་དཀོན་མཆོག་གི་ དབུ་མནའ་བཞེས་ཁཱན་འགན་རྒྱ་བ་ ན་ཧ་བ་ཀ་དེན་གེ་ མང་གི་ཝ་ཨ་དེན་གེ་ ན་ཧ་བ་ཤོ་ རེ་ཆ་དང་ དཀོན་མཆོག་མ་ཁཱན་ འཛམ་གླིང་ནང་ཀ་ཆོན་ཆོ༌ཝ། 13 དག་པ་ཀབ་ཉི་ ན་ཧ་བ་ ལམ་རིང་མུ་ག་ཆོ་ནེ་བུ་ ཁིརིས་ག་སྐུ་ཁྲག་ག་ཐུང་ཀེ་ཨ་ཉི་ དཀོན་མཆོག་ག་ ར་ག་ཕ་ཝ༌ཅ། 14 ཁིརིས་རོག་ཏེན་གི་ ཨའི་ཡ་ཧུ་དི་པ་དང་ ནའི་ཡ་ཧུ་དི་པ་མང་གི་ཁཱན་བ་ཆམ་ཉི་ ཐུར་ཅོད་ཉི་གནང་མ༌ཅ། ཨ་ཧ་བ་ མ་ཆ་མཱན་ བོང་ཉི་ཐ་ཁཱན་ དེང་ཙི་ཁེ་པ་ རོ་ཀི་ཆེད་ཉི་གེ༌མ། ཁིརིས་ཤོ་ ཨ་ཧ་སྐྱིད་པུ་གི༌ལ། 15 རོག་གཤགས་ཉི་ ཡ་ཧུ་དི་པ་བཀའ་ཁྲིམས་དང་ ལམ་ལུགས་བ་ མ་ཝ་ཅོད་ཉི་གནང༌མ། རོ་ཀ་ཐུགས་བཞེད་ཤོ་ རོ་ཀ་ཐུང་ཀེ་ཨ་ཉི་ མི་རིགས་ཉིག་ཙིང་ག་བར་ཀ་ སོ་ངོ་སིང་མ་བཀོད་ཉི་ སྐྱིད་པུ་ཅོད་ཉི་གནང་མེ་དེན་གེ་ གི་ཝ་ཆོ༌ཝ། 16 ཉི་ཁྲིམས་ཤིང་ག་ཐུང་ཀེ་ཨ་ཉི་ རོ་ཀ་སྐུ་གཟུགས་ཐུར་ག་ནང་ཀ་ ཨོ་ཐ་མི་རིགས་ཉིག་ཙིང་ཁེ་པ་ དཀོན་མཆོག་ཀབ་ཉི་ ལོག་ཉི་རང་ ཆ་མ་ཅོད་ཉི་གནང༌མ། ཨོ་ཐེན་ཨ་ཉི་ ཨ་ཧ་བར་ཀ་ཆོ་ཁཱན་དགྲ་ཁེ་པ་ མ་ཝ་ཅོད་ཉི་གནང༌མ། 17 ཁིརིས་བྱོན་ཐཱན་ ནའི་དཀོན་མཆོག་གེ་ ཇང་ཀིན་ག་ཆོ་ཁཱན་བ་དང་ དཀོན་མཆོག་ག་ ར་ག་ཆོ་ཁཱན་བ་ཀ་བུ་ སྐྱིད་པུ་ག་འཐེན་ལེག་པུ་ཁེ་པ་ བཤད་ཉི་གནང༌མ། 18 ཉི་ཁིརིས་ག་ཡོར་ཀེ་ དམ་པའི་ཐུགས་ཉིད་ ཐུར་ག་ཐུང་ཀེ་ཨ་ཉི་ ཨའི་ཐམས་ཅན་རང་ ཡབ་ཀ་སྐུན་མདུན་ག་ ཨོ་ཕེ་རེ༌བེ། 19 ཨོ་ཉི་ཨ་དེན་གེ་ ན་ཧ་བ་ ཨོ་མ་བུ་ ཕིས་ཀ་སོ་ངོ་དང་ གུམ་མ་ཡེ་ཁཱན་བ་མང་གི་ཝ་ དཀོན་མཆོག་ག་ སོ་ངོ་བ་ཀབ་ཉི་ ན་ཧ་བ་བུ་ མི་ཁུངས་ཆོ་ཁཱན་དང་ དཀོན་མཆོག་ག་ ཕོ་བྲང་ནང་ཀ་ སོ་ངོ་རི་ཝ༌ཅ། 20 ན་ཧ་བ་བུ་ སྐུ་ཚབ་བ་དང་ ལུང་བསྟན་པ་བ་ཀ་ རྨང་ཐུང་ཀ་ཅོད་པ༌ཅ། ཉི་ཟུར་ལུང་ངོ་མ་ཤོ་ ཁིརིས་ཡི་ཤུ་ རོག་ཏེན་གི༌ལ། 21 ཨོ་ཉ་ཕའི་ག་ཅ་ལ་ ཐམས་ཅན་རང་ ཁིརིས་གི་ཨ་ཉི་ ཏབ་ཐུར་ཙུང་ཉི་ གཙོ་བོ་ག་དེན་གེ་ དམ་པའི་མཆོད་ཁང་ ཅོད་ཉི་གནང༌ཅ། 22 ཉི་ཁིརིས་ག་ཐུང་ཀེ་ཨ་ཉི་ ན་ཧ་བ་བུ་དོབ་ཉི་ ཨོ་ཉ་མཆོད་ཁང་ བཞེངས་ཅ་གི༌ལ། ཉི་ཨོ་ཉ་མཆོད་ཁང་ནང་ཀ་ རོ་ཀ་ཐུགས་ཉིད་ག་ཐུང་ཀེ་ཨ་ཉི་ དཀོན་མཆོག་ བཞུགས་ཉི་གནང༌ཅ༎ |