ཀ་ལཱས་སི། 3 - Tshangla New Testament (BSI)

¹ ན་ཧ་བ་ ཁིརིས་ཀབ་ཉི་ལོག་ཉི་ ཝུ་ཝ་ཨ་དེན་གེ་ ཁིརིས་བཞུགས་ཁཱན་ ཞིང་ཁམས་ག་ རྒྱུ་ཅ་ལ་བ་ལམ་ཤོ། ཁིརིས་ དཀོན་མཆོག་ག་ ལ་ཉོང་ལོ་ཀ་ཁྲི་ག་ བཞུགས་པ༌ཅ།

² ན་ཤི་འཛམ་གླིང་ག་ རྒྱུ་ཅ་ལ་ག་དེན་གེ་མང་གི་ཝ་ ཞིང་ཁམས་ག་ རྒྱུ་ཅ་ལ་བ་ཀ་དེན་གེ་མི།

³ ཧང་ཡ་དག་ནེ་ལ་ ན་ཧ་བ་ཤོ་ ཤི་ཝ་ཨ་དེན་གེ་ ན་ཧ་ཚེ་ཁེ་པ་ ཁིརིས་ཀབ་ཉི་ དཀོན་མཆོག་ག་ནང་ཀ་གུ་མ༌ཅ།

⁴ ཨ་ཧ་ཚེ་ངོ་མ་ཤོ་ ཁིརིས་གི༌ལ། ཉི་རོག་ལོག་ཉི་བྱོན་མ་ཀབ་ཉི་ རོ་ཀ་གཟི་བརྗིད་ག་ནང་ཀ་ ན་ཧ་བ་བུ་ རོག་ཀབ་ཉི་ལོག༌པེ།

⁵ ཨོ་ཉི་ཨ་དེན་གེ་ ན་ཧ་ནང་ཀ་ཆོ་ཁཱན་ འཛམ་གླིང་ག་བག་ཆགས་བ་ ཤི་ལེ་བི། དཔེ་ཨ་ནེ་ལ་ གཉེན་མ་ཕི་ལེ་གོ་མ་ ལུས་འབྲེལ་ཨ་ལེ་མ་ན་ལ་ མ་ཙང་མ་ལུས་འབྲེལ་ ཨ་ལེ་མ་ན་ལ་ བག་ཆགས་ཨ་ལེ་མ་ན་ལ་ བཱརའ་སེམས་མ་ལེག་པ་ མི་ལེ་མ་ན་ལ་ ཉི་སེར་སྣ་ཨ་ལེ་མ་ན་ལ་ (སེར་སྣ་ཨ་ལ་ཀབ་ཉི་ སྐུ་ག་གསོལ་ཝ་ཏ་པ་ད་བུ་གི༌ལ།)

⁶ ཨོ་ཐ་བ་ཨ་ཁཱན་ སོ་ངོ་བ་ཀབ་ཉི་ དཀོན་མཆོག་ གནམ་མེད་ས་མེད་ དགོངསམ་ཁྲེལ་པ༌ཅ། ཉི་རོག་ཏེ་བ་ཀི་ དཀོན་མཆོག་གེ་ ཁྲིམས་ཅིད་པུ་ཉོང༌པེ།

⁷ ན་ཧ་ཚེ་ ཨོ་ཐ་འཛམ་གླིང་ག་ བག་ཆགས་བ་ཀི་ དབང་པེ་གང་ཀ་ ན་ཤི་བུ་ ཨོ་ཐ་བ་ཨན་ཆོ༌ཝ།

⁸ དག་པ་ཀབ་ཉི་ ཨོམ་གི་ནེ་ལ་ ཨོ་ཐ་བ་ ཐམས་ཅན་རང་ སྤང་མེ་ཁེ༌ལེ། རོ་ཙིག་པེ་ག་ ཧིང་འགྲམ་ཐ་ལེ་ག་ སེམས་མ་ལེག་པ་མི་ལེ་ག་ ཀོ་ཁ་ཨ་ལེ་ག་ ཉི་ན་ཧ་ནོ་ཝང་གེ་ ཙོ་ཁ་ཤོ་ལེ་ག་

⁹ ཐུར་དང་ཐུར་ག་ཏཱན་ སོ་ད་མ་ཕི། ཧང་ཡ་དག་ནེ་ལ་ གོ་མ་ག་ སོ་ངོ་དང་ ངན་པ་ཨ་ཐང་བ་ ཕེག་ཉི་གེ་མ༌ཅ།

¹⁰ ཉི་ཨོམ་ ན་ཤི་སོ་ངོ་སིང་མ་ཡེ་ཝ༌ཅ། ན་ཧ་བ་ ནོང་རེ་ནོང་རེ་ ཨའི་བཀོད་ཉི་གནང་ཁཱན་ད་བུ་ རི་ཉི་རང་དིན་ཅ་ཨ་ཉི་ ན་ཤི་ རོ་ཀ་ཀོར་གེ་ མང་པུ་ཧ་གོ་ལེ་རེ༌བེ།

¹¹ ནའི་ཡ་ཧུ་དི་པ་གི་ནེ་བུ་ གིརིག་གི་ནེ་བུ་ ཤ་ཅཱད་ཁཱན་གི་ནེ་བུ་ ཤ་མ་ཅཱད་ཁཱན་གི་ནེ་བུ་ ཕིས་ཀ་སོ་ངོ་གི་ནེ་བུ་ མི་གནག་པ་གི་ནེ་བུ་ ཉི་ཟ་པ་གི་ནེ་བུ་ ཟ་པ་མང་གི་ནེ་བུ་ ཏ་ཀ་ཧང་རང་མཱན༌ཅ། ཁག་ཆི་ལུ་ཤོ་ ཁིརིས་གི༌ལ། ཉི་རོག་ ཨའི་ཐམས་ཅན་ག་ནང་ཀ་ བཞུགས་པ༌ཅ།

¹² ན་ཧ་བ་ཤོ་ དམ་པ་དང་ཕང་ཁཱན་ དཀོན་མཆོག་ག་སོ་ངོ་གི༌ལ། ཨོ་ཉི་ཨ་དེན་གེ་ ན་ཤི་ཐུགས་རྗེ་དང་ བྱམས་པར་ ཉམ་ཆུང་དང་ ཞི་ཇམ་པུ་ ཉི་བཟོད་པར་ཨོ་ཉ་བ་ ཡེ་ལེ་ཁེ༌ལེ།

¹³ ཐུར་དང་ཐུར་ཀབ་ཉི་ ཐེས་ཉི་ཆོའི། ཉི་ཁིརིས་གི་ ན་ཧ་སྡིག་པ་ བཤགས་པ་གནང་མ་ པུརུས་ཀིན་ཨ་ཉི་ ན་ཤི་བུ་ ན་ཧ་ཏཱན་ མ་ལེག་པ་ཨ་ཁཱན་བ་ བཀའ་དྲིན་བསྐྱང་ཤོ།

¹⁴ ན་ཤི་ཡེ་ཁཱན་ ཐམས་ཅན་གེ་ ཁག་ཆི་ལུ་ཤོ་ སྙིང་རྗེ་གི༌ལ། ཉི་སྙིང་རྗེ་གི་ཨ་ཉི་ ན་ཧ་བ་ ཐམས་ཅན་རང་ཆམ་ཉི་ ཏབ་ཐུར་ཐིག་ཅ་གི༌ལ།

¹⁵ ཁིརིས་གེ་ཨུ་ཁཱན་སྐྱིད་པུ་གི་ ན་ཧ་སེམས་དབང་ཅེན། ལུས་པུ་ཐུར་ག་ དབང་པོ་གི་ཝ་པུརུས་ཀིན་ཨ་ཉི་ ནའི་ཐམས་ཅན་རང་ སྐྱིད་པུ་ཨ་ཉི་ཆོ་ལེ་དེན་གེ་ ར་ཝ༌ཅ། ཉི་ཧ་ལ་ཨ་ནེ་བུ་ བཀའ་དྲིན་བསམ་ཉི་ཆོའི།

¹⁶ ན་ཧ་སེམས་ཁེ་པ་ ཁིརིས་ག་གསུང་གི་ གནམ་མེད་ས་མེད་ མང་པུ་ཨ་ཉི་ཕུང་ཐཱན་ དབང་པེ་བི། ཉི་རོ་ཀ་རིག་པ་གེ་ཨ་ཉི་ ཐུར་དང་ཐུར་ག་ཡེ་ཉི་ བསླབ་བྱ་བི། ཉི་སེམས་ཀེ་ཨ་ཉི་རང་ བཀའ་དྲིན་བསམ་ཉི་ དཀོན་མཆོག་ག་ མགུར་མ་དང་ བསྟོད་པ་ཕུལ་བེ་ག་ངང་ ཉི་ཐུགས་ཉིད་ག་ངང་ ཨོ་ཉ་བ་ཇང་ཅོ།

¹⁷ ན་ཤི་ ཡི་ཤུ་ག་ཐུང་ཀེ་ཨ་ཉི་ ཡབ་དཀོན་མཆོག་ག་ བཀའ་དྲིན་བསམ་ཉི་ ན་ཤི་ཧང་ཡེག་ནེ་བུ་ ཧང་ཨ་ནེ་བུ་ གཙོ་བོ་ཡི་ཤུ་ག་མཚན་ག་ཨའི༎

ཡི་ཤུ་པ་བ༌ཀ་དེན༌གེ་ ཁྲིམས༌ལུགས།

¹⁸ གཙོ་བོ་ག་ དད་པ་ཨ་ཁཱན་བ་ཀི་ ཨ་ལེ་ཁེ་ཝ་དང་ཏུ་ཉི་ ནའི་མེ་ཝག་ཙ་བ་ཀི་ རང་རང་ས་ ཕེ་ཝག་ཙ་ག་ཕརའ་ཁེ་ ཆོ་ལེ་ཁེ༌ལེ།

¹⁹ ཉི་ནའི་ཕེ་ཝག་ཙ་བ་ཀི་ རང་རང་ས་མེ་ཝག་ཙ་ ཕང་པེ་ཁེ༌ལེ། ཉི་རོ་ཀ་མ་ལེག་པ་ ཨ་ལེ་མང༌ཕ།

²⁰ ནའི་ཝག་ཙ་བ་ཀི་ ཕ་མ་ག་ ཆ་གནས་ཐ་ལེ་ཁེ༌ལེ། ཧང་ཡ་དག་ནེ་ལ་ ཨུ་ཐུ་ད་བུ་ ཨ་ལ་ཀབ་ཉི་ དཀོན་མཆོག་ཐུགས་བཞེན༌ཅ།

²¹ ཨ་པ་བ་ཀི་ཝག་ཙ་བ་ཀ་ ཀག་ཏར་མ་ཨའི། ཨུ་ཉུ་ཨ་ནེ་ལ་ རོག་ཏེ་བ་ སེམས་ཤི༌ལེ།

²² ནའི་གཡོག་པ་བ་ཀི་ ཆཱས་ཐམས་ཅན་ག་ སྦྱིན་བདག་གི་ཡེག་ཁཱན་ག་ ཆ་གནས་ཐ་ལེ་ཁེ༌ལེ། སྦྱིན་བདག་ ཤོ་ནང་ཕེན་ཆེན་དག་པ་གི་ རོག་ཏེ་བ་ཀི་ གོད་པ་ཀབ་ཉི་ཤ་ མང་གི་ཝ་ གཙོ་བོ་གེ་ཡོང་ཁེ་ཉི་ སེམས་ནང་ཀེ་ཨ་ཉི་རང་ལའི་ཨའི།

²³ ན་ཤི་ཧང་ཨ་ཝ་ཐུར་ སོ་ངོ་ག་དེན་གེ་མང་གི་ཝ་ གཙོ་བོ་ག་དེན་གེ་ ཨ་ཝ་པུརུས་ཀིན་ཨ་ཉི་ ཙ་དྲེག་ཉི་རང་ཨའི།

²⁴ སེམས་ཀ་ཐའི་ ན་ཤི་ལའི་ཨ་ཝ་ཨ་དེན་གེ་ གཙོ་བོ་གི་ རོ་ཀ་སོ་ངོ་བ་ཀ་དེན་གེ་ཐ་ཁཱན་ སེ་རབ་ཁེ་པ་ ན་ཤི་ཉོང༌པེ། ན་ཤི་ཕྱག་ཞུ་ཁཱན་ སྦྱིན་བདག་ངོ་མ་ཤོ་ ཁིརིས་གི༌ལ།

²⁵ ཉི་ལའི་ངཱད་ཁཱན་ ཐམས་ཅན་གི་ རོག་ཏེ་བ་ཀི་ ལའི་ངཱད་པ་ཨ་དེན་གེ་ ཨུ་ཉུ་དང་ཏུ་ཉི་ ངེ་ལོང་ ཉོང༌པེ། ཉི་ཉེ་རིང་ཆི་ལེ་དག་ཉི་ ཏི་ངེ་རང་མཱན༌ཅ།