ཀ་ལཱས་སི། 2 - Tshangla New Testament (BSI)

¹ ཇི་གི་ན་ཧ་ཡེག་པེ་ ན་ཧ་དེན་གེ་དང་ ལའུ་དི་ཀི་ཡ་ ཆོས་ཚོགས་ག་དེན་གེ་ ཉི་ཇང་གུམ་མ་ཡེ་ཁཱན་ བཱརའ་སོ་ངོ་ མང་པུ་ཐུར་ག་དེན་གེ་ ཇི་གི་གནམ་མེད་ས་མེད་ ཙ་དྲེག་ཉི་ལའི་ཨ༌ཝ།

² ཇི་གི་ཨོ་ཐེན་ཨ་ལེ་དེན་ཐ་ཤོ་ རོག་ཏེ་བ་ དོ་རི་རི་རིན་ཆེན་ ཉི་ཐུར་དང་ཐུར་ག་ སྙིང་རྗེ་ཨ་ཉི་ ཆམ་ཆེན་དག་པ་གི་གི༌ལ། ཨོ་ཐེན་ཨ་ཉི་ དཀོན་མཆོག་ག་ གུམ་ནང་ཡོན་ཏན་ཁེ་པ་ ན་ཤི་ཧ་གོན་ཅ་གི་ལ་དག་ཉི་ ན་ཤི་ཏེན་ཏེན་ཨ་ཉི་རང་ སེ་ལེ་རེ༌བེ། ཉི་ཨོ་ཉ་གུམ་ནང་ཡོན་ཏན་ཤོ་ ཁིརིས་གི༌ལ།

³ དཀོན་མཆོག་ག་ རིག་པ་དང་ ཡོན་ཏན་ག་རྒྱུ་ནོར་ ཐམས་ཅན་རང་ ཁིརིས་ག་ནང་ཀ་གུ་མ༌ཅ།

⁴ སོ་ངོ་བ་ཀ་ཆཱས་ཁེ་པ་ ཧབ་ཏུར་དེན་པ་ད་བུ་ ཐོང་ནེ་བུ་ ན་ཧ་མགུ་སྐོར་ཕི་ལེ་ མར་ཆེན་དག་པ་གི་ ཇི་གི་ན་ཧ་ ཨོ་ཐ་ཆཱས་ཡེག་ཅ་གི༌ལ།

⁵ ཧང་ཡ་དག་ནེ་ལ་ ཇང་ན་ཧ་བ་ཀེ་ ཇང་ཀིན་ག་ཆོ་ནེ་བུ་ ཇ་ག་སེམས་ཁེ་པ་ ན་ཧ་བ་ཀབ་ཉི་རང༌ཅ། ན་ཤི་ཁིརིས་ག་ དད་པ་སྒྲིང་སྒྲིང་ཨན་ཀེ་ཉི་ ཉི་ལེག་པུ་ཨན་ཆོ་ཝ་ག་ཐོང་ཉི་ ཇང་གནམ་མེད་ས་མེད་ ཤོ་ནང་ཕེ་ཝ༌ཅ༎

ཁིརིས་ག་ཚེ༌གེ་ཨ༌ཉི་ རང༌དབང་རང་ཚད།

⁶ ཨོ་ཉི་ཨ་དེན་གེ་ ན་ཤི་ཁིརིས་ཡི་ཤུ་ ན་ཧ་གཙོ་བོ་ཨ་ཉི་ ཞུ་ཝ་ཨ་དེན་གེ་ རོ་ཀ་ཐུགས་བཞེད་དང་ཏུ་ཉི་ཆོའི།

⁷ ན་ཧ་ཙ་ རོ་ཀ་ནང་ཀ་དཱན་མེ་ཁེ༌ལེ། ཉི་ན་ཧ་བ་ རོ་ཀ་ཐུང་ཀ་ཅོད་ཅོ། ན་ཧ་ཡེན་བི་ཝ་དང་ཏུ་ཉི་ ན་ཧ་བ་དད་པ་ག་ཟོག་ཅོ། ཉི་བཀའ་དྲིན་བསམ་མེ་ག་ སེམས་ཨ་ཉི་རང་ཆོའི།

⁸ ཁུངས་མ་ཁཱན་ཆཱས་དང་ མགུ་སྐོར་ག་ཐུང་ཀེ་ཨ་ཉི་ སོ་ངོ་ཐུར་གི་རང་ ན་ཧ་མགུ་སྐོར་ཕི་ལེ་ མར་བེ་དེན་གེ་ རིག་པ་སྒྲིམ་ཅོ། ཨོ་ཐ་བ་ཤོ་ ཁིརིས་གེ་མང་གི་ཝ་ སོ་ངོ་བ་ཀ་མི་ཐང་དང་ འཛམ་གླིང་དབང་ཁཱན་ ངན་པ་རྣམ་ཤེས་བ་ཀེ་ ཨུན་ཅ་གི༌ལ།

⁹ ཧང་ཡ་དག་ནེ་ལ་ དཀོན་མཆོག་དངོས་སུ་ཨ་ཉི་ ཁིརིས་ག་སྐུ་གཟུགས་ནང་ཀ་ བཞུགས་པ༌ཅ།

¹⁰ ཉི་རོ་ཀེ་ཨ་ཉི་ ན་ཧ་ཚེ་ ཕུང་མ་ཅོད་གནང་མ༌ཅ། ཉི་རོག་ཤོ་ དབང་ཁཱན་དང་ དབང་ཚད་ཐམས་ཅན་ག་ ཤ་རང་གི༌ལ།

¹¹ ན་ཤི་ཁིརིས་ག་ དད་པ་ཨ་ལ་ཀབ་ཉི་ ན་ཧ་ཤ་བུ་ ཅཱད་པ༌ཅ། དག་པ་ཀབ་ཉི་ ལུས་པུ་ག་མང་གི་ཝ་ ན་ཧ་སྡིག་པ་དག་ཉི་ ཐུགས་ཉིད་ག་ ཤ་ཅཱད་པ་གི༌ལ།

¹² ཉི་ཁྲུས་གསོར་ཕི་ལེ་གང་ཀ་ ན་ཧ་བ་ རོག་ཀབ་ཉི་ས་ཝང་ཕི༌ཝ། ཉི་ཁིརིས་གཤགས་པ་གེ་ ལོག་ཉི་བཞེངས་གནང་ཁཱན་ དཀོན་མཆོག་ག་ ཤུགས་སྟོབས་ག་ ན་ཤི་དད་པ་ཨ་ཝ་ཨ་དེན་གེ་ ན་ཧ་བ་བུ་ རོག་ཀབ་ཉི་རང་ ཤི་ཝ་གེ་ལོག་ཉི་ཝུ་ཝ་གི༌ལ།

¹³ གོ་མ་ ན་ཧ་ཤ་མ་ཅཱད་པ་ཆོ༌ཝ། ཉི་ན་ཧ་བ་ ན་ཧ་སྡིག་པ་ནང་ཀ་ཤི་ཝ་ཆོ༌ཝ། དག་པ་ཀབ་ཉི་ དཀོན་མཆོག་གི་ ན་ཧ་སྡིག་པ་ ཐམས་ཅན་རང་ བཤགས་པ་གནང་མ་ཨ་དེན་གེ་ ཁིརིས་ཀབ་ཉི་ ན་ཧ་བ་བུ་ གསོན་པོ་ཅོད་ཉི་གནང༌མ།

¹⁴ ཉི་ཨ་ཤི་ཁྲིམས་གེ་ གེ་བ་ལའི་ཨ་ཉི་ སྡིག་པ་སག་ཁཱན་ ཐམས་ཅན་རང་ རོ་ཀི་མ་ཝ་ཅོད་ཉི་གནང༌མ། རོ་ཀི་ན་ཧ་སྡིག་པ་བ་ ཐམས་ཅན་རང་བསྣམས་ཐཱན་ ཁྲིམས་ཤིང་ཐུང་ཀ་ཇཱན༌མ།

¹⁵ ཨོ་ཐེན་ཨ་ཉི་ དཀོན་མཆོག་གི་ དབང་ཁཱན་བ་དང་ དབང་ཚད་ཙུང་ཁཱན་བ་ རོ་ཀ་ཕརའ་ཁེ་ཙུག༌པ། ཉི་རོ་ཀི་ རོག་ཏེ་བ་ཕམ་ཐཱན་ སོ་ངོ་ཐམས་ཅན་ག་གུབ་ཀ་ ངི་ནང་ཁུ་སི་སི་ཨ་ཝ་ཅོད༌པ།

¹⁶ ན་ཤི་ཟ་ཁཱན་དང་ ཇམ་ཁཱན་ག་ཀོར་གེ་ ཐུར་གི་རང་ ཁ་ཏང་མེ་མར་ཆེན། ཉི་དུས་ཆེན་དང་ ཚེས་སོ་ལྔ་ ཉི་དུས་བཟང་ཨོ་ཉ་བ་ མ་ཙི་ཝ་ཨ་དེན་གེ་བུ་ ན་ཧ་ཁ་ཏང་མེ་མར་ཆེན།

¹⁷ ཨོ་ཐ་བ་ ཐམས་ཅན་རང་ མ་འོངས་པ་ག་ཡོང་ཤ་གི༌ལ། དག་པ་ཀབ་ཉི་ ངོ་མ་ཤོ་ ཁིརིས་གི༌ལ།

¹⁸ མཇལ་ཁ་ཉོང་ཅ་ ཞིང་ཁམས་ག་འཐེན་པ་ག་ གསོལ་ཝ་ཏབ་ཅ་དག་ཡེག་ཉི་ ཉི་ཉམ་ཆུང་རི་ཝ་ཅོད་ཁཱན་བ་ཀི་ ན་ཧ་བ་ ཚ་ཁ་མ་ཚུད་ཁཱན་ཨ་ཉི་ ཙི་ལེ་མ་བི། ཨོ་ཉ་སོ་ངོ་བ་ཀི་ འཇིག་རྟེན་པ་སེམས་ཨ་ཉི་ གནམ་མེད་ས་མེད་ ཁམ་ཙོང༌ཅ།

¹⁹ དག་པ་ཀབ་ཉི་ རོག་ཏེ་བ་ཀི་ ཁིརིས་ཀབ་ཉི་ཆོ་ལེ་ག་ ཐུབ་ཐ་ཝ༌ཅ། ཁིརིས་ཤོ་ ལུས་པུ་ག་ཤ་རང་གི༌ལ། ལུས་པུ་ག་ཁེ་ཀོ་ ཁིརིས་གི་གནང་ཅ་གི༌ལ། ཚིག་དང་ཕུན་གི་ཨ་ཉི་ ལུས་པུ་ཏབ་ཐུར་ཙུང་ཉི་ཐཱན༌ཅ། ཉི་དཀོན་མཆོག་ག་ དབང་གི་ཨ་ཉི་ ལུས་པུ་ཟོག༌ཅ།

²⁰ ན་ཧ་བ་ཤོ་ ཁིརིས་ཀབ་ཉི་ ཤི་ཝ་ཨ་དེན་གེ་ འཛམ་གླིང་དབང་ཁཱན་ རྣམ་ཤེས་བ་ཀི་ ན་ཧ་ཧང་རང་ ཨ་ལེ་མར༌བ། དག་པ་ཀབ་ཉི་ ན་ཧ་བ་ འཛམ་གླིང་ག་གི་ཝ་པུརུས་ཀིན་ཨ་ཉི་ ལུགས་སྲོལ་བ་ཀ་ ཧང་ཨ་ཉི་ཆ་གནས་ཐཱན་ཅ་ཡ།

²¹ ཨུ་ཐུ་མ་ཙུང་ཤོ་ ཨུ་ཉུ་མ་ཟའི་ ཨུ་ཉུ་མ་ཐོབ་ཅོ་ཨ༌ཉི།

²² ཨོ་ཐ་ལུགས་སྲོལ་བ་ཤོ་ སོ་ངོ་བ་ཀི་ཅོད་ཐཱན་ ཡེ་ཝ་ག་གི༌ལ། དག་པ་ཀབ་ཉི་ ཨུ་ཉུ་མ་ན་ལ་ ཨུ་ཐུ་མ་ན་ལ་དག་ཉི་ ཡེ་ཁཱན་བ་ཤོ་ ཐོབ་ཏེན་གེ་ ལའི་མ་ན་ཝ་རི་ཁཱན་ ཅ་ལ་བ་ཀ་ཀོར་གེ་གི༌ལ།

²³ ཨོ་ཐ་ལུགས་སྲོལ་བ་ གོད་པ་ཀབ་ཉི་ ལེག་པུ་ད་བུ་ཐོང༌ཅ། ཧང་ཡ་དག་ནེ་ལ་ ཨོ་ཐ་ལུགས་སྲོལ་བ་དང་ཏུ་ཉི་ ཨ་ལ་ཀབ་ཉི་ དཀོན་མཆོག་མང་པུ་ ཕང་པ་ད་བུ་ཐོང༌ཅ། ཉམ་ཆུང་ད་བུ་ཐོང༌ཅ། རང་ཏེན་ག་ལུས་པུ་ སྒྲིགས་ཀ་ཙུག་པེ་ རེ་བ་ད་བུ་ཐོང༌ཅ། དག་པ་ཀབ་ཉི་ ངན་པ་ཨ་ལེ་རིག་ཁཱན་ བག་ཆགས་ཁེ་པ་ ཨོ་ཐ་ལུགས་སྲོལ་བ་ཀི་ ཧ་ལ་རང་ ཁག་པེ་རེ་བུ་མཱན༌ཅ།