མཛད༌པ། 6 - Tshangla New Testament (BSI)

རུམ་ཁཱན་སོ་ངོ་ཟུམ།

¹ སློ་མ་བ་ཀ་ཁ་གྱངས་ དར་ཉི་རང་དིན་ཅ་ཨ་ཉི་ ནོང་དྲང་རང་ཤམ་ཁཱན་ལྟོ་ཁེ་པ་ གིརིག་ག་མོ་རེན་མ་བ་ཀི་ ཉོང་པུ་མ་ལ་དག་ཉི་ ཁ་ཏང་མ་ཨ་དེན་གེ་ གིརིག་ག་ལོ་ཨ་ཁཱན་ ཡ་ཧུ་དི་པ་བ་ཀི་ ཡ་རུ་ཤ་ལེམ་ག་ཆོ་ཁཱན་ ཡ་ཧུ་དི་པ་བ་ཀ་ ཁ་ཏང་མ༌ལ།

² ཉི་སྐུ་ཚབ་སོང་ཉིག་ཙིང་གི་ དད་པ་ཨ་ཁཱན་བ་ ཐམས་ཅན་རང་ ཏབ་ཐུར་རཱན་ཐཱན་ གསུངས་མ་ལ་ སོ་ངོ་བ་ཀ་ ཟ་ལེ་ཇ་མེ་བི་ལེ་ག་ ལའི་ཨ་ལེ་དེན་གེ་ ཨ་ཤི་ དཀོན་མཆོག་ག་གསུང་ བཤད་པེ་ག་ཐུབ་ཐ་ནེ་ལ་ ལེག་པུ་མང་གི།

³ ཨོ་ཉི་ཨ་དེན་གེ་ ཡུང་ཟི་བ་ ན་ཧ་པོང་ཀེ་ དམ་པའི་ཐུགས་ཉིད་གི་ ཕུང་ཁཱན་དང་རིག་པ་ཆོ་ཁཱན་ སོ་ངོ་ཟུམ་ལམ༌ཤོ། ཉི་ཨ་ཤི་ ཨོ་ཐ་ལའི་ རོག་ཏེ་བ་ཀ་ཀེ༌བེ།

⁴ དག་པ་ཀབ་ཉི་ ཨའི་ཤོ་ དུས་ཏ་བུ་རང་ སྨོན་ལམ་ཞུ་ཉི་ གསུང་བཤད་ཉི་རང་ཆོ་ལེ་དག༌ཉི།

⁵ སྐུ་ཚབ་བ་ཀི་ གསུངས་ཁཱན་ཆཱས་ག་ དད་པ་ཨ་ཁཱན་བ་ ཐམས་ཅན་རང་ ཤོ་ནང་ཕེ་ཉི་ ཉི་རོག་ཏེ་བ་ཀི་ དམ་པའི་ཐུགས་ཉིད་ཕུང་ཁཱན་དང་ དད་པ་གནམ་མེད་ས་མེད་ ལེག་པུ་ཆོ་ཁཱན་ སོ་ངོ་ཨིས་ཏི་ཕ་ནཱས་དག་ཁཱན་དང་ ཕི་ལིབ་ ཉི་པཱརའ་ཁཱརས་དང་ ནི་ཀ་ནོར་ ཏི་མོན་དང་ པར་མི་ནཱས་ ཉི་གེ་ ཨེན་ཏྲི་ཨོ་ཁི་ཡ་གེ་ ཡ་ཧུ་དི་པ་རི་ཁཱན་ ནི་ཀོ་ལ་ཨུས་དག་ཁཱན་བ་ སི་ཝ༌ལ།

⁶ དད་པ་ཨ་ཁཱན་བ་ཀི་ རོག་ཏེ་བ་ སྐུ་ཚབ་བ་ཀ་ སྐུན་མདུན་ག་ཕ་ཉི་ ཉི་སྐུ་ཚབ་བ་ཀི་ རོག་ཏེ་བ་ཀ་དེན་གེ་ སྨོན་ལམ་ཞུན་ཐཱན་ རོག་ཏེ་བ་ཀ་ཕྱག་ རོག་ཏེ་ཟུམ་ག་ཐུང་ཀ་ ཀེ་ཉི་གནང་མ༌ལ།

⁷ ཨོ་ཉི་ཨ་དེན་གེ་ དཀོན་མཆོག་ག་གསུང་ཁེ་པ་ ཆབ་ཉི་རང་བུ་ཝ༌ལ། ཉི་ཡ་རུ་ཤ་ལེམ་ག་ དད་པ་ཨ་ཁཱན་བ་ དར་ཉི་རང་དི་ཝ༌ལ། ཉི་བླ་མ་མང་པུ་ཐུར་གི་བུ་ ཆ་གནས་ཐ་ཉི་ དད་པ་ཨ་ཝ༌ལ༎

ཨིས་ཏི་ཕ་ནཱས་ཙུང་མ༌ལ།

⁸ དཀོན་མཆོག་ག་ ཐུགས་རྗེ་དང་དབང་གི་ ཕུང་མ་ཨ་དེན་གེ་ ཨིས་ཏི་ཕ་ནཱས་གི་ སོ་ངོ་བ་ཀ་པོང་ཀ་ རྫུ་འཕྲུལ་དང་ཡིད་ཆི་ཝ་ག་ལའི་ མང་པུ་ཐུར་ མཛད་ཉི་གནང་མ༌ལ།

⁹ ཟ་པ་གེ་ཤོ་ཁཱན་ ཡ་ཧུ་དི་པ་ཆོས་འཛོམས་ (མིང་ཨོ་ཐེན་ཏག་པ་ཆོ༌ཝ།) དག་ཁཱན་ག་ སོ་ངོ་ཚེ་བང་དང་ ཀུ་རེ་ནི་ག་སོ་ངོ་ཚེ་བང་ ཉི་ཨ་ལེག་ཇེན་དྲི་ཡ་དང་ ཀི་ལི་ཀི་ཡ་ག་ ཉི་ཨེ་ཤི་ཡ་ག་ སོ་ངོ་བ་ཆོ་ཝ༌ལ། ཉི་ཨོ་ཉ་སོ་ངོ་བ་ཀི་ག་ཐིང་ཐཱན་ ཨིས་ཏི་ཕ་ནཱས་ཀབ་ཉི་ ཤག་རུ་མ༌ལ།

¹⁰ དག་པ་ཀབ་ཉི་ ཨིས་ཏི་ཕ་ནཱས་གི་ རིག་པ་དང་ཐུགས་ཉིད་ག་ ཐུང་ཀེ་ཨ་ཉི་ གསུངས་མ་ཨ་དེན་གེ་ རོག་ཏེ་བ་ཀི་ རོག་ཕ་མེ་མར་བ༌ལ།

¹¹ ཨོ་ཉི་ཨ་དེན་གེ་ རོག་ཏེ་བ་ཀི་ སོ་ངོ་ཚེ་བང་ག་ ནང་སུབ་བིན་ཐཱན་ སོ་ད་ཕི་ཉི་ རོ་ཀི་མོ་ས་དང་ དཀོན་མཆོག་ག་སྐུར་པ་ཞུ་ཝ་ག་ ཨ་ཤི་ན་ཐ་ཝ་ཨ་ཉི་ ཡེག་པེ་བི་ཝ༌ལ།

¹² ཨོ་ཐེན་ཨ་ཉི་ རོག་ཏེ་བ་ཀི་ སོ་ངོ་བ་དང་ སོ་ངོ་ཆི་ལུ་བ་ ཉི་བཀའ་ཁྲིམས་ག་སློབ་དཔོན་བ་ ཨིས་ཏི་ཕ་ནཱས་ཀབ་ཉི་ མ་ཆ་མ་ཅོད་པ༌ལ། ཉི་རོག་ཏེ་བ་ཀི་ ཨིས་ཏི་ཕ་ནཱས་ཙུང་ཐཱན་ ཚོགས་འདུ་ཆི་ལུ་ག་ གུབ་ཀ་ཀེ་བ༌ལ།

¹³ ཉི་རོག་ཏེ་བ་ཀི་ རོ་ཀ་ཀོར་གེ་སོ་ད་ཕི་ཉི་ འཛོམས་དཔང་ཨ་ལེ་དེན་གེ་ སོ་ངོ་ཚེ་བང་ ནང་ཀ་རིག་ཉི་ཕ་ཝ༌ལ། རོག་ཏེ་བ་ཀི་ ཡེག་པ་ལ་ ཨོ་ཐ་སོ་ངོ་གི་ ཧ་ལ་ཨ་ནེ་བུ་ ཨ་ཧ་དམ་པའི་མཆོད་ཁང་དང་ མོ་ས་ག་བཀའ་ཁྲིམས་ཀོར་གེ་ ཆཱས་མ་ལེག་པ་ཡེག༌ལ།

¹⁴ ཨོ་ཐ་ནཱས་རཱད་ག་ཡི་ཤུ་གི་ ཨ་ཧ་མཆོད་ཁང་ཁེ་པ་ དེད་གེམ་ཐཱན་ ཉི་མོ་ས་གི་གནང་ཁཱན་ ཨ་ཧ་ལམ་ལུགས་སྲོལ་བ་ སོར་པ་དག་ཉི་ རོ་ཀི་ཡེག་པ་ག་ ཨ་ཤི་ན་ཐ་ཝ་ཨ༌ཉི།

¹⁵ ཚོགས་འདུ་ཆི་ལུ་ག་ ནང་ཀ་ཆོ་ཁཱན་ སོ་ངོ་ཐམས་ཅན་གི་ ཨིས་ཏི་ཕ་ནཱས་ག་ཏཱན་ ཐེ་རེ་རེ་ཨ་ཉི་ གོད་པ༌ལ། ཉི་རོ་ཀ་ཞལ་ཁེ་པ་ ཞིང་ཁམས་ག་འཐེན་པ་ག་ ཞལ་ད་བུ་རང་ འགྱུར་བ་ག་ཐོང་མ༌ལ༎