མཛད༌པ། 3 - Tshangla New Testament (BSI)

དང་མེ་མར་ཁཱན་སོ་ངོ་དྲག་པ༌ལ།

¹ ནོང་ཐུར་ པ་ཏྲུས་དང་ཡུ་ཧན་ན་ སྨོན་ལམ་ཏ་པེ་ག་ དུས་ཙུན་རེན་པ་ཨ་དེན་གེ་ ངབ་ཀ་ཆུ་ཚོད་སམ་ག་ མཆོད་ཁང་ག་བྱོན་མ༌ལ།

² ཉི་ཨོ་ཉ་ སྒོ་རེ་ཁ་ཅེམ་པུ་དག་ཉི་ ར་ཁཱན་ག་སྒོ་རེ་ཁ་ར་ག་ ཀེ་དེན་ཐུར་གེ་ག་ཏཱན་ དང་མེ་མར་ཁཱན་ སོ་ངོ་ཐུར་ཅ་གི་ཝ༌ལ། རོག་ཤོ་ མཆོད་ཁང་ག་དི་ཁཱན་ སོ་ངོ་བ་ཀེ་ ཏི་རུ་ཕུན་མེ་དེན་གེ་ ཏ་བུ་རང་བང་ཕ་ཉི་ ཨོ་ཉ་སྒོ་རེ་ཁ་ར་ག་ ཐཱན་ཅ་གི་ཝ༌ལ།

³ པ་ཏྲུས་དང་ཡུ་ཧན་ན་ མཆོད་ཁང་ནང་ཀ་ བྱོན་ཅ་ཨ་ཉི་ རོ་ཀི་ རོག་ཉིག་ཙིང་གེ་ ཧང་ཐུར་ཕུན་མ༌ལ།

⁴ ཉི་རོག་ཉིག་ཙིང་གི་ རོ་ཀ་ཏཱན་ ཐེ་རེ་རེ་ཨ་ཉི་གོད་ཐཱན་ པ་ཏྲུས་གི་ རོ་ཀ་གསུངས་མ་ལ་ ཨ་ཧ་ཏཱན་གོད་ཅོ་དག༌ཉི།

⁵ ཉི་རོ་ཀི་ རོག་ཉིག་ཙིང་གེ་ ཧང་ཐུར་ཉོང་པེ་ག་ རེ་ཆ་ཨ་ཉི་གོད་པ༌ལ།

⁶ པ་ཏྲུས་གི་ དངུལ་དང་གསེར་ ཇ་ག་མཱན༌ཅ། དག་པ་ཀབ་ཉི་ ཇ་ག་ཧང་ཅ་གི་ལ་སྨོ་ ཨུ་ཉུ་ཇི་གི་ན་ག་བིན༌ཅ། ནཱས་རཱད་ཡི་ཤུ་ཁིརིས་ག་མཚན་ག་ ཇི་གི་ ནཱན་ག་ཐིང་ཐཱན་ དང་ཤོ་ཨ་ཉི་ བཀའ་བིན་ཅ་དག་ཉི་ གསུངས་མ༌ལ།

⁷ ཉི་པ་ཏྲུས་གི་ ཨོ་ཉ་སོ་ངོ་ག་ ག་དང་ལ་ཉོང་གེ་ཙུང་ཐཱན་ ག་ཐིང་མེ་ག་རུམ་པ༌ལ། ཉི་ཨོ་ཉ་ཐྲེ་ཀེ་རང་ རོ་ཀ་བི་དང་ཚིག་བ་ སྒྲིང་སྒྲིང་རི་ཝ༌ལ།

⁸ ག་ལིན་ཐཱན་ རོག་ཏེན་ག་བི་ག་ཐིང་ཉི་ ལེང་ཐེང་དང་མེ་གོ་ཙུག་པ༌ལ། ཉི་དང་ཉི་ལིན་ཉི་ དཀོན་མཆོག་ག་ བསྟོད་པ་ཕུལ་ཉི་རང་ རོག་ རོག་ཉིག་ཙིང་ཀབ་ཉི་ མཆོད་ཁང་ནང་ཀ་དི་ཝ༌ལ།

⁹ ཉ་ག་ཆོ་ཁཱན་སོ་ངོ་བ་ཀི་ རོག་དང་ཉི་ དཀོན་མཆོག་ག་ བསྟོད་པ་ཕུལ་བ་ག་ ཐོང་མ༌ལ།

¹⁰ ཉི་རོག་ཏེ་བ་ཀི་ རོག་ཤོ་ མཆོད་ཁང་ག་ སྒོ་རེ་ཁ་ཅེམ་པུ་ག་ལང་ཉི་ ཕུན་ཁཱན་གི་ཝ་ལ་ཨ་ཉི་ གུམ་ཡེ་ལ་ཀབ་ཉི་ དཀོན་མཆོག་གི་ རོག་དྲག་ཉི་ གནང་མ་ཨ་དེན་གེ་ རོག་ཏེ་བ་ གནམ་མེད་ས་མེད་ ཡིད་ཆི་ཉི་ཧ་ཆཱད་པ༌ལ༎

པ་ཏྲུས་གི་ སོ་ངོ་བ་ཀ་གསུངས་གནང་མ༌ལ།

¹¹ ཉི་དཔོན་སོ་ལོ་མོན་ག་ གཡབ་རིང་དག་ཉི་ཆིན་ཁཱན་ གཡབ་རིང་ག་ ཨོ་ཉ་སོ་ངོ་གི་ པ་ཏྲུས་དང་ཡུ་ཧན་ན་ཀབ་ ཆེབ་ཉི་རང་ཆོ་ཝ་ག་ཐོང་ཉི་ སོ་ངོ་བ་ཡིད་ཆི་ཉི་ རོག་ཏེ་བ་ཆོ་ས་ག་ཏཱན་ ཇུག་ཉི་དི་ཝ༌ལ།

¹² པ་ཏྲུས་གི་ སོ་ངོ་བ་ ཛོ་མ་ག་ཐོང་ཉི་ རོག་ཏེ་བ་ཀ་ གསུངས་མ་ལ་ ཨིས་རེལ་ག་སོ་ངོ་བ་ ཨའི་ཏེན་ག་དབང་གི་ཨ་ཉི་ ཉི་དཀོན་མཆོག་ག་སྤྱན་ག་ ཨའི་ལེག་པུ་ཆོ་ཝ་ཨ་དེན་གེ་ ཨོ་ཐ་སོ་ངོ་ དང་མེ་རེ་བ་ཅོད་པ་པུརུས་ཀིན་ཨ་ཉི་ ན་ཧ་བ་ ཧང་ཨ་ཉི་ཡིད་ཆིན་ཅ་ཡ། ཉི་ཨ་ཧ་ཏཱན་ ཧང་ཨ་ཉི་ ཐེ་རེ་རེ་གོད་ཅ་ཡ་དག༌ཉི།

¹³ ཨ་བཱརའ་ཧམ་དང་ཨི་སག་ ཉི་ཡ་ཀུབ་ག་དཀོན་མཆོག་ ཨ་ཧ་ཕ་མ་བ་ཀ་ དཀོན་མཆོག་གི་ རོ་ཀ་གཡོག་པ་ཡི་ཤུ་ གནམ་མེད་ས་མེད་ ཆི་ལུ་ཅོད་ཉི་གནང་མ༌ལ། དག་པ་ཀབ་ཉི་ རོག་ཤོ་ ན་ཤི་ ཡ་ཧུ་དི་པ་ག་ འགོ་དཔོན་བ་ཀ་ ག་དང་ག་སྤྲོད་ཁཱན་གི༌ལ། ཉི་པི་ལ་ཏཱས་གི་ རོག་ཐར་བེ་དག་ཉི་ གསུངས་ཐཱན་རང་གི་ནེ་བུ་ ན་ཤི་ པི་ལ་ཏཱས་ག་སྐུན་མདུན་ག་ རོ་ཀ་ཀོར་གེ་ མ་ལེག་པ་ཡེག༌པ།

¹⁴ རོག་ཤོ་ དམ་པ་ཆོ༌ཝ། ཉི་དྲང་པུ་ཆོ༌ཝ། དག་པ་ཀབ་ཉི་ ན་ཤི་ རོ་ཀ་མ་ལེག་པ་ཡེག༌པ། ཉི་སོ་ངོ་ཤེ་ཁཱན་བཙོན་པ་ཤོ་ ན་ཧ་དེན་གེ་ཐར་ཤོ་དག་ཉི་ ན་ཤི་པི་ལ་ཏཱས་ག་ཞུ༌ཝ།

¹⁵ ཚེ་ག་རིག་ཁཱན་ཁེ་པ་ ན་ཤི་བཀྲོངས༌མ། དག་པ་ཀབ་ཉི་ དཀོན་མཆོག་གི་ རོག་གཤགས་པ་གེ་ ལོག་ཉི་བཞེངས་ཉི་གནང༌མ། ཉི་ཨོ་ཐ་ག་འཛོམས་དཔང་ཤོ་ ཨའི་གི༌ལ།

¹⁶ ན་ཤི་ཐོང་ཁཱན་དང་སེ་ཁཱན་ ཨོ་ཐ་དང་མེ་མར་ཁཱན་ སོ་ངོ་ཁེ་པ་ རོ་ཀ་མཚན་ག་དབང་གི་ཨ་ཉི་ དང་མེ་རེ་བ་ཅོད་གནང༌མ། ནའི་ཐམས་ཅན་གི་ ཨོ་མ་ཐོང་མ་པུརུས་ཀིན་ཨ་ཉི་ ཡི་ཤུ་ག་ དད་པ་ཀེ་བ་ཨ་དེན་གེ་ རོག་དྲག་ཉི་གནང་མ་གི༌ལ།

¹⁷ ཉི་ཨོམ་ ཇ་ག་ཡུང་ཟི་བ་ ནའི་དང་ན་ཧ་འགོ་དཔོན་བ་ཀི་ ཡི་ཤུ་ག་ཏཱན་ཨ་ཁཱན་ཤོ་ ན་ཤི་མ་སེ་ཝ་ཨ་དེན་གེ་ ཨ་ཝ་གི་ལ་དག་ཉི་ ཇི་གི་སེན༌ཅ།

¹⁸ ཧང་ཡ་དག་ནེ་ལ་ དཀོན་མཆོག་གི་ ལུང་བསྟན་པ་ ཐམས་ཅན་ག་ཐུང་ཀེ་ཨ་ཉི་ གོ་མ་གེ་རང་ གསུངས་མ་ཆོ་ཝ་ རོ་ཀ་སྲས་ཁིརིས་ཁེ་པ་ དཀའ་ཝ་ཅཱད་པེ་ཁེ་ལེ་དག༌ཉི། ཉི་ཨུ་ཐུ་ད་བུ་ཨ་ཉི་ རོ་ཀི་གསུངས་ཁཱན་ཁེ་པ་ དེན་ཐ་འགྲུབ་ཉི་གནང༌མ།

¹⁹ ན་ཧ་སྡིག་པ་བ་ཀ་ བཤགས་པ་གནང་མེ་དེན་གེ་ སྡིག་པ་གེ་ལོག་ཐཱན་ དཀོན་མཆོག་ག་ཏཱན་ དད་པ་ཀེ༌ཤོ། ཉི་ཐུགས་ཉིད་ག་ ཤོང་ལ་ལེ་ག་དུས་ཙུན་ གཙོ་བོ་གི་གནང༌མེ།

²⁰ ཉི་རོ་ཀི་ གོ་མ་གེ་རང་ཀེ་ཁཱན་ ཁིརིས་ཡི་ཤུ་ ན་ཧ་དེན་གེ་ ལོག་ཉི་ཀུན་ཏིན་གནང༌མེ།

²¹ དཀོན་མཆོག་གི་ དང་པོ་གེ་རང་ རོ་ཀ་དམ་པའི་ ལུང་བསྟན་པ་བ་ཀ་ཐུང་ཀེ་ཨ་ཉི་ གསུངས་མ་དང་ཏུ་ཉི་ ཐམས་ཅན་རང་ ལོག་ཉི་སིང་མ་ མ་བཀོད་པ་སག་པུ་ ཡི་ཤུ་ཞིང་ཁམས་ག་རང་ བཞུགས་པེ་ཁེ༌ལེ།

²² ཉི་མོ་ས་གི་ གསུངས་མ་ཅ་ ན་ཧ་གཙོ་བོ་ དཀོན་མཆོག་གི་ ཇང་ཀུན་ཏི་ཝ་པུརུས་ཀིན་ཨ་ཉི་ ན་ཧ་དེན་གེ་བུ་ ལུང་བསྟན་པ་ཐུར་ ཀུན་ཏི༌ལེ། ཉི་རོག་ཤོ་ ན་ཧ་སོ་ངོ་རང་གི་ཝ་ཨོ་ཕེ། ཉི་རོ་ཀི་ ན་ཧ་ཧང་ཨའི་ཨ་ཉི་ གསུངས་མ་ཐུར་ ན་ཤི་ཨ་ལེ་ཁེ༌ལེ།

²³ ཉི་ཨོ་ཉ་ལུང་བསྟན་པ་གི་ གསུངས་ཁཱན་ག་ ཆ་གནས་མ་ཐ་ཁཱན་བ་ དཀོན་མཆོག་ག་ སོ་ངོ་བ་ཀ་པོང་ཀེ་ ཁ་བེརེ་ཐཱན་ མེ་པ་ཕིན་གེ་མེ་ དག༌ཉི།

²⁴ ལུང་བསྟན་པ་ ཤ་མུ་ཨེལ་གེ་གོ་ཙུག་ཉི་ རོ་ཀ་ཚིང་ཚིང་བྱོན་ཁཱན་ བཱརའ་ལུང་བསྟན་པ་ ཐམས་ཅན་གི་ ཨོ་ཐ་ནོང་བ་ཀ་ཀོར་གེ་ གསུངས་མ་ཅ་

²⁵ ནའི་ཤོ་ ལུང་བསྟན་པ་བ་ཀ་ རྒྱུད་པ་གི༌ལ། ཉི་དཀོན་མཆོག་གི་ ན་ཧ་ཕ་མ་བ་ཀ་གནང་ཁཱན་ འགན་རྒྱ་ཁེ་པ་ ན་ཧ་དེན་གེ་བུ་གི༌ལ། ཉི་རོ་ཀི་ ཨ་བཱརའ་ཧམ་ག་ ཨོ་ཐེན་གསུངས་མ་ཅ་ ན་ག་རྒྱུད་པ་གེ་ཨ་ཉི་ ཇི་གི་འཛམ་གླིང་ག་ སོ་ངོ་ཐམས་ཅན་ག་ བྱིན་རླབས་བི་ལེ་དག༌ཉི།

²⁶ ཨོ་ཉི་ཨ་དེན་གེ་ ན་ཧ་བ་ ངན་པ་ཨ་ལེ་ག་ ཐུབ་ཐ་ལེ་རིག་ཉི་ ན་ཧ་བྱིན་རླབས་བི་ལེ་དེན་གེ་ དཀོན་མཆོག་གི་ རོ་ཀ་གཡོག་པ་སིན་ཐཱན་ གོ་རང་ རོག་ན་ཧ་བཱརང་ཀ་ ཀུན་ཏིན་གནང༌མ༎