མཛད༌པ། 20 - Tshangla New Testament (BSI)

པ་ཝལ་མ༌ཀེ༌དོ༌ནི༌ཡ་དང་ གིརིས༌ག་བྱོན༌མ༌ལ།

¹ ཨོ་ཉ་ཇིཝ་ཆུམ་དེན་གེ་ པ་ཝལ་གི་དད་པ་ཨ་ཁཱན་བ་ རོག་ཆོ་ས་ག་རཱན་ཐཱན་ སེམས་གསོ་ཨ་ཝ༌ལ། ཨོ་ཉ་གེ་ རོ་ཀི་ཇང་དི་ཝ་ན་ཨ་ཉི་ གསུངས་ཐཱན་ མ་ཀེ་དོ་ནི་ཡ་ག་ཏཱན་ བྱོན་མ༌ལ།

² རོག་མ་ཀེ་དོ་ནི་ཡ་གེ་ ཤོ་ཉི་བྱོན་ཅ་ཨ་ཉི་ ལམ་ཁོན་ཆོ་ཁཱན་ ཁྲོམ་ཐམས་ཅན་ག་ དད་པ་ཨ་ཁཱན་བ་ཀ་ སེམས་གསོ་ཨ་ཉི་རང་ བྱོན་མ༌ལ། ཉི་ཤ་ དོང་གིརིས་ག་ཏཱན་ བྱོན་མ༌ལ།

³ རོག་གིརིས་ག་ ལ་ཉི་སམ་བཞུགས་པ༌ལ། ཉི་གེ་ རོག་གྲུ་ག་ནུབ་ཉི་ སི་རི་ཡ་ག་ཏཱན་ བྱོན་མེ་ག་ཅམ་ཅ་ཨ་ཉི་ ཡ་ཧུ་དི་པ་ཚེ་བང་གི་ རོ་ཀ་ཚེ་ག་དགྲ་ཨ་ཉི་ འཆར་གཞི་ཙ་མ་ག་ཀོར་གེ་ རོ་ཀི་མཁྱེན་མ༌ལ། ཨོ་ཉི་ཨ་དེན་གེ་ རོག་ལོག་ཉི་ མ་ཀེ་དོ་ནི་ཡ་གེ་ཨ་ཉི་ སི་རི་ཡ་ག་ཏཱན་ བྱོན་མེ་དག་ཉི་ ཐུགས་བསམ་གནང་མ༌ལ།

⁴ རོ་ཀ་ཞབས་ཏོག་ཞུ་ཉི་དི་ཁཱན་ སོ་ངོ་མང་པུ་ཐུར་ཆོ་ཝ༌ལ། ཁྲོམ་ཆེན་བེ་རི་ཡ་གེ་ པུ་རཱས་ག་ཟ་ སོ་པ་ཏྲོས་དག་ཁཱན་དང་ ཁྲོམ་ཆེན་ཐེ་ས་ལོ་ནི་ཀི་གེ་ ཨ་རིས་ཏར་ཁཱས་དང་ སི་ཀཱན་དཱས་དག་ཁཱན་ ཉི་དར་བི་གེ་ ག་ཡཱས་དག་ཁཱན་དང་ ས་ཆ་ཨེ་ཤི་ཡ་གེ་ ཏི་མོ་ཐི་དང་ཏུ་ཁི་ཀཱས་ ཉི་ཏྲོརོ་ཕི་མཱས་དག་ཁཱན་ གི་ཝ་ཆོ་ཝ༌ལ།

⁵ ཨོ་ཐ་སོ་ངོ་བ་ ཨ་ཧེ་གུམ་གུམ་དིན་ཐཱན་ ཏྲོ་ཨཱས་ག་ཤེག་པ་ ཨ་ཧ་དེན་གེ་ ནོང་ཉི་ཆོ་ཝ་ཆོ༌ཝ།

⁶ གོག་ཉི་དི་ཁཱན་ག་དུས་ཆེན་ ཆུམ་དེན་གེ་ ཨ་ཧ་བ་ ཕི་ལིབ་པི་གེ་ གྲུ་ག་ནུབ་ཉི་དི་ཉི་ ངམ་ལྔ་ག་ཚི་ངེ་ ཏྲོ་ཨཱས་ག་ཤེག་ཉི་ རོག་ཏེ་བ་རུ༌མ། ཉི་ཨའི་ཉ་ག་ ངམ་བི་ནང་ཟུམ་ཆོ༌ཝ།

⁷ ཧབ་ཏང་ག་གོ་ག་ནོང་ཀ་ གཙོ་བོ་ག་ཚོགས་ཞུ་ལེ་དེན་གེ་ ཨའི་ཐམས་ཅན་རང་ ཏབ་ཐུར་ཛོ་མ་ཆོ༌ཝ། ཉི་པ་ཝལ་ ནམ་ནིང་ད་བུ་ བྱོན་མེ་གི་ཝ་ཨ་དེན་གེ་ རོ་ཀི་སོ་ངོ་བ་ཀ་ བི་ནང་དོ་སག་པུ་རང་ ཆོས་བཤད་ཉི་གནང༌མ།

⁸ ཉི་ཨ་ཧ་བ་ཛོམ་ཁཱན་ ཕའི་ཐོ་ཀ་ ལ་ཝང་ མང་པུ་ཐོག་པ་ཆོ༌ཝ།

⁹ པ་ཝལ་གི་ གསུང་བཤད་པེ་གང་ཀ་ ཡུ་ཏྲི་ཀཱས་དག་ཁཱན་ ཡམ་ལང་ཤོ་ ཀོ་ཅུང་ཐུང་ཀ་ ལང་མ་ཆོ༌ཝ། ཉི་རོག་གནམ་མེད་ས་མེད་ མི་ནང་ཨོ་ཕེ་ཡང་ཉི་ ཇུ་ཀ་དག་པ་ཀབ་ཉི་ རོག་མི་ནང་ཤུག་ཐེ་ཉི་ ཕའི་ཐོག་སམ་གེ་ དོང་ར་ག་ཞུད་ཁེ༌ཝ། ཉི་རོག་ཏེ་བ་ཀི་ རོག་ག་དུང་ཉི་ གོད་པ་ཀབ་ཉི་ རོག་ཤི་ཝ་ཆོ༌ཝ།

¹⁰ པ་ཝལ་དོང་བྱོན་ཉི་ ཀུར་ཐཱན་ རོ་ཀ་ཕྱག་ཀི་ཨ་ཉི་ ཡུ་ཏྲི་ཀཱས་ག་དུང༌མ། ཉི་རོ་ཀི་གསུངས་མ་ སྡུག་བསྔལ་མ་ཨའི་ རོག་མ་ཤི་ཝ་ཅ་ཨ༌ཉི།

¹¹ ཉི་གེ་ པ་ཝལ་ལོག་ཉི་རང་ ཐོ་ཀ་བྱོན་ཐཱན་ གཙོ་བོ་ག་ཚོགས་གནང༌མ། ཉི་རོ་ཀི་ མིང་མ་ཏེག་པ་སག་པུ་ གསུང་བཤད་ཐཱན་ ཝུན་བེད་པེ་རང་ རོག་ཉ་གེ་བྱོན༌མ།

¹² ཉི་སློ་མ་བ་ཀི་ ཨོ་ཉ་ཡམ་ལང་ ལེག་པུ་ཨ་ཉི་རང་ ཕའི་ག་ནུང་མེ་རེ་བ་ཨ་དེན་གེ་ རོག་ཏེ་བ་ གནམ་མེད་ས་མེད་ ཤོ་ནང་ཕེ་ཝ༌ལ༎

པ་ཝལ་ཨེ༌ཕི༌སཱས༌ག་ སོ༌ངོ་ཆི༌ལུ༌བ་ཀབ༌ཉི་རུ༌མ༌ལ།

¹³ པ་ཝལ་དང་ཉི་ ཨས་སོས་ག་ཏཱན་བྱོན༌མ། ཉི་ཨས་སོས་ག་ ཨ་ཤི་རོག་མཇལ་བེ་ག་ ཁ་ཙི་ཐ་ཝ་དང་ཏུ་ཉི་ ཨའི་ཤོ་གྲུ་ག་ནུབ་ཉི་ རོ་ཀེ་གུམ་གུམ་དི༌ཝ།

¹⁴ ཨས་སོས་ག་ པ་ཝལ་དང་ཨའི་རུམ་ཉི་ ཉ་གེ་གྲུ་ག་ནུབ་ཉི་ ཁྲོམ་མི་ཏི་ལེ་ནེ་ག་ཏཱན་དི༌ཝ།

¹⁵ ནམ་ནིང་དག་པ་ཀབ་ཉི་ ཨ་ཤི་མཚོ་བར་ཀ་ས་ ཁི་ཡཱས་དག་ས་ག་ཤེག༌པ། ཉི་ཞིམ་རོང་དག་པ་ཀབ་ཉི་ མཚོ་བར་ཀ་ས་ ས་མོས་དག་ས་ག་ཤེག༌པ། ཉི་ཤིམ་རོང་དག་པ་ཀབ་ཉི་ ཨའི་མི་ལེ་ཏྲས་དག་ས་ག་ཤེག༌པ།

¹⁶ ས་ཆ་ཨེ་ཤི་ཡ་ག་ མང་པུ་བཞུགས་པེ་ག་ ཐུགས་བསམ་མ་ཝ་ཨ་དེན་གེ་ ཨོ་ཐ་ཤེག་པ་ པ་ཝལ་གི་ ཨེ་ཕི་སཱས་ག་ མ་ནོང་མ་ཨ་ཉི་ གྲོས་ཐག་ཆོད་པ་ཆོ༌ཝ། ཉི་རེན་ཐཱན་ཨ་ནེ་ལ་ པེན་ཏི་ཀོས་ག་དུས་ཆེན་ག་དེན་གེ་ ཡ་རུ་ཤ་ལེམ་ག་ ཕེབས་པེ་རེ་བ་ཨ་ཉི་ བྱོན་མེ་ག་ ཐུགས་བསམ་གནང་མ་ཨ་དེན་གེ་ བཱས་པ་ཆོ༌ཝ།

¹⁷ པ་ཝལ་གི་ མི་ལེ་ཏྲས་ག་ཕེབས་ཏེན་གེ་ ཨེ་ཕི་སཱས་ག་ ཆོས་ཚོགས་ག་ སོ་ངོ་ཆི་ལུ་བ་ ར་ལེ་ཀུན་ཏི་ཝ༌ལ།

¹⁸ རོག་ཏེ་བ་ ཤེག་ཏེན་གེ་ རོ་ཀི་གསུངས་མ་ལ་ ས་ཆ་ཨེ་ཤི་ཡ་ག་ ཇི་གི་ བི་ཏབ་ཏེན་ཐུར་གེ་ག་ཏཱན་ ཨོ་མ་སག་པུ་ ཧང་ཏེན་ཆོ་ཝ་གི་ལ་སྨོ་ ན་ཤི་སེན༌ཅ།

¹⁹ ཇི་གི་ཉམ་ཆུང་ཨ་ཉི་ ཉི་མིང་རི་ཤོ་ཉི་ གཙོ་བོ་ག་ཕྱག་ཞུ༌ཝ། ཡ་ཧུ་དི་པ་བ་ཀི་ ཇ་ག་དགྲ་ཨ་ཉི་ འཆར་གཞི་ཙ་མ་ཀབ་ཉི་བུ་ ཇང་ཐེས་ཉི་ཆོ༌ཝ།

²⁰ ཨོ་ཉེ་རང་གི་ནེ་བུ་ ན་ཧ་ཕཱན་མེ་ཆོ་ནེ་ལ་ ཇི་གི་ན་ཧ་མ་ཡེག་པཱན་ ཧང་རང་མ་ཐཱན་ཤི། སོ་ངོ་མང་ཀ་གུབ་ཀ་བུ་ གསུང་བཤད་ཉི་ཡེན་བི༌ཝ། ཉི་ན་ཧ་ཕའི་ཁོན་བུ་ ཨུ་ཉུ་ད་བུ་རང་ཨ༌ཝ།

²¹ ཇི་གི་ ཡ་ཧུ་དི་པ་དག་པེ་མ་ཝ་ གིརིག་དག་པེ་མ་ཝ་ ཐམས་ཅན་གི་རང་ སྡིག་པ་གེ་ལོག་ཉི་ དཀོན་མཆོག་ལོ་ཀ་ཏཱན་ གིར་ཐཱན་ ཨ་ཧ་གཙོ་བོ་ཡི་ཤུ་ག་ དད་པ་ཨའི་ཨ་ཉི་ཡེག༌པ།

²² དག་པ་ཀབ་ཉི་ ཨོམ་ ཇང་དམ་པའི་ཐུགས་ཉིད་ག་ བཀའ་དང་ཏུ་ཉི་ ཡ་རུ་ཤ་ལེམ་ག་ཏཱན་དིན༌ཅ། ཉི་ཡ་རུ་ཤ་ལེམ་ག་ ཇ་ག་ཐུང་ཀ་ ཧང་ཇུང་མེ་གི་ལ་སྨོ་ ཇི་གི་མ་སེ༌ལ།

²³ ཇང་བཙོན་ཁང་ག་ དི་ལེ་ཁེ༌ལེ། ཉི་ནང་དོག་པེ་ཁེ་ལེ་ཨ་ཉི་ ཁྲོམ་ཆེན་དྲང་རང་ དམ་པའི་ཐུགས་ཉིད་གི་ ཇ་ག་གསུངས་ཁཱན་ཤ་ ཇི་གི་སེན༌ཅ།

²⁴ ཇང་ཏེན་ག་ཚེ་ག་ཀོར་གེ་ ཇི་གི་ཧང་རང་མི་ལུ་མཱན༌ཅ། དག་པ་ཀབ་ཉི་ ཇ་ག་དེན་གེ་ ཨོ་ཉ་གེ་བུ་ལག་ཉི་ གཙོ་བོ་ཡི་ཤུ་གི་ གནང་ཁཱན་ལའི་ཁེ་པ་ འགྲུབ་ཕེ་ག་ ཁག་ཆི་ལུ་གི༌ལ། ཨུ་ཉུ་ལའི་ཤོ་ སོ་ངོ་བ་ཀ་ དཀོན་མཆོག་ག་ ཐུགས་རྗེ་ག་ཀོར་གེ་ འཐེན་ལེག་པུ་བཤད་པེ་ག་ ལའི་གི༌ལ།

²⁵ ཉི་ཨོམ་ ཇི་གི་ ན་ཧ་དཀོན་མཆོག་ག་ རྒྱལ་སྲིད་ག་ཀོར་གེ་ གསུང་བཤད་པ་གི༌ལ། ཉི་ན་ཧ་པོང་ཀེ་ ཐུར་གི་རང་ ཇང་ལོག་ཉི་ རུ་མེ་མར་བ་ཨ་ཉི་ ཇི་གི་སེན༌ཅ།

²⁶ ཨོ་ཉི་ཨ་དེན་གེ་ ཐི་ནོང་ ཇི་གི་ན་ཧ་ཡེག་ཅ་ སོ་ངོ་ཨི་བི་རང་གི་ནེ་བུ་ དམྱལ་བ་ག་དི་ནེ་ལ་ ཨོ་ཉ་སོ་ངོ་ག་རྩིས་ ཇི་གི་ཕུལ་བེ་ མ་ཁེ་ལ་ཨ༌ཉི།

²⁷ ཧང་ཡ་དག་ནེ་ལ་ ན་ཤི་སེན་ཆེན་ཨ་ཉི་ དཀོན་མཆོག་ག་ ཐུགས་བཞེད་ཆོ་ཁཱན་ ཐམས་ཅན་རང་ ཇི་གི་ན་ཧ་ཡེག༌པ།

²⁸ ཨོ་ཉི་ཨ་དེན་གེ་ ནའི་ཏེན་ག་དེན་གེ་དང་ དམ་པའི་ཐུགས་ཉིད་གི་ ན་ཧ་ཕརའ་ཁེ་ཐ་ཁཱན་ ཆུ་ག་ དེན་གེ་རིག་པ་སྒྲིམ༌ཅོ། ཡི་ཤུ་ག་ སྐུ་ཁྲག་གི་ངོ་ཁཱན་ དཀོན་མཆོག་ག་ ཆོས་ཚོགས་ག་དི་པ་ཨའི།

²⁹ ཇི་གི་སེན་ཅ་ ཇང་དི་དེན་གེ་ ཏེ་ངན་རོམ་ ན་ཧ་པོང་ཀ་ཤེག༌པེ། ཉི་རོག་ཏེ་བ་ཀི་ ཆོས་ཚོགས་ཐུབ་མ་ཐ༌ལ།

³⁰ ཉི་ན་ཧ་པོང་ཀེ་བུ་ ཚེ་བང་གི་ དེན་པ་འགྱུར་ཐཱན་ རོག་ཏེ་བ་ཀི་ ཡེ་ཝ་དང་ཏུ་ཉི་ སློ་མ་བ་ཀ་ ཨ་ལེ་བི་ཁཱན་ཤོ༌ལེ།

³¹ ཨོ་ཉི་ཨ་དེན་གེ་ ན་ཤི་སེམས་ཀ་ཐའི། ངམ་བི་ནང་མ་ཝ་ ཉིང་སམ་སག་པུ་ ཇི་གི་མིང་རི་ཤོ་ཉི་ ན་ཧ་ཡེ་ཉི་བི་ཝ༌ཅ།

³² ཉི་ཨོམ་ ཇི་གི་ནའི་ དཀོན་མཆོག་ཕྱག་ཀ་དང་ རོ་ཀ་གསུང་ག་ཐུགས་རྗེ་ག་ཕུལ༌ཅ། ཨོ་ཐ་ཐུགས་རྗེ་གི་ཨ་ཉི་ ནའི་ཟོག་པེ་བི༌ལེ། ཉི་དཀོན་མཆོག་ རོག་ཏེན་ག་དེན་གེ་ སོ་སུ་ཨ་ཉི་ སི་ཁཱན་བ་ཀ་གནང་ཁཱན་ བྱིན་རླབས་བུ་གནང༌མེ།

³³ ཇི་གི་ཧ་ལ་རང་གི་ནེ་བུ་ བཱརའ་ག་གསེར་དང་དངུལ་ ཉི་ཁ་མུང་ས་རི་ག་ ངེ་ཆཱད་པ་མཱན༌ཅ།

³⁴ ན་ཤི་ སེ་ཝ་གེ་ལག་ཏང་མཱན་ཅ་ ཇ་ག་ཨོ་ཐ་ ག་དང་གི་ ཇང་ཏེན་ག་དེན་གེ་ ལའི་ཨ་ཝ་མ་ཚཱད་པ་ ཇང་ཀབ་ཉི་ཆོ་ཁཱན་བ་བུ་ ཇ་ག་ཨོ་ཐ་ ག་དང་གི་ལའི་ཨ་ཉི་སིང༌མ།

³⁵ ཉི་ན་ཤི་དཀའ་ཝ་ཅཱད་ཉི་ ལའི་ཨ་ཉི་ དུག་པུ་སོ་ངོ་བ་ཀ་ ཧང་ཏེན་རུམ་པེ་གི་ལ་སྨོ་ ཨོ་ཉ་ཀོར་གེ་ ཇི་གི་ ན་ཧ་ཤེབ་མང་པུ་ཐུར་ དཔེ་གེན༌མ། གཙོ་བོ་ཡི་ཤུ་གི་ དོག་པ་གེ་ཏ་བི་ཝ་ག་ བྱིན་རླབས་མང་པུ་ཅ་ཨ་ཉི་ གསུངས་ཁཱན་ཡིད་ཀ་ཨའི།

³⁶ ཨོ་ཐ་བ་གསུངས་ཉི་ ཆུམ་དེན་གེ་ ཏོང་ཟིང་ས་ག་ཏེས་ཐཱན་ རོག་ཏེ་བ་ཀབ་ཉི་ སྨོན་ལམ་ཏ་པ༌ལ།

³⁷ ཉི་རོག་ཏེ་བ་ཀི་ པ་ཝལ་ག་ ཕང་མ་གེ་ལོམ་ཉི་ ལེག་པ་ཨ་ཉི་ བྱོན་ཤོ་དག་ཉི་ཞུན་ཐཱན་ རོག་ཏེ་བ་ ཐམས་ཅན་རང་གེ་ཕ༌ལ།

³⁸ ཙོ་ཙོ་རང་ པ་ཝལ་གི་ རོག་ཏེ་བ་ཀ་ ན་ཤི་ཇང་ལོག་ཉི་ ཧ་ལ་རང་མ་རུ་མ་ན་དག་ཉི་ གསུངས་མ་ཨ་དེན་གེ་ རོག་ཏེ་བ་ གནམ་མེད་ས་མེད་ ཤོ་ནང་མ་ཕེ་ཝ་ཨ་ཝ༌ལ། ཉི་གེ་ རོག་ཏེ་བ་ཀི་ དོང་གྲུ་ར་ག་སག་པུ་ པ་ཝལ་ག་ ཞབས་ཏོག་ཞུ་ཉི་ དི་ཝ༌ལ༎