མཛད༌པ། 2 - Tshangla New Testament (BSI)དམ་པའི་ཐུགས་ཉིད་བྱོན་མ༌ལ། 1 པེན་ཏི་ཀོས་ག་ནོང་ཀ་ དད་པ་ཨ་ཁཱན་བ་ ཐམས་ཅན་རང་ ཕའི་ཐུར་ག་ཏབ་ཐུར་ ཛོམ་ཉི་ཅ་གི་ཝ༌ལ། 2 ཡིད་ཀ་རྣམ་ཏོག་མ་ཝ་ རི་དི་ཤུག་ཨན་ ཨོ་ཕ་པུརུས་ཀིན་ཨ་ཉི་ ཞིང་ཁམས་གེ་དོང་ ཀཱན་ཐུར་ཨུ་ཉི་ རོག་ཏེ་བ་ ལང་ཉི་ཆོ་ཁཱན་ཕའི་ ཐམས་ཅན་རང་ ཨོ་ཉ་ཀཱན་གི་ཕུང་མ༌ལ། 3 ཉི་གེ་ རོག་ཏེ་བ་ཀི་ ལེ་ད་བུ་ཆོ་ཁཱན་ མི་ཐོང་མ༌ལ། ཉི་ཨོ་ཉ་མི་ བོང་ཉི་དིན་ཐཱན་ རོག་ཏེ་བ་ ཐམས་ཅན་ག་ཐུང་ཀ་ ཆག་པ༌ལ། 4 རོག་ཏེ་བ་ དམ་པའི་ཐུགས་ཉིད་གི་ ཕུང་མ༌ལ། ཉི་དམ་པའི་ཐུགས་ཉིད་གི་ དབང་ཚད་གནང་མ་དང་ཏུ་ཉི་ རོག་ཏེ་བ་ཀི་ བཱརའ་ལོ་སོ་སུ་བ་ ཕི་ལེ་གོ་ཙུག་པ༌ལ། 5 ཉི་ཨུ་ཉུ་གང་ཀ་ འཛམ་གླིང་ག་རྒྱལ་ཁབ་ ཐམས་ཅན་གེ་ཨུ་ཁཱན་ ཆོས་ཨ་ཁཱན་ ཡ་ཧུ་དི་པ་བ་ ཡ་རུ་ཤ་ལེམ་ག་ ཅ་གི་ཝ༌ལ། 6 ཉི་ཨོ་ཉ་ཀཱན་གི་ཨ་ཉི་ སོ་ངོ་མང་པུ་ཐུར་ ཏབ་ཐུར་ཛོ་མ༌ལ། དད་པ་ཨ་ཁཱན་ ཐམས་ཅན་གི་ རོག་ཏེ་བ་ཀ་ལོ་གེ་ཨ་ཉི་ ཆཱས་ཕི་ཝ་ག་གོད་ཉི་ རོག་ཏེ་བ་ གནམ་མེད་ས་མེད་ ཡིད་ཆི་ཝ༌ལ། 7 ཉི་རོག་ཏེ་བ་ ཡིད་ཆི་ཉི་ ཉི་གེ་ ཧ་ཆཱད་ཉི་ཡེག་པ་ལ་ ཨུ་ཐུ་ད་བུ་ ཆཱས་ཕི་ཁཱན་སོ་ངོ་བ་ ག་ལིལ་པ་བ་གི༌ལ། 8 དག་པ་ཀབ་ཉི་ རོག་ཏེ་བ་ཀི་ ཨའི་ཨའི་ཏེན་ག་ལོ་གེ་ཨ་ཉི་རང་ ཆཱས་ཕི་ཝ་ག་ ཨ་ཤི་ན་ཐ་ཁཱན་ཤོ་ ཧང་ཏེན་ཡ། 9 ཨའི་ཐ་ག་ པར་ཐི་གེ་ མ་དི་གེ་ ཨེ་ལ་མི་གེ་ མེ་སོ་པོ་ཏྲ་མི་ཡ་གེ་ ཡ་ཧུ་དི་ཡ་གེ་ ཀ་པ་དོ་ཀི་ཡ་གེ་ པོན་ཏྲས་གེ་ ཨེ་ཤི་ཡ་གེ་ 10 ཕིརི་གི་ཡ་གེ་ པམ་ཕི་ལི་ཡ་གེ་ ཨི་ཇིབ་གེ་ ཀུ་རེ་ནི་ག་ར་ག་ཆོ་ཁཱན་ ས་ཆ་ལི་བི་ཡ་གེ་ རོམ་གེ་ (ཡ་ཧུ་དི་པ་བ་དང་ ཡ་ཧུ་དི་པ་རི་ཁཱན༌བ།) 11 ཀེརེད་གེ་དང་ཨ་ར་བི་ཡ་གེ་ ཨུ་ཁཱན་བ༌ཅ། དག་པ་ཀབ་ཉི་ དཀོན་མཆོག་གི་མཛད་ཁཱན་ ཕྱག་ལཱ་ཆི་ལུ་བ་ཀ་ཀོར་གེ་ རོག་ཏེ་བ་ཀི་ ཨའི་ཏེན་ག་ལོ་གེ་ཨ་ཉི་ གསུངས་མ་ག་ ན་ཐ་ན་དག༌ཉི། 12 རོག་ཏེ་བ་ཧ་ཆཱད་ཉི་ ཧང་རང་ཨ་ལེ་ མ་སེ་ཝ་རི་ཝ༌ལ། ཉི་ཐུར་གི་ཐུར་ག་ ཇིམ་ཉི་རང་ཐ་ཝ་ལ་ ཨོ་ཐ་ག་དེན་ཐ་ ཧང་གི་ལ་ཡ་དག༌ཉི། 13 དག་པ་ཀབ་ཉི་ བཱརའ་སོ་ངོ་བ་ཀི་ དད་པ་ཨ་ཁཱན་བ་ཀ་ མེམ་ཅོར་ཉི་ ཨོ་ཐ་སོ་ངོ་བ་ ཞུ་སུང་ཁུ་ཝ་ལ་དག་ཉི་ ཡེག་པ༌ལ༎ པ་ཏྲུས་གི་གསུང་གནང་མ༌ལ། 14 དག་པ་ཀབ་ཉི་ པ་ཏྲུས་གི་ བཱརའ་སྐུ་ཚབ་སོང་ཐུར་ཀབ་ཉི་ ཐིང་ཐཱན་ གསུང་སྐད་ཆི་ལུ་ཨ་ཉི་ སོ་ངོ་མང་ཀ་ གསུངས་མེ་གོ་ཙུག་པ་ལ་ ཡ་ཧུ་དི་ཡ་ག་ སོ་ངོ་བ་དང་ ཡ་རུ་ཤ་ལེམ་ག་ཆོ་ཁཱན་ ནའི་སོ་ངོ་ཐམས་ཅན་རང་ ཇི་གི་ཡེ་ཁཱན་ག་ཉཱན་ཅོ་ ཉི་ཨོ་ཐ་ག་དེན་ཐ་ ཧང་གི་ལ་སྨོ་ ཇི་གི་ན་ཧ་ཡེག༌པེ། 15 ན་ཤི་མི་ཝ་ད་བུ་ ཨོ་ཐ་སོ་ངོ་བ་ ཞུ་སུང་ཁུ་ཝ་མང་གི། ཧང་ཡ་དག་ནེ་ལ་ ཨོ་མ་བེད་པུ་ག་ཆུ་ཚོད་ དགུ་ཤ་དུང་མ༌ལ། 16 ཞུ་སུང་ཁུ་ལེ་མང་གི་ཝ་ དང་པོ་ ལུང་བསྟན་པ་ ཡོ་ཨེལ་གི་ གསུངས་མ་ཅ་ 17 དུས་ཇུ་ཀ་དག་པ་ཀབ་ཉི་ ཇི་གི་ཨུ་ཐུ་ད་བུ་ ཨ་ལེ་དག་ཉི་ དཀོན་མཆོག་གི་གསུངས་ལ་ ཇི་གི་ ཇ་ག་ཐུགས་ཉིད་ སོ་ངོ་ཐམས་ཅན་ག་ ཐུང་ཀ་ལུག༌པེ། ཉི་ན་ཧ་ཟ་དང་ ཟ་མིན་བ་ཀི་ གསུང་བཤད༌པེ། ཉི་ན་ཧ་ཡམ་ལང་བ་ཀི་ མཇལ་ཁ་ཉོང༌པེ། ཉི་ན་ཧ་ལོ་ན་གཱན་ཁཱན་བ་ཀི་ མོང་ཤི་ཐོང༌མེ། 18 གི་ལ་ ཨོ་ཉ་དུས་ག་ ཇ་ག་ཕྱག་ཞུ་ཁཱན་ ཕེ་ཝག་ཙ་དག་པེ་མ་ཝ་ མེ་ཝག་ཙ་དག་པེ་མ་ཝ་ ཉིག་ཙིང་ག་རང་ ཇི་གི་ཇ་ག་ཐུགས་ཉིད་བི༌ལེ། ཉི་རོག་ཏེ་བ་ཀི་ ཇ་ག་གསུང་བཤད༌པེ། 19 ག་ངམ་ཐུང་ཀ་ ཇི་གི་རྫུ་འཕྲུལ་གེན༌མེ། ཉི་དོང་འཛམ་གླིང་ག་ ཇི་གི་ཡིད་ཆི་ཝ་ག་ ལའི་བ་ཨ༌ལེ། ཨུ་ཉུ་ཤོ་ ཞི་དང་མི་ ཉི་མུག་པ་ཐེད་པུ་གི༌ལ། 20 ངམ་མེར་བུ་རི༌ལེ། ཉི་ལ་ཉི་ངམ་ ཞི་ད་བུ་རང་ ཙ་ལུ་རི༌ལེ། ཨོ་ཐ་བ་ཤོ་ གཟི་བརྗིད་ཅན་དང་ ཤུགས་སྟོབས་ཆི་ལུ་ཆོ་ཁཱན་ གཙོ་བོ་ག་ནོང་ མ་ཤེག་པེ་གོ་མ་ཇུང༌མེ། 21 ཉི་ཨི་བི་གི་ གཙོ་བོ་ག་མཚན་ ཞུན་ཅ་གི་ལ་སྨོ་ ཨོ་ཉ་སོ་ངོ་གི་ ཐར་པ་ཉོང་པེ་ དག༌ཉི། 22 ཨིས་རེལ་ག་སོ་ངོ་བ་ ཨོ་ཐ་ཆཱས་ཉཱན་ཅོ་ ནཱས་རཱད་ག་ཡི་ཤུ་ཤོ་ དཀོན་མཆོག་གི་ ཀུན་ཏི་ཝ་གི་ལ་ཨ་ཉི་ ཁུངས་ཀེ་བེ་ག་དེན་གེ་ དཀོན་མཆོག་གི་ རོ་ཀ་ཐུང་ཀེ་ཨ་ཉི་ རྫུ་འཕྲུལ་བ་དང་ ཡིད་ཆི་ཝ་ག་ ཕྱག་ལཱ་བ་མཛད་ཉི་ ཉི་རྟགས་བ་གེན་ཉི་གནང༌མ། ཨོ་ཐ་བ་ ན་ཧ་པོང་ཀ་རང་ ཇུང་མ་ཨ་དེན་གེ་ ནའི་ནའི་ཏེན་གི་བུ་ ལེག་པཱན་རང་སེན༌ཅ། 23 དཀོན་མཆོག་གི་ གོ་མ་གེ་རང་ཙམ་ཁཱན་ རོ་ཀ་འཆར་གཞི་དང་ཏུ་ཉི་ ཡི་ཤུ་ ན་ཧ་ག་དང་ག་སྤྲོད་ཉི་ སོ་ངོ་ངན་པ་བ་ཀི་ཨ་ཉི་ ཁྲིམས་ཤིང་ཐུང་ཀ་ཇཱན་ཉི་ བཀྲོངས༌མ། 24 དག་པ་ཀབ་ཉི་ དཀོན་མཆོག་གི་ རོག་ཤི་སྲོག་ག་ དབང་གེ་ཐར་ཉི་ རོག་གཤགས་པ་གེ་ ལོག་ཉི་བཞེངས་གནང༌མ། ཧང་ཡ་དག་ནེ་ལ་ རོག་ཤོ་ ཤི་སྲོག་གི་ཙུང་ཉི་ ཐ་ལེ་མར༌བ། 25 ད་ཝུད་གི་ རོ་ཀ་ཀོར་གེ་ གསུངས་མ་ལ་ ཇི་གི་ཇ་ག་གཙོ་བོ་ ཧ་ལ་རང་གི་ནེ་བུ་ ཇང་ཀབ་ཉི་བཞུགས་པ་ག་ཐོང༌ཅ། རོག་ ཇ་ག་ལ་ཉོང་ལོ་ཀ་ བཞུགས་པ་ཨ་དེན་གེ་ ཇང་ཧང་གི་རང་ སིག་པེ་མར༌བ། 26 ཨོ་ཉི་ཨ་དེན་གེ་ ཇང་གནམ་མེད་ས་མེད་ ཧར་པ༌ཅ། ཉི་ཇང་ཤོ་ནང་ཕེ་ཉི་ ཆཱས་ཨན༌ཅ། ཉི་ཨོམ་ཆང་རང་ ཇ་ག་ལུས་པུ་གི་བུ་ རེ་ཆ་ཨ་ཉི་ཆོ༌ལེ། 27 ཧང་ཡ་དག་ནེ་ལ་ ནཱན་གི་ ཇ་ག་སྲོག་ ཤི་ས་ག་ཐུབ་མ་ཐ༌ལ། ཉི་ནཱན་གི་ ན་ག་དམ་པའི་སོ་ངོ་ དུར་ནང་ཀ་ཞིད་པེ་མ་བི༌ལ། 28 ནཱན་གི་ ཇ་ག་ཚེ་ག་རིག་ཁཱན་ ལམ་ག་བ་ གེན་གནང༌མ། ཉི་ན་ག་སྐུན་མདུན་ག་ ནཱན་གི་ ཇང་གནམ་མེད་ས་མེད་ ཤོ་ནང་ཕེ་ཝ་ཅོད་གནང་མེ་ དག༌ཉི། 29 ཡུང་ཟི་བ་ གནམ་མེད་ས་མེད་ མིང་གཏམ་ཆོ་ཁཱན་ ཨ་ཧ་དང་པོ་ག་ཕ་མ་ དཔོན་ད་ཝུད་ག་ཀོར་གེ་ ཇི་གི་ན་ཧ་ ན་སྒྲིང་སྒྲིང་ཨ་ཉི་ ཡེག་པེ་རེ་བེ་ རོག་ཤོ་ གཤགས་ཐཱན་ དུར་ག་ནང་ཀ་ཙུག༌པ། ཉི་རོ་ཀ་དུར་ཁེ་པ་ ཨོ་མ་བུ་ ཐ་ག་ཨའི་ཀབ་ཉི་རང༌ཅ། 30 རོག་ཤོ་ ལུང་བསྟན་པ་གི་ཝ་ཆོ༌ཝ། ཉི་དཀོན་མཆོག་གི་ རོ་ཀ་དབུ་མནའ་བཞེས་ཁཱན་ཁེ་པ་ རོ་ཀི་མཁྱེན་མ་ཆོ༌ཝ། ད་ཝུད་ག་རྒྱུད་པ་ཐུར་ རོག་པུརུས་ཀིན་ཨ་ཉི་རང་ དཔོན་ཅོད་གནང་མེ་དག་ཉི་ དཀོན་མཆོག་གི་ དབུ་མནའ་བཞེས་ཝ་ཆོ་ཝ༌ལ། 31 དཀོན་མཆོག་གི་ མ་འོངས་པ་ག་ ཧང་མཛད་པེ་གི་ལ་སྨོ་ ད་ཝུད་གི་མཁྱེན་ཉི་ ཁིརིས་གཤགས་པ་གེ་ གསོན་པོ་ཨ་ཉི་སྐུ་བཞེངས་པ་ཀོར་གེ་ ཨོ་ཐེན་གསུངས་མ་ཅ་ རོག་ཤོ་ ཤི་ས་ག་ཐུབ་མ་ཐ་ཝ༌ལ། ཉི་རོ་ཀ་སྐུ་ཕུང་ དུར་ནང་ཀ་མ་ཞིད་པ་ལ་དག༌ཉི། 32 དཀོན་མཆོག་གི་ ཨོ་ཐ་ཡི་ཤུ་གཤགས་པ་གེ་ ལོག་ཉི་སྐུ་བཞེངས་ཉི་གནང༌མ། ཉི་ཨའི་ཐམས་ཅན་རང་ ཨོ་ཐ་དེན་པ་ག་ འཛོམས་དཔང་གི༌ལ། 33 རོག་ཁེ་པ་ ག་དུང་ཉི་ རོ་ཀ་ཡབ་དཀོན་མཆོག་ག་ ལ་ཉོང་ལོ་ཀ་བཞུགས་པ༌ཅ། ཉི་ཨ་པ་གི་དབུ་མནའ་བཞེས་ཁཱན་ དམ་པའི་ཐུགས་ཉིད་ཁེ་པ་ རོ་ཀི་ཉོང་པ༌ལ། ཉི་ཨོ་མ་ ན་ཤི་ཐོང་ཁཱན་དང་ ན་ཐ་ཁཱན་ཤོ་ རོ་ཀི་ཨ་ཧ་གནང་ཁཱན་ སེ་རབ་གི༌ལ། 34-35 ཧང་ཡ་དག་ནེ་ལ་ ད་ཝུད་ ཞིང་ཁམས་ག་མ་བྱོན་ཤི། དག་པ་ཀབ་ཉི་ ལག་ཏང་ རོ་ཀི་ཨོ་ཐེན་གསུངས་མ་ཅ་ གཙོ་བོ་གི་ ཇ་ག་གཙོ་བོ་ག་ གསུངས་མ་ ན་ག་དགྲ་བྱང་ཕིཤི་བ་ ན་ག་བི་ཏཱན་ཨ་ཉི་ ན་ག་ཕརའ་ཁ་ མ་ཙུག་པ་སག་པུ་ ནཱན་ཇ་ག་ལ་ཉོང་ལོ་ཀ་ ལང་ཤོ་ དག༌ཉི། 36 ཨོ་ཉི་ཨ་དེན་གེ་ ཨིས་རེལ་ག་ སོ་ངོ་ཐམས་ཅན་གི་ ཏེན་ཏེན་ཨ་ཉི་ སེ་ལེ་ཁེ༌ལེ། ན་ཤི་ཁྲིམས་ཤིང་ཐུང་ཀ་ཇཱན་ཉི་ བཀྲོངས་ཁཱན་ ཨོ་ཐ་ཡི་ཤུ་ཁེ་པ་ དཀོན་མཆོག་གི་ གཙོ་བོ་དང་ ཁིརིས་ཅོད་གནང་མ་གི་ལ་ཨ༌ཉི། 37 སོ་ངོ་བ་ཀི་ པ་ཏྲུས་གི་གསུངས་མ་ག་ ན་ཐ་ལ་ཀབ་ཉི་ རོག་ཏེ་བ་ གནམ་མེད་ས་མེད་ སེམས་ཕམ་ཉི་ པ་ཏྲུས་དང་ བཱརའ་སྐུ་ཚབ་བ་ཀ་ ཇི་མ་ལ་ ཨ་ཤི་ཧང་ཨ་ལེ་ཁེ་ལེ་ཡ་ ཨ་ཏ་བ་དག༌ཉི། 38 པ་ཏྲུས་གི་ལན་གནང་ཉི་ གསུངས་མ་ལ་ སྡིག་པ་བཤགས་པ་ཉོང་ཉི་ དམ་པའི་ཐུགས་ཉིད་ ཉོང་པེ་དེན་གེ་ ནའི་ཐམས་ཅན་གི་ སྡིག་པ་གེ་ལོག་ཉི་ ཡི་ཤུ་ཁིརིས་ག་མཚན་ག་ ཁྲུས་གསོར་ཞུ་ལེ་ཁེ༌ལེ། 39 ཧང་ཡ་དག་ནེ་ལ་ དཀོན་མཆོག་གི་ དབུ་མནའ་བཞེས་ཁཱན་ཁེ་པ་ གཙོ་བོ་དཀོན་མཆོག་གི་ རོག་བཞུགས་ས་ག་ཏཱན་ར་ཁཱན་ ནའི་དང་ན་ཧ་ཝག་ཙ་བ་ ཉི་ལམ་ཐ་རིང་མུ་ག་ ཆོ་ཁཱན་བ་ཀ་དེན་གེ་གི་ལ་དག༌ཉི། 40 པ་ཏྲུས་གི་ བཱརའ་ཆཱས་མང་པུ་ཐུར་ག་ ཐུང་ཀེ་ཨ་ཉི་ རོག་ཏེ་བ་ཀ་ གསུངས་ཉི་གནང་མ༌ལ། ཉི་ཨོ་ཐེན་གསུངས་ཉི་ ཡེན་གནང་མ་ལ་ ཨོ་ཐ་སོ་ངོ་ ངན་པ་བ་ཀ་ཐུང་ཀ་ཨུ་ཁཱན་ ཁྲིམས་གེ་ ནའི་ནའི་ཏེན་གི་ དགོངས་ཡངས་ ཉོང་པེ་གོད་ཅོ་དག༌ཉི། 41 རོ་ཀི་བཤད་ཁཱན་གསུང་ག་ དད་པ་ཨ་ཁཱན་བ་ཀ་ ཁྲུས་གསོར་གནང་མ༌ལ། ཉི་ཨོ་ཉ་ནོང་ཀ་ སོ་ངོ་ 3000 ཕང་དབ་ཏུར་ རོག་ཏེ་བ་ཀ་ སྡེ་ཚན་ག་པོན་མ༌ལ༎ དད་པ་ཨ་ཁཱན་བ་ཀ་པོང་ཀ་ཆོས་གྲོགས། 42 རོག་ཏེ་བ་ སྐུ་ཚབ་བ་ཀེ་ལབ་ཉི་ ཆོས་གྲོགས་ཨ་ཉི་ ཀེབ་ཏང་བོང་ཉི་ ཉི་སྨོན་ལམ་ཞུ་ཉི་ཆོ་ཝ༌ལ། 43 སྐུ་ཚབ་བ་ཀ་ཐུང་ཀེ་ཨ་ཉི་ རྫུ་འཕྲུལ་དང་རྟགས་ མང་པུ་ཐུར་གེན་ཉི་ གནང་མ་ཨ་དེན་གེ་ སོ་ངོ་མང་པུ་ཐུར་ ཡོང་ཁེ་ཝ༌ལ། 44 དད་པ་ཨ་ཁཱན་བ་ ཐམས་ཅན་རང་ གནམ་མེད་ས་མེད་ཆམ་ཉི་ ཏབ་ཐུར་ག་ཆོ་ཝ༌ལ། ཉི་རོག་ཏེ་བ་ཀ་ རྒྱུ་ཅ་ལ་བ་ རོག་ཏེ་བ་ནང་དོ་ བོང་མ༌ལ། 45 ཉི་རོག་ཏེ་བ་ཀི་ རང་ཏེན་ག་ རྒྱུ་ཅ་ལ་བ་ཙོང་ཐཱན་ ཨི་བི་གི་ ཧང་ཏེ་ཧང་ཏེ་ ཚཱས་པ་ཅ་གི་ལ་སྨོ་ ཨུ་ཉུ་དང་ཏུ་ཉི་ བོང་བི་ཝ༌ལ། 46 རོག་ཏེ་བ་ ནོང་དྲང་རང་ མཆོད་ཁང་ག་ཏབ་ཐུར་ ཛོམ་ཅ་གི་ཝ༌ལ། ཉི་རོག་ཏེ་བ་ཀ་ཕའི་ཁོན་ ལྟོ་ཏབ་ཐུར་ཛོམ་ཉི་ ཟཱན་ཆོ་ཝ༌ལ། ཉི་ཤོ་ནང་ཕེ་ཉི་ སེམས་ཀེ་ཨ་ཉི་རང་བོང་ཉི་ རོག་ཏེ་བ་ ཏབ་ཐུར་ཟཱན་ཇམ་ཉི་ 47 དཀོན་མཆོག་ག་ བསྟོད་པ་ཕུལ་ཉི་ སོ་ངོ་ཐམས་ཅན་གི་ ལེག་པུ་ཡེག་ཁཱན་ག་ ཤོ་ནང་ཕེ་ཉི་ཆོ་ཝ༌ལ། ཉི་ཐར་པ་ཉོང་ཁཱན་བ་ ནོང་དྲང་རང་ གཙོ་བོ་གི་ རོག་ཏེ་བ་ཀ་ སྡེ་ཚན་ག་ཐུང་ཀ་ པོན་ཉི་གནང་མ༌ལ༎ |